🔵 يا سلااااام يا استاذ عاااادل .. اما قصة عبرة بصحيييح 🤔

📌انا مش عارفة اجيبهالك ازاي
بس هو محاولة اغتيال مبارك كانت في 1995 في 25 يونيو
بعدها اعلنا القطيعة مع اثيوبيا
و اصدرت مصر بيان بعدم نيتها حضور اي فاعلية في اديس ابابا
و اتهمنا السودان باستضافة العناصر الارهابية اللي قامت بالمحاولة و سحبنا السفير

و مبارك 5 مرات يرفض يستقبل ميلس زيناوي حتي يدخله مصر سياحة 🤷🏻‍♀️
و زيناوي مجاش مصر الا بعد 2011
و لم يتقابل مبارك مع اي اثيوبي من بعد 1995

📌 سد النهضة كان اسمه اساسا السد الحدودي .. فكرته بدأت سنة 2006
و في 2008 تم وضع الدراسات السرية له
بعد زيارة المهندسين الامريكان لاثيوبيا لاختيار مكانه
يعني اثيوبيا نفسها مكنتش تعرف انها هتعمل سد 🤷🏻‍♀️

ما تخليك في النفاق المنمق وسلسلة رجل المستحيل و تسيبك من السرد السياسي🤷🏻‍♀️🤷🏻‍♀️

بقا قاله و لو اتبني يا عمر يا سليمان
راح قاله هنفجره ياريس 🙄

لا منهجية و لا اسلوب و لا طريقة اللواء عمر سليمان

سيبك من اللي ماتوا
و ركز في نفاق الصاحيين و حكاياتهم البطولية الخيالية

اثيوبيا نفسها عرفت انها هتعمل سد في فبراير 2010😒😒

🔵 تصريحات 🤔 .. و قوية 🤔

الحمد لله يارب قبلنا البشري يا استاذ علي
20 جنيه 🙄 .. 20 جني بالاسكندراني الفصيح🙄

قولهم يا استاذ علي يا ايقونة الوطنية
قولهم اعداء الوطن دول 🤷🏻‍♀️🤷🏻‍♀️
----------------------------------------
🔸 كان في اغنية للاستاذ عبد المنعم مدبولي بيقول فيها ااه يا زمان العبر .. سوق الحلاوة جبر

لو تعرفوها فكروني هو كان بيقول اااه يا زمان العبر و لا الدبل 🤔🤔
الواحد اصل السن و الزهايمر بجااا

تصريحات قوية من علي حسين مهدي
الحمد لله علي نعمة الدولار ابو 20 🤲🏻🤲🏻

🔵 في خبر كده مينفعش يمر مرور الكرام :

انهاردة الشركة القابضة للنقل البحري
و هيئة اسكندرية للموانئ

اتقدموا لشركة اسكندرية للحاويات بوثيقة رفض

📌 اسكندرية للحاويات شركة عامة حكومية
اسهمها في البورصة بيتم التداول عليها
و كل مجموعة حملة اسهم لهم محفظة

حملة الاسهم دول :
▪ بلاك كاسبيان الاماراتية التابعة لمجموعة موانئ ابوظبي و دي مستحوذة علي 19.32% من الاسهم
▪ هيئة اسكندرية للموانئ
▪ الشركة القابضة للنقل البحري
▪ صغار حملة الاسهم

بلاك كاسبيان قدمت عرض شراء 👈🏻 اجباري
" ركز في كلمة اجباري دي "
عشان تستحوذ علي الاسهم اللي في محفظة الشركتين .. و يوصل استحواذها ل 90%
بسعر 27.47 ج للسهم

🔸اولا العرض الاجباري لا يقدم الا اما الشركة تكون مستحوذة علي 50% + 1 من الاسهم
اما يبقا مكملش 20%
اجباري ايه اللي بتقدمه يا حبيبي 🤷🏻‍♀️🤷🏻‍♀️

▪ سعر 27.47 ج ده سعر زهيد جدااا ومحصلش سعره الدفتري حتي

🔹الشركتين بقا قالوا ايه في حيثيات الرفض 👈🏻 شركة الاسكندرية للحاويات هي واحدة من قلاع الاملاك المصرية
و هي واحدة من الشركات التي تجلب العوائد الدولارية و تشكل جزء من دخل الدولة
لذلك بيعها يتسبب في فقدان الدولة لأحد موارد دخلها الدولارية 👌🏻👌🏻

كلام محترم جدا
و هو ده اللي بنناهد فيه
انك لما تبيع كل شركاتك هتجيب فلوس منين ايرادات الموازنة يا عم 🤷🏻‍♀️🤷🏻‍♀️

♦قبل ما نلاقي بس تحليلات احنا بنضغط علي الامارات
و نؤدب الامارات
و العناوين الفتاكة دي 🙄

احنا اللي طرحنا اسكندرية للحاويات في برنامج الطروحات
من ضمن اصول كتير
و احنا اللي عارضين باقي شوية المواني اللي نملك بعضها علي الامارات

و انها تعمل عرض اجباري غير قانوني
ده لازم يكون بموافقة الحكومة

🔸كون بقا الشركات ترفض البيع
ده اللي بيتقال عليه الموقف الوطني الذي يجب دعمه
و طبعا دي شركة مش بتخسر نهااااائي

مش عايزة العشم ياخدني
و اقول كده ضمنا عدم البيع
لأني عارفة ان الحكومة هتجبر الشركات علي البيع .. من اجل توفير دولارات للسداد في اقساط الديون الخرافية المستحقة علينا لنهاية 2026

لو كل الشركات رفضت بيع الاصول المملوكة للدولة يمكن نقدر ننقذ حاجة
انما الحكومة الفاشلة دي بتعتبر نفسها هي الدولة و هي صاحب الاملاك
مش شوية موظفين قائمين علي ادارة مقدرات الدولة

اصلا ميعرفوش يعني ايه دولة و لا يعرفوا ايه هو مفهوم الدولة
و ده بيظهر من حماقة رئيس الحكومة اما بيطلع تصريح حقير يقول فيه : الدولة تتحمل عن المواطن
يا المادة الخام للفشل و الجهل
مفهوم الدولة هو باختصار الارض بمقدراتها + السكان اللي عليها
باقي المؤسسات هي هياكل ادارية 🤷🏻‍♀️🤷🏻‍♀️

بلاش نتعشم
هيضغط في بيعها و يخلص من الشركة
و لو الشركات تمسكت بالرفض
جايز يبقا صراع

الصراع ده يا حبيبي بيتصنف فشل اداري
و ربما يرقي لتضارب مصالح
لكن بين مصلحة الشعب و مصلحة الحكومة 👌🏻👌🏻

🔵 نتنياهو بقاله كده 36 ساعة بيبيد في جنوب لبنان
تقريبا كده بيمحي تاريخ جنوب لبنان كله 🤷🏻‍♀️

♦ و من قلب غزة بقا شوية تصريحات :
▪نسيطر حاليا علي 60% من القطاع
▪لن ننسحب من القطاع و سنواصل جميع خطواتنا داخلها

