🔵بعد ما رجعت من الشغل كده
قولت اما اتسلي شوية مع الذكاء الاصطناعي

ما في بشر كتير عندها قصور عقلي و قلة بديهة و جهل بتحتاج له

عاااادي
فقولت اما اسأله كده عن فوايد امتهان الدعارة

📌المفروض بقا انه يرد عليا ان الدعارة ملهاش فوايد
لااااا ده طلع لها فوايد ☝🏻☝🏻

📌 فقولت اسأله عن الست اللي اسمها چيلان قاسم دي
و النبي يا ولاد لقيته يعرفني اكتر من جوز اختي 😂😂😂

بس اللي لفت نظري ان چيلان قاسم الذكاء الرباني صححت للذكاء الاصطناعي معلومة 😎😎

بس طلع دمه شربات المضرووووب 😂😂

كم انتي راااائعة يا چاكوووو
حتي الذكاء الاصطناعي محتار قدامك

و ده لما احب اختصمه يوم القيامة
اخد من حسنات سوفت ويره 🤔
و لما ادعي عليه
اقوله روح الهي خوارزمياتك تتسلخ 🤔

اما تكبروا ابقوا تعالوا اقفوا قدام چيلان قاسم ... انما طول ما انتوا رقاصين
ف خدوا بفتوة الشيخ چيمناي و احترفوا الدعارة 😎😎😎

▪ و انت لما تحب تسكت واحدة ست منحازة للناس و بترزع للحكومة بسبب فسادها وفشلها ومش عارف تجيب انسان وااااحد يسكتها بالعلم .. تعمل اييييه 🤔
▪ ألم العيال المرتزقة اللي بأكلهم و اخليهم كلهم يهاجموها في وقت واحد و ينزلوا بوستات تشهير بيها في نفس التوقيت و نهش فيها عشان ابعد الناس عنها 👌🏻👌🏻
▪غشيييييييم ... ما كده الناس فهمت ان دي تعليمات و ان كلابك قبيضة يا جحش و انها هجمة مفتعلة
و الناس مبقتش اغبيا و هتتفهم بسرعة يا حمااااار 🤷🏻‍♀️🤷🏻‍♀️

🔵 انا مبقاش في حاجة بتفرحني الا الراجل ده و هاني سويلم و الاهلي برغم ضياع الدوري 🙄🙄

📌 عارف يعني ايه تفتح عينيك علي اعلان وزير البترول ان الوزارة صفرت مديونياتها
و دي اصلا اول مرة في تاريخها من يوم ما عملوها
هي اتعملت مديونة🙄

يعني نور ساطع في توقيت عتمة .. يعني في ناس بتنجح لأنها متخصصة و صاحبة علم و فاهمة مجالها .. يعني مش مستحيل نحافظ علي كرامتنا

كريم بدوي وزير يحقق النجاح من الانجازات .. اول واحد يعمل انجاز نجني ثماره .. زيه زي د.هاني و جني ثمار البحث العلمي في محصول القصب و القمح و البستانية👌🏻

🔸كريم بدوي قدر يحقق انجاز و يسدد مديونية و يرفع كفاءة العاملين في القطاع و كمان هيساعد في سداد عجز الموازنة و سداد الديون

ده النتيجة الحتمية للعالم المتخصص الوطني الشريف اللي عينيه مليانة و بوصلته بلده فقط

معنديش كلام غير اني ادعيلك من قلبي و الله
روح يا شيخ ربنا يحفظك و ينجيك و يعمي عيون العصابة عنك و يوفقك و يثبتك 🤲🏻🤲🏻

‏( عرفتوا مين اللي بيعرف يسدد ديون 👈🏻 المتخصص الفهمان .. مش شوية مرتزقة موعودين بمناصب برا 😒 ‏)

🔵 #متفرقات_اقتصادية:

🔷🔶 صفقة جبل الزيت :
ناخد بس شوية معلومات عن المحطة الاول :
▪مكان المحطة في البحر الاحمر " مش عند العاصمة الادراية خااااالص " هي عند راس غارب كمان و هو مجمع جبل الزيت 1 , 2 , 3
▪اعمال التخطيط و اقتراح اتفاقيات التمويل بدأت في سنة 7 مارس 2010 " ده اول تاريخ تم اقتراح فيه للمنطقة اصلا "
لكن مجرد تخطيط و فكرة و وقف عشان آليات التمويل
" لأن كان المقترح ان الحكومة المصرية تمولها مع بعض رجال الاعمال .. لكن المبلغ كان فوق طاقتهم و مقدروش 👌🏻"
▪في 2015 بدأت اعمال الانشاء و التركيب
▪تم الانتهاء منه و افتتاحه في 24 يوليو 2018
" يعني احنا بنستهلك منه بقالنا 8 سنين "
و تم تحديد عمر افتراضي للمحطة " توربينات و محولات و ما شابه "
من 20 ل 25 سنة
يعني ينتهي من 2038 ل 2043

لكن ده في حالة عدم الصيانة و الاحلال التكنولوجى و رفع الكفاءة الدوري

📌 نشوف تكلفة و تمويل المشروع :
🔹التضارب ما بين الرقمين 340 مليون دولار .. لا 575 مليون دولار المنتشر ده
هو لا هذا و لا ذاك
المشروع ده له جهات ممولة خارجية و داخلية
الجهات الخارجية :
عبارة عن قروض ميسرة و منح
" قرض ميسر يعني مدة سداده لا تقل عن 15 سنة من بعد بدء التشغيل "
اجمالي التمويل الخارجي ده 👈🏻 340 مليون يورو " يورو مش دولار " يعني بما يعادل وقتها 398 مليون دولار
توزيعتهم :
▪ في منحة غير مستردة من مفوضية الاتحاد الاوروبي ب 30 مليون يورو
▪بنك الاستثمار الاوروبي " EIB" مول ب 115 مليون يورو قرض ميسر
▪ بنك التنمية الالماني " KFW " "عشان في بنك المجموعة الالمانية للتنمية و ده حاجة تانية و ملناش معاه معاملات "
دفع شريحتين
شريحة في 2015 ب 72 مليون يورو
ثم شريحة تكميلية في نهاية 2017 ب 70 مليون يورو
▪الوكالة الفرنسية للتنمية 53 مليون يورو
كده اجمالي التمويل الخارجي 340 مليون يورو = 398 مليون دولار "

الجهات الداخلية :
تم تمويل بعض اعمال الانشاءات و ربط المحطات من مصر
الخزينة + صندوق تحيا مصر + البنوك المصرية
" معرفش ايه معلومة صندوق مصر السيادي دي .. الصندوق مكنش تم انشاءه اصلا وقت افتتاحها حتي 🤷🏻‍♀️🤷🏻‍♀️ "
كام التمويل ده 👈🏻 171 مليون دولار

يبقا اجمالي تمويل المحطة كاااام 👈🏻 569 مليون دولار
هناخد متوسط عمر افتراضي 22 سنة
يبقا تكلفة اهلاك السنة الواحدة👈🏻 تقريبا 26 مليون دولار
اضرب في 8 سنوات استهلاك مصري 👈🏻 207 مليون دولار تقريبا
اطرحهم من اجمالي التكلفة
هيطلعلك قيمة المحطة انهاردة
569 - 207 = 362 مليون دولار
ده حاجة اسمها القيمة الدفترية للمحطة

لكن انا لما ببيع .. بيتم البيع بالقيمة السوقية و ليست الدفترية
و ده اللي حددته الحكومة المصرية ب 420 مليون دولار

🔸 هل ده سعر عادل 🤔
لأ غير عادل بالمرة لو هتبيع
السعر السوقي للمحطة دي باعتبارها اكبر محطة طاقة كهربا بالرياح في شمال افريقيا و الشرق الاوسط كله
ما لا يقل عن 850 مليون دولار في ظل ازمات الطاقة المتكررة عالميا و قدرة المحطة علي التصدير

طب عشان نحل الاشكالية دي في فارق السعر 👈🏻 حق الادارة
يعني حق انتفاع
شركة ألكازار الاماراتية قالت 25 سنة ... الحكومة المصرية قالت من 20 ل 25 سنة
الورق نفسه مكتوب في ايه الله اعلم
بس ناخد انه 25 سنة
هو حق ادارة و تأجير و انتفاع شامل قيمته 420 مليون دولار 👌🏻👌🏻

