🔵 #وثيقة_ملكية_الدولة:

انا مكنتش حابة افتح الملف ده نهائي لانه ملف مشبوه و مش مريح و مخيف
لكن بما ان بتسأل عليه
ف تمام 👌🏻👌🏻

📌 وثيقة ملكية الدولة هي قانون مشبوه اتعمل في 2025 يتيح انهاء صفة 👈🏻 المال العام الغير جائز التصرف فيه او بيعه او التفريط فيه " و ده اللي متعارف عليه في مصر من ايام قدماء المصريين "
الي ملكية خاصة للدولة
بموجبه يجوز بيع الاراضي بكافة صفاتها .. بيع الاصول بكافة صفاتها
و كذلك جواز طرحها للشراكة و حق الانتفاع و الاستثمار طويل الاجل سواء للمصريين او الاجانب

♦ليه القانون مشبوه
لانه اختزل الدولة في بندين
▪ البند الاول :خطة الحكومة و المنفعة العائدة ماديا علي الحكومة
و تحديد وجه الاستفادة من العائد في تخفيف عبء الدين
" وطبعا اللي اعد الخطة هو صندوق النقد الدولي .. و ده كافي بالنسبة لي اني يكون القانون بالوثيقة مشبوهين "
▪البند التاني : موافقة الرئيس

يعني القانون تجاهلنا گ شعب .. تجاهل الاجهزة السيادية و الاستخباراتية واعتبر موافقة الرئيس بديل عنهم .. تجاهل البرلمان " هو ملوش لازمة اه بس تجاهله "

ف بقت الدولة عبارة عن الرئيس و الحكومة
و انتقلت الملكية العامة لملكية خاصة بهمااااااا فقط 👌🏻

🔘 عشان اكون اكثر وضوح .. كل القوانين اللي تم تشريعها في البلد من 2018 لحد انهاردة قوانين مشبوهة
سواء جديدة او تعديلات
▪ قانون تملك الاجانب
▪ قانون الجنسية
▪ قانون الاستثمار
▪تعديل قانون الاقتراض
▪تعديل قانون البورصة و الاستحواذات

ف القانون 480 اللي تم تشريعه في 2025 لتحويل الملكية العامة لاملاك الرئيس و الحكومة يتصرفوا فيها كيفما شاؤوا و أينما شاؤوا ... ده قانون مشبوه و غير دستوري
لأنه تجاهل موافقة او عدم موافقة الشعب

♦لما القانون تم الموافقة عليه
ايه اللي حصل 👈🏻 الحكومة بدأت تحصر املاكها بقا عشان تتصرف فيها
بالبيع .. بالمشاركة .. بحق الانتفاع
المهم انها تجيب دولارات
ليه 👈🏻 عشان تسدد ديونها .. اللي انا گ مواطن لم استفد منها شئ
▪ليه لم استفد منها شئ 👈🏻 لأن جودة حياتي لم تتحسن .. و انزلقت طبقات ل أصل الي الفقر 👌🏻
و الحكومة فسخت عقدها الاجتماعي معايا من طرف واحد .. بدون ما تاخد رأي
و بقا التعليم و الصحة و الدعم مش مسئولية الحكومة
بس ان الحكومة تعيش في رفاهية و تغير عربياتها بموديل السنة و تقترض وتاخد عمولات و حوافز علي الاقتراض و تدفع 8 مليار جنيه ايجار مقرها في العاصمة لشركة العاصمة و تصرف مكافآت للمستشارين الفرد الواحد ممكن يتجاوز ربع مليون جنيه
ده مسئوليتك انت گ مواطن

▪ الحكومة مش هتصرف عليك من ضرايبك اللي انت بتدفعها
لأنها ملتزمة بسداد فوايد الديون
اللي ضرايبك كلها رايحة تسددها و كمان عندهم عجز 0.4%
• طب و اقساط الديون نفسها 👈🏻 لا .. دي هتبيع اصولك عشان تسددها
اللي هي مبقتش اصولك و لا املاكك .. بقت اصولها هي 👌🏻