📌يسرائيل كاتس من غزة امام نتنياهو 👈🏻 لدينا خطط لاخراج الفلسطينيين من غزة و لكن ننتظر ان تحدد الولايات المتحدة المكان الذي يمكن نقلهم فيه

📌 بن غفير من غزة امام نتنياهو 👈🏻 باقي 1.86 من سكان غزة و بدو النقب.. يمكننا ابادتهم في 7 سنين لذلك يجب نقلهم
" يوم 7 اكتوبر كان التعداد 2 مليون و 330 الف غزاوي هاااا .. يعني كلامي صح لما قولتلكم ابادوا اكتر نص مليون و يقولوا لاااا 77 الف شخص 😎 "

مجلس السلام مهنج 🙄

https://www.facebook.com/share/p/19TAVMZHjv/

🔵 ابسط حاجة نقدر نقف بيها في وش فيضان الفساد اللي عايشين فيه
هو اننا ندعم بعض
و نشد من آزر بعض

لما باسل سماقية لانه بينه و بين الحكومة بيزنس توطين السوريين
و الله اعلم بيجيب ملايين الدولارات بتاعت الجنسيات اللي بتتمنح للسوريين دي منين

في المقابل يتسابله الحبل علي الغارب انه يبطش بالشركات المصرية
و يقفلها عافية

يبقا متبقاش لنا في البلد دي غير دعم المصريين ضد الاحتلال

ادعم ملوك القطن المصري و كبر الحملة ضد كل ما هكسوسي و كوشي
ادعم ابن بلدك ضد اللي بيخطف بلدك

📌 انا بعلن اني بنضم لحملة منع اغلاق مصنع ملوك القطن المصري مع كل المصريين الشرفاء
و هعملهم اعلانات في كل الجالية في 4 دول اوروبية و عربية كمان

قاطع قطونيل – دايس – الامبراطور
و ادعم اخوك يا مصري 👌🏻

شارك البوست و كبر الحملة و زود الدعم
#انا_في_ضهر_اخويا 👌🏻

♦ حال المواطن المصري كل يوم الصبح بعد ما بيطمن علي شحن المفاعلات النووية اللي مركبنها في البيوت ويلاقي لسه رصيد 30 جنيه☝🏻☝🏻

" الدولة تتحمل ااه ... حاضر 🤌🏻🤌🏻"

🔵 #عبدالرحمن_القرضاوي ينعم بالحرية من جديد 🤷🏻‍♀️🤷🏻‍♀️

لو تفتكروا كده في 3 يناير لما نزلت فراندة هذا العام
قولتلكم في احداث هتحصل
هتعمل علي اعادة تدوير تنظيم الاخوان بأساليب جديدة

مظلوميات ماشي
ناس هتبقا قرابين لبعض الانظمة مقابل مكاسب سياسية و شو اعلامي ماااشي
تنجيم و تلميع مااااااشي

هو تنظيم الاخوان بيقبل كل الاوضاع
استك منه فيه .. زي شراب الاستاذ سعيد صالح في مسرحية هاللو شلبي كده 🙄

" طبعا انا منتظرة التحليلات بتاعت الامارات خرجت عبد الرحمن عشان الحكومة مرضتش تبيع اسكندرية للحاويات 🙄
مش الحكومة .. ده مجموعة موظفين ابطال
انما الحكومة هتبيعها 😒 "

♦ خروج عبد الرحمن هو تلطيف جو مع امريكا
📌 طب و ايه اهمية عبودي ده لامريكا 🤔

لا طبعا له اهمية
ده ابن الغالي ده
ابن الشيخ يوسف القرضاوي رجل ال CIA الوفي 🤷🏻‍♀️
▪ الشيخ يوسف اللي اقنع آلاف بل عشرات الالاف من الشباب بالجهاد ضد بشار
و كان ضلع هام جدا في تدمير سوريا
▪ الشيخ يوسف صاحب عقيدة اننا الاولي لنا تحرير الدول العربية من الجيوش العربية
هو اول طرق تحرير القدس 🙄
▪ الشيخ يوسف اللي فيديوهات لقاءاته بمنسقي الموساد موثقة
و يوسي كوهين بيقول نسلم الاوامر لقطر لتسلم حقائب الاموال للقرضاوي ليقتسمها مع قادة الاخوان و قادة حماس
" مكنش في AI في 2016 لسه عشان تقولوا ده مزيف 🤷🏻‍♀️ "
▪ و قبل ما يتحرك لقطر
كان لاعب اساسي في غزوة الصناديق اللي اعدتها آن باترسون السفيرة الامريكية
بحضور القرضاوي و خيرت الشاطر و يونس مخيون و نادر بكار " انتوا بس اللي بتنسوا 😒 "
▪ القرضاوي من الناس اللي تبنت فتاوي تنظيم ولاية سينا و انصار بيت المقدس بوجوب قتال الجيش المصري
و طبعا الايام عرفتكم التنظيميين دول بيعملوا لصالح مين 👈🏻 اسرائيل

لذلك عبد الرحمن الشاعر الثائر زو الشعر الغجري المجنون
ابن المجاهد البطل
له وزن و ثقل
و لو فضلنا مضحيين بيه .. ده هيأثر علي عملية تجنيد المشايخ فيما بعد
" علي فكرة القرضاوي مكنش جاهل بالدين .. بالعكس كان دارس
لكن اصاغ نسخة تانية من الدين موازية للدين الحقيقي لخدمة اهداف تنظيمه "

و الامارات گ دولة براجماتية بحتة
و من ألد اعداء هذا التنظيم
ف هي عارفة و دارسة قدر كل فرد او قيادة فيه

لذلك احتفظت بعبدالرحمن عندها
مع ان المفروض كان يتسلم لمصر
لأن تهمته الاساسية كان ارهاب ضد الدولة المصرية 🤷🏻‍♀️🤷🏻‍♀️
بس هي شالته في الدرج لوقت عوووزة 👌🏻

🔸 و اهو جه وقت العوزة اهو
هتقرفونا في نظامنا المصرفي
طيب .. خدوا عبد الرحمن حبيبكم اهو
يلا بقا نمشيها سيب و انا اسيب 🤷🏻‍♀️🤷🏻‍♀️

اسيبلك حتة سياسية .. و اسيبلك حتة مالية .. و ادعمك في حتة نرجسية في مجلس الامن
و نتفاهم
و مصالحنا تمشي

هو العالم بيدار كده
عالم بدأ بأخ قتل اخوه
و تأنيب ضميره الوحيد انه طلع اغبي من الغراب
عايزين تمشوه بشعارات الانسانية و الشرف ازاي 🙄🙄

🔵 #متلازمة_المصطلحات_الرديئة_للحكومات_الفاشلة:

📌 ليه في عالم اول و عالم تالت
ومين العنصري اللي عمل التصنيف ده 🤔
طب ليه مفيش عالم تاني 🤔

🔹التصنيف ده اتعمل علي حسب قيمة الانسان داخل الدولة
ف لما جم يصنفونا
لقوا ان احنا محصلناش ترتيب انسان من الدرجة الثانية
ف عملونا انسان من الدرجة الثالثة
ف تحول عالمنا الي عالم تالت

