" رزانة الخيل لا مَشيت بطق الطبل
رقيقة الحس همّاسة بحرفٍ بخيل

ما يقبل القلب لو عقلي لغيرك قبل
أنتي كثيرة زمانك بالزمان القليل

كنتي جميلة وزادت فتنتك عن قبل
ومثلك إذا مرّ أي حاجة تزين وتميل

منتي نبيلة فقط أنتي وريثة نُبل
حفيدة أول رجل يطري ببال الدخيل

وحيدتي قلبي الغارق بحبك ذبل
محتاج منّك شعور يمكّن المستحيل " .

جادلٍ ربي عطاها قابليّه
بالنبا الطيب وبالطبع الحياويّ

درةً عن المطاميع محميه
ماتطيش الا على أصوات العزاوي

من سلايل عزوتن فالجاهليه
الخصوم بفعلهم راحو نحاويّ

وصفها وصف الزعوج الباتليه
بالحلا والرق والزين الرهاويّ

كن لون يدينها لون برديه
والكفوف خضابها جمرً يضاوي

كنها يوم وقفت في أرضً خليه
عطفت الفارس شليويح العطاوي

طوحت بخمارها الريح القويه
يوم طار الستر عن الوجه الحياويّ

كن وصف الأكلبي يطري عليه
لبتن من فوقها الخمري ثعاوي .

شالعن قلبي هوى سيدت كل الملاح
من بعد ماعرضت لي بخدر اعيانها

جادلن ربي خلقها على الأرض البراح
تمشي وكن الوطى صايرً ميدانها

فارقه بالعنق والقد والسحر المباح
والعيون اللي هدبها هزم فرسانها

كن نظرة عينها مثل زرقات الرماح
في معارك جدها اللي رفع من شانها

من ينافسها على الزين ماحوله نجاح
الله اللي زادها عن جميع اقرانها

تفتخر وتماري وصيتها عذب وقراح
وأرثه صيت الفخر من فعل جدانها

طايشه ماتلتفت لارتفع صوت الصياح
مهرةً محدً عسفها وشد عنانها .