📰 Bağdad cümə namazının imamının Azərbaycanda hicabın qadağan edilməsinə reaksiyası

▫️Nəcəf-Əşrəf dini elmi hövzəsinin tanınmış müəllimi və Bağdad cümə namazının imamı Ayətullah Seyid Yasin əl-Musəvi Azərbaycanın hakimiyyət orqanlarının məktəblərdə hicabın qadağan edilməsi ilə bağlı qərarını tənqid edərək dini azadlıqların qorunmasına çağırıb.

▫️Ayətullah Seyid Yasin əl-Musəvi siyasi xütbəsində bildirib ki, şagirdlərin və müəllimlərin hicab taxmasının qadağan edilməsi dini azadlığın pozulmasıdır. O vurğulayıb ki, Azərbaycan cəmiyyətinin əksəriyyəti dinə və dini ayinlərə qarşı mübarizə aparan kommunist hakimiyyətinin onilliklər boyu davam edən siyasətinə baxmayaraq, öz İslam kimliyinə sadiq qalır.

▫️O, ali dini mərcəiyyət Ayətullah Seyid Əli Sistaninin ofisinin bu məsələnin həllinin zəruriliyi ilə bağlı mövqeyinə toxunaraq vurğulayıb ki, hicab məsələsinə yalnız ayrı-ayrı hallarla bağlı problem kimi deyil, cəmiyyətin mədəniyyəti və kimliyi ilə əlaqəli məsələ kimi yanaşmaq lazımdır.

▫️Ayətullah əl-Musəvi Azərbaycan xalqı ilə həmrəyliyini ifadə edərək alimləri, dini elmi hövzələri, müsəlmanları və qeyri-müsəlmanları bu cür tədbirləri pisləməyə çağırıb.

🔹 Ayətullah Yaqubi Azərbaycanın məktəblərində hicablı şagirdlərin təhsil müəssisələrinə buraxılmasının qadağan edilməsinin ləğvini tələb edib

Şiə dünyasının böyük mərcəyi-təqlidi Ayətullah əl-üzma Şeyx Məhəmməd Yaqubi Azərbaycan Respublikası hökumətindən hicablı şagirdlərin məktəblərdə iştirakının qadağan edilməsi barədə qərarı dərhal ləğv etməyi tələb edib. O, bu şagirdlərin qanuni təhsil hüququndan məhrum edilməsindən dərin təəssüf hissi keçirdiyini bildirərək vurğulayıb ki, bu qərarın düzəldilməsi fəzilət, cəsarət və uzaqgörənlik göstəricisi olmaqla yanaşı, ölkənin maraqlarının və sabitliyinin qorunmasına xidmət edəcək.

Ayətullah Yaqubi İslam Dünyası İffət Günü münasibətilə, Həzrət Əmirəl-möminin Əli ibn Əbu Talibin (ə) qızı Həzrət Zeynəbin (s.ə.) mövludu ilə eyni vaxta təsadüf edən bəyanatında bildirib: “Hicablı şagirdlərin göz yaşları içində dərslərdən məcburi şəkildə çıxarılması və onların sinif yoldaşlarının məktəblərin girişindəki heyrət və təəccüb dolu görüntüləri bu qərarın yaratdığı ağrının dərinliyini göstərir.”

O, bu qadağanın hicablı müəllimələrə də şamil edilə biləcəyinə işarə edərək soruşub: “Bu qızlar hansı cinayətə yol veriblər ki, təhsil almaq hüququndan məhrum edilməlidirlər?”

Ayətullah Yaqubi əlavə edib: “Hicabın qadağan edilməsinin dövlətin dünyəvi olması ilə əsaslandırılması belə bir sual doğurur: Bu qərar vətəndaşların azadlığı və öz dinlərinə bağlı qalmaq hüququ ilə nə dərəcədə uzlaşır? Xüsusilə nəzərə alınmalıdır ki, hicab Azərbaycan cəmiyyətinə yad və qeyri-adi bir hadisə deyil. Əksinə, İslam bu cəmiyyətin kimliyinin ayrılmaz və əsas hissələrindən birini təşkil edir.”

Ayətullah Yaqubi bu məsələ ilə bağlı Peyğəmbərin (s) “İffət bütün yaxşılıqların mənbəyidir” buyuruğuna istinad edib.

O, Azərbaycan Prezidentinin heç bir qayğıkeş atanın öz qızları üçün görmək istəmədiyi bu ağrılı səhnələrdən xəbərdar olmasına ümidvar olduğunu bildirib. O, həmçinin ehtimal edib ki, bu qərar məktəb rəhbərləri tərəfindən yüksək vəzifəli şəxslərin məqsədinə zidd şəkildə şərh edilərək icra olunmuş ola bilər. Ayətullah Yaqubi vurğulayıb ki, bu hal təsdiqini taparsa, bu səhvə yol vermiş məsul qurumlar cavab verməlidirlər.

Şiələrin böyük mərcəyi-təqlidi vurğulayıb ki, atalıq mərhəməti ilə davranmaq uğurlu rəhbərin ən mühüm xüsusiyyətlərindən biridir. O, Peyğəmbərin (s) Əmirəl-möminin İmam Əliyə (ə) verdiyi tövsiyəyə istinad edib: “Ey Əli! Mən və sən bu ümmətin atalarıyıq.”

O, İlham Əliyevi bu xüsusiyyətdən nümunə götürməyə çağıraraq xatırladıb ki, hicablı şagirdlər Həzrət Fatimeyi-Zəhranın (s.ə.) qızlarıdır və onlar həmin Həzrətin iffət və dini dəyərlərə bağlılıq yolunu davam etdirirlər.

Ayətullah Yaqubi həmçinin sual edib ki, əhalisinin 96 faizinin müsəlman olduğu bir ölkədə belə bir qərarı necə qəbul etmək olar? Halbuki müsəlmanlar bundan əvvəl İslama qarşı mövqeyi ilə tanınan Avropa ölkələrindən birində qəbul edilmiş oxşar qərara etiraz ediblər.

O, bəyanatının davamında bildirib ki, iffətə qarşı mübarizə yaradılışın başlanğıcından etibarən şeytanın və onun ardıcıllarının bəşəriyyətə qarşı qarşıdurmasının təzahürlərindən biridir. O, Qurani-Kərimdə şeytanın Adəm və Həvvaya vəsvəsə verməsi və onların örtülü bədənlərinin aşkara çıxması ilə bağlı ayələrə istinad edərək bildirib: “İffətin qorunması yalnız fərdi davranışla məhdudlaşmır, həm də cəmiyyətin dini və əxlaqi dəyərləri ilə dərin şəkildə bağlıdır.”

Şiələrin mərcəyi-təqlidi vurğulayıb: “Bu qərarın ləğvi dövlətin nüfuzunu azaltmayacaq və onun qüdrətinə xələl gətirməyəcək. Əksinə, bu addım fəzilət, cəsarət və müdriklik göstəricisi olacaq. Bu qərarın ləğvi Azərbaycan müsəlmanlarının qəzəbini səngidə, ölkəni bəzi şəxslərin yaratmağa çalışdığı gərginlik və fitnələrdən uzaq saxlaya bilər. Bundan əlavə, sözügedən qərarın ləğvi Azərbaycanın tarixi, İslam mənşəli kimliyi və qədim elmi irsinin qorunmasına xidmət edəcək.”

🔻🔻🔻🔻🔻