ف لذلك انا بقالي سنة متجنبة الكلام في الملف ده
لأني يا اقول الحقيقة كاملة .. يا اسكت 🤷🏻‍♀️

♦نيجي للنقطة اللي انتوا بتسألوا فيها 👈🏻 ايه موضوع ضفاف النيل اللي هتتباع دي 🤔

وفقا لوثيقة ملكية الحكومة لأملاكنا گ شعب
ف الحكومة حصرت مواقع مميزة علي النيل
110 موقع في القاهرة و 82 موقع في الجيزة باجمالي 192 موقع
بإجمالي 745 فدان بقيمة 9 مليار دولار

▪ 3 مستثمرين خليجيين تقدموا لشراء 136 قطعة
تقدموا لمين 👈🏻 صندوق التنمية الحضرية
اللي بيتبع مين 👈🏻 وزارة الاسكان " اللي وزيرتها كان عليها قضية اختلاس و تربح سنة 2017 .. و لم يتم تبرئتها بل ردت الاموال المختلسة بضغط من وزير الاسكان وقتها مصطفي مدبولي .. هفضل اعيد و ازيد فيها لحد ما اموت لانه شئ غير منطقي 🤷🏻‍♀️"
الوزارة بتتبع مين 👈🏻 الحكومة اللي هي الارض دي املاكها بموجب قانون 480 و الوثيقة

يعني وفقا للقانون اللي اتقيف .. موقفهم سليم و زي الفل 👌🏻

📌 مين المستثمرين الخلايجة دول :
شركات تابعة للصناديق السيادية
في
دولة قطر
دولة الامارات
دولة السعودية
" هي قطر و الامارات بقوا دول امتي .. مش كانوا دويلات
ااه فعلا 👈🏻 قبل ما يشتروا ارض مصر و يتوسعوا حدوديا عندك 👌🏻 "

📌 هل قيمة ال 9 مليار دولار دي قيمة عادلة للارض دي كلها
▪ لا طبعا
هو مين اصلا اللي بيقيم 🤷🏻‍♀️

لكن ممكن تعرف القيمة ازااااي 👈🏻 احسب قيمة المتر السكني في المناطق دي للوحدات السكنية المطلة علي النيل
حسبة كبيرة كده عملتها انا
طلع الاجمالي 32 مليار دولار .. شيل 10 مليار دولار تكلفة مباني و بنية تحتية
يتبقا 22 مليار دولار
مش 9 مليار دولار خاااالص

بس مننساش العمولات و الرشاوي و الاكراميات اللي محسوبة من قيمة الارض لكن مش ظاهرة في التقييم
اومال الناس دي هتنيم ضميرها و تبيع وطنها مجانا .. لازم المنوم يكون يستحق 🤷🏻‍♀️

📌 هل كل الفدادين دي هتتباع بيع نهائي
لأ .. في اراضي التابعة لوزارة الاسكان هتتباع بيع نهائي
و الفدادين التابعة لصناديق اخري زي صندوق مصر السيادي و التابعة لبنك الاستثمار القومي
معروضة للشراكة مع المستثمرين

📌 طب حصيلة البيع بقا هتروح فين
هيتسدد بيها عجز موازنة الديون

يعني مش هنعمل بيها مصانع مثلا و نشغل الناس
عارفين 9 مليار دولار يبنوا كام مجمع صناعي
🔸هديكم نموذج : كيما 2 بتاع الاسمدة
ال 9 مليار دولار هيبنوا 12 كيما
▪ بطاقة انتاجية 14400 طن امونيا .. و 19000 طن يوريا يوميااااا
▪هيوفروا 23 الف فرصة عمل ثابتة
و 62 الف فرصة عمل بتعاقد
و 117 الف وظيفة مرتبطة خدمية
▪لما انتج الكميات دي يوميا
يبقا شهريا
هيكون عندي
120 الف طن امونيا فائض جاهز للتصدير
سعر الطن 770 دولار " انهاردة "
و 400 الف طن يوريا فائض جاهز للتصدير
سعر الطن 450 دولار

