«Үс Хатыҥҥа» Чурапчы түһүлгэтигэр биир дойдулаах ытыктабыллаах дьоммутун көрсүү сиэрэ-туома, Үрүҥ Тунах ыһыах алгыһын түһэрэн иҥэринии, оһуохай этиитигэр, дэгэрэҥ ырыаҕа, хомуска оонньууга, төрүт сахалыы таҥаска уо.д.а. күрэхтэр, Саха сиригэр биллэр-көстөр Чурапчы биһирэмнээх ырыаһыттарын кэнсиэрэ, салгыы спорт сахалыы көрүҥнэригэр күүрээннээх күрэхтэһиилэр тэрилиннилэр.

Туймаада ыһыаҕар Чурапчы улууһун түһүлгэтэ дьону-сэргэни көрсөр, түмэр ураты үтүө сиэрдээҕинэн-туомнааҕынан, ыалдьытымсах үгэһинэн биллэр. Түһүлгэбитин дьоһуннук киэргэтэн, үбүлүөйдээх киэн туттар дьоммут Социалистическай Үлэ Геройа Р.И.Константинов, олоҥхоһут П.М.Терютина-Ырыа Ымыычаан быыстапкаларын туруоран, кэлбит ыалдьыттары арыылаах саламаатынан, алаадьынан айах тутан Мугудай, Болугур нэһилиэктэрэ үрдүк тэрээһиннээхтик көрүстүлэр. Дьоһун-мааны ыалдьыттарбыт киирэ-тахса сылдьан, аймах-билэ дьоннорун кытта сандалыга атах тэпсэн олорон сэһэргэһэн ааһыахтара, кэнсиэр, спорт күрэхтэһиилэрин, култуура куонкурустарын астына-дуоһуйа көрүөхтэрэ.

Дьоннорун тэрийэн киллэрбит нэһилиэктэрбит баһылыктарыгар Н.И.Аммосовка, Р.Г.Васильевка, Болугур, Мугудай нэһилиэктэрин дьаһалталарыгар, Норуот айымньытын дьиэлэрин кэлэктииптэригэр барҕа махталбын тиэрдэбин!

Артем Дьяконов – победитель «Игр Дыгына»! Искренне поздравляю Артема, его большую команду и весь Кобяйский район с блестящей победой! Победа Артема Дьяконова действительно заслуженная: ведь в его арсенале уже были бронзовая и серебряная медали Игр, а теперь у него полный комплект медалей самых зрелищных и любимых якутянами соревнований!

Артем Дьяконов халыҥ хамаандатын, дьонун-сэргэтин, Кэбээйи олохтоохторун итиитик-истиҥник эҕэрдэлиибин!

http://max.ru/aisen_nikolaev

Туймаада ыhыаҕар оhуохай күрэҕэр биһиги улуустан кыттыбыт Пестряков Данил Михайлович Чурапчыттан аан бастакынан Дархан Этээччи сүүнэ аатын сүгэн, Гран-при хаһаайынынан буолбутунан эҕэрдэлиибин!

Улуу Туймаада хочотун ыһыаҕын добун оһуохайын күрэҕэр Дархан Этээччи аатын сүгүү улахан билинии уонна чиэс буолар.
Данил Михайлович улууспут оһуохай тылын этээччилэриттэн аан бастакынан бу үрдүк ааты сүгэҥҥин Чурапчыга оһуохай сайдыытын кэрэһилиир дьоһун олугу уурбуккар улахан махтал буоллун.

Эйиэхэ инникитин да бу курдук ситиһиилэр кэлэн истиннэр, Чурапчыга оһуохай тойуга дуорайа, түһүлгэтэ тэнийэ турдун!

Туймаада ыhыаҕар ыччаттар ортолоругар ыытыллыбыт "Бэргэн оонньууларыгар"
Мындаҕаайыттан Марк Захаров боруонса призёр аатын ылбытынан улуус салалтатын уонна тус бэйэм ааппыттан итиитик, истиҥник эҕэрдэлиибин!

Марк, эйиэхэ инникитин даҕаны үрдүк ситиһиилэр, кыайыылар-хотуулар кэлэ турдуннар, тапталлаах Чурапчыбыт үрдүк аатын өрүү дьоһуннук ааттата тур!

Биробиджан куоракка ыытыллыбыт Уһук Илин үөрэнээччилэрин спартакиадатыгар көҥүл тустууга Саха сирин хамаандата 2 миэстэ буолары ситиһиитигэр Чурапчыттан 41 киилэҕэ Фомин Иван 2, 48 киилэҕэ Яковлев Марат 2 миэстэ буолан, тус кылааттарын киллэрдилэр.

Уолаттарбытыгар Иваҥҥа, тренеригэр Сергей Иванович Санниковка, Маратка, тренеригэр Ануфрий Егорович Аржаковка бу үрдүк кыайыыларынан эҕэрдэлээн туран, инникитин өссө үрдүк ситиһиилэри, чыпчаал кыайыылары баҕарабын!

