🔘 سنة 1994 مبارك فوض القضاء لفرض الحراسة علي نقابة المهندسين
لحمايتها من مجلس الادارة الاخواني
و منع اخونتها
" هي كده كده متأخونة .. و كانت هندسة اسكندرية هي ابتلاء الجامعة في استقطاب و تجنيد الشباب للجماعة و هندسة عين شمس و الزقازيق كمان "

📌 لكن مع صدور الحكم
بقا مفيش قرار و لا انضمام و لا اجتماع بيحصل بدون الحارس القضائي

و لا تبرعات لغزة و لا للصومال و لا النصب اللي عمله علينا الاخوان ده

و كانوا دائمي الشغب و التظاهر
و تكسير النقابة وشغل بلطجة كده

📌 في 2011 و بعد مجلس الشعب الاخواني ما اتقيف
اصدروا تشريع رفع الحراسات القضائية عن النقابة
و اتسلمت بقا للاخوان رسمي

📌و في 2013 بلطجوا علي المهندسين و رفضوا سحب الثقة منهم
و النقابة اتقفلت امنيا في اغسطس و اتظاهروا بعد فض رابعة و اتعصموا جوا النقابة و ليلة كبيرة

♦في الدستور و القانون المصري الخاص بتنظيم عمل النقابات 👈🏻 لااااا يجوز تقييد غير المصريين بالنقابات

🔹جينا في يوليو 2017
وحصل تعديل في القانون بخصوص النقابات العمالية
و تم السماح بتقييد العمالة غير المصرية في النقابات
" و معرفش ليه .. يعني ايه السبب اللي يخلي نقابة مصرية تسمح بتقييد غير مصريين 🤷🏻‍♀️"

لكن تم الثبات علي ان النقابات الاخري كالاطباء و المهندسين و الصيادلة
بعدم الجواز الدستوري و القانوني بتقييد غير المصريين فيها
الا بشرط ان تكون الدولة الام لذلك المهندس تقبل تقييد المصريين فيها
و ان يكون خريج الجامعات المصرية

🔸امبارح بقا نقابة المهندسين قررت تدوس علي الدستور و القانون بالجزمة
" و ده عادي في مصر .. مصر مفيهاش جهة بتحترم الدستور و لا بتحافظ عليه اساسا 🤷🏻‍♀️ "

قررت تقييد المهندسين الفلسطينيين خريجي الجامعات و المعاهد المصرية دون شرط الاقامة السابقة
فقط يسددوا الرسوم اللي هي 10000 جنيه تقريبا

و بالتالي هيستخرجوا كارنيه نقابة
و بناءا علي الكارنيه تصريح عمل
و بناءا علي التصريح ده هياخدوا اقامة عمل سارية 🤷🏻‍♀️🤷🏻‍♀️

🔹طب هل توافر اصلا شرط تقييد المهندسين المصريين في نقابة فلسطين 🤔
اصلا نقابة المهندسين اللي موجودة في القدس الغربية .. تحت اشراف اسرائيلي
و الاتحاد العام لرعاية مهندسي فلسطين في الداخل و الخارج قفلته اسرائيل بعد احداث اكتوبر 🤷🏻‍♀️🤷🏻‍♀️
طب ليه يعني ياخدوا الاستثناء ده
و الفلسطينيين اصلا بيفضلوا الوفود للهندسات المصرية من قديم الازل
يعني هنلاقي زوربيح فلسطينيين بيتم تقييدهم رغما عن أنفنا و أنف اللي جابونا كمان 🤷🏻‍♀️🤷🏻‍♀️

التهجير و التوطين ماشي زي السكينة في الجاتووووه
لا في احترام لقوانين
و لا في احترام لدستور
و لا حتي في اعتبار لمصطلحات تصفية القضية و الخروج من الارض و الكلام ده
هو مصر هتلبس الفلسطينيين يعني هتلبسهم
بالنقابات بقا .. بالمنح الدراسية .. بالتواجد للعلاج .. بالاسري المبعدين اللي منورنا هما و عائلاتهم 👌🏻👌🏻

و دي مش هتكون اول نقابة و ب رهان 👌🏻

🔵 الدكتور رضا عبد السلام نائب مجلس الشعب
عامل فيديو علي قناته الرسمية بعنوان " اين نواب مجلس الشعب من القرارات الحكومية "

و الحقيقة انا اكتفيت بالعنوان و مدخلتش الفيديو حرصا علي سلامي النفسي الممزق 🤷🏻‍♀️🤷🏻‍♀️

📌 سيادة النائب الموقر
السؤال ده تسأله واحدة زي .. مفيش في ايديها غير النضال علي صفحات الميديا .. كشف الفساد و مناهضته .. فضح كوارث الحكومة

