Бүгүн Чурапчы нэһилиэгэ төрүттэммитэ 378  сылыгар аналлаах күн бырааһынньыктааҕы бырагырааматын иһинэн улуус киинин көҕөрдүүгэ мастары олордуу акцията ыытылынна. Чурапчы нэһилиэгэ 2018 сылтан Рекорд кинигэтин саҕалаабыта. Манна быйыл 2026 сылга биллэриллибит "Тупсаҕай эйгэ" сылын өйөөн, нэһилиэк 378  сылынан Чурапчы нэһилиэгин эр дьоно  уонна оскуола уолаттара көҕөрдүүгэ диэн 378 маһы аҕалбыттара. Ону П.Е. Барахсанов аатынан Култуура уонна сынньалаҥ пааркатыгар олордууга,  парламент спикерэ Алексей Еремеев, Чурапчы улууһун уонна улуус киинин салалталара, олохтоохтор кытыннылар, оҕолор быыстапкаларын уонна күһүҥҥү дьаарбаҥканы көрдүлэр-иһиттилэр.

Чурапчы улууһун баһылыгын бастакы солбуйааччы Рустам Данилов улуус дьаһалтатын планеркатын ыытта. Манна ааспыт нэдиэлэҕэ ыытыллыбыт үлэлэр, тэрээһиннэр түмүктэрэ, үүммүт нэдиэлэ соруктара чопчуланна. Ол курдук, ааспыт нэдиэлэҕэ Чурапчы улууһугар Ил Түмэн бэрэссэдээтэлэ Алексей Ильич Еремеев оробуочай сырыытын кэмигэр Сылаҥ нэһилиэгин олохтоохторун, «Спортивнай» түөлбэ олохтоохторун, Чурапчытааҕы физкультура уонна спорт судаарыстыбаннай институтун, Д.П. Коркин аатынан Чурапчытааҕы спортивнай интэринээт оскуола кэлэктиибин, устудьуоннарын кытта көрүстэ. Г.П.  Башарин аатынан Сылаҥ орто оскуолатыгар эбии тутуу (пришкольнай учаастак) хаамыытын, чочуобуна тутуутун, хапытаалынай өрөмүөҥҥэ наадыйар «Чуораанчык» оҕо саадыгар, ону кытта тутулла турар «Кыталык» оҕо саадын эбийиэгэр сылдьан, тутуу хаамыытын, баһаарынай чааһы миэстэтигэр билистэ, итиэннэ учууталлар балаҕан ыйынааҕы сүбэ мунньахтарын үлэтигэр кытынна. Маны сэргэ Чурапчы нэһилиэгэ төрүттэммитэ 378 сылыгар аналлаах нэһилиэк төрүттэммит күнүн тэрээһиннэрэ уо.д.а. ыытылыннылар.

Планеркаҕа улуус тэрилтэлэригэр, олорор дьиэлэргэ сылааһы ыытыы боппуруоһа болҕомто киинигэр тутуллан, үлэ салҕанан бара турара, нэһилиэк иһинээҕи автобуһу улуус балаансатыгар докумуонунан ылыы бу күннэргэ быһаарыллан эрэрэ бэлиэтэннэ.

Саҥа нэдиэлэҕэ Урбаанньыт күнүн көрсө улуус урбаанын эйгэтигэр аналлаах декаданы ыытыыга, “Ийэ тыл» айар бөлөҕүн үлэтигэр уонна үөрэх управлениетын кытта муниципальнай тэрилтэлэр структураларын, “Илин” экопаарка туһунан итиэннэ туризм эйгэтигэр үлэлиир урбаанньыттары кытта мунньахтар, култуура үлэһиттэрин балаҕан ыйынааҕы сүбэ мунньахтара буолуохтара. Улуус дьаһалтатыгар экологияҕа улуус стратегическай бырайыагар уонна улууска тырааныспар уонна энергетика инфраструктураларын сайыннарыыга туһуламмыт стратегическай бырайыакка анал мунньахтары таһынан Улуу сэрии сылларыгар Чурапчы холкуостаахтарын күүс өттүнэн Хоту көһөрүүнү кэриэстиир күнү тэрийиигэ итиэннэ өрөспүүбүлүкэ уонна улуус ытык киһитэ А.И. Поисеева үбүлүөйүгэр бэлэмнэниилэр, История уонна этнография музейыгар «Боло Уус. Уһаныы сай саҕанааҕыттан” диэн Н.Аржаков кинигэтин ааҕааччыларга билиһиннэрии, балаҕан ыйын 18, 19, 20 күннэригэр Госдуума быыбарыгар кыттыы былааҥҥа киирдилэр.