اجمالي العائد الشهري للتصدير 272.5 مليون دولار
يعني سنوي 3.2 مليار دولار
في 3 سنين يبقا 9.6 مليار دولار .. استرديت التكلفة و كسبان 600 مليون دولار كمان 🤷🏻‍♀️🤷🏻‍♀️

عملت مصانع .. شغلت الناس .. رفعت من مستواهم المعيشي .. كفيت احتياجات السوق باسعار رخيصة .. صدرت و قللت العجز في ميزان المدفوعات

ايه بقا انا گ مصر هستفيده من ام الابراج و الفنادق و البلوكات الخرسانية و الزفت فوق دماغكم و دماغ اللي شار علينا بيكم 🤷🏻‍♀️🤷🏻‍♀️

و لااااا اي حاجة
غير نزع ملكية ضفاف النيل من المصريين و نقلها لفئة معينة و مش مصريين كمان 🤷🏻‍♀️🤷🏻‍♀️
بلد بيدير اقتصادها واحد بتاع اسمنت و خلاطة .. هتبقا دولة صناعية بأمارة ايه ما لازم تبقا مقاول .. اتيتيود المعلم هريدي ابو الهدد بتاع فيلم الراقصة و الطبال 🤷🏻‍♀️🤷🏻‍♀️

و هياخدوا ال 9 مليار دولار يسددوا بيهم اعباء الدين في موازنة 2027 و بعدين في 2028 محتاجين يقترضوا 41 مليار دولار

هتبيعوا ايه بقا .. كلاوينا ده اللي هيتفضل في البلد اصلا 🤷🏻‍♀️🤷🏻‍♀️

" زي طرح المطارات للقطاع الخاص .. تمام
هيطوروهم و يشغلوهم و يدفعوا للحكومة قيمة عقود التشغيل بالدولار
حلوووو
هناخد القيمة دي نودوها فيييين بقاااا 👈🏻 لسداد عبء الدين
بردوووو 😳 "

و اللي يكيدك يا اخي و يركبك المرض ان يقولك ايه : القرار قبل ما يتاخد بيندرس 10 مرات 🙄

10 مرات و أستك 😒

📌 هل الجزر النيلية و المحميات لها نصيب في الكارثة دي
▪الجزر مش كلها محميات
المحميات لا يجوز التعامل عليها
انما كافة الجزر بعد ذلك املاك دولة بالتالي يجوز التصرف فيها بالبيع او حق الانتفاع او الاستثمار المباشر
▪زي جزيرة الوراق و امبابة
بموجب القانون 480 يجوز نزع ملكية الاراضي من مالكيها
و تخضع لما يسمي الخطة الحكومية لتطوير الجزيرة
و دي شراكة بين الحكومة و بين مستثمرين
الحكومة بتشارك بالارض .. و المستثمرين هيتكلفوا البنية التحتية و الانشاءات للفنادق و المنتجعات السياحية اللي هيتم انشاءها فيها
و توزع الارباح بين الحكومة و المستثمر وفقا للنسب التقيمية

🔹الفنادق مش هتتباع .. هتكون مشروعات تدر دخل ثابت
انما المنتجعات هتتباع وحدات سكنية
وطبعا قانون تملك الاجانب هيتيح لاي حد انه يشتري 👌🏻

وثيقة ملكية الدولة اعدها إبليس شخصيا .. و حطها في اطار جميل انها هتجيب نهر دولارات نعوموا فيه
" و روجتها شيطانة و اخدت مكافأتها منصب براتب مليون ونص شهريا 🤷🏻‍♀️🤷🏻‍♀️ .. و اقامة في نيويورك "

و دي مش حقيقة .. مفيش منها عائد مستدام
دي تفريط في حقوق و املاك ومقدرات الاجيال الحالية و الاجيال القادمة
و ده مش من حق حد

♦و تيجي انهاردة تكلمني عن اللي الامارات بتعمله يؤذي امنك القومي
الله 🤔
بيعتلها نص البلد ليييييه يا فندم
السواحل و الاراضي الزراعية و المجمعات الصناعية الغذائية و الادوية و الفنادق و الاراضي الصحراوية و المستفيات و المعامل ومحطات الكهربا
و لسه هتديها مطارات و فدادين زراعية و فدادين علي ضفاف النيل