لكن ازاي و انت النائب تسأل السؤال ده
ما انت معاهم كل يوم
ما تسألهم هما فين من قرارات الحكومة
▪حضرتك فتحت ملف حق الاجيال في ثروات مصر المنتهكة
ثم 🤔
عملت ايه 🤔
هل كملت علي الملف الهام ده
ابدااا 🤷🏻‍♀️🤷🏻‍♀️
ليه محاولتش تجمع بعض الاعضاء و تفتحوا الملف الهام ده و تصدروا له تشريعات تحمي الاجيال اللي هتتولد عليها ديون اكتر من عمرها 🤷🏻‍♀️
▪لما جالكم الحساب الختامي للدولة و لقيتوا فيه 1.3 تريليون جنيه سرقات و اهدار مال عام
منسحبتوش ليه من جلسات المناقشة و انتظرتوا لما مستقبل وطن اخد قراره في مستقبلنا اننا تمام معندناش مانع في السرقة و الهدر
هما قسموا مع بعض و اخدوا نصيبهم .. انا گ مواطن اتسرقت و حقي انك كنت تجيبلي حقي 🤷🏻‍♀️
▪اتسرق من حضرتك مسودة مناقشة قانون
حضرتك قولت بعظمة لسانك " روحت اشرب يا ريس رجعت ملقتش شنطتي و لا اوراقي "
علي طريقة عبعال و سكينة في المسرحية : اللله .. هو انا نايم چنب مرتي و لا في محطة مصر .. آني اتجلبببت 😒😒
اتقلبت يا سيادة النائب
و عملت ايه بعدها
" الفيديو عندي علي فكرة "

ده غيض من فيض
يا سيادة النائب بتطلع تشتكي همك للمواطن .. و المواطن هيعملك ايه
ده نفسه يشتكيلك همه
خلاااص بقا
ادخل في الصف
و ارفع ايديك و حسبن معانا و خلاص 🤷🏻‍♀️🤷🏻‍♀️

📌 انت و كام نائب الواحد لا يشكك في نزاهتهم و نظافة ايديهم
بس انت بتتسائل هما جايبننا ليه

انا اجاوبك بإجابة قاسية جدااا

زمان لما عبد الناصر حكم لغي رخصة البغاء
و بقا قلم الاداب بيطارد الشقق المشبوهة
و كان معروف ان في عمارات كاملة في كلود بك و عابدين دي مهنتها
عشان يهربوا من مطاردة القانون لهم ... فضوا كام شقة
و أجروهم لدكاترة يعملوهم عيادات و لا لمهندسين يعملوها مكاتب او محامين
و اليفط كبييييرة و واخدة وجهة العمارة

ف عسكري الدورية لما يشوف الناس داخلة خارجة علي العمارة .. و يلاقي اليفط الضخمة متعلقة
ميشكش ان ده بيت العواهر

يعني القواد اللي بيدير العمارة كان بيجيب ناس محترمة .. يغسل بيهل سمعة العمارة
و يهرب من الملاحقة القانونية
و بيكون معظمهم من الارياف .. فميعرفوش تاريخ العمارة و اللي بيحصل فيها

🔹ليه بقا تم السماح بدخول نواب بدون دفع الرشوة ال 70 مليون جنيه و ال 100 مليون جنيه
زي رضا عبد السلام و احمد البرلسي و سلاف درويش و ايريني سمير و اميرة ابو شقة و ايهاب منصور و فريد البياضي و ضياء الدين داوود و محمد عبد العليم

عشان يغسلوا بحضراتكم فسادهم
و يقنعوا صاحب النظارة السوداء ان البلد فيها معارضة
عددكم 37 نائب من 596 صحيح
يعني حتي سياسيا مصنفة نسبة مجحفة
لكن اهو معارضة
مكملتوش 10% من البرلمان .. لكن اهو معارضة

يا دكتور رضا انتوا اللي تقدروا تعملوا كتلة برلمانية .. اكيد في عدد اكبر محتاج فقط من يستدعي وطنيته
حضرتك اللي بتسحب الثقة من الحكومة مش انا
حضرتك اللي بتحاسب الحكومة مش انا
حضرتك اللي مر من تحت دقنك قانون تملك الاجانب و بيع الجنسية مش انا
حضرتك اللي مر علي مرأي و مسمع منك موازنة مفلسة للدولة وسكتت مش انا

انا مجرد مواطن
حتة مواطن
اللاجئ احسن مني و انت عاجز عن حمايتي .. المستثمر بياخد دعم بالشوال و انت عاجز انك تحافظلي علي فتافيت الدعم

جي انهاردة تسألني انا النواب فين

انا بقا اللي بسألك
▪كل الفساد اللي بيعدي من تحت ايديكم في مجلس الشعب ده .. بيعدي ازااااي
▪القروض اللي كل يوم تعتمدوها مش بتقفوا للجنة الاقتصادية و توقفوها ليه
و اما بتعتمدوها بتعرفوا راحت فين و لا دوركم انتهي بهز الراس
▪المليار و 14 مليون جنيه اللي اتسرقوا من فلوس المعاشات في نصباية السيستم
و اللي صرح بالرقم النائب احمد البرلسي مع المذيع عمرو حافظ علي قناة الشمس و الفيديو معايا
عملتوا فيهم ايه
سكتوا علي سرقة فلوس كبار السن ليه
مليار جنيه بيعمل بيهم سيستم
ليييييه سيستم البنتاجون 🤷🏻‍♀️🤷🏻‍♀️
▪ اخبار رواتب مستشارين رياسة الوزرا اللي رواتب بتوصل 400 الف جنيه ايييه
مش انتوا اللي اثارتوا الموضوع ده في البرلمان ... النائبة سولاف درويش و تضامنتوا معاها

