Аҕам саастаах дьоммутугар анаммыт  декада чэрчитинэн, «Тоҕус томтор ыллыгынан» экскурсия тэрилиннэ.

А.А.Саввин аатынан Чурапчытааҕы история уонна этнография  түмэлин салайааччыта Афанасий Захаров , научнай үлэһитэ Юрий Толстоухов уонна П. Н.Сокольников аатынан улуустааҕы киин балыыһа лаборант бырааһа Любовь Михайловна Григорьева Чурапчы тоҕус томторун былыргыттан билиҥҥэ диэри устуоруйатын туһунан кэпсээтилэр.

Сылдьыбыт аҕам саастаахтарбыт саҥаны билэн, астынан, махтанан тарҕастылар.

Чурапчы улууһун Соловьев нэһилиэгин П.М. Васильев аатынан орто уопсай үөрэхтээһин оскуолатын 100 сыллаах үбүлүөйүн бэлиэтиир үөрүүлээх тэрээһинигэр улуус баһылыгын социальнай боппуруоска солбуйааччы Мария Кронникова уонна улуус депутаттарын Сэбиэтин бэрэссэдээтэлэ Яков Оконешников улуус салалтатын аатыттан эҕэрдэ тылы эттилэр, наҕараадалары туттардылар. Бу үөрүүлээх түгэннэргэ оскуола кэлэктиибэ, үөрэнээччилэрэ уонна араас сылларга оскуоланы бүтэрбиттэр үбүлүөйдээх тэрээһиннэри, көлүөнэлэр көрсүһүүлэрин уруйдуу көрүстүлэр.

Үбүлүөй кэмигэр оскуола үтүө түмүктэрэ, кыайыы-хотуу үктэллээх, үүнүү-сайдыы аргыстаах ситиһиилэрэ бэлиэтэннэ. Тыл этээччилэр сылын ахсын оскуола үөрэнээччилэрэ Арассыыйатааҕы олимпиадаҕа кыттыылара, ситиһиилэрэ, үөрэххэ киириилэрэ элбээн иһэриттэн үөрэллэрин биллэрдилэр. Онуоха оҕолор үөрэххэ дьаныардаах, билиилээх, бэйэлэригэр эрэллээх, ситиһиилээх дьон буола улааталларыгар, биллэн турар, үрдүк билиилээх, бэлэмнээх учууталлар үтүөлэрэ сүҥкэн.

100 сыллаах сайдыы чыпчаалыттан тэбинэн кэлэктиип уонна үөрэнээччилэр өссө үрдүк ситиһиилэргэ дабайан истиннэр, үлэҕэ, олоххо уһуйар дьоһун саастаах үөрэх кыһатын суола өссө да уһун уонна ситиһиилээх буоллун!