يا باشا انت عملت للمواطن الاماراتي اللي معملوش الشيخ زايد الكبير نفسه 🤷🏻‍♀️

▪الاعلام المناوئ و اللي مولوا الارهاب و دعموه هيتحاسبوا
الله 🤔
قطر اخدت فنادق اسوان كلها
ده هشام طلعت اخد فندق بطلوع الروح و دفع تمنه رشاوي 🤷🏻‍♀️
و الديار القطرية لانشاء مدن في علم الروم و البحر الاحمر

امن قومي ايه و بتاع ايه
احنا هنهزر 😒😒

يا حبيبي الامارات اللي انت زاقق عليها اليوتيوبر و الفيسبوكية يشتموا فيها انهاردة
انت بتشتري منها قمحك اللي هي زرعاه في ارضك .. لو قرر يصدره لغيرك هتعمل ايه🤷🏻‍♀️🤷🏻‍♀️

و وحياااااة امك
بلاش عنتريات حنجورية
و ناخد ارضناااااع
دي مبقتش ارضك .. انت قابض تمنها و التحكيم الدولي يدفعك غرامات كمان

لو قرروا يبيعوا انتاج محطات الكهربا بالاسعار العالمية مش التفاضلية
هتعملهم ايه 🤔
ولا اي حااااجة 🤷🏻‍♀️🤷🏻‍♀️

وثيقة ملكية الدولة مفيهاش اراضي و سواحل بس
لا دي مليانة من خيرات ربنا
وكلها موجهة للديون 👌🏻

هنقول ايه بقا
ياما صرخنا آن الاوان تبعد عن صندوق النقد
لكن أسمع إن أسمعت حيا

اكاذيب بتتداول
القرارات بتندرس 10 مرات .. النمو بيزيد .. الاقتصاد بيتحسن
و كل يوم خسارة جديدة في مكان شكل 👌🏻

📌 طب احنا في ايدينا ايه نعملوه 🤔
ولا حاجة يا فندم
و لا اجهزة سيادية و لا اجهزة كهربية
عشان متتعبوش قلبي بالسؤال المعتاد
وثيقة ملكية الدولة و القانون 480 بيحصن الملاك الجدد للدولة ضد اي تحرك او تدخل لا قانوني و لا غير قانوني

دي ناس فاهمة انها مبتغلطش ابدا
و لوحدها اللي عارفة المصلحة

" قُلْ هَلْ نُنَبِّئُكُمْ بِالْأَخْسَرِينَ أَعْمَالًا * الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا " صدق الله العظيم

🔵 الناس اللي سألتني عن مشروع 2050 و البوليفار

اللينكات اللي لقتها علي موقع الامم المتحدة و الهابيتات فيها حاجات محذوفة و حاجات متأرشفة
و اكيد انا مش هعتمد مستند ملوش اصل علي الموقع الرسمي .. حتي لو اتحذف 👌🏻

♦ كل اللي اعرفه عن المشروع ده قديم
ان في مشروع اتعرض سنة 2004 علي مصر من الامم المتحدة
يحول وسط البلد و القاهرة الخديوية او التاريخية
لمقر مالي عالمي فيه شركات كتير و جنسيات كتير و الشركات دي تتملك متأجرش

و القاهرة التاريخية تتحول لمزار متحف مفتوح " انا معرفش ايه مصطلح القاهرة التاريخية ده .. هي البلد كلها تاريخ بس جايز ده مصطلح مقصود بيه مناطق معينة "
لكن بشرط 👈🏻 ان اللي عايز يجيب اثاره و يعرضها عندنا يبقا تمام
و مفيش حاجة اسمها دي اثار مصرية و غير مصرية " علي اساس ان الثقافة تشملها فكرة تعميم الحضارات الانسانية "

🔸في المقابل هابيتات كانت هتدفع مبالغ كتير گ منح اقتصادية
سمعت وقتها ارقام متضاربة
يعني 6 مليار دولار .. و 10 مليار دولار
و كان اكبر رقم 30 مليار دولار و ده كان يعادل ديون مصر وقتها

