FVV Akademiyasi huzurida Qutqaruvchilarni tayyorlash texnikumi tashkil etiladi

O‘zbekistonda favqulodda vaziyatlardan muhofaza qilish sohasida faoliyat yurituvchi malakali qutqaruvchilarni tayyorlash tizimini takomillashtirish maqsadida yangi texnikum tashkil etilmoqda. Bu Vazirlar Mahkamasining 2026 yil 6 noyabrdagi 611-sonli qarorida belgilandi.

Texnikum faoliyati 2027/2028 o‘quv yilidan boshlab yo‘lga qo‘yiladi. Muassasaga umumiy o‘rta ta’lim tashkilotlarining (maktablarning) bitiruvchilari davlat granti va to‘lov-kontrakt asosida o‘qishga qabul qilinadi. O‘quv jarayoni boshlang‘ich, o‘rta va o‘rta maxsus kasbiy ta’lim dasturlari bo‘yicha tashkil etiladi.

Yirik iqtisodiyot va toifalangan obyektlar hamda xavfli ishlab chiqarish korxonalarida ishlayotgan qutqaruvchilar ushbu tashkilotlarning buyurtmasiga asosan to‘lov-kontrakt shaklida imtiyozli o‘qishga qabul qilinadi.

Qarorga muvofiq, 2029 yildan e’tiboran texnikumning kasbiy ta’lim yo‘nalishlarini tamomlagan bitiruvchilar tarkibidan favqulodda vaziyatlar organlari uchun kadrlar zaxirasi shakllantiriladi.

FVV tizimida qutqaruvchi lavozimida xizmat qilayotgan xodimlar texnikumga o‘qishga qabul qilinganda, ularning o‘qish davri mobaynida oylik maoshi to‘liq va teng miqdorda saqlanib qoladi.

FVVga ikki oy muddatda texnikum ustavini tasdiqlash va uni davlat ro‘yxatidan o‘tkazish, shuningdek, 3 oy muddatda Kasbiy ta’lim agentligi bilan birgalikda o‘quv reja va dasturlarini ishlab chiqish vazifasi yuklatildi.

@COM_BAT_UZ kanalini kuzatib boring!