لالا اختي ماحظرتكش اردي عليا هنا فالڤروب دك نبعتلك نشوف المشكل هدا

الحمدلله مالا كي رتحتي بدلي
اما بالنسبة للمستوى الفيزيك تاعهم كيما تاع علوم غير الاعمدة وبزاف ساهلين اتفه درس ولباقي كيف كيف هوما برك مايمدولنمش بزاف تعريفات كيما العلميين ونحس مواضيعهم خير متاع علوم
اما الجبر انا مابانليش صعيب
ختي تقراي الجبر تقدريلو خير من تمرميد تاع علوم وبما انو عندك زوج مواد اساسية تسما يكفيك الوقت واتكلي على ربي وموفقة باذن الله

راكي مخصوصة فالدرس مكيش متمكنة منو مليح عاودي ولي للدرس وشوفي التفاصيل لي خصوك فيه وراح تتحل مشكلتك باذن الله

رضا مليح لكن مراهش دار كلش حاط شوية برك لذلك تبعي منصوري افضل باش ماتخلطيش لي بروف

تفضلو ملخص الدالة الاسية

ماتبقايش تخممي بلي راكي روطار لانو حايهبطلك المورال وتدبرسي كملي اقراي نورمال مكيش روطار ويكفيك الوقت وبزيادة زيري روحك برك وربي يوفقك

من الافضل ملخصك الخاص او مخطط لي يساعدك لانو كي تكتبيه بخط يدك راه يساعدك اكتر باش تشفاي عليه+ في رايي كتاب بورنان طويل بزاف هو صح مليح واستاذ هايل مي بصح كتابو بزاف طويل تقدري تشوفي الاستاذ عبدوش وعندو كتاب ادا ساعدك تبعيه وعلى ضمانتي

عادي نتي ضرك المهم راكي فاهمة الوحدات مليح
ضرك حلي شوي تمارين في كل مادة بصح لي نفس الوقت ابداي في الوحدات في بعدها
مثلا فيزيك حلي تمارين في المتابعة الزمنية امبعد ابدايتقراي في وحدة الميكانيك وحلي تمارين في نفس الوقت باش تبقاي منظمة وتربحي الوقت(طريقة اعتمدتها في الفيزياء) ، نفس الشي مع باقي المواد
قضية تنظيم وقت برك ونحي الخوف والستراس تع راني روطار
وبالتوفيق

عادي يعني مزال الحال تقدري تبداي المواد الادبية بما انك ماتيلام لازم عليك تخدمي فالمات والفيزيك باش تضمني الباك تاعك ومدام تقرايهم فير هوما معنتها راكي منقدمة فيهم وحا يبقالك الوقت باش تقراي باقي المواد من الافضل انك تخصصي كل يوم ساعة لكل مادة ثانوية اصلا مايدوش بزاف وقت يعني وبالتوفيق حببتي

لا مايحبطلك مورال ماوالو مراكيش عارفة الخواص تاعها والنهايات الشهيرة برك وعادي تحصلي ومهيش مضيعة وقت راكي تحاولي مكيش تضيعي وقتك عاودي اقراي الخصائص والنهايات الشهيرة مليح وعاودي حلي وشوفي ادا مزالك فنفس المشكل

متبقايش تخممي بلي راكي روطار بيسك حاتبقاي تخممي وتولي روطار بروماكس وعادي مزال الحال ويكفيك الوقت تقرايهم مفيهمش حاجة كبيرة مزالو سبعة اشهر للباك متكبروش المواضيع وديرو ضغط بلا والو لروحكم ابدابهم يخي مدبتلكم خطة تبعيها وراح تستفادي باذن الله

تفضلو هاد الدالة سهلة نوعا ما حلوها كامل من غير السؤال 5 ماتحلوهش ولي يحلها يبعتلي نصححلو
ملاحظة فالسؤال 2 جزء2 هديك f’ مشي f’'خطأ مطبعي

جماعة لي مخصوصة فالنهايات هادو بعض النهايات اتدربو علبهم

لالا مكاش منها 🙂🙂🙂🙂 لي قالك كدب عليك الشعبة بزاف مليحة وتقدري تدي فيها خاصة هندسة مدنية مهيش صعيبة وتضمني فيها علامة ممتازة

فالعادة يكونو فالوحدة الثانية فالفيزياء والرياضيات نهاية الاسية او راهم فلوغاريتم
نزيد نستفسر ونقلك

عادي جدا كملي اقراي الوحدات الثانية وفنفس الوقت ابقاي تحلي فتمارين الوحدة الاولى وهكا تتمكني منهم كتر وكتر والمواد الادبية عادي يكفيك الوقت تقرايهم وتكملي مفيهمش بزاف اما بالنسبة لتنظيم الوقت ترجع ليك على حساب وقتك تاع القراية شوفي خطة8-8-8 وبدلي فيها شوية على حساب وقتك تاع ليسي وبالتوفيق

شوفي تبداي دك تلحقي باينة تلحقي لانو راكي مطلعة على البرنامج ديجا والباك مزالو 7 اشهر يعني يكفيك الحال وبزيادة
اما ادا تقدري توفقي بيك لافاك والباك ترجع ليك نتي منقدرش نرايي عليك فدي الحاجة مي نقلك كيفاش ديري
شوفي تخصص هدا ادا مفيهش ضغط كبير واسكو تقدري تروحي تقراي فلافاك وتولي وتزيدي تقراي للباك واسك تقدري تعيشي فداك الضغط ومتنسايش الاختبارات تاع سوماستر زاوج يجو مع الباك
ادا تخصص هدا مراكيش حاباتو وتحسيها مشي بلاصتك اخرجي واقراي للباك تاعك
ولا متبلوكيش خلي عامك يمشي وروحي للافاك اقراي فلابيب للباك ادا نتي منوع لي ميقراش فالدار وحا تلقاي بزاف ناس يعاودو فالباك كيفك
صلي استخارة ولي فيها خير ربي يكتبهالك وربي يوفقك

السلام عليكم ورحمة الله عساكم بخيييير

قولولي اقتراحاتكم وش تحتاجو نحطولكم في القناة ولا ادا بغيتو نبداو بخطة تنظيم الوقت ؟؟ قولولي في التعليقات 👇

هذا l'application إسمها thea وهو تطبيق تاع أدرس بذكاء بحيث تبعث ليه رابط فيديو من يوتيوب تاع درس (أي درس وأي شعبة) وهو يساعد بزاف حيث يعطيك أسئلة متعلقة بهذا الدرس ويعطيك إقتراح تاع إختبار يعاون وأسئلة تفاعلية سواء في التاريخ والجغرافيا والأدب والعلوم والرياضيات....
#isra