علي فكرة مش احنا بس المستباحين ... لو حسبتوها يا نواب البرلمان المعترضين
انتوا مستباحين اكتر مننا
لأن انتوا اللي معاكم حصانة و في ايديكم الحل و الربط

كل الملفات اللي بتفتحوها بتعملوا زي مطلقي ال fire works ... هااا شوفتونا و احنا و بنتكلم
اااه شوفناكم
و شوفناكم و انتوا كلامكم بيترمي في الباسكت بردو 😏

بتطلعوا تولوا علي اليوتيوب وعلي قناة الشمس القناة الوحيدة اللي بتستضيفكم
باقي القنوات بتستضيف نواب العصابة

و احنا بنولول علي السوشيال
ثم ماذا 🤷🏻‍♀️🤷🏻‍♀️

و الله رأي گ مواطنة مصرية منتخبتش حد فيكم و لا نزلت انتخابات الفساد و الرشوة اصلا .. بس اعتبروه نصيحة
اذا لم تستطع مقاومة الفساد .. فحاول الاستمتاع يا سيادة النائب بقا

الفساد نوع من انواع هتك عرض الدولة بالمناسبة

متسألناش احنا تعملوا ايه .. و احنا مالنا 🤷🏻‍♀️🤷🏻‍♀️

يا اخي سعد زغلول كان بيجمع توقيعات من خصومه
مصطفي النحاس كان بيعمل كتلة برلمانية من الوفديين و التيار المستقل
ما تتحركوا زيهم

استفادت انا ايه گ مواطن من ظهوركم في البرامج و مداخلتكم .. ما عندكم قبة برلمانية اقلبوا الدنيا تحتها
و هتلاقوا شعب يقف وراكم

ملكوش صوت و لا وزن و وجودكم ديكوري و بيتقطع عليكم المايك من مهندس عملية توريث جمال مبارك سابقا 😎
امشوا
سيبهالهم و امشوا
انما الحقيقة احنا گشعب محتاجين حد يمعلشنا ... مش هنقدروا نمعلشوكم
يا ريت العين فيها دموع 🤷🏻‍♀️🤷🏻‍♀️

ان شاء الله اما نلاقي مدير فني اجنبي يجي يمعلشنا .. هنبقا نبعتولكم العنوان 😒😒

🔵 5 طن مساعدات مصرية تشمل ادوية و مواد إعاشة لمتضرري الزلزال في فنزويلا 🙄

فرجوا مالي .. وزعوووه وزعوووه😂😂

احنا بنبعت مساعدات لفنزويلا اللي هي تحت الاحتلال الامريكي و اللي ترامب حلبهم في 200 مليون برميل نفط لحد انهاردة
ومعبرهمش في الزلزال .. شوية مساعدات و دمتم

📌ايه بقا اللي بيربطنا بفنزويلا المحتلة حاليا.. بنخفف مصاريف عن العم ترامب عشان وراه جمعيات مثلا🤔
طب قبل كده كانت علاقتنا كويسة بمادورو .. دلوقت بنبعت مساعدات من باب اننا بنود الجماعة علي ما ربنا يفك حبس ابوهم و سألوا علي عيالي في حبستي 🤔
شوفت انا الاستاذ محمود ياسين كان زعلان من المعلم العقاد عشان مزارش عياله في حبسته🤔

ااحييييه لا تكون المساعدات دي طلعت تحت بند المؤلفة قلوبهم 😳

لا في سبب سياسي لان دي دولة محتلة عشان بتوع دي سياسة.عووووليا مينبحوش بس
و لا في سبب اقتصادي
يعني مبستوردش منهم مشبك غسيل لأنهم عليهم حصار
و لا هما غزة اللذة اللي لها حق في ديب فريزر المصريين عافية كده

ف ليه بقا🤔
عندنا فوائض 🤔
يعني خيركم .. خيركم لأهله

ولاااا يهمكم .. فرجوا مالي وزعوووه 🤷🏻‍♀️🤷🏻‍♀️
اقسم بالله العظيم ان احافظ مخلصا علي الكوكب كله و الكواكب المجاورة 👌🏻

🔵 سنة 2003 الاستثمار في قطاع البترول و الطاقة في مصر حب يتوسع
راح صادر قرار جمهوري بتأسيس شركات استثمارات في الطاقة خارج مصر

وزارة البترول اخدت بعضها و طلعت علي الاردن
اسست الشركة المصرية الاردنية للغاز " فجر " داخل الاردن لدعم الطاقة هناك و لتسهيل مد خطوط مشروع الخط العربي " كان مشروع ووقف .. و في 2021 الرئيس السيسي كان بيتكلم في احياءه .. بس مصطفي مدبولي له رأي تاني مش هيحيي حاجة 😒"

راس مال مملوك لمصر بنسبة 100%
" بنك الاستثمار القومي .. انبي .. بتروجيت .. شركات الغاز في وزارة البترول نفسها زي ايجاس و جاسكو .. وزارة المالية "

