تبقى نديم القلب وأصدق نواياه
‏حتى ولو حظّي معك ما وقف لي

ويبقى غرامك داخل الرُوح مبناه
‏يالله عسَى مع الزمن تنكتب ليّ .

‏يـ الجمال المستحيل يـ القوام الراهي
‏يـ العيون اللي طوارف رمشها يسلبها

‏فصل فنجال قهوه من يديك ولا شاهي
‏فرصة يـ حظ منهو في العمر يكسبها .

ياحبيبي المحبه مواطنها القلوب
‏والقلوب اليا تصافت يزيد اشعافها

‏والله ان حبك سعاده وذنبٍ من الذنوب
‏سكةٍ فيها الركايب يطول اوقافها

‏مايتوب القلب من حب خله مايتوب
‏لو تتوب الناس من حقها واعرافها .

كان أحسب إن لحبنا عشرة أرواح
‏إلين شفت الحبل بيديه مقطوع

‏يوم العهد به حده إسبوع لى راح
‏إسبوع ويعوّد علي شوق ودموع

‏واليوم خمس سنين والهم مازاح
‏هم الفراق اللى بلا عذر مشروع .

لـو اقـول ان البحر من الهوى مـهوب قدّي
ماقدرت اقول قلبي تاب واعرض عند دروبه

لو اتوب من الذنوب الي جنت الايام ضدي
ماقدرت اتوب عن ذنبٍ يعنّ القلب صوبه

كيف اتوبك يا جمل ذنوبي واقف عند حدي
وانت ذنبِ لا غفره الله ولا لي عنه توبه .

- ضيدان بن قضّعان .