📌 انجيلا ميركل صاحبة اقوي طفرة اقتصادية في العصر الحديث كان عندها مساعد و 2 مستشارين
📌 فلاديمير بوتين الرجل الاقوي عنده 4 مستشارين و 2 مساعدين
📌تشي شي بينج صاحب اقوي و اكبر فوائض في الحسابات التجارية و اكبر احتياطي نقدي و اكبر شبكة صادرات عنده 2 مستشارين و مساعد تنسيقي
📌مارجريت تاتشر المرأة الحديدية و الظابط اللي جندت ميخائيل جورباتشوف كان عندها مستشار و نائب
📌رئيس وزراء النرويج صاحب اكبر صندوق سيادي في العالم و اعلي رواتب و اكتر شعب مستقر اقتصاديا في العالم عنده 2 مستشارين
📌رئيس وزراء فنلندا اللي بقاله 4 سنين شعبه متصدر اسعد شعوب الارض و رقم 1 في جودة التعليم و رقم 1 في جودة الصحة و رقم 1 في انعدام الجريمة عنده 4 مستشارين و معندوش مساعدين
📌ترامب الرجل الشيطان معندوش مستشارين عنده 4 مبعوثين بيقوموا بالدور الاستشاري و التنسيقي
📌 شارل ديجول رجل فرنسا القوي كان عنده مستشار و مساعد

وزير دولة يعني مش وزير حقيبة
دستوريا 👈🏻وزير معني بمهمة ما ينتهي عمله بنهاية المهمة
معندوش موازنة مخصصة له و موازنته مصروف جيب من مصروفات رياسة الوزرا
معين بالمخالفة للدستور 8 مستشار و6 مساعد

ممكن تعرفونا علي انجازات سيادة الوزير طيب🤔

♦ الواد محمد ابن ابو سويلم ابو لسان زالف داير في الكفر يجول للناس ان سعادة الجناب بقبول تعيين 22 موششار لوزير الاعلام .. يبجا عدد الموششارين في حكومة سعادته 112 موششار
و عمال يلسن و يجول: و بيجيب لهم رواتب و مكافأت منيييين
و ايه لازمة الموششارين دولم و الوزرا دوكهم منيلين الدنيا و ملهمش انجازات

و بيجول و لما هو معاه فلوس كيده .. اومال رفض ليه يصرف ال 300 جنيه علاوة غلاء للغلابة.. وعايز يقلل وزن رغيف العيش ل 70 جرام.. و بيصرف لرائدات الارياف الارامل و المطلقات 310 جنيه راتب اعانة ميجيبوش كيلو لحمة
هو التقشف علي ام الشعب بس 🤔

🔹جولتله اسكت يالاااا .. هو انت مش عارف ان الچناب من ساعة نقل ال7 صلاحيات في 11 يوليو 2024 و هو بجا من صلاحياته تعيين الموششارين
و هو يعني بيعين زوربيح الموششارين دولهم ليييه .. ده عشان بيلبسوا كرافيتات و بدل و نتئمع بيهم كدا وسط الدول الرأسمالية 🤷🏻‍♀️ .. اوماااال 🤷🏻‍♀️

و بعدين انت مش فاهم دماغ الچناب زي الولية اللي اسمها چيلان قاسم دهي ..اااه
الچناب مبيصرفش علاوة غلاء خايف الفلوس تجري في ايد الشعب يقوم ينحرف
و بيخفض وزن الرغيف عشان الشعب يبقا سيمباتيك

و يجعلووو عامر
✍🏻فلاح كفر الهنادوة

🔵 و هكذا انتهت المباراة بفوز الشعب المصري فوز سحيق بركلات الترجيح .. بعد اداء رجولي من كافة اطيافه و تلاحم بين الدفاع و الهجوم

و كان في حراسة المرمي الجيش المصري العظيم ... الذي لم و لن يتخاذل عن صون الارض و العرض دوما

و انتهت المباراة بإقصاء اذناب الماسونية الصهيونية في تاريخ لن ينسونه ابدااا 30 يونيو 2013