📌الشركة دي هي المسئولة عن تغذية الكهربا في الاردن
لها عقود ثابتة مع شركة الكهرباء الوطنية الاردنية .. و مع المصانع
ارباحها السنوية حوالي 65 مليون دولار بتدخل لحساب مصر

الحكومة المصرية القذرة بتاعتنا
هتبيع الشركة دي لحكومة الاردن
عايزين يبيعوا ب 450 مليون دولار
و الاردن بتفاصل عارضة 350 مليون دولار بس

الاردن هتقترض 200 مليون دولار و تسحب من الموارد الداخلية 150 مليون دولار
عشان تستحوذ علي الشركة
و تملك الشركة بالكامل و تحتفظ بكامل الارباح .. لأن الحكومة الاردنية بتاخد الرسوم وعمولات العقود الاجلة فقط بينما مصر بتاخد الارباح كاملة 🤷🏻‍♀️🤷🏻‍♀️

مصر بقا تحتفظ بالاصل المربح ده
ابداااا ... لازم نخرب بيت ام الشعب و نبيعوه اللي وراه و اللي قدامه و نفقروا ام اللي خلفته 👌🏻👌🏻

هتبيع الشركة عشان محتاجة سيولة دولارية عشان دعم تخفيف عبء الديون
عشان احنا مطلوب مننا 10.5 مليار دولار بنهاية سبتمبر 2026 ديوووون
اخدنا من الاتحاد الاوروبي 1.5 مليار و فشخنا الشعب في زيادة كهربا و شوية و البنزين هيحصلهم عشان شريحة 1.8 مليار

و بتفاوض عشان اخلص في بنك القاهرة و المشتري بيتنك علينا و مش عاجبه

اما اقوم بقا اشوف شوية اصول ابيعهم
فيبيعوا الشركة اللي اتعملت من 23 سنة و كان في شركات عملت اكتتاب عشان تجمع قيمة مساهمتها ... يعني اتعملت بفلوس الشعب 🤷🏻‍♀️🤷🏻‍♀️

ال 450 مليون دولار = ارباح الشركة دي في 7 سنين
انا بقا عشان مديون لطوب الارض بمليارات عبثية
بخسر ارباحها للابد
عشان اسدد الديون 🤷🏻‍♀️🤷🏻‍♀️

ربنا ينتقم منكم
و يورينا فيكم نهاية شارون
و لو ان شارون السفاح الجزار كان مخلص لشعبه و ارضه و مفرطش في ذرة تخص شعبه و ارتكب مجازر من اجل وطن صنعوه من الاحتلال

هتبيعوا فجر يا ظلمممة
ده المصريين عملوا احتفالات يوم افتتاحها

ده مش تخارج لحساب القطاع الخاص
ده بيع اصل من اصول الدولة مملوك للشركات الحكومية و البنوك الحكومية المملوكين للشعب

هاااا عامل حسابك في عمولات و رشاوي قد ايه يا مدبولي باشا 🤔
اصل القيمة السوقية للشركة حاليا بظروف انهاردة 👈🏻 565 مليون دولار

اخدت رأي محمود محي الدين و انت قاعد معاه من يومين العمولات تتقيف ازاي
ما هووو برنس في الموضوع ده و خبرة قديمة 🤷🏻‍♀️🤷🏻‍♀️

هيدورا علي الحاجات اللي من ايام الانجليز اللي المصريين ميعرفوش عنها حاجة و يبيعوها

سيادة الرئيس قبل ما توقع علي الصفقة دي ابقا فكر 5 دقايق بس 👈🏻 هي كده متبقاش كشفت ضهرها 🤔🤔

🔹 في انتظار بوستات التعري"ض" بتاعت اصل الاردن هتصرف عليها صيانة
و الشركة محتاجة صيانة واحنا موازنتنا مفيهاش دولارات للصيانة " زي جبل الزيت كده "

بس معلش بقا 👈🏻 صافي ارباح الشركة 67.5 مليون دولار
بعد خصم تكاليف التشغيل و الصيانة 👌🏻👌🏻
شوفوا تعري"ض"ة تانية عشان دي هتقلش منكم 🙄🙄

🔵 #الكماشة_والطموح:

في شوية تفاصيل كده محتاجين تتربط مع بعضها
▪ليه ترامب مستقتل علي ان السعودية تدخل اتفاقية ابراهام
▪محاولات الضغط علي السعودية
▪الفشل السعودي في اليمن
▪زيارة الزيدي رئيس وزراء العراق لامريكا .. وضربة عسكرية مرتقبة للاراضي السعودية

📌 اولا : ليه اتفاقية ابراهام مشروطة بالسعودية حاليا :
خلينا نتفق من البداية ان اساس وجود الدين الابراهيمي هو القضاء علي المسيحية و الاسلام .. ليتسيد اليهود علي العالم
و مش المقصود باليهود هنا يهود سيدنا موسي .. لا لا خالص دول خلصوا معدش لهم وجود
مقصود الصهيونية الماسونية المختبأة خلف قناع يهودية موسي و هارون 👌🏻

في اوروبا مش محتاجين يثبتوا وجود آثار خاصة بهم لأن اوروبا مش قارة استدلال بالاركيولوجي

انما في منطقة زي منطقتنا
اثبات وجودك في مكان هو الاثر اللي تركته فيه

كمان المنطقة العربية هي مهبط الانبياء " اهتم شوية بالتفصيلة دي "