♦هو احنا عندنا فائض كهربا طيب عشان نبيع محطة كهربا 🤔
لأ ما هو ده ضمنه الاتفاقية
ان المشتري لانتاج المحطة هو مصر
بقيمة 2.4 سنت لكل كيلو وات / ساعة
تكلفة انتاج الكيلو وات / ساعة كااااام 🤔
انا سألت 2 متخصصين الحقيقة لأن انا مفهمش في الموضوع ده .. وجايز احسب تكلفة تطلع غلط
ف الافضل ارجع للمختصين
و الاتنين اجمعوا ان تكلفة انتاج الكيلو وات / ساعة من محطات الرياح مش بيكون الا في تكلفة التشغيل و الصيانة لأن الوقود مجاني اللي هو الرياح
و التكلفة تتراوح بين 0.7 الي 0.8 سنت لكل كيلووات/ساعة 👌🏻

♦يعني هنا ألكازار هتاخد المحطة حق انتفاع بقيمة 420 مليون دولار
و تنتج الكهربا و مصر هي اللي تاخد الانتاج كله حاليا بقيمة 2.4 سنت كيلووات/ساعة

و سعر البيع للنوع ده من الكهربا بيتراوح دايما من 2.8 ل 3 سنت عالميا 👌🏻

♦طب احنا استفدنا ايه و الامارات استفادت ايه
ما كنا خليناها معانا ووفرنا فارق سعر التكلفة عن البيع :
🔹احنا استفادنا ايه :
▪حصلنا علي سيولة دولارية تتوجه لجبل الديون اللي علينا لان احنا معندناش سيولة تأمن احتياجاتنا الدولارية للديون خلال الربع الاول من الموازنة الجديدة
احنا عندنا يوم 6 او 8 يوليو القادم استحقاق جزء من سندات اليورو بوند بحوالي 1.45 مليار دولار

▪توفير تكلفة الصيانة
هي يعني تكلفة الصيانة ازمة اوي
بالنسبة لوضعنا ازمة
المحطة تكلفة صيانتها " حسب كلام المختص " 30 مليون دولار
و المفروض بتتعمل في السنة ال 7 و ال 14 و ال 21
ثم في ال 25 يتم رفع الكفاءة و الاحلال
احنا معملناش الصيانة بتاعت السنة السابعة دي لأن الصفقة كانت في طي التفاوض
دي حاجة اسمها الصيانة الشاملة .. غير الصيانة السنوية لمتابعة الكفاءة و الاداء 👌🏻
ف هو شايف انه وفر ال 30 مليون دولار بتوع الصيانة
و هيوفر علي نفسه الصيانة السنوية
و هيشتري طاقة نظيفة
" هل ده تفكير اقتصادي سليم 👈🏻 ااه لكن بشروط
- نقص العمالة اللي محتاجاها العين الاقتصادية
- رفاهية الدولة ماليا
لكن في حالتنا انت بتلجأ لكل الابواب الاقتصادية اللي تجيبلك دولار و بتحاول تصيغه و تكيفه علي قد ما تقدر وفقا لظروفك الاقتصادية "
▪و من مميزات التكيف ده ان الحكومة المصرية هتدفع تمن الكهربا بالدولار ااه لكن البنكنوت مصري
يعني دفع بالمصري ما يعادل الدولار
و ده هيوفر علينا توفير سيولة دولارية لأننا معندناش ازمة في السيولة النقدية للجنيه 👌🏻👌🏻

🔹الامارات استفادت ايه :
طبعا الترويج لأننا ضحكنا علي الامارات و الصندوق و البيضة و الحجر ده شغل هذيان
الحداية مبترميش كتاكيت زي ما بنقولوا

