Балаҕан ыйын 24-25 күннэригэр Дьокуускайга республикатааҕы предпринимательства министерствота, дьарыктаах буолуу госкомитета уонна бүтүн Россиятааҕы инвалидтар обществоларын тэрийиилэринэн "Инвастартап Якутия 2026" Бүтүн Россиятааҕы слетун чэрчитинэн доруобуйаларынан хааччаахтаах республика предприниматель инвалидтарыгар форум буолан ааста.
Форум квартал труда креативнай кластерга буолла.
Биһиги улуустан Дария Иванова дьиэ тутуутунан дьарыктанар уонна Гаврил Павлов ( Хатылы нэһ.) культурнай-музыкальнай өҥөлөрү оҥорор предпринимателлар кыттыыны ыллылар.
Быйылгы форуму " Мой бизнес" республикатааҕы предпринимательства киинэ аныгылыы форматынан ыытан, кыттааччылар интириэстэрин уонна биһирэбиллэрин ылла.
Ол курдук уруку сылларга лекциянан уонна вопросы-ответы буоллаҕына, быйылгы деловой оонньуунан, семинар тренинг ыытылыннылар.
Биһиги хамаанда "Чараҥ" аатынан икки күннээх күрэх түмүгүнэн 3 бочуоттаах миэстэни ылан, бирииһстэринэн наҕараадаланныбыт.
Кыттыбыт предпринимателларга сертификаттары туттардылар.
Дария Иванова урбаан эйгэтигэр өр сыллаах үлэтин түмүгүнэн анал номинация ылла.
Сыллата маннык ыытыллар форумнарга улууспут ИПлар кыттыыларын эбэн уонна кэнэтэн иһэрбит ирдэнэр, дьоммут бэйэлэрэ дьарыктаах буолалларыгар олук буолуон наада
И.Матвеев

Балаҕан ыйын 27 күнүгэр Чурапчы сэлиэнньэтигэр Улуу Өктөөп өрөбөлүүссүйэтин  пааматынньыгар Саха Өрөспүүбүлүкэтин Судаарыстыбаннаһын күнүгэр аналлаах миитиҥҥэ улууспут, нэһилиэкпит салалтата, эдэр ыччата, улуус, нэһилиэк уопсастыбаннаһа уонна олохтоохторо кыттыннылар.

«Чурапчы улууһа” муниципальнай тэриллии баһылыга Степан Саргыдаев, улуус депутааттарын Сэбиэтин бэрэссэдээтэлэ Яков Оконешников, уопсастыбаннас уонна ыччат бэрэстэбиитэллэрэ Чурапчы улууһун бары олохтоохторугар туһаайан Саха Өрөспүүбүлүкэтигэр сүдү суолталаах күнүнэн эҕэрдэ тылы эттилэр, 1990 сыллаахха Саха сирэ автоновнай статустан өрөспүүбүлүкэ статуһун ылбытын, манан сибээстээн Саха сирэ судаарыстыба быһыытынан сайдарыгар саҥа кэрдиис-кэм саҕаламмытын, күн бүгүн ол кэмтэн ыла улуус олоҕор балысхан сайдыы киирбитин  бэлиэтээтилэр. Төһө да уустук, ол эрээри бары салааларга сайдыы тэтимнээхтик киирэ турар кэмигэр дьон-сэргэ айымньылаах олоҕор, үлэтигэр көдьүүстээх үчүгэй усулуобуйаны оҥоруу, Чурапчы улууһа үгүс көрдөрүүлэринэн бастыҥнар кэккэлэригэр сылдьыыта  салҕанан барарыгар тапталлаах төрөөбүт дойдубут салалтата «Чурапчы күүһэ – түмсүүгэ! Түмсүү күүһэ – сайдыыга!” диэн күүстээх санаа тула айар-тутар үлэҕэ бар дьонун түмэр, сомоҕолуур.

Судаарыстыбаннас күнүгэр Чурапчыга Сахабыт сирэ сайдыы кэскиллээх суолун тутуһан, иннин диэки эрэллээхтик хардыылыырын мэктиэлиир өрөспүүбүлүкэбит былааҕа күөрэйэ тэлимнээтэ, өрөгөй ырыалара ньиргийдэ, Өктөөп өрөбөлүүссүйэтин пааматынньыгар сибэкки дьөрбөтүн  ууруу сиэрэ-туома ыытылынна.

Чэчирии, үүнэ, бөҕөргүү турдун, төрөөбүт улууспут, өрөспүүбүлүкэбит!