🔹دخول الدين الابراهيمي للسعودية كده كده هيأثر علي الاسلام
لانه هيأثر علي واحدة من اهم شعائر الاسلام 👈🏻 الحج
و شعيرة بيسعي لها كل المسلمين 👈🏻 العمرة
▪التطبيع : هيدخل الشركات الاسرائيلية الي السعودية
و ده بالنسبة لهم حلم كبير
اولا : هيسيطروا علي مجال البناء التشييد و المقاولات
و ده فلوس و ارباح كبيرة
ثانيا : هيقدروا يغيروا من تركيب المدينة ومكة كما يشاؤوا لاخفاء اثار معينة و اظهار اخري

و هما لهم ناس بالفعل جوا السعودية قدرت شوية تلعب في التركيبة دي
يعني مثلا بيت السيدة خديجة رضي الله عنها اللي دخل في التوسعة و اتبني فوقه " اعزكم الله حمامات 😒" .. بيت سيدنا ابو بكر الصديق اللي بعد اكتشافه راحوا طمسوه و اتبني فوقه فندق هيلتون مكة " ابراج مكة "
دار الارقم بن ابي الارقم اتمحت و دخلت في توسعة الصفا و المروة
دار سفيان بن ابي حرب دخلت بردو في التوسعة

طيب انت نسفت كل ده ودخلتهم في التوسعة
و اما الناس اعترضت علي هدم دار ابي بكر طلعت بفتوي ان تم طمسها حتي لا يتخذها المسلمون دار عبادة
" انا معرفش احنا امتي سجدنا لأبي بكر .. بس تمام السعوديين هللوا و شكروهم كمان "

احتفظت بإيه بقا 👈🏻 حصن كعب ابن الاشرف زعيم يهود بني النضير
وعملت حواليه سياج
و بقا مزار سياحي
كل بيوت الصحابة اللي حوالين حصن كعب بن الاشرف و الملاصقة له .. دخلت في التوسعة
ما عدا ده .. الدنيا وسعت بقا و مبقوش محتاجينه 🙄

الموضوع ده مخدش زخم اعلامي و لا ناس انتبهت له
لكن اما كنت في العمرة معداش عليا و متقبلتش فكرة اقامة " حمامات " فوق بيت السيدة خديجة
و لو اتكلمت يقولك يا اخي هاذي مرافق عامة لخدمة الحجيج و مكتبة 😒

ربطت الموضوع ده بشوية تفاصيل في عقلي
▪في تيار اللي بيقولوا علي نفسهم تنويرين
بيشككوا في حاجات كتير زي ان مفيش قرآن نزل في مكة و لا المدينة و ان القرآن كتاب تم تدوينه في الشام
و ان سيدنا محمد صلي الله عليه و سلم لم يتواجد في مكة ابدا .. وان مدعي النبوة في مكة اسمه قثم و هو من اليهود
▪التشكيك بالاسراء و المعراج
" خد بالك ان ايمانك بالمعجزات هو جزء من ايمانك بالدين عشان مدخلش في مناهدات مع المستشرقين دوت كوم بالله 😏"
▪التشكيك حول مكان غزوة احد و ان احد مش المقصود بيه جبل احد اللي في مكة
▪زعماء المدينة او سادة قريش هم يهود و المدينة يهودية
بدليييييل 👈🏻 الاثار الموجودة اثار اليهود اهي قدامكم
ازاي يبقوا سادة و اثارهم مش موجودة 🤷🏻‍♀️🤷🏻‍♀️

مع الوقت و الايام و استمرار ترويج الاكاذيب و استخدام اللي بيقولوا علي نفسهم مفكرين تنويرين امثال فراس سواح اللي اقنع اتباعه بعدم وجود نبي اسمه محمد من الاساس و بالتالي الاسلام صناعة بشرية ومعاه ماحد خزعل و كل الممولين دول
هيطلع اليهود مستقبلا بسردية عدم وجود اسلام لعدم وجود ما يدل عليه 🤷🏻‍♀️🤷🏻‍♀️
" و بلاش حميتك گ مسلم تخدك في اتجاه لاااا ازااااي مش هيقدروا .. لو اهالينا كانوا عرفوا ان في حاجة اسمها شات چي بي تي هيتعمل نبي و مقدس و البشر هتتحول لبقر و تلغي عقلها و تلجأ له في كل كبيرة و صغيرة مكنوش خلفونا وكنا ارتحنا 😏"

وطبعا بالنسبة للمسيحية
هما شغالين علي الفاتيكان زي الفل و بروتستانتية امريكا و انجيلية بريطانيا يفدوا اسرائيل بأرواحهم 🤷🏻‍♀️🤷🏻‍♀️
الصهيوانجيلية الامريكية اصلا صنعت من اجل تسخير المسيحية لخدمة السردية اليهودية 👌🏻
🔹طب لما انتهي من الديانتين و اختزلهم في ديانة
اللي هي الابراهيمية
و ارجع بعد كده اقولك دي مش ديانة .. ده مجرد فلسفة حياة و دستور انساني للتعايش و السلام
احنا مش محتاجين دين عشان ينظم حياتنا

