Devendra Fadnavis
✔
4.09K subscribers
102K photos
19.3K videos
4.29K files
10.7K links
श्री देवेंद्र फडणवीस यांच्या कार्यालयातून
Download Telegram
मुख्यमंत्री श्री देवेंद्र फडणवीस:

बळीराजाच्या कष्टांची गोड भेट!

कोहळी, कळमेश्वर येथील शेतकरी बांधवाने आज आपल्या शेतातील ताजी सीताफळे भेट दिली. त्यांच्या कष्टातून पिकवलेल्या या सीताफळांची गोडी आणि त्यांनी दिलेला आपुलकीचा स्नेह मनाला भावला!

#Maharashtra #Nagpur #DiwaliWithFarmers
CMO Maharashtra Tweets:

मुख्यमंत्री देवेंद्र फडणवीस यांना नागपूर येथे नरखेड नगरपरिषदेचे नगराध्यक्ष मनोज कोरडे यांनी दुष्काळग्रस्त शेतकऱ्यांच्या मदतीसाठी मुख्यमंत्री सहाय्यता निधीमध्ये ₹60,000 देणगीचा धनादेश सुपूर्द केला. यावेळी मुख्यमंत्री फडणवीस यांनी त्यांचे आभार मानले.

#Maharashtra #DevendraFadnavis #CMReliefFund
मुख्यमंत्री देवेंद्र फडणवीस यांनी आज नागपूर जिल्ह्यातील लोहारी सावंगा येथील भाजपाचे ज्येष्ठ कार्यकर्ते माजी सरपंच वसंतराव चापले यांच्या निवासस्थानी भेट दिली. यावेळी चापले कुटुंबियांनी केलेल्या स्वागताबद्दल मुख्यमंत्री देवेंद्र फडणवीस यांनी त्यांचे आभार मानले.

#Maharashtra #DevendraFadnavis #Nagpur #DiwaliWithFarmers
मुख्यमंत्री श्री देवेंद्र फडणवीस:

शेतकऱ्यांच्या चेहऱ्यावरील आनंद, त्यांच्या डोळ्यांतील आपुलकी आणि जनतेकडून मिळणारे प्रेम व आशीर्वाद हीच आयुष्यातील खरी कमाई आहे. जनतेशी जुळलेले हे अतूट नाते पुढील वाटचालीसाठी कायम प्रेरणा आणि ऊर्जा देते.

#Maharashtra #Nagpur #DiwaliWithFarmers
मुख्यमंत्री श्री देवेंद्र फडणवीस:

लहान मुलांच्या निरागस विश्वात रमण्याचा आनंद काही वेगळाच असतो. त्यांच्या चेहऱ्यावरील हास्य आणि प्रेमळ संवादातून मिळणारे समाधान अनमोल आहे.

#Maharashtra #Nagpur #DiwaliWithFarmers
मुख्यमंत्री श्री देवेंद्र फडणवीस:

दिवाळीचा खरा आनंद आपल्या माणसांसोबत, त्यांच्या सुख-दुःखात सहभागी होण्यातच आहे!

नागपूर जिल्ह्यातील लोहारी सावंगा येथील शेतकरी अरुणाताई बालपांडे आणि रामभाऊ बालपांडे यांच्या घरी काल मुक्काम केल्यानंतर आजची दिवाळी पहाट अधिकच प्रसन्न झाली. गावाकडच्या शांत वातावरणात, निसर्गाच्या सान्निध्यात निवांत वेळ घालवता आला. गावकऱ्यांचा जिव्हाळा आणि त्यांची आपुलकी मनाला विशेष आनंद आणि समाधान देणारी होती.

सकाळी उठल्यानंतर दिवाळीनिमित्त अभ्यंगस्नान केले. अरुणाताईंनी प्रेमाने भाऊबीज केली, तर घरातील सर्व महिलांनी पारंपरिक पद्धतीने ओवाळणी करून औक्षण केले. प्रत्येक औक्षणात माझ्या लाडक्या बहिणींचे प्रेम, त्यांच्या प्रार्थना आणि आशीर्वाद सामावलेले होते. हा स्नेह आणि आपुलकीचा अनुभव मनात कायमचा जपून ठेवण्यासारखा आहे.