انا عرفت بالمشروع ده و سمعت عنه سنة 2006 لما اترفض
📌 لأن الحكومة سنة 2006 و بعد الدراسة و التدقيق " علي حسب ما قالوا لليونسكو وقتها "
انها رفضت المشروع بأكمله
لانه يمس الامن القومي و ذلك بعد استشارة كافة الاجهزة
و اللي بلغ قرار الرفض للامم المتحدة كان اللوا عمر سليمان رحمه الله بنفسه

و قال ان المشروع مينفعش في مصر حفاظا علي الامن القومي
و ده عرفته من احد الوزراء بنفسه وقتها و كان من المعترضين
علي فكرة كل الوزراء وقتها صوتت بالرفض ما عدا واحد فقط مش متذكراه جايز وزير السياحة او المحليات
مش متذكرة حقيقي

سمعت انه من ضمن مخططه ضفاف النيل شرق و غرب في الجيزة و القاهرة
لكن مسمعتش عن الجزر و لا مثلث ماسبيرو و لا المنيل الحقيقة

و سمعت عن تحويل منطقة وسط البلد كلها لمشاع تمليكي و تبقا حي مال و اعمال زي وول ستريت
لكن لم اطلع او اسمع عن شوارع بعينها 🤷🏻‍♀️🤷🏻‍♀️

♦انا معرفش اللي اتحذف و اللي اتأرشف هل لاخفاءه و لا لانعدام اهميته الحالية
بالتالي المعلومات كده ناقصة بالنسبة لي
ف لاااا اقدر اتكلم فيها و لا اكون رأي


مقدرش اقول ادانة او تبرأة
مادمت لا املك معلومة كاملة
فيكون الافضلية لعدم إلقاء التهم 👌🏻

📌اه لما تحط البازل جنب بعضه .. عقلك ممكن ينسج الاحداث
لكن مادامت بدون دليل و مستند بالنسبة لي ف بيكون في مكان الشبهة
و انا لو هموت مرميش حد بالشبهات

مش معني اني بكره مدبولي اني ارميه بالباطل او ألقي تهم جذافا حتي لو صحيفة تهمه عندي اطول من الدائري

لا طبعي و لا اخلاقي
مش عشان حد
ده عشان نفسي
محدش يستاهل إني اتحمل وزره امام الله .. العمر رايح مش جاااي 🤷🏻‍♀️🤷🏻‍♀️

و زي ما بكره اني اتظلم او اشوف حد بيتظلم
فمستحيل هظلم حد
مهما كانت كراهيتي له 👌🏻👌🏻

انا اسفة اني معرفتش افيدكم 🙏🏻🙏🏻
اكيد في حد تاني أجدر مني يفيدكم
و مش حاجة اتكسف منها اني اقول معرفش .. بالعكس اعترف بجهلي في موضوع احسن ما أضل نفسي و أضلل غيري

ف بعتذر و الله 🙏🏻🌺

🔵 #عبدالناصر_عقدة_المنافقين_والفاشلين:

الواحد لما بيكبر في السن و يقترب من الموت .. بيكون خايف من لقاء ربنا والحساب
فبيكون حريص في كلامه
انه ميكذبش .. مينافقش .. ميضللش حد
و لما كمان يكون صاحب تاريخ محترم .. يحاول انه يحافظ علي التاريخ ده و يترك سيرة حسنة

انما انه يطلع عقده العائلية علي اشخاص ماتت .. و يا ريته بالحق .. ده باطل و زور و بهتان
ف يبقا حقيقي حاجة تكسف 🤷🏻‍♀️🤷🏻‍♀️

♦بيقولك بقا يا سيدي ان تعويم الجنيه و خفض قيمته بالشكل الرهيب ده
سببه جمال عبد الناصر 🤷🏻‍♀️🤷🏻‍♀️

لا هو سببه طومان باي او قنصوة الغوري بعد معركة مرج دابق ... راح واخد قرار تعويم الجنيه و شحت البلد كلها و سلمها لسليم الاول في معركة الريدانية 🙄

