لما يكون في عائلتكم، في أصحابكم، في مكان عملكم أو حد تشوفوا فيه في الحياة جوه ديما رايق ويضحك وأموره تمام وحياته جميلة وكل شي واخذه بالراحة

اعرفوا أن الشخص هذا أدرك حقيقة الحياة وسلم الأمر لله تسليما تاما

لذلك كلما شفتوا شخص زي هكي

أولا ما تشعروش بالنقص أو الغيرة أو الحسد بسبب الظاهر لكم

ثانيا تعاهدوه بالسؤال مرة مرة وتطمنوا عليه لأن هذا غالبا هو أكثر حد يصيرن معاه أشياء صعبة
وأن البرود واللامبالاة اللي عنده عاطيهن له ربي كتعويض وآلية حماية من الإنهيار

لأن لو خذا الحياة بجدية راهو ما قدرش عليها.


واحمدوا ربي دائمًا لأن عادة أنتم في نعم غير مدركين قيمتها، وتوقفوا عن سؤال (ليش الناس كلهم متريحين إلا نا) المقارنة متعبة للنفسية. حطوا عدسة مكبرة للنعم، ودائمًا اسألوا الله الرضا واحمدوه كثيرًا عشان حتى الألم اللي تمروا بيه كفارات وأجر💚

هل تعلم أنه في مرحلة في التطور المعرفي للطفل يكون عنده النمط الأناني، تحديدًا بين عمر 2 إلى 7 سنوات، وفي هذه المرحلة يكون الأطفال غير قادرين على فهم وجهات نظر واحتياجات الآخرين، ويعتقدوا أنه كل شيء يدور حواليهم وأنه اهتمام كل الناس وخاصة أهلهم لازم يكون موجه ليهم.

ووفقًا لأغلب الدراسات والبحوث، تقل الأنانية تدريجيًا كل ما يكبر الطفل وتتطور وقتها مهاراته الإجتماعية والمعرفية.

جميل ✅ ولكن .....

للأسف البعض نتيجة لظروف ما، يستمر معاهم هذا النمط حتى البلوغ، عشان يكونوا وقتها بالغين جسمانيًا فقط مش فكريًا ونفسيًا؛ بحيث يكون الشخص يعتقد أنه محور كل أمر وأنه مشاعره مهمة ويجب مراعاتها وتقديسها والآخرين لا، وهو مش مطلوب منه يقدرهم ويراعيهم، مثلاً:

- أنا مقصر لأنه أنا مشغول بس أنتم ما عندكمش عذر ليش مقصرين معاي!! بدون ما يقدر أنه حتى هما مقصرين لأنهم مشغولين.

- أنا مؤخرًا حساس ونزعل بسرعة لأنه نمر بفترة صعبة ولازم الكل يسايرني حتى لما نأذيهم لأنه أنا مشاعري مهمة، بس هما عادي يعني لازم يقدروني أنا!!

هذا الفكر والمنطق غير واعي ومؤذي لكل اللي حواليك و لما تكبر بيه فأنت غير بالغ نفسيًا وللأسف عندهم حق لما يقولولك مشاعرك طفولية وحتلقى نفسك منبوذ !!

عشان هكي لازم تقعمز مع روحك وتدرك أنه ما يسري عليك برضو يسري على الناس اللي حواليك، وأنه كل اللي تبي تأخذه يلزم برضو أنك تعطيه.

د.الخـنساء إمبيرش - Dr.Alkhansa Emberish
ديما طيبين وصحيحين 🌾

الوسواس القهري من أكثر الاضطرابات النفسية انتشارًا
أولا لأنه يجي بأكثر من شكل وغالبًا الناس ما يفكروش أنه وسواس قهري أصلا وثانيا لأن يترافق مع اضطرابات أخرى فيتم اهماله والتركيز على الاضطراب الرئيسي

من أشكال الوسواس القهري هو الأفكار الجنسية أو الصور الجنسية الغير مسيطر عليها واللي تجي بدون تحفيز
كذلك الأفكار القهرية عن الله والدين
أو التركيز مع الناس والحكم عليهم وع أخلاقهم أو دينهم أو العكس تخيلهم في أوضاع جنسية معينة حتى لو محارم


للعلم مالهاش علاقة أبدا بأخلاق وتدين الشخص
أو احتشامه ممكن تجي للناس المتدينين والمحافظين أكثر وهذا يوترهم بزيادة وتؤدي لتأنيب ضميرهم بالتالي تفاقم الوضع لأن الكبت والخوف يزيد الموضوع.