पुढील दौऱ्यावर निघण्यापूर्वी तालुक्यातील लोकप्रतिनिधींशी संवाद साधला. ग्रामीण भागातील पिण्याच्या पाण्याची टंचाई आणि जनावरांसाठी चाऱ्याची उपलब्धता या प्रश्नांवर चर्चा केली. हे प्रश्न सोडविण्यासाठी पुढाकार घेणाऱ्या गावांना सरकारचे संपूर्ण सहकार्य राहील. तसेच जलसंधारणाची कामेही प्राधान्याने हाती घेण्यात येतील, अशी ग्वाही दिली.

सध्याची दुष्काळी परिस्थिती लक्षात घेता, विशेष बाब म्हणून झाडे जगविण्यासाठी जिथे विंधन विहिरींची गरज आहे, तिथे केवळ शेतीकामासाठी विंधन विहिरी खोदण्यावरील बंदी येत्या 15 डिसेंबरपर्यंत उठविण्यात आली आहे. विंधन विहिरींचे खोलीकरण किंवा नवीन विंधन विहिरी खोदण्यास परवानगी देणे अडचणीचे असले, तरी शेतकऱ्यांची गरज लक्षात घेऊन हा निर्णय घेण्यात आला आहे. तसेच पशुदवाखान्यांची आवश्यकता तपासून तातडीने निर्णय घेण्याचे निर्देश जिल्हा परिषदेच्या मुख्य कार्यकारी अधिकाऱ्यांना दिले.

जलजीवन मिशनअंतर्गत निधीअभावी काही कामे अपूर्ण राहिली आहेत. ही कामे आता प्राधान्याने पूर्ण केली जात आहेत. ज्या ठिकाणी 75 टक्क्यांपेक्षा अधिक कामे पूर्ण झाली आहेत, तिथे तातडीने निधी उपलब्ध करून उर्वरित कामे मार्गी लावली जातील. अन्य ठिकाणची कामेही टप्प्याटप्प्याने पूर्ण करण्यात येतील.

वन्यप्राण्यांकडून पिकांचे होणारे नुकसान हा शेतकऱ्यांसमोरील गंभीर प्रश्न आहे. यावर उपाय म्हणून तार कुंपण योजना अधिक व्यापक करण्यात येईल. विशेषतः जंगलालगतच्या शेतांना यामध्ये प्राधान्य दिले जाईल. दुष्काळाच्या पार्श्वभूमीवर जलसाठ्यांमधील गाळ काढून तो शेतीत टाकण्याची कामेही सुरू करण्यात आली आहेत.

पुढे नरखेड तालुक्यातील सोनेगाव रिठी येथे शेतकरी दिलीप सरोदे यांच्या शेताच्या बांधावर जाऊन दुष्काळामुळे पिकांचे झालेल्या नुकसानीची पाहणी केली. त्यानंतर कळमेश्वर तालुक्यातील कोहळी येथे शेतकरी बाबुराव काळे यांच्या शेतातील पिकांची स्थिती जाणून घेतली. दुष्काळाची भीषणता लक्षात घेऊन सरकारने मदतीसाठी आवश्यक कार्यवाही सुरू केली आहे. शेतकऱ्यांना थेट मदत मिळावी यासाठीही प्रक्रिया राबविण्यात येत आहे. या कठीण काळात माझा शेतकरी बांधव एकटा नाही. या संकटातून सावरण्यासाठी आणि पुन्हा उभे राहण्यासाठी शासन त्याच्या पाठीशी खंबीरपणे उभे आहे.

शेतकरी बांधवांच्या सुख-दुःखात सहभागी होता आले, त्यांच्या कुटुंबीयांचे प्रेम आणि आशीर्वाद अनुभवता आले. त्यांच्या अडचणी जाणून घेऊन त्यांना मदतीचा विश्वास देता आला. यामुळे आजची दिवाळी खऱ्या अर्थाने संस्मरणीय आणि समाधान देणारी ठरली. बळीराजाच्या चेहऱ्यावर पुन्हा आनंद फुलावा, त्याच्या कुटुंबात सुख-समृद्धी नांदावी आणि त्याच्या आयुष्यात आशेचा नवा प्रकाश निर्माण व्हावा, यासाठी सदैव प्रयत्नशील राहीन.