طبعا تصنيف عنصري و تقييم غير آدمي

لكن في معايير " هما " قرروا يطبقوها علي نفسهم عشان يحافظوا علي المسافة الطبقية بين"نا" و بين"هم"

من المعايير دي :
▪الضرائب حق للدولة علي المواطن
و انفاقها 👈🏻 حق للمواطن علي الدولة 👌🏻
▪العمل السياسي حق للجميع
" المعارضة مش خونة
ده وصفهم في المجتمعات المتخلفة فقط
لأن بيحدث تداول للسلطة بين المعارضة و الاغلبية
و الاغلبية بتتبادل الكراسي فتتحول لمعارضة
و تتحول المعارضة للحزب الحاكم "
▪👈🏻 موظفين 👉🏻 الحكومة يعملون علي ادارة موارد الدولة لتوفير حياة كريمة للمواطنين
▪اذا خالفت الحكومة العقد الاجتماعي او نصوص الدستور التي تحمي حقوق المواطن
متاح للمواطن مقاضاتها
" العقد الاجتماعي اللي هو الاحقية في الحصول علي فرص تعليم مجانية .. الاحقية في الحصول علي رعاية صحية مجانية .. تلتزم الوزارات الحكومية بتجنب تعريض الامن القومي للخطر "
ف تلاقي الديموقراطيين في الكونجرس بيهددوا ترامب في نوفمبر القادم بسحب الثقة من حكومته لانه بيدخل البلد في حروب مش عايزنها .. تلاقي عضو برلمان ماسك ميلوني ماسح بيها البلاط لانها تدخلت في الحرب علي غزة .. تلاقي اولاف شولتس اطاحوا بيه لانه بيعرض البلد لخطر روسي محتمل

🔘 لكن تيجي بقا عند مواطن الدرجة التالتة
تلاقي حكومة من اللصوص و المختلسين و المزورين
اخفقت في كل الملفات
اما يجي رئيسها يتكلم مع المواطن
يقوم يتعامل معاه بفوقية و استعلاء و يقوله انه مواطن عبء علي الحكومة ... و الحكومة بتصرف عليه من جيبها

و المواطن اللي بيتم تجهيله عمدا 👌🏻
يأنب نفسه
و يقول و هي الحكومة هتجيب منين 🤷🏻‍♀️🤷🏻‍♀️

ف انا ممكن ببساطة استعرض في عجالة هو مين اللي عبء علي مين 👌🏻

♦ مبدئيا يا عزيزي المواطن حكومتك بلااااا ايرادات .. حكومة مفلسة
مصدر دخلها الوحيد للانفاق 👈🏻 الضرائب .. يعني انت

من ضرايبك دي يا عزيزي المواطن
🔸🔸الحكومة عندها 4 مقرات
مقر صيفي و مقر شتوي و مقر في النص و حاجة اخر دلع
▪المقر اللي موجود في العاصمة الادارية بس بيندفع له ايجار 7.6 مليار جنيه سنويا شاملة الصيانة
" رقم غريب عجيب و مش مفهوم ... ليه يا باشا انتوا جايبين مدير فني اجنبي 🙄"
بتندفع لشركة العاصمة الادارية 🙄
بتتحمل علي الموازنة العامة اللي بيدفع فلوسها المواطن
▪مقر العلمين بقا ضمن املاك هيئة المجتمعات العمرانية
ف بيتعمل لها عقود صيانة من تحت لتحت ... محدش بيعرف الارقام
🔸 عدد سيارات الاسطول الحكومي الجهاز المركزي للمحاسبات نفسه فشل انه يعرف عددها
ليه بقا 👈🏻 بسبب تعدد الجهات المالكة
▪ وحركة الاحلال و الاستبعاد : سنويا في آلاف السيارات بتخرج خردة و بيدخل مكانها جديد من خلال الهيئة العامة
اللي من ضمنها عشرات من سيارات الركاب الحكومي
" انا المواطن يا باشا اللي بيدفعلك تمن العربية الجديدة .. و كمااااان بدفعلك بنزينها .. و مرتب السواق اللي سايق بيك و نفس الحال علي 4 عربيات حراسة 🤷🏻‍♀️"
🔸احنا من الدول اللي محدش يعرف عدد المستشارين في حكومتها كااااام
" بنعاملهم معاملة الكتاكيت .. مش بنعدوا لا يتحسدوا "
النائبة سولاف درويش قالت ان رواتبهم تتراوح من 250 الف لتتجاوز 400 الف جنيه شهريا
و النائب فريد البياضي قال هو احنا ليه عندنا 622 مستشار ما بين ثابت و بالطلب
رجولة مني هحسبهم 400 مستشار × 300 الف جنيه
يبقا 120 مليون جنيه في الشهر .. في السنة مليار و 440 مليون جنيه
" إحياة ابوك ما تنسي تنزل نفي علي صفحتك ان المستشارين 6.7 و كان في ايد و رجل سيبناهم برا التلاجة حمضوا ... عشان هلطعلك الفيديوهات بتاعت النواب في خلقتك 👌🏻"

بيندفعوا في ايه بقا المليار و 440 مليون دول
عشان حسن هيكل يقترح بيع قناة السويس
و طلع مستشار part time بالحتة يعني مش اساسي 🙄

🔸رواتب الحكومة .. حوافز الحكومة .. مكافآت الحكومة
سفرياتك .. تحركاتك .. بدلك .. كرافتاتك .. عملية الليزك .. البيوت اللي سيادتكم مقيمين فيها
كل ده بيتحمله المواطن من ضرايبه
اللي هي ايراداتك
اللي هي بتطلع منها الانفاق الحكومي الداخلي و المنح الاستثنائية زي ال 30 مليون جنيه اللي اخدهم ضياء رشوان لصندوق معاش الصحفيين كده بالمخالفة للدستور اساسا 🤷🏻‍♀️🤷🏻‍♀️

عرفت انا گ مواطن انت گ حكومة بتشكل عبء عليا قد اييييه

🔘 النقطة التانية اللي تعباك 👈🏻 الدعم
بما انا المواطن اللي بيدفع ايرادات الدولة
يبقا من حقي اخد من خلال الايرادات دي خدمات
و ميزات تفاضلية
▪ايه الخدمات : الصحة و التعليم المجاني
▪ايه الميزات التفاضلية :
* رواتب اعانة بطالة مثلا .. انت بتدفع لحد اعانة بطالة
* الحماية الاجتماعية للطبقات الاكثر فقرا
انت بتمنحها ل 17 مليون مواطن في حين ان بقا في 70 مليون مواطن محتاجينها وفقا لمعدلات الفقر
* كافة صور و اشكال الدعم

يعني ليه ساندوتش الفول بقا ب 15 جنيه
لأنك رفعت الدعم عن زراعة الفول فتكلفة الزراعة زادت بالتالي سعر السلعة زاد
و رفعت الدعم عن الكهربا و الغاز و المحروقات فتكلفة تسوية الفول زادت
و رفعت اسعار كل حاجة فالراجل بتاع عربية الفول بقا يدفع ارضية زيادة

