Низомга кўра, профилактик эмлаш ҳудудда юқумли касаллик аниқланиб, у фаол тарқала бошлаган ёки аҳолининг муайян қатламлари юқтириш хавфи мавжуд бўлган ҳолатларда ўтказилади.

«Фуқаролар соғлиғини сақлаш тўғрисида»ги қонунга мувофиқ, профилактик эмлашни жорий этиш тўғрисидаги қарор бош давлат санитария врачи томонидан қабул қилинади.

Қарорда юқумли касаллик номи ва эмлашни жорий этиш асослари, унинг мақсади, эмлаш ўтказиладиган ҳудуд ва аҳоли гуруҳлари, қўлланиладиган вакцина тури, эмлашни бошлаш ва якунлаш санаси, шунингдек, жараённи ташкил этувчи тиббиёт муассасалари ҳамда санитария-эпидемиология органлари кўрсатилади.

Эмлаш жараёнида биринчи навбатда юқтириш ва инфекцияни атрофдагиларга тарқатиш хавфи юқори бўлган шахсларга устуворлик берилади.

Профилактик эмлаш учун фақат давлат рўйхатидан ўтган ва қўллашга рухсат этилган вакциналардан фойдаланишга йўл қўйилади.

Эмлашдан олдин фуқарога вакцина, унинг эҳтимолий реакциялари, кейинги тиббий кузатув тартиби ва эмлашдан бош тортишнинг ҳуқуқий оқибатлари ҳақида тўлиқ маълумот берилиши керак.

Эмланган ҳар бир шахс ҳақидаги маълумотлар Ягона тиббий ахборот тизимига киритилади.

Низом 2026 йил 10 сентябрдан кучга кирган.

Ўзбекистонда алимент миқдорини ҳисоблаш тартибини ўзгартириш таклиф этилмоқда. Бу ҳақда Сенатнинг 19-ялпи мажлисида Бош вазир ўринбосари — Оила ва хотин-қизлар қўмитаси раиси Дилноза Каттахонова маълум қилди.

Унинг айтишича, айрим ҳолатларда алимент миқдорини камайтириш учун шахслар ҳақиқий даромадини яшириб, ўзини кам маошли иш жойига расмийлаштираётгани кузатилмоқда. Шу боис ҳар бир боланинг ёш тоифаси бўйича минимал истеъмол саватини белгилаш ва алиментни ота ёки онанинг расмий маошидан эмас, боланинг эҳтиёжидан келиб чиқиб ҳисоблаш таклиф қилинди.

Шунингдек, алимент ундириш билан боғлиқ айрим жараёнларни хориж тажрибаси асосида босқичма-босқич хусусий секторга ўтказиш таклифи ҳам билдирилди. Ҳозирча бу таклифлар қонунчиликка киритиш учун муҳокама қилинмоқда.