فتبدأ تستغني عن الدين " احنا هنكون موتنا و بقينا تراب بتكلم عن الاجيال القادمة "
▪و اجي ادرسلك ان الصراعات و الحروب اللي فاتت تاريخيا كان سببها الاديان اللي اندثرت و انهينا وجودها عشان نعيشوا في سلام
▪يبقا مين سبب الحروب و الكراهية و الدم👈🏻 صاحب الاديان
الاله اللي الاديان دي تحدثت باسمه
هل انت تصدق ان في اله يعمل كل ده .. ويكون اله مستحق العبادة
اكيد لااااء 🤷🏻‍♀️🤷🏻‍♀️
لكن احنا صنعنا السلام و النور للعالم ب اله آخر 👈🏻 اله النور

المجئ التاني للمسيح بينتظره المسيحيين .. و احنا منتظرين المهدي و المسيح
عشان ينتهي الزمان الحالي بكل معطياته و يبدأ زمان اخر

لكن دوووول منتظرين تسيد سيدهم علي الكون
لاتمام الوعد 👈🏻 " و عزتك لأغوينهم أجمعين "

🔸 خد بالك ان الماسون معدوش بيتخفوا زي زمان
و الاماكن اللي بتدخلها اسرائيل سياسيا بعملاءها .. المحافل فيها بتاخد شكل علني
يعني بغض النظر عن محفل اسرائيل
المحفل الماسوني اللبناني بقا مؤسسة رسمية معترف بيها و بيمارس طقوسه و ممارساته و اجتماعاته و تم الاعتراف بأحقيته في التمويل و بقا حسابه اللي بيجي عليه تمويل المحفل المبير في اسكتلندا حساب عادي في البنوك و غير خفي 🤷🏻‍♀️🤷🏻‍♀️

ومنخرط بقا في الاعمال الخيرية
و اللبنانيين مبسوطين بيه اخر انبساط 🙄
" لولا جهل الشعوب و تعمد الحكام تجهيل الشعوب عشان يحافظوا علي كراسيهم و يورثوا ابناءهم الحكم .. عمر الناس دي ما كانت هتقدر تنجح
لكن بيحكموا السيطرة علي عقل الحكام و يوعزوا لهم بأنظمة تعليمية متخلفة عقليا تخرج جهلة و بيقنعوهم ان الجاهل يسهل استعباده
المتعلم ثائر و لا يقبل بالعبودية تحت اي راية .... لذلك كل المنطقة لم تخرج الا جهلة بكل شئ إلا من رحم ربي و المتعلم الثائر بيكفروه زي الامام محمد عبده و الامام الغزالي و القطيع المغيب يسير في طريق الظلمة ب اسم التدين 🤷🏻‍♀️🤷🏻‍♀️"

المهم 👈🏻 لأنك عشان تقدر تخفي اثار وجود الاسلام لازم تدخل السعودية
ف اخواننا البعد مستقتلين علي التطبيع مع السعودية
تارة بالترغيب و اخري بالترهيب
و ده ينقلنا للنقطة التانية 👇🏻

📌ثانيا : محاولات الضغط علي السعودية :
السعودية حاليا واقفة في مفترق طرق
اما الزعامة
و اما استمرار التبعية الامريكية
و اعتقد انه عرف كويس ان امريكا باعته ... و الا كانت نجدته من الضربات اللي بيتلقاها ليل و نهار 🤷🏻‍♀️🤷🏻‍♀️
▪تراجع السعودية عن استكمال بعض المشروعات من انجح القرارات اللي اخدها بن سلمان
ان مشروع مش مرجو منه تغطية تمويله و نفقاته يبقا يقف بدل ما اقترض و يبقا المشروع فاشل و اتورط في الديون
ف كان قرار شجاع جدااا
و اللي اشار عليه بيه منتهي الانتماء و الولاء لوطنهم
لأن ادوات الدين اللي كان هيلجأ لها معظمها امريكي
و ده ممكن يفتح الباب لاستيلاء امريكا عليهم فيما بعد و ميبقاش استفاد حاجة بل اتورط في قروض 👌🏻👌🏻
ده بردو مؤشر علي عدم الثقة في استمرارية التبعية الامريكية " اصل هو مش تحالف .. التحالف ده بين قوتين متساويتين "

🔸ف مفيش قدامه غير محاولة فرض الزعامة
و بدأها باليمن و ده ينقلنا للنقطة التانية 👇🏻

📌 الفشل السعودي في اليمن :
و التبني اللي متبنيه للحكومة الانتقالية ... و مش فاهمة يعني ايه انتقالية بقالها 15 سنة
لازم تسأل نفسك 👈🏻مين له مصلحة في استمرار هذا الوضع المأساوي في اليمن و عدم استقرارها
هتلاقيهم اتنين :
ايران 👈🏻 عشان تفضل تنهب من خيرات اليمن
اسرائيل 👈🏻 عشان تفضل لها عيون في مضيق باب المندب

