“Чет элда ишлаётган ҳар бир юртдошимиз оиласининг ризқи, фарзандлари келажаги учун тинимсиз меҳнат қилаётган ҳақиқий мард инсонлардир. Улар ҳам бизнинг фуқароларимиз, бизнинг фарзандларимиз. Қаерда ишлашидан қатъи назар, фуқароларимиз ҳуқуқини ҳимоя қилиш — давлатнинг доимий бурчи ва вазифаси”, — деди давлат раҳбари.

“Нимага бир ойда бир марта таҳлил қилмайсизлар? Ҳамма имкониятлар бор-ку, мигрантларга шароит яратиш бўйича элчиларни йиғиб гаплашмайсизларми” — дея ҳокимларга юзланди давлат раҳбари.

Давлат раҳбари хорижда қонуний меҳнат қилаётган фуқаролар солиқ билан бирга пенсия бадалларини ҳам тўлаётгани, аммо уларнинг иш стажини ватанга қайтгач ҳисобга олиш масаласи тўлиқ ҳал этилмаганига эътибор қаратди.

Бу йил Қирғизистон, Озарбайжон ва Туркия билан иш стажи ва пенсия ҳуқуқини ўзаро тан олиш бўйича битимлар имзоланган. Энди Германия, Россия, Япония, Корея, Болтиқбўйи ва Болқон давлатлари билан ҳам шундай келишувларга эришиш вазифаси қўйилди. Мутасаддиларга ушбу давлатлар билан музокараларни жадаллаштириб, йил якунига қадар аниқ натижага эришиш топширилди.

Ёшларни касб ва тилга тайёрлаш учун техникум биноларининг бир қисми бепул ижарага берилади.

Шунингдек, чет элдан жалб қилинган ўқитувчи ва экспертлар учун ижтимоий солиқ 1 фоиз этиб белгиланади, ўқув жараёни учун зарур ускуна ва жиҳозлар эса божхона божидан озод қилинади.

Эвазига хусусий бандлик агентликлари тўлиқ шаффоф тизимда ишлайди ва уларнинг рейтинги юритилади. Фуқаронинг аниқ ишга жойлашиши, ҳуқуқлари таъминланиши, юқори даромад топиши ва кафолатли ижтимоий таъминотга эга бўлиши асосий мезон бўлади.