#حراس_أرض_الاله 🇪🇬🇪🇬🇪🇬

هي من قديم الازل كده 👈🏻 يا احنا يا احنا 🤷🏻‍♀️🤷🏻‍♀️

🔵 #الچوكر_الجديد:
مساء الخير عليكم جميعا

صحيت من النوم الصبح علي 👈🏻 مطاريد الاخوان زي محما ناصر كناريا .. و معتز مطر صاحب اكبر فرق شعر ملزوق بالچل في التاريخ
بيهاجموا وزير الصناعة مهندس خالد هاشم و بيقولوا عليه " امنعوا الضحك 😂 " .. صهيوني و امريكي 🤔🤔

📌 في الاول استغربت
و بعدين و انا في الطريق للشغل بقا .. ذاكرتي بعتت لي اجزاء من مذكرات چاك بيتون " رأفت الهجان "

لما ايهاب نافع الله يرحمه " و اللي ميعرفش ايهاب نافع ظابط مخابرات و التمثيل ده ال cover " بتاعه
بترتيب الجهاز اتجوز فالتراود بيتون " فراو هجان - هيلين " ... عشان يتولي ادارة شركة السياحة سي تورز قبل ما الحكومة الاسرائيلية تحط ايدها علي فروعها

لما رجعوا مصر .. جاب معاه مجموعة مذكرات متفرقة كتبها رفعت الجمال بنفسه

و منها فترة احباطه بعد النكسة و رغبته في عدم الاستمرار و قراره بالبقاء في مصر

و لكن اللي خلاه يرجع عن قراره
انه لما قعد يتمشي في مصر و يزور محافظاتها و قرايبه و اصدقاءه .. اتفاجئ بنهضة صناعية بتحصل في البلد
و مصانع تم تشييدها بالفعل
و جيش عمال الساعة 6 الصبح واقفين علي محطات الاتوبيس مستعدين لبدء معركتهم اليومية مع بناء المستقبل

قال انه راح زيارة لصديق قديم له في منطقة حلوان .. و شاف مجمع الحديد و الصلب في التبين
مكنش مصدق انه عملاق كده
و صديقه قاله ان الانتاج مبقاش يتوقف مم ساعة تشغيل الفرن التاني في سنة 1960
و ان الطفرة في السكك الحديد المصرية احد اسبابها المصنع ده " اللي قعدوا يطفوا افرانه 18 سنننننة .. يقتلوه بالبطئ عشان يأمنوا فلوس المستر المستخبية في بيزنس احمد عز 😏 .. كنت بتابع قتله بدموع عينيا اقسم بالله ربنا المنتقم 😒
ما بلاش نكش في خلق الله يا چيلان
ميغمضليش عييييين إلا اما اسرسب بلوة صغنتوتة كده 🙈 "

المهم
رفعت الجمال في مذكراته قال : انا كنت مفكر ان شبكة علاقاتي في الحكومة الاسرائيلية بتبالغ في تخوفها من نهضة مصر الصناعية
و ان مقالات الجرايد عن عبد الناصر و رغبته في تشييد قلاعات صناعية في مصر .. ده هيدعم مصر اقتصاديا و هيوفر لها سيولة توفر لها القدرة علي زيادة التسليح
و كانوا بيقولوا ان الصناعة لما تنهض في مصر .. هتشكل خطر علي امن اسرائيل 👌🏻👌🏻 " عبد الناصر الخالد ابو خالد العظيم بين الرجال ❤❤

مذكرات رفعت الجمال نشرها ايهاب نافع
لكن معرفش ليه معدتش موجودة
اتمني القائمين علي الامر يعيدوا نشرها و نشر مذكرات اشرف مروان
فيهم تفسيرات كتير لوقائع بتحصل دلوقت 👌🏻👌🏻

♦ واحنا متفقين ان الاخوان ذراع من اذرع اييييه يا ولااااد 👈🏻 الصهيونية
برافو 10 من 10 ونجمة
ف لما ينظموا ضده افتراءات
يبقا دي تعليمات
و التعليمات دي بناءا علي تخوفات
ان م. خالد هاشم يطلع صادق في طموحه و يوطن في مصر صناعات تحويلية و يرحمنا من تصنيعة العويل اللي اسمها تجميع
" انا من مدرسة اقتصادية بتعتبر التجميع صناعة العويل ... لو مكنتش المكنة تطلع قمااااش قدامي مبعتمدهاش صناعة 🤷🏻‍♀️🤷🏻‍♀️ "