यावेळी मंत्री चंद्रशेखर बावनकुळे, आमदार डॉ. राजीव पोतदारजी, आमदार डॉ. आशिष देशमुख, आमदार चरणसिंग ठाकूरजी व इतर मान्यवर उपस्थित होते.

#Maharashtra #DiwaliWithFarmers #Nagpur

https://x.com/Dev_Fadnavis/status/2119431857356050529?a=UthJzrdackmng13YP3k&s=20
CMO Maharashtra Tweets:

शेतकऱ्यांसोबत दिवाळी; दुष्काळावर मात करण्यासाठी तातडीच्या मदतीसह कायमस्वरूपी उपाययोजनांवर भर!

दुष्काळी परिस्थितीचा सामना करणाऱ्या शेतकऱ्यांना दिलासा देण्यासाठी, त्यांच्या अडचणी प्रत्यक्ष जाणून घेण्यासाठी आणि त्यांच्यासोबत दिवाळी साजरी करण्यासाठी मुख्यमंत्री देवेंद्र फडणवीस यांनी नागपूर जिल्ह्यातील लोहारी सावंगा येथे शेतकरी कुटुंबासोबत मुक्काम केला. यावेळी शेतकऱ्यांशी संवाद साधण्यासोबतच शेताच्या बांधावर जाऊन पीक नुकसानीची मुख्यमंत्री फडणवीस यांनी पाहणी केली. यावेळी त्यांनी तातडीची आर्थिक मदत, सिंचन सुविधा, जलसंधारण, पिकांचे संरक्षण आणि ग्रामविकासासाठी विविध उपाययोजनांबाबत निर्णय घेतले. दुष्काळाच्या संकटात शेतकऱ्यांच्या पाठीशी राज्य सरकार ठामपणे उभे असल्याचा विश्वास मुख्यमंत्री फडणवीस यांनी यावेळी व्यक्त केला.

शेतकरी कुटुंबासोबत दिवाळी; गावकऱ्यांशी साधला संवाद

लोहारी सावंगा गावात आगमन झाल्यानंतर ग्रामस्थांनी पारंपरिक पद्धतीने मुख्यमंत्री फडणवीस यांचे स्वागत केले. यानंतर शेतकरी रामभाऊ बालपांडे यांच्या घरी भोजन करून मुख्यमंत्री फडणवीस यांनी तेथेच मुक्काम केला व रात्री संवाद साधत गावकऱ्यांच्या अडचणी आणि समस्या जाणून घेतल्या. यानंतर दुसऱ्या दिवशी सकाळी शेतकरी कुटुंबीयांसोबत नाश्ता करून त्यांनी पुढील दौऱ्याला सुरुवात केली.

सिंचन सुविधांसाठी महत्त्वाचे निर्णय; खोरी प्रकल्प आणि पाझर तलावाचा प्रश्न मार्गी

लोहारी सावंगा येथे शेतकऱ्यांशी संवाद साधताना मुख्यमंत्री फडणवीस म्हणाले, कमी पर्जन्यमानामुळे निर्माण झालेल्या दुष्काळी परिस्थितीत नागरिकांना पिण्यासाठी पाणी, जनावरांना चारा आणि उपलब्धतेनुसार सिंचनासाठी पाणी देण्याचा राज्य सरकारचा प्रयत्न आहे. खोरी प्रकल्पाला मान्यता देण्यात आली असून त्याचे काम लवकरच सुरू होणार आहे. तसेच, 43 वर्षांपूर्वी पायाभरणी झालेल्या पाझर तलावाचा प्रश्नही लवकरच मार्गी लावण्यात येईल, असे मुख्यमंत्री फडणवीस म्हणाले.
लोहारी सावंगा येथील 10 शेतकऱ्यांना सिंचन विहीर योजनेअंतर्गत विहिरी मंजूर करण्यात आल्या आहेत. तसेच, गावात ₹243.35 लाख खर्चाच्या साठवण तलावाचे बांधकाम करण्यात येणार आहे. या तलावामुळे सिंचनाला लाभ होण्यासोबतच परिसरातील विहिरींच्या पाणीपातळीत वाढ होऊन पिण्याच्या पाण्याची उपलब्धता सुधारण्यास मदत होणार आहे.