و اليمن بدأت تتفكك اكتر بقا
الجنوب و الحضرمية كمان مش متحملين سوء الاوضاع
و بن سلمان مش بيقدم لليمن حاجة الا استضافة حكومتها و حماية حدوده .. حتي شربة ماء مبيهتمش يبعتها
و لما الامارات تدخلت امام الاخوان .. طالبهم بالانسحاب خوفا علي حدوده
طب انسحبوا .. عملت ايه 🤷🏻‍♀️
و لا حاجة .. بتاخد علي قفاك يوميا 🤷🏻‍♀️

▪حاول يوصل لاتفاق مع الحوثي
راح فتحله باب اكبر علي باب المندب و عطاله نفوذ اكتر
و لأن الشيعة يهود لا عهد لهم .. ف كل يوم بيلسعوه 🤷🏻‍♀️🤷🏻‍♀️

🔸قالك نعمل اتحاد تحالف دولي بقيادة السعودية لحماية امن الملاحة في البحر الاحمر
▪ اللي لفت نظري ان هو القائد
يعني التحالف بقيادته
قيادة لدولة بتنضرب كل يوم 🤔
مش تقود نفسك الاول طيب 🤔

◾الهدف من التحالف 👈🏻 ضرب اليمن
و ده سبب رفض مصر للتحالف
مش صراع علي قيادة و لا حاجة
لكن مش هنكون طرف في قوة هجومية تعتدي علي دولة عربية .. و نشارك في سقوط ابرياء
بن سلمان عايز يعمل زي اسرائيل
و يروج لسردية الدفاع عن نفسه و عن امن الملاحة
و بعدها يبيد الابرياء
14 دولة المفروض تضرب في اليمن ... هل ده شئ عقلاني .. ده جنون
و لذلك كان قرار مصر بعدم الانضمام للتحالف
الاسطول اللي موجود في البحر الاحمر مصري .. و ده اللي هيستخدموه
و مصر لن تقبل سقوط ابرياء بنيرانها

بن سلمان مش قادر يصد عن نفسه هجمات الحوثي البرية .. ف عايز تحالف يحميه من البحر
لكن الضرب مش انتقائي
يعني الحوثيين مش حاطين ألوان فلورسنت فوسفوري علي وجوههم عشان تعلمهم بيها 🤷🏻‍♀️

انت مش عايز تحمي امن ملاحة
انت في خطر .. المملكة في خطر
و بن سلمان عايز يحمي نفسه
و مفيش حد فينا يتمني الشر للمملكة " بتكلم عن الاسوياء مش المتخلفين عقليا "
لكن وقوع المملكة في دايرة ابخطر هيكون بداية تنفيذ الخطة الشيطانية اللي ذكرناها فوق ☝🏻☝🏻

و ده ينقلنا للنقطة الرابعة 👇🏻

📌زيارة الزيدي لامريكا :
وما تتعرض له السعودية من بعد الزيارة
و مش السعودية بس
معاها الاردن كمان " ما هو من ضمن الخطة 👈🏻توسعة اسرائيل لحد نصف الاردن لتملك نهر الاردن و تهجير اهل الضفة "

🔹من يوم عودة الزيدي و كل يوم الفصايل العراقية بتهدد السعودية
و بتقصف الاردن
مع ان تصريحاته في امريكا كانت رائعة
من نوعية الجيش هو المتحكم و مفيش سلاح هيبقا بايد الفصايل
و انا قولتلكم انها مجرد تصريحات 👌🏻👌🏻

🔹علي حسب المعلومات الاستخباراتية الواردة للسعودية و التقارير اللي صرحت عنها خلال اليومين الماضيين
ان لديها معلومات ان في ضربات قوية هتتوجه للمملكة في نفس التوقيت من الفصايل الشيعية العراقية و من الحوثي

▪بالعقل كده مين صاحب المصلحة في الضربة دي 🤔
اللي عايز يضغط علي السعودية لتنفيذ رغباته 🤷🏻‍♀️
▪هل هتكون ضربة شديدة 🤔
اااه
ان كان مطار نجران الهجوم عليه اردف 11 قتيل غير المصابين" حسب نيويورك تايمز " و ده رقم علي فكرة

لذلك كان علي السعودية انها تتحرك و تحمي نفسها بتحالف تواجده يشكل قوة رادعة للهجوم الوشيك ده
و التحالف ده هو اتفاقية اليوم في جدة
تحالف سعودي باكستاني تركي للدفاع المشترك .. واي اعتداء علي اي دولة هو اعتداء علي الثلاثة 👌🏻👌🏻

◾ هل ده اتفاق كويس 👈🏻 اه طبعا
هو الهدف منه مش انها عايزة تحارب بيه حد
الهدف منه انها تحمي نفسها و تدافع عن نفسها
و قصاد ده هي بتدفع كويس ... لكن مش زي الحلب الامريكي

انما بتمول مشروعات في باكستان تخدم المجتمع الباكستاني و تدر عليها ارباح في نفس الوقت

اردوغان بيعرف يكسب كويس من اي اتفاقية يعملها
و لو حصل لا قدر الله هجوم عراقي علي السعودية .. اردوغان عارف كويس جدا اهدافه جوا العراق اللي هيضربها و هيبقا اسمه بيدافع عن السعودية👌🏻👌🏻