ف قولت اما اتعرف اكتر علي الوزير
و اشوف هو مين

و اذ بي اتفاجئ بإنه حفيد واحد من افضل الشخصيات الوطنية لقلبي
و من اجدر الشخصيات المصرية في القرن العشرين
رجل الازمات الصعبة علي باشا ماهر 👌🏻👌🏻

و انا شخص مبيحبش حد من فراغ
و خصوصا لو في فترة الاحتلال الانجليزي و الملك

🔘 تعالوا بقا اعرفكم علي اسرة سيادة الوزير :
محمد باشا ماهر جد والده كان وزير الحربية
الاتنين الابناء
واحد برع سياسيا 👈🏻 علي ماهر
واحد برع اقتصاديا 👈🏻 احمد ماهر " و انا علي خلاف مع جزء من فكر احمد ماهر 👌🏻 "

🔸ليه علي ماهر رجل الازمات :
لانه اتولي رئاسة الوزارة في 4 فترات عصيبة ... كان الجميع بيتخلي فيها عن المنصب و بيرفض تشكيل الوزارة
📌 اول مرة لما مات الملك فؤاد و الحكم هيؤول لفاروق
في ظل صراعات عائلية
و بشوات كتير نطوا من المركب
و حسوا ان شويكار زوجة فؤاد الاولي و اخوها احمد سيف الدين بيخططوا لفوضي

ظهر علي ماهر و تولي رئاسة الوزرا
و كانت مهمته الحفاظ علي الانتقال السلمي للحكم ... ومنع شويكار انها تجيب والي تركي 👌🏻

📌 تاني مرة :بعد الحرب العالمية التانية سنة 1939
و البشوات كانوا خايفين من الانجليز
اللي عايزين يجمعوا جيش من السخرة المصريين و يزجوا بيهم في الحرب لجانب بريطانيا
ظهر تاني علي ماهر و اتولي رئاسة الوزرا
و اعلن حاجة اسمها 👈🏻 قانون الحياد للجيش المصري و مفاده تجنيب دخول الجيش المصري للدفاع عن بريطانيا ضد الالمان ... و عدم تجنيد دفعات جديدة من الشباب المصري

و هنا بقا ظهرت عداوة الاحتلال له
اللي أدت بعد كده لضغط علي الملك انه يقيله من وظيفته
و فيما بعد تم اعتقاله بعد ما الانجليز كشفوا علاقته بعزيز باشا المصري
و دعمه له ومجموعات الفدائيين ضد الانجليز ... و كمان تسهيله لتهريب عزيز المصري بطيارة عسكرية
و تم اعتقالهم مع بعض
و اعتبروه خاين للملك و للصديقة بريطانيا 😏😏

📌 تالت مرة : وزارة الرماد
بعد ما الاخوان حرقوا القاهرة يناير 52
البلد كلها كانت شايطة
و محدش رضي يفضل في منصبه
هاتووووووا علي ماهر
و بالفعل
جه علي ماهر
و قدر يحتوي الموقف
و يصرف تعويضات للمصريين
و يصدر تعليماته بتعقب الارهابيين اللي حرقوها
علي ماهر كان محبوب عند المصريين
" كل من يكرهه الاحتلال هو حبيب للمصريين 👌🏻 "
📌 رابع مرة : و دي بقا المفاجأة :
لما حصلت ثورة يوليو
واحتاجوا تشكيل وزارة
علي ماهر وافق و انضم لرغبة الشعب
و تولي الوزارة
" لكن خلافه مع عبد الناصر في قانون الاصلاح الزراعي و مماطلته في تنفيذه .. خلاه استقال
بردو هو من البشوات و مش سهلة عليه يجزرهم 🙄 "
لكنه تولي خروج فاروق بمنتهي السلمية
و تولي التفاهمات الخارجية لتأمين اسرة فاروق في الخارج

" مننساش ان البشوات محدش فيهم وقف جنب الثورة الي 4 و لا 5
منهم علي ماهر ... و دي زادت رصيده عند الناس و فضلوا يحبوه و يحترموه 👌🏻"

تخيل بقا ان الراجل السياسي البارع ده و الدبلوماسي الوطني الشعبوي
له انجازات اقتصادية 🤷🏻‍♀️🤷🏻‍♀️
و كل حاجة عملها علي ماهر هي العكس تماما لما يحدث الان 😏