🔹اصل احنا منبقاش مصريين لو لم ننافق الحاكم الحالي
و نقوله انت متغلطش ابدا .. انت من الموحي إليهم
اللي قبلك هما الغلط
انما انت فل
مسح الجوخ و الرياء للحاكم ده اكتر حاجة وصلتكم للفشل السياسي و الاقتصادي اللي واقعين فيه

📌 سيادة السفيرة تدمير العملة سببه 5 تعويمات " و بالمعني الادق تحرير واحد و 4 تخفيضات عملة بغرض تدميرها "
▪ التعويم الصحيح الوحيد في 2016 : لتلافي خطأ تمويل العملة من ايرادات قناة السويس كما كانت تفعل الحقبة المباركية
من 8.88 ج الي 16.25 ج
و ده كان زيادة عن القيمة العادلة للجنيه وقتها اللي كانت 13.90 ج
لكن اخضاع الجنيه للسوق الحر للصرف خفض قيمته بمقدار 2.35 ج ثم عاد لمستويات 15.7 ج
▪قرار خفض العملة بأمر صندوق النقد في 21 مارس 2022
و قفزة العملة من 15.70ج الي 18.5 ج
و ده بسبب خطأين اقتصاديين مستمرين معانا لحد انهاردة و مكملين للابد
• خروج الاموال الساخنة بعد اندلاع الحرب الروسية
لأن مفيش اقتصاد محترم اساسا يجعل الاموال الساخنة نقطة ارتكاز الا الاقتصادات الريعية " العويلة يعني "
• العجز الدائم في ميزان المدفوعات و مع توقف سلاسل الامداد اسعار الواردات زادت
فاتسعت الفجوة
‏( ومفيش حد اصلا بيتجه لخفض العملة و هو وارداته اعلي من صادراته .. لأنه بيدمر موازنته
يتخذ القرار ده الصين .. الهند .. تايوان .. روسيا
انما مش ميزان مدفوعات وارداته 3 اضعاف صادراته 🤷🏻‍♀️‏)
▪تخفيض 27 اكتوبر 2022 :
الدول اللي بتلجأ لخفض العملة مرتين في السنة هي دول فاشلة اقتصاديا
" حتي افتحي كتاب القاتل الاقتصادي كده
و هتلاقي اعترافات بخطة افشال الدول و تركيعها اقتصاديا هو الاتجاه المتوالي لخفض عملتها .. و الوصول بها لمراحل انفجار الاسعار في السنة الواحدة عدة مرات 👌🏻‏)
و التخفيض ده كان بلا سبب اقتصادي و لا وجود ازمة
هو بس اتفاق جديد مع صندوق النقد .. لرفع قيمة القرض 3 مليار دولار كمان " ملهمش اي تلاتين لازمة و لم تستفد منهم مصر دولار وااااحد حتي "
اشترط الصندوق رفع الدولار ل 24 ج 🤷🏻‍♀️
▪ و لأن مستوي 24 ج لم تحقق الانهيار المطلوب لمستوي معيشة المواطن
في 4 يناير 2023
و نتيجة ضغط الاستيراد " لأننا مش اقتصاد صناعي .. احنا اقتصاد ريعي "
و من اجل صرف شريحة 975 مليون دولار
اشترط الصندوق خفض العملة ل 33.5 ج
و ثبت الجنيه عند 30.80 ج بفضل تحويلات المصريين من الخارج اللي انقذت السوق
لان الدولار كان رايح ل 37 ج 🤷🏻‍♀️🤷🏻‍♀️
▪و جاءت الضربة الكبري للجنيه
بعد مخطط قذر اشترك فيه ناس من داخل الدولة .. لخلق سوق سودا
و ساهمت حكومة مدبولي في خلق تقييمات دولارية مختلفة
زي :
• دولار الدهب
• دولار الحديد " اللي تحول الان لدولار العقار "
• دولار السيارات
• دولار الادوية
و تعنتت البنوك بفعل فاعل علي اتاحة الدولار للمستوردين بحجة نقصه
مع ان طول 2023 السياحة كانت جيدة و ايراداتها عالية .. ايرادات قناة السويس كانت عالية جدااا .. صادرات الغاز و تحصيل المقابل كاش و بصفة يومية
يعني الدولار تم اخفاءه بفعل فاعل 👌🏻
بعد معاونة كل تلك الاطراف
و لصرف شريحة 975 مليون دولار من القرض
تم اجبار مصر في 6 مارس 2024 الاسود علي تخفيض قيمة العملة 45% من قيمتها
في اكبر انخفاض شهده الجنيه المصري في تاريخه
ليتأرجح بين 48.5 و 50 ج 👌🏻