و كل ده اتحمل علي المواطن .. انت بقا عملت ايه للمواطن
رفعت عليه ضريبة الدخل خصم من المنبع و فواتير الميه و النور و الغاز و المواصلات
ف بقا مضطر يشتري رغيف فول وااااحد بدل اتنين لأن دي مقدرته المالية

جوعته يعني يا مصطفي بيه .. ياللي بتعايرنا بفلوسنا و ضرايبنا 🤷🏻‍♀️🤷🏻‍♀️

و من علامات البجاحة
ما هو البجاحة لها علامات اااه
ان اما الانسان يبقا غلطان مش يعترف ... لاااااااء
ده يسقط فشله علي الاخرين مدعيا اكاذيب زي الحروب اللي بتشن عليهم
و المواطن ابن الكلب الجاحد اللي مش حاسس بالنعمة و مش طمران فيه

حكومة بتكلفنا 20 مليار جنيه سنويا في الاونطة
متعرفش الا الاستدانة و الاقتراض و التصريحات
و احنا اللي بنشكل عبء عليهم كمان

الدول اللي بتحارب
محدش طلع فيهم اشتكي من فاتورة الحرب و قال للشعب انت تقيل علينا يا اخي .. ما تقوم تشوفلك شغلانة بقا اصرف بيها علي نفسك

هيكلك الوظيفي 4.8 مليون موظف ... في حين ان عندي من 6 ل 8 مليون مواطن بيشتغلوا ديلفري ...... واحنا اللي عبء

اجمالي رواتب موظفينك 3 اضعاف و نصف رواتب كل العمالة في القطاع الخاص ..... و احنا اللي عبء

من شهر يناير لحد اليوم ناس من المعاشات مش عارفة تصرف معاشها بسبب عجزكم عن تقييف سرقة المليار و 140 مليون بتوع ال system الجديد ..... واحنا اللي عبء

بيعتوا اماكن الطلبة المصريين للوافدين و اللاجئين بالدولار
و مدرسة كاملة " ستيم " مش لاقية جامعة تروح فيها ..... واحنا اللي عبء

انتوا اصلا وجودكم عبء في جبين البشرية 🤷🏻‍♀️🤷🏻‍♀️

كفاياكم تصريحات مستفزة
عشان خلصنا رصيد القرف اللي جوانا تجاهكم
و انتقي ألفاظك
و اعترف بفشلك
عشان هتلاقي دايما رد عليك زي الكابوس كده 👌🏻👌🏻
بفضل فشلك الجنيه المصري اتصنف في يوليو و اغسطس تاني اسوأ عملة عالميا امام الدولار
و دي ساااابقة تستحق ان تدرس 🤷🏻‍♀️🤷🏻‍♀️

" متقلقش مش ناسية النمو ابو 5.1% ... اتقل بس 🤌🏻🤌🏻"

🔵 #التكرار_مبيعلمش_الحمير:

لحد ما انزل التفاصيل الكتير اووي في السودان
ف شوف يا صديقي
اي دولة بيتاخد فيها قرار التقسيم و الانهاء علي وجودها
لها بروتوكول بيتنفذ بحذافيره :
▪ اولا 👈🏻 تعلي اسهم جماعة دينية معينة و تمكنهم من الدولة
▪ ثانيا 👈🏻 تتهم نظامها باستخدام اسلحة محرمة دوليا

لكن جوا ده تفاصيل كتير
▪ العراق اسقطوا صدام و الجيش بالتعاون مع الشيعة و الجيش بيستخدم الكيماوي
▪ سوريا اسقطوا بشار و الجيش بالتعاون مع ميليشيات الجيش الحر المكونة من داعش وجبهة النصرة و جبهة تحرير الشام
وعشان بن سلمان يسكتهم علي ما فعله باليمن بقا هو الممول الرئيسي للميليشيات الارهابية دي و الراعي لها
و اسطورة براميل الفوسفور اللي استخدمها الجيش السوري ضد الارهابيين " اللي بيقولوا عليهم مدنيين "

و حاليا ده بيتم في السودان
▪ مكنوا الاخوان من الحكم الحالي تماما
ف وحدات الجيش 80% منها اخوان
و هما اللي سايقين البرهان " اللي مش مستغربة نهائي ميوله و هواه الاخواني المكتشف حديثا ده 🤷🏻‍♀️ "
▪ و الاخوان امتثلوا لاوامر ال CIA و اوجدوا كل الدلائل علي استخدام البرهان لقنابل الكلور مع المدنيين

♦ رصاصة الفاينال انضربت للسودان خلاص
البرهان جاب الكلور من 👈🏻 مصر
انا قولتلك قبل كده ان مسعد بولس مش هيصبر كتير علي موضوع وحدة السودان ده

فعلا الكلور لتنقية الميه
و فعلا موجود عقود بيعه اللي فيها نص استخدامه
و فعلا انت ملكش وجود في هيكل التصنيع اللي تم الاشارة اليه
و ياسر العطا لم يضع اي مسئولية علي مصر

لكن ده تلويح لك بالعقوبات
اشارة .. و اللبيب بالاشارة يفهم

في تفاصيل اكتر
هدققها الاول و بعدين انزلها لكم 👌🏻

🔵 في مشروب في امريكا اللاتينية عند قبائل غابات الامازون اسمه " ياهواسكا "

المشروب ده لما الانسان بيشربه بيفقد وعيه الحقيقي و بيروح لعالم الهلاووس
او عالم آخر صنعه هو في خياله و هو وحده اللي عايش فيه

معرفش الصراحة هو ايه نوع المخدر اللي فيه .. لكنه تركيبة من مجموعة نباتات اكيد فيها نباتات خدرية عالية التخدير 🤷🏻‍♀️

كنت اتفرجت مرة علي وثائقي لمتناوليه
واحد بيقول ان بعد تناول المشروب ده بيقدر يحاسب ابوه علي عقد الطفولة اللي عملها له
واحدة قالت انها بتذهب لعالم اخر تعاقب فيه اللي عنفوها جسديا .. و بتشتغل الوظيفة اللي بتحبها .. و بتتزوج حبيبها اللي هجرها و تزوج اخري و بتعيش معاه حياة سعيدة و بتنجب اطفال كمان
عشان كده عمرها ما هتتوقف عن المشروب ده لأنه بيدخلها العالم الذي تحبه وتريده مش الواقع المرفوض

📌 اعتتتتتقد ان الوثائقي ده محتاج لقاء مع اشخاص اخرين يحكوا لنا تجربتهم
يعني مثلا واحد يقول ان لما يتناول المشروب ده
بيشوف اللي معاه دبلوم صناعي موظف و بياخد 15 الف جنيه بعد 3 سنين بس من الدبلوم
مش شغال علي توكتوك و لا بيركن عربيات و لا شاري موتوسيكل بالتقسيط و بيشتغل ديلفري
و بيشوف المهندس حديث التخرج بياخد 30 الف جنيه
في حين ان كبري الشركات في الدولة دي بتعين المهندس علي 4500 ج + حافز 700 ج " ده لو له حد من اهله شغال فيها " 🙄