Улуус баһылыгын бастакы солбуйааччы Рустам Данилов улуус дьаһалтатын планеркатыгар  ааспыт нэдиэлэҕэ ыытыллыбыт үлэлэр түмүктэрин таһааран, үүммүт нэдиэлэ былааннарын чопчулаата. Ол курдук бу нэдиэлэҕэ улууска Бүтүн Россиятааҕы «Кросс нации”, “Кытыл” экопарка боппуруоһугар сүбэ мунньах, Дьокуускайга балаҕан ыйын 30 күнүттэн алтынньы 4 күнүгэр диэри остуол тенниһигэр сүүмэрдиир күрэхтэһиилэр, алтынньы 1 күнүгэр “Дьиэ кэргэн” федеральнай бырайыагынан аныгылыы модельнай бибилэктиэкэни оҥорууга ыытыллыбыт үлэ түмүктэнэн, Е.А. Борисов аатынан киин бибилэтиэкэни үөрүүлээх быһыыга-майгыга арыйыы,  алтынньы 2 күнүгэр Мырылаҕа орто оскуола 100 сыллаах үбүлүөйэ, алтынньы 3 күнүгэр Мугудай орто оскуолатын 95 сылын бэлиэтээһин, улуус дьаһалтатыгар балаҕан ыйын 30 күнүгэр өрөспүүбүлүкэ биллэр-көстөр судаарыстыбаннай, уопсастыбаннай диэйэтэлэ, Чурапчы улууһун уонна Одьулуун нэһилиэгин бочуоттаах киһитэ, норуот хаһаайыстыбатын үтүөлээх үлэһитэ А.И.Поисеева 80 сааһыгар ананар тэрээһин уо.д.а. былааҥҥа киирдилэр.

Планеркаҕа 170 тахса киһи кыттыылаах «Якутия, вперёд!» каадыры сүүмэрдиир  өрөспүүбүлүкэтээҕи куонкурус финалыгар Чурапчы улууһун хамаандата 10 бастыҥнар истэригэр киирбитинэн туттарыллыбыт анал сертификат улуус баһылыгын бастакы солбуйааччыга Рустам Даниловка туттарылынна. Лобанов А.Г., Васильев Н.Д.,
Бушкова Н.И., Сергеева М.И.,
Туласынов У.И.  састааптаах улуус биэс киһилээх хамаандата «Территория сотрудничества” диэн Чурапчы улууһун урбаанньыттара бэйэ бэйэлэрин кытта биир ситимнээхтик  үлэлииллэригэр уопсай систиэмэни тэрийэр бырайыагы суруйууларын көмүскээбиттэрин федеральнай таһымнаах эспиэрдэрдээх анал хамыыһыйа биһирээбит. Бу оун иһигэр киирбит хамаандалар сэтинньи ыйтан финалга кыайар иһин киирсиилэрэ саҕаланар. Тохсунньу ыйга кыайыылаах биллэн, өрөспүүбүлүкэ салалтатын каадырга саппааһыгар киириэхтээх. Финал кыайыылааҕар уон мөлүйүөннээх бириис көрүллэр. Планеркаҕа улуус дьаһалтатыгар хамаанда финалист буолбутун туоһулуур сертификата туттарылынна. Инники өттүгэр хамаанда оҥорбут бу бырайыагын олоххо киллэриигэ үлэ барыахтаах. Бырайыак улуус дьаһалтатын саайтыгар таһаарыллара былааннанна.

Улуус быыбарга хамыыһыйатыттан Мария Егоровна Госдуумаҕа депутааттары талыыга уонна Алаҕар, Бахсы биир мандааттаах уокуруктан улуус депутаатын талыыга быыбар тэрээһинэ хайдах ыытыллыбытын, быыбар хаамыытын кэтээн көрөөччүлэр үлэлэрин, быыбардааһын хайдах ааспытын уонна түмүктэрин, быыбары ыытыыга сыыһа-халты тахсыбатаҕын тустарынан сиһилии билиһиннэрдэ. Ол курдук, Тимофеева Күннэй Леонидовна улуус быыбардааччыларын 53,35 % ылан, улуус депутаатынан талыллыбыт. Ону таһынан Чурапчы улууһун быыбардааччылара паартыйалартан саамай элбэх бырыһыаны «Биир ньыгыл Россия” паартыйаҕа 50,85 % куоластарын биэрбиттэр. Биир мандааттаах уокурукка Петр Шамаев 44,15% ылбыт. Быыбарга кыттыы көрдөрүүтэ 60.60 %. Үүммүт нэдиэлэ былаанынан үлэ саҕаланар.