بعد دخول مبلغ 15 مليار دولار كاش الي خزينة البنك المركزي جراء صفقة رأس الحكمة في يوم واحد
ادت لخفض دولار السوق السودا من 69 ج الي 37 ج
و كان منخفض اكتر لولا تدخل صندوق النقد و البنك المركزي لانقاذه 🤷🏻‍♀️

و المعجزة اللصوصية ان محدش عارف لحد انهاردة ال 15 مليار دولار دول راحوا فين
عشان يتم ذلنا و نطأطأ رؤوسنا و نحن صاغرين امام لص زي جهاد ازعور
و ندمر عملتنا الوطنية في مقابل 975 مليون دولار 🤷🏻‍♀️🤷🏻‍♀️

مش مكتفيين بتزييف الماضي .. بتزيفوا الحاضر اللي احنا عايشينه
ده ايه البجاحة دي

اعتقد يا سيادة السفيرة
انك محتاجة طبيب معالج لأن ربما تنتابك نوبات خرف مرتبطة بعامل السن
نصيحة تناولي اوميجا 3 و ماغنيسيوم 👌🏻

الجنيه المصري تم تدميره بدءا من 2018
ومستمر تدميره
لانه عايش علي جهاز التنفس اللي اسمه الاموال الساخنة و فقد معامل الاتاحة 👌🏻

عبد الناصر مات من 56 سنة
قبل ما يستشهد بقا
مسلم البلد ميزان مدفوعات فيه فائض 46.9 مليون جنيه " عشان التقييم كان بالجنيه مكنش بيربط الجنيه بعملات "
كانت الصادرات 300 مليون جنيه
و الواردات 254 مليون جنيه تقريبا "

📌 الجنيه في عهد عبد الناصر كان ب 2.5 دولار
لذلك لم تقوم القوائم النقدية بعملة هزيلة 🤷🏻‍♀️
عبد الناصر مات و سايب لكم الجنيه ب 2.8 دولار .. الدولار كان ب 35 قرش 👌🏻

و ده ليه 👈🏻 عشان النصباية الامريكية المسماة بصدمة نيكسون مكنتش لسه اتعملت

📌 طب القوة الشرائية للجنيه كانت ضعيفة و لا قوية 🤔
كانت قوية جدااا
لييييه 👈🏻 لأن كان في قيود بتحمي العملة
▪ القيود الصارمة علي الاستيراد
اي سلعة مستوردة لها بديل محل يتم وقف استيرادها
▪القيود الصارمة علي خروج العملة من البنوك
▪العقوبات الكبيرة لمن يثبت تورطه في تجارة العملة و خلق اسواق موازية .. كانت بتصل ل 15 سنة مشدد
" تحبي اقولك مين بيتاجر في العملة حاليا عشان كده مبقاش في إلقاء قبض علي تجار عملة 🤔 "
▪السلع الاساسية المدعمة اللي كانت بتوفر للمواطن قدرة شرائية عالية
" الدعم ده مكنش من قروض .. ده كان من ايرادات الصناعة و التصدير
مكنش عويل عبد الناصر .. وكل يوم اربعاء يطل علينا يقولنا الدولة بتتحمل عبء الدعم كأن الدولة دي ورث الحجة امه اللي بيطلع لنا منه 😏 "
▪الحفاظ علي الغطاء الذهبي لاصدار العملة
‏( اييييه داااا 😳 مش عبد الناصر ضيع الدهب في حرب اليمن بردووو 🤔
هنقف كلنا قدام ربنا و هيقتص من كل واحد اتهم غيره بما ليس فيه 👌🏻‏)