📌 تخيل يا عزيزي ان علي ماهر كان عنده تارجت 👈🏻 تمصير الاقتصاد " الحد من النفوذ الاجنبي و استقلال الاقتصاد المصري"
و عشان كده انشأ وزارة الشئون الاجتماعية

لحصر القوي العاملة من المصريين
و قاد بنفسه مفاوضات تعيين المصريين في الاغلبية الوظيفية بدل الاجانب

📌 تخيل يا عزيزي ان علي ماهر هو اللي نفذ فكرة خزان اسوان سنة 1939
و اللي كانت مرمية عند شمشرجية الملك فؤاد الاول من سنة 1923

📌 تخيل يا عزيزي ان لما المودعين سحبوا اموالهم من بنك مصر بعد اندلاع الحرب العالمية التانية
و بنك مصر كان هينهار
اصدر علي ماهر قانونين
▪ قانون ضمان الحكومة لودائع البنك
▪ قانون دعم الشركات الوطنية اللي هتحط فلوس و ودايع في بنك مصر تحصل علي اعفاء ضريبي بنسبة 8%
راحت الشركات سحبت اموالها من مصارف الانجليز و دعمت الموقف المالي لبنك مصر

📌 تخيل يا عزيزي ان قانون السخرة اللي وضعه الانجليز من ايام حفر قناة السويس
لغاه علي ماهر
و اصدر قانون العقوبات علي من يستمر في فرض العمل الاجباري علي المصريين

📌 تخيل انه حل التضخم بعد الحرب العالمية التانية بدون اعباء فوايد و لا ديون و لااااا سحب الكاش من الناس
بحاجة بسيطة 👈🏻 فرض التسعيرة الجبرية علي سلع الارز و الزيوت و 6 محاصيل زراعية ... و اصدر قانون عقوبات للمتلاعبين بالسوق
فقدر يتحكم في غلاء الاسعار
و ينهي التضخم 🤷🏻‍♀️🤷🏻‍♀️

علي ماهر كان رجل وطني ... محب لمصر
لمصر الارض و الشعب
مش مصر الملك و الحاشية
وقدم كل الدعم لعزيز باشا المصري اللي هو الاب الروحي للظباط الاحرار
و مفرقش معاه ان نجاح الحركة معناها الاطاحة بالحاشية و البشوات
عشان كان عنده هدف اسمي 👈🏻 انقاذ مصر من الاحتلال البريطاني و استقلالها 👌🏻

🔷🔶 نيجي بقا لاحمد ماهر :
ونشوف مين اللي اغتال احمد ماهر 🤔

هنلاقي اللي اغتاله التنظيم السري للاخوان
ايووووون .. محمود العيسوي اااه كان من شباب الحزب الوطني
لكنه كان جاسوس علي الحزب لحساب التنظيم السري للاخوان " التنظيم السري ده اللي هو الجناح المسلح .. الارهابيين يعني "

و ده مش كلامي
ده شهادة الشيخ حسن الباقوري رحمه الله
و اللي قال عنه ان عنده اعترافات بخط ايد زمايله التائبين في التنظيم
عن كل شباب التنظيم الشباب السري
اللي كان في الاصل بيمولهم الاحتلال الانجليزي 🤷🏻‍♀️🤷🏻‍♀️

📌 ليه انا بختلف مع احمد ماهر :
لانه حسب حسبة غلط
و اخوه علي ماهر كمان بيختلف معاه
انه اعتقد ان انضمام مصر للحرب بجانب بريطانيا .. ممكن يؤهلها للحصول علي مقعد في الامم المتحدة
و ده يديها الحق في طلب الاستقلال

لكن هي حسبة غلط
لأن الامم المتحدة كان بيقودها بريطانيا نفسها " عصبة الامم "

🔹طب تقولي ما ده سبب اغتياله 🤔
الوطنيين اغتالوه عشان عايز يورط الجيش المصري في الحرب

اقولك وطنيين ميييين
الوطنية يا عزيزي هي سلاح الانتماء الذي يملكه للفقراء
اما ثروات ومقدرات الوطن للاثرياء
شعارات الوطنية بيستخدمها اللصوص و المنتفعين ... عشان يقنعوا الفقراء ان الصبر علي الفقر و التكيف مع الجوع هو وطنية
عشان يوعدوهم بقصورهم في الجنة
اللي هتعوض تشريدهم في الدنيا 😏😏