Полиция сводкатынан ааспыт нэдиэлэҕэ барыта 57 сайабылыанньа киирбит. Онтон 19 – микрозайм ылан баран төннөрбөт буолуу, биир дьахтар персональнай дааннайынан туһанан 10 тыһ. солк. кирэдьиити ылыы, харчыны сыыһа ыытыыны 1 төннөрүү, оҕо араас түгэҥҥэ эчэйиитэ - 7, улахан киһи эчэйиитэ - 3, 1 оҕо бэйэтин ытыгар ытыттарыыта, 1 суолга саахалланыы, Хатылыга гаас тирэҕин түҥнэри көтүү уо.д.а. боротокуолланан, үлэлэр бараллар. Саҥа нэдиэлэҕэ “Жилой сектор”, “Анаконда”, “Школьник” уонна сааны харайыыга операциялар  саҕаламмыттар.

Мунньах түмүгэр сылын аайы ыытыллар тыа хаһаайыстыбатын эйгэтигэр сүөһүнү, дьиэ кыылын маркировкалааһын хаамыытын туһунан иһитиннэрдилэр.

Бүгүн Дьокуускайдааҕы медицинскэй колледж Чурапчытааҕы отделениетын бастакы куурсун устудьуоннарын чиэстээһин үөрүүлээх чааһыгар Кронникова МФ кытынна. Дьокуускайдааҕы Медицинскэй колледж дириэктэрэ Дмитрий Алексеевы, Прокопий Сокольников аатынан Чурапчытааҕы Киин балыыһа кылабынай бырааһа Николай Сивцевы кытта быйылгы үөрэх дьылыгар 13 устудьуоннаах стоматологическай отделение арыллыбытынан итиэннэ саҥа киирбит устудьуоннарга нэһилиэнньэ доруобуйатын туругар быһаччы көдьүүстээх идэни баһылааһыннарыгар ситиһиилэри баҕаран, үөрэх дьыла саҕаламмытынан эҕэрдэлээтибит. Үөрүүлээх быһыыга-майгыга бастакы кууруска киирбит оҕолор Гиппократ андаҕарын эттилэр, устудьуон буолбуттарын туоһулуур билиэттэри, зачетнай киниискэлэри долгуйа туттулар.

Санатан эттэххэ, сиэстэрэлэри үөрэтэр Дьокуускайдааҕы Медицинскэй колледж Чурапчытааҕы отделениета 2022-2023 үөрэх дьылыгар Прокопий Сокольников аатынан Чурапчытааҕы Киин балыыһа уонна Чурапчытааҕы аграрнай-техническэй колледж баазатыгар аан бастаан аһыллан, олохтоох ыччаттар үөрэнэллэригэр үчүгэй усулуобуйа тэриллибитэ.

Медколледж Чурапчытааҕы отделениетын устудьуоннарыгар үрүҥ халааттаах аанньал буолан, улуус, өрөспүүбүлүкэ дьонун-сэргэтин туһугар үтүө суобастаах үлэни ис сүрэхтэн баҕарабын!

И.Н.Винокуров аатынан "Айылгы" Норуот айымньытын дьиэтигэр култуура уонна искусство үлэһиттэрин күһүҥҥү мунньаҕар кытынным. Манна нэһилиэктэр кулууптара, музей, библиотека уонна искусство оскуолатын үлэһиттэрэ мустан, үлэ хайысхаларынан салайааччылар дакылааттарын иһиттилэр,санааларын үллэстэн, инники үлэҕэ көдьүүстээх этиилэри киллэрдилэр. Чурапчы улууһун култуураҕа салалтатын салайааччыта П.Е. Гуляевы кытта эҕэрдэлээн туран, улууска култуура эйгэтин бары үлэһиттэригэр саҥа күүстээх, айымньылаах үлэни баҕардыбыт.

Култуура уонна искусство үлэһиттэрин күһүҥҥү мунньаҕар Сылаҥнааҕы А.А.Сивцев аатынан Норуот айымньытын дьиэтин специалиһыгар Альбина Черныхха, Бахсытааҕы библиотека библиотекарыгар Лариса Аргуноваҕа, Кытаанахтааҕы "Түһүлгэ" Норуот айымньытын дьиэтин методиһыгар Агафья Барашковаҕа наҕараадалары туттардыбыт. Маны сэргэ саҥа үлэлии кэлбит 9 үлэһити биир идэлээхтэрин иннилэригэр билиһиннэрдибит, кинилэргэ инникитин бар дьон туһугар кэрэ эйгэтигэр айымньылаах, күүрээннээх үлэни баҕардыбыт.