♦ماكس فيبر احد علماء علم الاجتماع السياسي .. و مؤسس نظرية السلطة و علم الاجتماع
لما كان بيتكلم عن الحكومات
قسمهم ل 3 حكومات
▪ حكومة مدركة
و دي الحكومة اللي بتتناول الواقع گ مادة لاداءها
▪ حكومة " تحاول "
و دي اللي مش بتكون تمتلك كفاءة 100% .. لكنها بتصر انها تستخدم كافة السبل
من اجل حل مشكلة
و بيصفها ايضا بالحكومة ذات الآذن
لانها بتستمع للجميع
سواء داخلها او خارجها
▪ حكومة " اضطراب التوهم "
و ده مرض نفسي
المريض فيه بيتوهم انه شخص عظيم و يمتلك قوة خارقة ولكن المؤامرات تحاك ضده
و بالتالي ده بيأثر في شعور الاخرين بانجازه في الحياة
ف بيعيش في حالة انكار
و ده بيجعل من هذه الحكومة آلة كبيرة لانتاج الكذب
و بيتحول الكذب هو السلعة الاستراتيجية الاساسية لهم

والكذب ده بياخد مصطلح كذب المسئولين
لانه بيتسم بالخطورة

ماكس فيبر بيقول في نظريته
ان الاضطراب التوهمي بيؤدي للاصابة بالنرجسية و ده درجة اعلي من المرض
و ده اعراضه :
انكار الواقع و إلقاء اللوم المستمر علي الاخرين و التقليل منهم
ليه 👈🏻 لاعادة صياغة الواقع بما يتناسب مع الصورة اللي راسمها الشخص عن نفسه و واقعه ... و التي تعفيه في نظر نفسه من عدم الوقوع في الخطأ

يعني مش انه مش غلط .. لاااا ده انا اصلا مبغلطش
و ادعاءه الدائم بإنه الوحيد الذي يملك كل شئ
" بيفهم في كل حاجة و كل القرارات صح
و فشل النتائج مش بسببه
ده بسبب الاخرين
هما اللي جهلة .. او هما اللي مش مقدرين عبقريتي و افكاري "

📌 ماكس فيبر بيقدم اطروحة
ان الحكومات الفاشلة فقط
هي من تلجأ للكذب السياسي
لحد ما بتوصل لحالة الاضطراب التوهمي
ف بيكون بيكذب بمنتهي اليقين
لدرجة انه مصدق كذبه
و عنده قناعة ان الناس هتصدقه 👌🏻

🔹ضرب مثال ب صوفيا إلكسيفينا
الشقيقة الكبري للقيصر الروسي بطرس الاكبر او بطرس العظيم زي ما بيسموه الروس

لما ابوهم مات
الحكم تشارك فيه إيڤان الخامس و بطرس الاول و كان مازال طفل
صوفيا كانت بتميل ل إيڤان
و كانت مثال صارخ لاضطراب التوهم
و كانت بتنقل التوهم ل ايڤان

الجميع يحبك .. انت عظيم .. الشعب يعيش في رفاهية " و هما كانوا مش لاقيين ياكلوا "
نحن ندعم العلم " و هي و امها قفلوا ساحات التعليم بسبب فرض ضرائب عليها و الشعب فقير مش قادر يدفع .. فسحب اولاده من التعليم "
نحن نوفر للشعب الوظائف " و المزارعين بيهجروا اراضيهم و بيهربوا علي اوروبا "

▪ إيڤان كان عنده سؤال 👈🏻 طب ليه يوم الاحتفال بالعيد الشعب مجاش ساحة الاحتفالات و انا موجود .. ليه الشعب غضبان مني
فما كان من صوفيا اللي كانت بتدير الدولة من خلف الستار الا انها قالت له 👈🏻 الشعب طماع .... من كتر سخاءك و كرمك معاه تعلم الجشع و يطلب المزيد
و دخل ايڤان و صوفيا في مرحلة انكار الواقع
و ان العيب في الشعب 👌🏻

" ماكس فيبر و بيعمل نظريته استند لنظرية عالم اخر اسمه أليكسس دو توكفيل
كانت بتتكلم عن قدرة الحكومات المصابة بالامراض النفسية علي افساد النظام الحاكم كله ... و ان الحكومات دي عمرها ما بتكون ضحية
بالعكس هي الجاني و ان اجيال كاملة بتكون ضحايا لها ... حتي الاجيال التي تأتي بعد زوالها بتكون ضحية لها 👌🏻 "

♦ في دولة كده محتاجة تعمل جهاز كشف الكذب بحجم كبير زي جهاز الدخول بتاع المولات و البنوك
و المسئول الكذاب الجهاز يطبق عليه يدغدغ عضمه

لكن هتواجه الدولة دي مشكلة كبيرة جدااا
انها هتعاني من ان مستشفيات العظام مش قادرة تواجه كل هذا العدد من الاصابات 🤔🤔

🔵 #ألمانيا_نحو_المجهول:

ده علي حسب كلام الالمان المعترضين يعني
انما بالنسبة لي
انا قايلة من 3 سنين ان حزب البديل من اجل المانيا هيجي هيجي 👌🏻

لكن الالمان تركوا كل المبادئ
من اجل 3 حاجات :
▪ قضية اللاجئين و المهاجرين
▪ عدم قدرة الرواتب علي تحمل فواتير الطاقة و التدفئة
▪ انشغال الحكومة ب أوكرانيا علي حساب ألمانيا
▪ اهمال كبار السن في برامج حزب الخضر و الحزب المسيحي الديموقراطي

المواطن الالماني المرفه من 70 سنة
مش قادر يستحمل فقدان الرفاهية في 4 سنين بس يا عيني 🙄🙄

و بيدي أصواته لحزب اساسا هيفقدهم كل المبادئ الاوروبية المتحضرة اللي حققوها
زي مثلا حقوق المثليين
مع ان رئيسة الحزب في ساكسونيا مثلية و متزوجة من امرأة و عندها طفلتين

الا انها مشلفة اللي يقف قدامها
ست جبروت
♦برنامج الحزب :
▪ وقف اعانة اللجوء للاجئين الاوكران اللي عددهم 700 الف
" و اللي الحكومة بتدفع لهم اعانة 4000 يورو من اموال دافعي الضرائب
مع ان متوسط الرواتب لعمل 40 ساعة اسبوعيا للمواطن الالماني 3200 يورو "

و دي كانت صدمة للألمان
فكرة انهم عرفوا ان الحكومة بتفضل اللاجئين عليهم .. حولت كل اصواتهم لحد يحترمهم 🙄

▪ شيب المجتمع الالماني
و ده بسبب نقص عدد الشباب
و الحزب ارجع الاسباب لهجرة الشباب نتيجة عدم توافر وظايف بسبب زحام اللاجئين لهم
و كمان العزوف عن الانجاب
لأن الاسر المثلية عددها زاد
و بيتبنوا اطفال السوسيال اللي معظمهم مش ألمان 🤷🏻‍♀️

و برغم ان أليس فايدل مثلية
الا انها موافقة علي وقف اعانات الاسر المثلية ... و لما حد من حزب الخضر هاجمها
قالتله : بما ان المجتمع يتضرر من سلوك فئة معينة يبقا لازم اقف مع المجتمع ضد هذا السلوك من أجل ألمانيا .. حتي لو انا بنتمي لها " يا سلاااااام اما قصة عبرة بصحيح 🙄"
بس الكلام جايب مع الناس
و القاعة ضجت بالتصفيق 🤷🏻‍♀️