♦ازاي عبد الناصر سابنا من غير ديون طيب 🤷🏻‍♀️
اللهم قرض الاتحاد السوفيتي لبناء السد العالي و اللي تم اسقاطه لاحقا
🔹 ابدا يا سيدي كان بيصنع و بيزرع و بيعمل دراسات جدوي
ف كان ماشي بالخطط المتوالية
• يعني يبني 5 مجمعات صناعية في نفس التوقيت
• المجمعات دي بتنتج بالتوازي مع البناء
• ياخد الانتاج يبيعه و يمول المراحل التالية من البناء
• فيزداد الانتاج يقوم يحقق فوائض تذهب لايرادات الموازنة

انما بقا لو قال لا معلش انا هعمل 20 الف مجمع صناعي مرة واحدة .. و اخلقوا تمويل لها .. و افتحوا الاقتراض علي البحري
كان نتيجة طبيعية ان ال 20 الف يفشلوا 🤷🏻‍♀️🤷🏻‍♀️

لكن هو بدأ بالصناعات التحويلية الكبري 👌🏻

مصنع كيما 1 بتاع عبد الناصر تم بناءه بدون و لا مليم اقتراض لا داخلي و لا خارجي
و اعتمد علي تكنولوجيا تحليل المياه من خزان اسوان لتوفير الطاقة
انتاجه 645 طن نترات امونيا يوميا .. تكنولوچيا الستينات
مصنع كيما 2 انتاجه 1200 طن يوميا نترات
و 1575 طن يوريا يوميا

و مازال بيسدد اقساط ديون بناءه

كيما 1 مش مجمع صناعي فقط
ده خدمي و سكاني و مدينة كاملة و كليات هندسة و طاقة و معاهد فنية و مدارس فنية تم تشييدها علي مساحة 946 فدان
صرفت علي انشاءها و دخولها الحياة ايرادات المصانع الاخري اللي كانت خلصت و انتجت 🤷🏻‍♀️
كيما 2 مساحة 55 فدان
بقرض ضخم 12 مليار جنيه من البنوك المصرية 👌🏻

ف الجنيه مكنش محتاج انه يتفرم عشان يرضوا يدونا قروض 🤷🏻‍♀️🤷🏻‍♀️

📌 ايام عبد الناصر كان في ميزانين مدفوعات :
ميزان بيحقق فائض .. و ميزان بيحقق عجز
و بعدين ينضافوا علي بعض
▪الميزان الاول :
الواردات و الصادرات من السلع الاستهلاكية
و دايما كان بيحقق فائض
علي الرغم من عدم وجود اكتفاء ذاتي من القمح " اللي هي مأساة المصريين الابدية "
لكن استدامة الفائض بسبب ان وارداتنا عمرها ما تعدت 50% من صادراتنا 👌🏻
▪ الميزان التاني :
اللي كان بيضاف فيه واردات تحقيق النهضة
زي السلع الرأسمالية و الماكينات و المعدات و الالات الثقيلة اللازمة لبناء آلاف المصانع و مستلزمات تشييد السد العالي

بالاضافة لفاتورة التسليح

و العجز ده كان بينخفض سنة بعد سنة لحد ما في سنة 1969 حقق فائض
برغم ظروف الحرب و شراء السلاح 🤷🏻‍♀️
لأ ده كمان كان في فائض موازنة 👌🏻

🔸طب دايما معروف ان اي دولة بتحارب صعب تحقق فوائض 🤔
ده يا حبيبي مش في الدول اللي بتصنع
و مصر كانت تملك عمالقة صناعية زي مجمع الحديد و الصلب مثلااا و مجمع نجع حمادي للالومنيوم اللي كان مش ملاحق علي طلبات قارة افريقيا و منطقة الشرق الاوسط كلها
و تطوير مجمع السكر في قنا المصانع التحويلية و اللي بردو مكنتش ملاحقة علي التصدير 🤷🏻‍♀️🤷🏻‍♀️

و ده اللي مخلي دولة زي روسيا برغم من تكلفة الحرب و العقوبات بتحقق فوائض 👌🏻👌🏻