Davlat tili talablari va ijro intizomiga rioya etish masalalari o‘rganildi

Boyovut tumani hokimligi tomonidan tasdiqlangan reja-jadval asosida tuman hududidagi korxona va tashkilotlarda davlat tili to‘g‘risidagi qonunchilik hujjatlari ijrosi, murojaatlar bilan ishlash hamda ijro intizomi holatini o‘rganishga qaratilgan navbatdagi monitoring tadbirlari o‘tkazildi.

O‘rganishlar davomida tashkilotlarda “Davlat tili haqida”gi Qonun talablariga rioya etilishi, xizmat hujjatlarining lotin yozuviga asoslangan o‘zbek alifbosida yuritilishi, jismoniy va yuridik shaxslarning murojaatlari bilan ishlash sifati hamda hujjatlar ijrosi holatiga alohida e’tibor qaratildi.

Shuningdek, ish yuritish madaniyatini takomillashtirish, ijro intizomini mustahkamlash va hujjatlar bilan ishlash samaradorligini oshirish yuzasidan tahlillar o‘tkazilib, aniqlangan kamchiliklarni bartaraf etish bo‘yicha mas’ullarga tegishli tavsiya va ko‘rsatmalar berildi.

Monitoring tadbirlari doirasida raqamli texnologiyalarni keng joriy etish, elektron davlat xizmatlaridan foydalanish ko‘lamini oshirish hamda aholining raqamli savodxonligini yuksaltirish masalalari ham muhokama qilindi. Xodimlarga elektron davlat xizmatlaridan foydalanishning afzalliklari, zamonaviy axborot texnologiyalari va sun’iy intellekt yo‘nalishidagi imkoniyatlar haqida tushuntirishlar berildi.

Yoshlar murojaatlari e’tibor markazida

Boyovut tumani prokurori Dilshod Babamuratov tomonidan Sohil mahallasida istiqomat qiluvchi 30 ga yaqin yoshlar bilan ochiq muloqot o‘tkazildi. Uchrashuv davomida yoshlarning bandlik, tadbirkorlik, ta’lim, kredit olish, kasb-hunar o‘rganish hamda boshqa ijtimoiy masalalar yuzasidan murojaat va takliflari tinglandi. Har bir murojaat atroflicha o‘rganilib, mavjud muammolarning yechimi bo‘yicha mas’ul tashkilotlar vakillariga tegishli topshiriqlar berildi.

Ochiq va samimiy ruhda kechgan muloqot davomida yoshlar tomonidan ilgari surilgan tashabbuslarni qo‘llab-quvvatlash, ularning bandligini ta’minlash hamda hayotda munosib o‘rin egallashlariga ko‘maklashish masalalariga alohida e’tibor qaratildi.