▪ الحزب تعهد برفع النفقات علي الرعاية الطبية لكبار السن
و كمان تقديم دعم مادي لهم
عشان يقدروا يعيشوا حياة بلا عوز " زي عندنا بالظبببببط .. كله الا اصحاب المعاشات ده في عينينا كده 🙄 قلودين اوي الالمان دول يا اخي 🙄"

▪ في البوندستاغ شاورت علي اعضاء حزب الخضر و قالت لهم : انتوا قاعدين هنا ليه .. عشان توافقوا علي الموازنة المهترئة اللي بيقدمها ميتريتس كل 3 شهور و قبله شولتس
انتوا لم تقدموا شئ ل المانيا
انتوا جزء من الفساد الذي تسبب فيه الحزب الديموقراطي المسيحي

و رايحيين جايين يدوسوا علي وش ميتريتس 👌🏻👌🏻

▪ تعهدوا بعودة كل السوريين
لأنهم زهقوا من تحول احتفالات اعياد الميلاد
لمجموعة من الحوادث الارهابية
و نفسهم يحتفلوا بالكريسماس بلا متاريس او تواجد للجيش في الشارع
و الكلام ده جي علي هوا الالمان جدااا

♦ ايه بقا اللافت للنظر يا صديقي :
ان احتياجات المواطن في كل مكان في العالم هي المحرك له تجاه الحكومة و الحكم

المواطن يحتاج لانه يكفي احتياجات اسرته .. المواطن يحتاج معاش يضمنله انه لا يهان في شيبته .. المواطن يحتاج لحكومة توفرله و لابناءه وظيفة و مكان لتلقي التعليم مش تفرط فيه للاجئ و لا مهاجر

هو ده يا فندم محرك الانسان
طلع بقا حد من الالمان اتهم هؤلاء المواطنين بالخيانة و لا انهم بينتموا لجماعة الاخوان المسيحيين
ابداااا 🤷🏻‍♀️🤷🏻‍♀️
لان الاتهامات المتخلفة لمواطن يأن و يشتكي و يطالب بحقوقه
لااااا تخرج الا من جماعات متخلفة بتردد شعارات جوفاء

المواطن في كل مكان في العالم يريد حكومة و نظام حكم يحسن جودة حياته و يراعي مصالحه
مش محتاج حكومة يصرف عليها عشان هي تعيش حياة كريمة
و لا يموت من الجوع عشان يعجب النظام الحاكم 👌🏻👌🏻

🔵 حال اهم عركة دايرة علي الميديا حاليا 🙄🙄

🔵 مساء الخير علي حضراتكم :

في 3 يناير 2026
نزلت الفراندة بتاعت السنة
و كتبت فيها براجراف كامل عن عودة تنظيم الاخوان للظهور
" هسيبلكم جزء من البراجراف سكرين "

ناس ساعتها استغربت .. اخوان ايه اللي بتتكلم عليهم
قولتلكم انا مبكتبش كلممممة واحدة عشوائية 👌🏻

📌 انهاردة اللي قولته بالحرف بيحصل
التنظيم مش اعيد احياءه في مكان واحد
لأ يا فندم في 3 اماكن عليهم العين
🔘 هبدأ بالسودان :
لأنها البؤرة الاكثر تعرض للخطر حاليا
🔹اجندة الاخوان في السودان انهم يوصلوها للتقسيم .. و يحيدوا قدرات الجيش
عشان تعلي قدرات الدعم السريع
نوصل لابادة
فيكون الحل التقسيم
و ده اللي حصل بالحرف 👌🏻👌🏻

📌 مسعد بولس في اخر جلسة لمجلس الامن بخصوص السودان اللي هي في اخر اغسطس
طالب بمنع التسليح عن طرفي النزاع .. و ان اي دولة يظهر انها تتورط في تسليح اي من الطرفين توقع عليها عقوبات
▪طب انت يا عم بولس يوم 25 اغسطس 2026 افريكان انتليچناس منزلة تقرير طويل عريض فيه تفاصيل علاقة اسرائيل بحميدتي
و ان حميدتي " و ده بشهادة 2 من المنشقين عنه اللي سلموا نفسهم " قبل ما تبدأ الحرب الاهلية
قابل مسئولين من الموساد في وجود السفير البريطاني في تشاد و اغندا .. في العاصمة الاوغندية يوم 22 ديسمبر 2022
و ان عدد اللقاءات كان 23 لقاء
من 22 ديسمبر 2022 الي 17 مايو 2023
و اندلعت الحرب في ابريل 2023 .. و خشي التحرك خارج السودان
ف كان بيلتقي بأجانب بيض البشرة داخل مقره و كانوا بيدخلوا من الحدود التشادية 👌🏻👌🏻
▪ المسيرات و التسليح البريطاني 🤔
▪المرتزقة الكولومبيين اللي بيتجندوا من خلال شركة الامن و الحراسات البريطانية الموجودة في تشاد " ​ETS Risk Management "
هتقولي بس اخر تقارير صادرة من بريطانيا بتتهم الامارات وراء استقدام المرتزقة
هقولك لو الامارات بتعمل ده ف بالشراكة مع بريطانيا بقا
لأن الشركة دي مرتبطة ارتباط وثيق بالاستخبارات البريطانية MI 6 و ده يعلمه القاصي و الداني
ف الاتهام ده لا محل له من الاعراب بقا 🤷🏻‍♀️
اضف علي ذلك ان نفس الشركة هي اللي متولية الحراسة لالافراد الاسرائيليين في بريطانيا و فرنسا سواء دبلوماسيين او رجال اعمال
و بتحظي بنصيب جيد من تبرعات رجال الاعمال هؤلاء 👌🏻
▪قصاد الاطراف دي مع الدعم
اللي بيسلح الجيش السوداني
مصر 🤷🏻‍♀️
و حديثا السعودية
يبقا هنا عشان اوقع عقوبات علي الجيش السوداني .. بالتبعية لو ثبت تسليحه من جهة هوقع العقوبات علي الجهة دي 👌🏻

📌 و عشان يكون في مشروعية للعقوبات اخد عليها موافقة مجلس الامن دون اي فيتو
لازم اثبت ان الجيش ده استخدم سلاح محرم دوليا
🔹 هل يقدروا يثبتوه 👈🏻 اه يقدروا لأنه حقيقة
لأن في 2024
كتيبة البراء بن مالك .. كتيبة البنيان المرصوص .. لوء حماة العقيدة
فعلاااا استخدموا اسلحة محرمة دوليا
▪مين دول يا فندم 👈🏻 دول تشكيلات الكتايب التابعة للجيش السوداني و لكنها اخواااان 🤷🏻‍♀️
▪طب اشمعني دول تحديدا اللي يستخدموا سلاح محرم دون عن كتايب باقي الجيش السوداني 👈🏻 تعليمااااات من برا .. تعليمات تلقاها التنظيم الدولي من اللي مشغلنهم .. اعطوها لفرع التنظيم في السودان