दुष्काळग्रस्त शेतांची बांधावर जाऊन पाहणी; तातडीने आर्थिक मदत

8 नोव्हेंबर रोजी नरखेड तालुक्यातील सोनेगाव रिठी आणि कळमेश्वर तालुक्यातील कोहळी येथे शेताच्या बांधावर जाऊन मुख्यमंत्री फडणवीस यांनी पिकांची पाहणी केली. सोनेगाव रिठी येथे शेतकरी दिलीप सरोदे यांच्या शेतातील पावसाअभावी वाढ खुंटलेल्या आणि बोंडे न फुटलेल्या कपाशीच्या पिकाची, तर कोहळी येथे शेतकरी बाबूराव काळे यांच्या शेतातील कापूस आणि तुरीच्या पिकांची पाहणी करून नुकसानीची माहिती घेतली. अशा कठीण परिस्थितीत राज्य सरकार शेतकऱ्यांच्या पाठीशी आहे, असा विश्वास मुख्यमंत्री फडणवीस यांनी यावेळी दिला.
पिकांच्या नुकसानीपोटी शेतकऱ्यांना तातडीने ₹5000 ची मदत देण्यात आली असून उर्वरित मदतही त्यांच्या खात्यात जमा करण्यात येईल. कोणताही शेतकरी मदतीपासून वंचित राहणार नाही, असे मुख्यमंत्री फडणवीस यांनी स्पष्ट केले.

वन्यप्राण्यांपासून पिकांचे संरक्षण; जलसंधारण आणि पाणी बचतीवर भर

वन्यप्राण्यांमुळे पिकांचे होणारे नुकसान लक्षात घेता सौर कुंपण योजना प्रभावीपणे राबविण्यात येईल, असे मुख्यमंत्री फडणवीस यांनी सांगितले. जंगलालगतच्या शेतांना प्राधान्य देऊन तार कुंपण योजनेचा विस्तार करण्यात येणार आहे. सध्याची दुष्काळी स्थिती पाहता विशेष बाब म्हणून जिथे गरज आहे, तिथे झाडे जगविण्यासाठी केवळ शेतीकामासाठी विंधन विहिरींवरील बंदी 15 डिसेंबरपर्यंत शिथिल करण्याची घोषणा मुख्यमंत्री फडणवीस यांनी केली. हा निर्णय सरसकट लागू नसून यासाठी परवानगी घेणे आवश्यक आहे. नागरिकांनी पाण्याची बचत आणि पुनर्भरण करावे, असे आवाहनही मुख्यमंत्री फडणवीस यांनी केले.

जलसंधारण आणि ग्रामविकासाच्या कामांना प्राधान्य

लोहारी सावंगा येथे स्थानिक स्वराज्य संस्थांच्या प्रतिनिधींशी संवाद साधताना मुख्यमंत्री फडणवीस यांनी गाळमुक्त धरण आणि जलयुक्त शिवार योजनेतील कामांना सर्वोच्च प्राधान्य देण्यात येणार असल्याचे सांगितले. अटल भूजल योजनेतील कामे प्राधान्याने पूर्ण करण्यासह नादुरुस्त जलसंधारण कामांच्या दुरुस्तीसाठी निधी उपलब्ध करून देण्यात येईल. जलजीवन मिशनअंतर्गत 75 टक्क्यांहून अधिक कामे पूर्ण झालेल्या ठिकाणी उर्वरित कामांसाठी तातडीने निधी उपलब्ध करून देण्यात येईल, तर अन्य कामे टप्प्याटप्प्याने पूर्ण केली जातील. दुष्काळाच्या पार्श्वभूमीवर जलसाठ्यांमधील गाळ काढून ती माती शेतीत टाकण्याचे काम हाती घेण्यात आले असल्याचे मुख्यमंत्री फडणवीस यांनी नमूद केले.
पिण्याच्या पाण्याचा आणि जनावरांच्या चाऱ्याचा प्रश्न सोडविण्यासाठी ज्या गावांकडून पुढाकार घेतला जाईल, त्यांना राज्य सरकारकडून संपूर्ण सहकार्य देण्यात येईल, असे मुख्यमंत्री फडणवीस यांनी सांगितले. तसेच पशुवैद्यकीय दवाखान्यांच्या उपलब्धतेबाबत पाहणी करून निर्णय घेण्याचे निर्देश त्यांनी जिल्हा परिषदेच्या मुख्य कार्यकारी अधिकाऱ्यांना दिले. ग्रामपंचायतींना विश्वासात घेऊन विकासकामे दर्जेदार पद्धतीने पूर्ण करण्याबाबत सरपंचांनी मांडलेल्या सूचनांवरही प्राधान्याने कार्यवाही केली जाईल, असे मुख्यमंत्री फडणवीस यांनी स्पष्ट केले.