Улуус дьаһалтатын саҥа нэдиэлэтээҕи планеркатыгар өрөбүллэргэ буолан ааспыт Туймаада ыһыаҕар Чурапчы улууһа бары хайысхаларга бэлэмнээх тиийэн үрдүк тэрээһиннээхтик кыттыбытын бэлиэтээтилэр. Ол курдук ыһыахха Чурапчы улууһун талба талааннаахтара, сымсалара, бөҕөлөрө, талыы-талба олоҥхоһуттара, оһуокайдьыттара, тойуксуттара ох курдук оҥостон-бэлэмнэнэн тиийэн, илин былдьаһан кэлбит ситиһиилэрин иһитиннэрдилэр.

Туймаада ыһыаҕар Чурапчы улууһун түһүлгэтигэр үбүлүөйдээх киэн туттар дьоммут Социалистическай Үлэ Геройа Р.И.Константинов, олоҥхоһут П.М.Терютина-Ырыа Ымыычаан быыстапкалара турда. Чурапчы түһүлгэтигэр  биир дойдулаахтары көрсүү сиэрэ-туома, Үрүҥ Тунах  ыһыах алгыһын түһэрэн иҥэринии, оһуохай этиитигэр, дэгэрэҥ ырыаҕа, хомуска оонньууга, төрүт сахалыы таҥаска уо.д.а. күрэхтэр, Саха сиригэр биллэр-көстөр Чурапчы биһирэмнээх ырыаһыттарын кэнсиэрэ, салгыы спорт сахалыы көрүҥнэригэр күрэхтэһиилэр буолан аастылар. Ыалдьыттары сандалы тула олордон Мугудай, Болугур нэһилиэктэрэ үрдүк тэрээһиннээхтик көрсөннөр, кэлбит ыалдьыттар ирэ-хоро сэһэргэһэн, түһүлгэҕэ ыытыллар куонкурустары, кэнсиэртэри астына-дуоһуйа көрдүлэр-иһиттилэр. Планерка кэмигэр дьоннорун тэрийэн киллэрбит нэһилиэктэр баһылыктарыгар, Норуот айымньытын дьиэлэрин кэлэктииптэригэр, бары үлэҕэ кыттыспыт уонна ыһыах күрэхтэһиилэригэр улуус чиэһин көмүскээбит дьоҥҥо махтал, эҕэрдэ тыллара этилиннилэр.

Ол курдук, оhуохай күрэҕэр Пестряков Данил Михайлович Чурапчыттан аан бастакынан Дархан Этээччи сүүнэ аатын сүгэн, Гран-при хаһаайынынан  буолла. "Бэргэн оонньууларыгар" Мындаҕаайыттан Марк Захаров боруонса призёр аатын ылла. «Дыгын оонньууларыгар» улуус аатын мадьынылар Павел Друзьянов уонна Юрий Копырин чиэстээхтик көмүскээтилэр. Маны сэргэ Туймаада ыһыаҕар төрүт таҥаска, саха быһаҕын оҥорууга, чабырҕахха уо.д.а. ыытыллыбыт араас күрэхтэһиилэргэ улуус ситиһиилээхтик кыттыбыта бэлиэтэннэ.

Ааспыт нэдиэлэҕэ С.Ф. Гоголев аатынан Дьокускайдааҕы педагогическай колледжы бүтэрэн, дипломнарын туппут 16 специалист Чурапчы улууһугар үлэлии кэлэргэ сөбүлэспиттэр, өрөспүүбүлүкэҕэ Ыччат күнүнэн улууска ыччака аналлаах тэрээһиннэр ыытыллыбыттар.

Полиция отделын сводкатынан ааспыт нэдиэлэҕэ киирбит сайабылыанньаларынан үлэлэр  бара тураллара этилиннэ. Ол курдук арыгы иһэн баран уопсастыбаннай бэрээдэги кэһии, итирик туруктаах уруулга олоруу, суол быраабылатын кэспит суоппардар массыыналара штрафстоянкаҕа туруоруллуута уо.д.а. бэлиэтэммит.

Саҥа нэдиэлэ былааныгар “Илин” эко-парк бырайыагы олоххо киллэрии боппуруоһугар сүбэ мунньах, улуус депутааттарын уочарата суох мунньаҕа, Бэрэ учаастагар муостаны арыйыы, Дьиэ кэргэн күнүн, Бойобуой дьайыылар бэтэрээннэрин күнүн тэрээһиннэрэ, Кэбээйигэ Олоҥхо ыһыаҕар кытта барар улуус делегациятын атаарыы, Соловьев нэһилиэгин баһылыгын быыбарын ыытыы боппуруоһугар нэһилиэк депутааттарын сүбэтин мунньаҕа уо.д.а. киирдилэр.