يعني البرهان لما بينكر معرفته بقصة السلاح المحرم و الكلور
و ياسر العطا رئيس الاركان اما بيقول بفحص اوامر القتال لم نجد امر باستخدام اي سلاح غير المألوف محرم او غير محرم
مش بيكدبوا
هما فعلا ميعرفوش
لأن اللي اصدر الامر هو التنظيم الدولي اللي المرشد بتاعه ظابط في ال MI 6 👌🏻

🔸ليه يا چيلان بريطانيا مستقتلة كده علي تقسيم السودان 🤔
هي مين يا عزيزي بريطانيا 👈🏻 احد اوجه الصهيونية العالمية
" و لا انتوا مصدقين حوار ان بريطانيا و اسرائيل واقعين مع بعض 🙄 .. و ربنا ازعل 🙄 "

في مجموعة نقط :
▪تحكم الصهيونية في احد الممرات المائية 👈🏻 باب المندب
عن طريق تواجدها في بورتسودان
▪الدهب السوداني
و ده يقدر يحل كل المشكلات الاقتصادية في بريطانيا و ينقذ المملكة التي لا تغيب عنها الشمس من السقوط الاقتصادي المدوي
▪النفط السوداني
قادر علي تغذية جهتين
الجهة الاولي اسرائيل : لما تركب الدعم السريع علي حكم نصف السودان هتقدر تاخد منه نفط شبه مجاني زي ما بتعمل مع سيلفا كير " بيشتروا البرميل ب 32 دولار "
الجهة التانية امريكا : تقدر تستحوذ علي نفط النصف التاني عن طريق شيفرون
" ترامب لو عرف ان جنة المسلمين فيها نفط .. هيقدم علي حج القرعة بتاع وزارة الداخلية السنة دي 🙄 "

ف انهاردة انت امام دولة احد اهم اذرع تقسيمها 👈🏻 الاخوان
و الوجه اللي ظهروا بيه انهم ظباط جيش
و من شريحة الشباب
ف احنا بنقدم نفسنا علي اننا قادرين علي تقديم قائد شاب قوي من الجيش يحكم النصف السوداني 👌🏻

▪الكلور اللي بيتكلموا عليه مصدره 3 دول مش مصر فقط
طب ليه مسعد بولس قال مصر بس
مجابش سيرة اوغندا و اثيوبيا 🤔
عشان يقولك انك ملطوط
ف هتقعد تقولي لا للتقسيم و خط احمر و خط اخضر
هديلك الخط الازرق زراق النيلة و اوقع عليك عقوبات
" علي بلاطة كده عشان انا مليش في تزييف الواقع و انتوا عارفني كويس 👌🏻"

🔘 اليمن :
لو انت متعرفش
ف انا بقولك ان هناك حرب عسكرية تدور في اليمن
بين القوات الحكومية اللي بتدعمها السعودية و بين الحوثي " اللي مدعوم من كل الحبايب 😏"

و بناءا عليه الحوثي قصف 4 مناطق سعودية و تسبب عن مقتل 73 و عشرات المصابين منهم ناس حالتهم خطيرة

📌 لكن الجديد بقا انهاردة
ان القوات الحكومية اعلنت عن تعطيل الاخوان المسلمين في تعز غلق المعركة
و انها رافضة تنهي الحرب دي
و عايزة تسيب جبهة القتال مفتوحة
ده مش كده وبس
الاخوان لازم يعلوا علي نفسهم في الوساخة 🤷🏻‍♀️
القوات الحكومية اكتشفت ان الاخوان اللي طلبوا الانضمام لهم في القتال .. هما الجواسيس اللي نقلوا لقوات الحوثي اماكن تمركزات القوات الحكومية في مرتفعات سوفتيل في شرق تعز
و اللي الحوثي أبادهم بصواريخ باليستية نسف وجودهم
" يا اخي الحوثي ده صواريخه غريبة جدا 🤔
قصف اسرائيل بعشرتلاف وشخروميت صاروخ كلهم نزلوا في الفاضي ومفيش صاروخ اصاب اهداف لا مينا و لا مطار و لا سوبر ماركت بتاع بقالة حتي ... انما عرف ينشن علي القوات الحكومية اليمنية 🤔 "

📌 ليه يا عزيزي الاخوان مصلحتها الحرب تفضل شغالة و اليمن عايشة في المدعكة دي 🤔
السبب 👈🏻 لعبة الممرات المائية اللي بيلعبها اسيادهم
لو اليمن استقرت
و تم القضاء علي الحوثي
هترجع السيادة علي باب المندب لحكومة شرعية في بلد مستقر
و ده ضد مصالح الصهيونية طبعاااا
ف لازم الحوثي يستمر
عشان الفزاعة تفضل مستمرة
و الاخوان بتساعد الحواثي في الاستمرار 🤷🏻‍♀️🤷🏻‍♀️

🔘 مصر " اااه ام الدنيا بقا " :
و دي لازم بيبقا لها أچندة فاخرة من اللي متغلفة بالدهبي دي 🙄

♦انا قولتلكم و حذرتكم في 3 يناير
ان شغل شعار " و اعدوا " و المصحف مع المسدس
و الكلام ده مش هيستقطب حد .. و مش هيفتح لهم باب الظهور تاني
عشان القالب ده اربط في أذهاننا بالارهاب 👌🏻
🔹 طب نلتف علي الصورة الذهنية دي ازااااي 👈🏻 بوجوه جديدة ب اهداف جديدة

ف يظهر عندنا شباب و شابات
قبل اساميهم فيه لقب علمي " الباحث الدكتور .. البشمهندسة "
في صورة المصري اللي بيكشفلك الفساد عشان هو خايف علي البلد 👌🏻

خلينا واضحين
" ما هو اول خطوة لعلاج المرض .. اني اعترف اني مريض فعلا 🤷🏻‍♀️"
▪هل مفيش فساد
لا يا فندم
البلد بتعوم في بحر فساد
و مش فساد عادي .. فساد بروماكس
بيقوده حزب مستقبل وطن مع الحكومة
يعني لو الحزب الوطني هو ال 6200 اللي انبهرنا بيه ده و بشكل الدمعة
مستقبل وطن ده الايفون البروماكس 🙄🙄
و رجالته خاربنها في كل حتة و كل المؤسسات ... يا بيه انت برلمانك نفسه تم عمله بالفساد الفج 🤷🏻‍♀️🤷🏻‍♀️

ف العيال دي نازلين بالجديد منه :
▪مستندات رسمية من جهات حكومية
▪وثائق متعددة
▪فويسات و فيديوهات
▪ارقام تليفونات صحيحة لظباط شرطة و موظفين كبار و رؤوساء مجالس ادارة و برلمانيين واعلاميين