لحد دلوقت و لا تحالف خليجي او دخلته دولة خليجية بيهدد اسرائيل .. لأن اسرائيل لابسة وجه الحمل و موجهتش اي اعتداء علي الخليج و لا الاردن
اللي بيعتدي هو ايران و ذيولها
و بالتالي اي تحالف هو خطر علي ايران 🤷🏻‍♀️🤷🏻‍♀️ " المسلمة الكيوت اللي بتضرب مسلمين بس .. تخصص مسلمين سنة البكالوريوس بتاعها في دماء المسلمين السنة بس 🙄 "

عشان بس الترويج للتحالف الاسلامي الجديد اللي هيقف لاسرائيل
الاجابة 👈🏻 و هي اسرائيل اعتدت علينا عشان نعتدي عليها 🤷🏻‍♀️🤷🏻‍♀️

اللعبة تدار بمنتهي الحرفية و الذكاء و مش ذنب حد ان الاخر غبي و حساباته كلها غلط 🤷🏻‍♀️🤷🏻‍♀️

▪باكستان تتمتع بعلاقات جيدة مع ايران
و ايران من مصلحتها متخسرهاش
▪تركيا لسه عاملة اكبر اتفاقية تعاون نفطي مع العراق
لذلك السعودية جابتهم

في دول لازم تجيب حد كبير يضرب العيال اللي بتضربها في الشارع عشان هي مبتعرفش تضرب .. بتنضرب بس

و ده شئ ميخصناش في حاجة .. كل دولة تدور علي مصلحتها بطريقتها
و ارجو انكم لا تنجروا خلف شغل اللجان اللي بتدعي انها سعودية و تدخلوا الحروب الافتراضية الهبلة دي 👌🏻👌🏻

انا شخصيا اتمني من كل قلبي نجاة السعودية من المأزق ده
و لا اتمني الضرر لاي سعودي
زي ما مش بتمني اي ضرر لاي مواطن يمني برئ لا هو ضمن فصيلة و لا ميليشيا و لكن قدره انه في دولة تمكنت منها ايران فدمرتها تدميرا 🤷🏻‍♀️🤷🏻‍♀️

و بحترم و بقدر جدااا رد فعل مصر و عدم تورط الجيش المصري العظيم ربنا يحفظهم و يديمهم و لا يسؤنا فيهم ابدا 🤲🏻🤲🏻

🔵 يا امريكا هتعمليها ازاي 🙄

دولة المهجر بتقيد الجنسية لمنع منحها لمن لا يستحق

🔘 طب عشان مهزلة شركات الاتصالات المصرية
و مدي سفالة موظفيها

اصل محدش عنده صورة بطاقتك و بياناتك غيرهم .. و ده واضح جدا انه شغل عصابات عشان يتعمل بيها محافظ مالية
يتنفذ بيها عمليات نصب علي المواطنين

📌 وتضارب نصايح المحامين
و موضوع انكار الملكية في شركة الاتصالات ده سذاجة الحقيقة
لأن العصابة من جوا الشركة

ف انا لو في الموقف ده هطالب بصور العقود اللي لاي عدد من الخطوط باسمي
و طبعا هلاقي التوقيع مزور
بالتالي هتوجه لأي قسم و اعمل محضر تزوير توقيع للشركة و استخدام بياناتي الخاصة في اعمال مشبوهة يقوم بها موظفيها

طب رفضوا يدوني العقود
هتصل بالنجدة و اعمل بلاغ و اخد بياناته و اطلع علي القسم اعمل محضر للشركة بردو

انما اعمل انكار ملكية
و انا ايه يضمنلي اصلااااا انهم هيحتفظوا بيه

و يفضل قبل ما تطلب صور العقود
تفتح الكاميرا بتاعتك و تسجل الواقعة كلها فيديو من غير ما الموظف يحس
عشان ترفق الفيديو مع البلاغ

الصراحة انا مشوفتش المهزلة دي في اي حتة في الكوكب
في كتاب اسمه محاطون بالحمقي
الوضع بقا حاليا محاطون بالعصابات 🤷🏻‍♀️🤷🏻‍♀️

🔵 نداء للحلوين اللي قاعدين في العلمين رايقين ومصيفين :

الدكتوراه الفخرية مش درجة علمية دي شهادة تقدير
عشان لما نلاقي اخبار بعنوان صرح معالي الدكتور وزير التعليم
ويتقالكم لأ

📌 فترجعوا تحذفوا البوستات .. و الصور
و احسس واعتذر ..و احسس واعتذر🙄🙄
و تنفوا
و تنزلوا بوستات كذب ان الوزير مسافرش
والناس تنزلكم صور اليابان
ملهاش لازمة الحوارات
" احنا مأمنين نفسنا و كل فسسسوة بناخدوها سكرينات دلوقت😂"

خلونا واضحين 👈🏻 الدكتوراه الفخرية شهادة تقدير و بموجب القانون لا تمنح لقب دكتور
و الاشخاص المنوطين بهذا اللقب اما خريجيين كليات الطب بفروعها و الصيدلة او الحاصلين علي درجة PhD العلمية

يعني احنا لسه واقفين مكاننا " فوق كوبري الاعدادية اتجاه مسترد 🙄"

"بردو هيغلطوا و يقولوا معالي الدكتور😂"