▪اولا : ألكازار اللي اشترت دي اشترت بالمقر بتاعها اللي في جزر ڤيرچن البريطانية
و اصلا هناك اكتر من شركة اماراتية وغير اماراتية لأن هناك مفيش ضرايب
يعني ألكازار مش هتدفع ضرايب علي نشاطها ده للحكومة الاماراتية
▪ثانيا :هتستفيد من عدم ازدواجية الضرايب بين مصر و الامارات وفقا للاتفاق التكميلي لبنود اتفاقية الضرائب بين مصر و الامارات اللي اتعمل في يناير 2024 " عشان صفقة رأس الحكمة "
يعني الامارات هتدفع لمصر ضريبة بسيطة اللي هي ضريبة الاستثمار عن صافي الارباح داخل مصر
لما تحول الارباح دي للشركة الام عشان ضريبة الدخل .. هتحولها ل جزر ڤيرجن اللي هي صفر ضرايب 🤷🏻‍♀️🤷🏻‍♀️
▪ثالثا : توسيع قاعدة مصادر الدخل بعيدا عن البترول و الغاز المستخرج من الدولة نفسها
" استثمارات متنوعة يعني "
▪رابعا : الكازار مش هتدفع المبلغ كله لوحدها
▪البنك الاوروبي لاعادة الاعمار و التنمية قام بتمويل الصفقة دي ب 140 مليون دولار
قرض طويل الاجل لدعم الاستحواذ و التطوير للشركة الحاصلة علي الصفقة

نركز في الكلام 👈🏻 140 مليون دولار لشركة ألكازار مش لمصر
علي 35 سنة 🙄

هو اصلا الحكومة الاماراتية بتملك 18% من اسهم البنك ده اساسا
يعني هيساووها مع بعضيهم 😒😒
▪شركة ألكازار دفعت ال 280 مليون دولار

📌معلش يا چيلان احنا ممكن نفهم ايه علاقة البنك الاوروبي لاعادة الاعمار ده بالموضوع 🤔

▪انت في مصر ملكش علاقة بيه .. يعني القرض ابو 140 مليون دولار ده بينه و بين ألكازار
▪طب دخل الموضوع ازاي 👈🏻 متنساش ان الصفقة دي ضمن برنامج الطروحات بتاع صندوق النقد
و صندوق النقد احيانا بيساعد الدول المديونة له انه يجيب لها مشترين لصفقات الطروحات
ف هنا ألكازار معندهاش الاستعداد انها تدفع المبلغ كله سيولة .. بيروح الصندوق يتوسطلها عند ممول اخر يساعد معاها
و هنا وقع الاختيار علي البنك الاوروبي لاعادة الاعمار انه يقرض ألكازار
في مقابل ان الصندوق بيخلص الصفقات دي بيحصل علي عمولات من جميع الاطراف
و ده عادي و متعارف عليه 🤷🏻‍♀️🤷🏻‍♀️
عشان كده بنقول ان الصندوق هو شريك في ادارة صفقات الطروحات ... محدش بيضحك عليه و لا زفت 😏😏

♦طب رأيك في الصفقة دي :
انا دافعت عن صفقتين .. و تجاهلت صفقتين
دافعت عن راس الحكمة الاماراتية و علم الروم القطرية " بالرغم من كراهيتي المعروفة لقطر .. لكن انا مش بشخصن الامور ابدااا و الا هيبقا جهل 🤷🏻‍♀️ "
لأن الاتنين حق انتفاع و الحكومة المصرية شريكة فيهم
و تجاهلت صفقتين رأس جميلة و رأس بيناس
لأني عمررررررري في حياتي ما هدافع عن بيع متر أرض
انا مش فلسطينية .. ومستحيل هدافع عن بيع ارض عشان اخفف عبء الموازنة
ما تولع الموازنة فوق دماغك
مشكلتك انك مش قادر تجيب ايرادات متحاسبش شعب عليها 🤷🏻‍♀️🤷🏻‍♀️

لذلك بما ان صفقة جبل الزيت انتفاع ف هي كويسة بالنسبة لظروفنا لكن بدون ظروف الديون و الاحتياج الدولاري
الاحتفاظ بيها كان افضل .. لكن انت لازم تعمل ده 👌🏻👌🏻

🔸مكنش في حلول تانية للموازنة 🤔
في ظل الفكر الموجود لأ
ده اسهل حل عندهم
بيع .. أجر .. اعمل حق انتفاع
انما المفروض ان ال 420 مليون دولار دول ملاليم تقدر تجيبهم في سنة لو حققت مستهدفات الانتاج و البيع و التصدير لزوربيح المصانع اللي تم افتتاحها في خلال ال 6 سنين الماضية 🤷🏻‍♀️🤷🏻‍♀️