الوثائق و المستندات فيها حاجات صحيحة و فيها حاجات مزيفة بس معمولة حلو علي ايد صنايعي 😎
" علي فكرة انا قولت اني مش هتتدخل في العركة الحقيرة دي و مازلت علي موقفي .. لكن ده مش معناه اني اعدي اي مستند و لا ورقة من غير ما اراجعه 😎"
📌 هل نجحوا في مهمتهم 🤔
للاسف نجحوا
لان اصلا الارض خصبة لانهم يزرعوا فيها اي زفت فوق دماغهم
و الناس قرفانة وجايبة اخرها
اي حد هيقولهم فلان ده حرامي هيصدقوه .. لأن الواقع بيقول اننا محاطين باللصوص " يا بيه انت معين وزرا عليهم قضايا اختلاس لم تنتهي بالبراءة بل انتهت ب رد الاموال المختلسة تحت ضغط حكومي 😒"

ف اللي بيلتف حواليهم حاليا مش اخوان
والعيال الصغيرة " مش اقصد الاطفال .. اقصد الشباب اللي احنا تعبانين فيهم "
بدأوا يرددوا مصطلحاتهم
احنا مش عايزين رئيس من العسكر و لا وزير من العسكر
شايف اللواءات و فسادهم
و تجلي الموضوع في حاجتين
▪سيستم المعاشات اللي بقالهم 9 شهور مش عارفين يحلوه .. سيستم ناسا لما حصله عطل صلحوه بعد 11 دقيقة و 19 ثانية 🙄
▪هروب لاعبي المصارعة من المنتخبات
و الكلام اللي كتبوه

في وسط الوقائع دي .. بيسربلك حاجات تانية مش صحيحة نهاااائي
بس بيصطادك بيها

🔸حكاية ارقام التليفونات دي بردو مش بريئة
هنزلك رقم ظابط شرطة و اقولك ده متورط في كذا كذااا .. و ده رقم مراته اللي بتعمل كذا و كذاااا
ف يقوم العيل من دول متزحلق
و ماسك الظابط و مراته
يلاااا يا اللي فيكم و عليكم
يسخن الظابط و انت بتقول ايه ياض يا ابن ال.... ده انا هجيب امك
و بيجيب امه
و الا يبقا خريج تربية موسيقية مش شرطة 🙄
نفس الحال مع اي شخصية

طب ليه 👈🏻 عشان لما يجوا
سواء قانوني او البشوات بيجاملوا الباشا زميلهم
و يترمي الشباب في السجن " ما دي تهمة يا بيه و لها محكمة و حكم في محكمة اقتصادية و غرامات كبيرة و حبس "
نلاقي بعدها بيومين حلقات منتشرة زي النار في الهشيم
وعناوين بقا :
الابرياء في سجون السيسي
نظام السيسي يعتقل شباب ليس لهم انشطة سياسية

و ده هيبقا واقع 🤷🏻‍♀️
الشباب اتسجنت و لا لهم في الطور و لا الطحين
و اما يطلع اب يقول ابني مش اخوان مسجون ليه .. كلنا هنتعاطف معاه و هننزل معاه عند القسم و في المحكمة
و لا اييييه 🤷🏻‍♀️
محدش بقا هيسأل و يعرف ان ابنه مسجون عشان اهطل 🤷🏻‍♀️

" شوف يا باشا انا بغششك السيناريو اهو .. و عليا النعمة عارفة انك هتتزحلق عنجهية و كبر 😒" .. مش انتوا .. مش انتوا الكلام ل حد عارف نفسه 😒

مفيش خطوة بيخطوها اي فرد من هذا التنظيم
الا و قد درسها الظباط بتوعهم كويس و عارفين هتسمع مع الناس و تؤتي أكلها ازاي علي ال short run و ال long run 👌🏻

📌 في ناس كتير علي الميديا بتناضل ضد الفساد
و بيتكلموا من منطلق خوفهم علي البلد و بمنتهي الشرف و الوطنية
و بتهاجم الحكومة نظرا لفشلها في ادارة البلاد و تردي الاحوال

الاخوان بقا داخلين بكتفهم يزاحموا معاهم
لاااا بكتف امك ده 🙄
لن يختلط الغث بالغيث ابداااا

انتوا هتفضلوا عملاء و خونة ما حيينا 👌🏻

يا ريت تفهموا اللعبة
وتاخدوا حذركم منها

هما مش عايزين يرجعوا للحكم .. الماتريكس خلاص مش هيسمح لهم ب ده تاني
لأنهم عروه و جرسوه في كل الدول اللي ركبوا فيها الحكم و خصوصا مصر
لكن عايزين يخلقوا حالة من الصراع علي السلطة .. الحالة دي كفيلة تشيع الفوضي
لما الفوضي يتم اشاعتها
ساعتها هتتنفذ في مصر اجندتها 👌🏻👌🏻

الرئيس نفسه عارف اللي بقوله .. انا قولتلكم انا مبكتبش كلمة عشوائي

و نجحوا يخلقوا الحالة دي :
▪و علي اساسها رجال مبارك بدأوا يظهروا في الصورة
بيسخنوا
اااه لو هيبقا في اطاحة و تغيير ف جحا اولي بلحم دبيحته
▪الحمدين و الطنطاوي بدأ يبقا لهم حس وصوت تاني
▪الاصوات بتاعت اخواتنا المحاصرين في القطااااع .. و الابادة
و ازااااي
الهدف 👈🏻 فتح الحدود
" هتقولي ما كده كده بيدخلوا من المعبر 😏"
لأ مش ده فتح الحدود اللي انا اقصده
هما عايزين فتح الحدود بالقوة
عشان يدخل ناس تانية خاااالص يفرضوا الامر الواقع 🙄🙄

▪هو مستهدف جيشك
ازاي اصلا ممكن اخد وثيقة فيها واقعة فساد من واحدة مبتقولش الا عسكر انجاس .. جيش فوزية

احنا مبقاش حيلتنا غيره و ملوش غيرنا 🤷🏻‍♀️🤷🏻‍♀️

كيسنجر في السبعينات كان بيقول تستند منطقة الشرق الاوسط علي مثلث قوة اضلاعه الجيش العراقي و الجيش السوري و الجيش المصري
و كان بينبه جولدا مائير ان مشروع بن جوريون صعب يتم في ظل وجودهم 👌🏻

▪ازاي ممكن تسمع من حد او تصدق ان الحد ده صاحب قضية
وهو كل دفاعه و ترويجه عن شعب مش شعبك و ارض متخصكش
ازاي تآمن لواحد بيشتم جيشه عشان غزة
و لا حتي عشان مكة نفسها

مبقاش دورهم ينازعوا علي حكم
بقا اچندتهم يضيعوا اوطان👌🏻

ومش بعد كل التعب و المجهود ده نفتح لهم عقولنا مهما ادعوا انهم خايفين علينا او انهم مننا 🤷🏻‍♀️🤷🏻‍♀️
و مهما كان حجم المعاناة اللي بنعانيها
و مهما كان حوالينا من خونة
ومهما كانت القرارات المستفزة
ف مش هنستجير من الرمضاء بالنار ابدااا
هنكمل في طريقنا
لكن مش هنسيب رصيف يمشي عليه اذرع الصهيونية 👌🏻

اتمني تكونوا فهمتوني

هنزلكم فيديو
فيه التسريبات اللي بجد بقا
اللي انتوا شوفتوها و عيشتوها 👌🏻👌🏻