महिला सरपंचांच्या तक्रारींची दखल; पोलिसांना तातडीच्या कारवाईचे निर्देश

पत्रकार असल्याचे सांगून पैशांची मागणी व ब्लॅकमेलिंग होत असल्याची तक्रार तालुक्यातील काही महिला सरपंचांनी मुख्यमंत्री फडणवीस यांच्यासमोर मांडली. अशा प्रकारे पैशांची मागणी करणाऱ्या संबंधित व्यक्तीला तुरुंगात टाकण्यात येईल, असे स्पष्ट करत मुख्यमंत्री फडणवीस यांनी पोलिस विभागाला तातडीने कारवाई करण्याचे निर्देश दिले.

नियमित कर्जफेड करणाऱ्या शेतकऱ्यांना अनुदान

नियमित कर्जफेड करणाऱ्या शेतकऱ्यांच्या खात्यात कर्जमाफीची रक्कम जमा झाल्यानंतर प्रत्येकी ₹50,000 सानुग्रह अनुदान देण्यात येत आहे, असे मुख्यमंत्री फडणवीस यांनी सांगितले. कर्जमाफीची रक्कम जमा झाल्यानंतर नियमित परतफेडीच्या 18 लाख शेतकऱ्यांच्या खात्यात प्रत्येकी ₹50,000 जमा केले जाणार असल्याचे त्यांनी सांगितले.
तसेच, अपघातात पाय निकामी झालेल्या अभियांत्रिकीच्या विद्यार्थ्याच्या संपूर्ण उपचारांची जबाबदारी घेण्याचे आश्वासनही त्यांनी दिले. जिल्हास्तरावर सुरू असलेल्या मुख्यमंत्री सहायता निधी कक्षांबरोबरच तालुकास्तरावरही सहायता कक्ष सुरू करण्यात येणार असल्याचे मुख्यमंत्री फडणवीस यांनी जाहीर केले.

या दोन दिवसीय दौऱ्यात शेतकऱ्यांच्या बांधावर जाऊन त्यांच्या अडचणी जाणून घेण्यासोबतच सिंचन, जलसंधारण, पिकांचे संरक्षण, दुष्काळी मदत आणि ग्रामविकासाशी संबंधित विविध प्रश्नांवर निर्णय घेण्यात आले. शेतकऱ्यांना या संकटातून बाहेर काढण्यासाठी शासन सर्वतोपरी प्रयत्न करेल, असा विश्वास मुख्यमंत्री फडणवीस यांनी व्यक्त केला.

यावेळी महसूल मंत्री चंद्रशेखर बावनकुळे, आमदार डॉ. राजीव पोतदार, आमदार चरणसिंह ठाकूर, आमदार डॉ. आशिष देशमुख, व अन्य मान्यवर उपस्थित होते.

#Maharashtra #DevendraFadnavis #Nagpur #DiwaliWithFarmers
CMO Maharashtra Tweets:

बळीराजाच्या कष्टातून फुललेल्या स्वप्नांना संकटाच्या काळातही भक्कम आधार देण्याचा निर्धार, हीच खरी दीपावली!

मुख्यमंत्री देवेंद्र फडणवीस यांनी नागपूर जिल्ह्यातील लोहारी सावंगा येथे बालपांडे कुटुंबीयांच्या घरी मुक्काम केला. या कुटुंबाने अनुभवलेला आपुलकीचा ओलावा, प्रेम आणि त्यांनी व्यक्त केलेल्या हृदयस्पर्शी भावना…

#Maharashtra #DevendraFadnavis #DiwaliWithFarmers #Nagpur