لذلك أفضل حل هو تقبل الأفكار هذي زي ما هي بدون حكم على نفسنا أو الآخرين
والتعبير عن هالأفكار بالكتابة أو الحديث مع مختص مباشرة
كذلك معرفة السبب الكامن ورائها
عادة يصاب الإنسان بالوسواس القهري نتيجة التربية الصارمة والقيود

أو بالوراثة

أو وجوده في وسط فيه وسواس قهري

الحكم القاسي على النفس والآخرين والتركيز

الضغوط النفسية بكل أشكالها تزيد الوساوس لأن العقل الباطن يبي ينفس عن اللي يشعر بيه وتراكم الضغط فيلجأ أنه يخففه بالوسواس

يجي أيضًا لما تقل المرونة النفسية وهذي لها أسباب واجد أيضًا، كذلك الأشخاص اللي عندهم سعي للمثالية والكماليين أكثر عرضة للوسواس
القهري بأنواعه المختلفة.

اليوم حكيت عن النوع هذا لعدة أسباب أولا زي ما قلت في البداية أن الأغلب ما يعرفش أنه نوع من الوساوس القهرية
ثانيا نتيجة الحرج والحياء من إخبار الآخرين.

أدام الله الصحة على الجميع💙

للتوازن النفسي علينا معرفة الحدود الطبيعية للمشاعر فحتى السعادة الشديدة اضطراب.
لذلك قاعدة أساسية هي معرفة مشاعرك للتعبير عنها بوضوح

المشاعر الأساسية درجات، تعريف شعورك وتسميته من الخطوات المهمة للتعافي.
لأن أغلب من نسألهم بماذا تشعر
يقول: أنا نفسي لا أعرف!

أنواع القلق:

الألم واللذة:

حاس/ة روحي مش متريح/ة
حاس/ة أني ثقيل/ة عليك
حاس/ة أني مش ح نتعافى
حاس/ة عندي مرض خطير
حاس/ة (أمي/باتي) ما يحبنيش
حاس/ة أنه مش ح يصير مني في (الامتحان/ الشغل/الزواج)
أنا إحساسي ما عمراش خاب
أنا نحس أن فلان ح (يسيبني/يديرلي) زي فلان

ضمن ملاحظات عملي أن أغلب الناس يكرروا في هالأنواع من الجمل

وفي حديث مع (صديقتي) حكيتلها عن الفرق بين الإحساس والحدس وح نحط الكلام هنا برضو

الناس ديما يخلطوا بين
الاحساس والحدس
الاحساس غالبا كذاب بس الحدس غالبا صادق
الحدس هو سبب ونتيجة زي المسألة الرياضية أنك لاحظت/ي كم حاجة وعقلك ربط كويس بس الوعي غير مدرك للربط هذا

اما الاحساس هو غالبا مخاوفنا ومشاعرنا الدفينة نتيجة تجارب سابقة
أحيانا احساسنا بأن حد خاين او كذاب (فقط لأننا مرينا بتجارب سيئة أو لأنه يذكر فينا بحد سببلنا الأذى)
يخلينا نتصرفوا تصرفات تجاهه تحوله بجد هك لان هو واصله شعور بأنه مش آمن وأنك هك ولا هك مش واثق فيه فـ تحدث نبوئتنا ويطلع هك ونقولوا (شفت احساسي)!!
كذلك لما نتوتروا قبل الامتحان رغم دراستنا وبعدها نجاوبوا خطأ ونفشلوا ونقولوا إحساسنا صح
لما نتصرفوا تجاه الأشياء والأشخاص بحذر مبالغ أو بطريقة خطأ لحد ما يصير اللي نخافوا منه


أما الحدس مختلف عقلك لاحظ أشياء وربطها (كلمة نبرة لغة جسد) الأشياء هذي يلاحظهن اللاوعي بدون ما تنتبه ويصير ربط كويس ويعطيك نتيجة

صعب التفريق بين الحدس والاحساس واغلب اللي عندهم قلق ووساوس واكتئاب يقولك حسيت واحساسي صاح بس في الحقيقة هم اللي يخلوا في الآخرين مش متريحين بتصرفاتهم ف تلقي اوريدي اصحابه يسيبوا فيه وهله يعاملوا فيه معاملة مش حلوة (لأنه حساس حساسية غير صحية ويقوم بتفسير الأشياء بطريقة خاطئة بدون ما يعرف)بالتالي ديما حاس بنقص وديما ردود فعله مبالغة

الحدسيين تلقاهم مريحين في تعاملهم وظنهم كويس في الناس غالبا وضروري ما يلقى دليل وإثبات عشان يتأكد وما يتبعش أفكاره فقط.

لذلك غالبًا أي شعور سيء هو مجرد إحساس لحد يثبت العكس.

ما تخسرش سلامك النفسي والأشياء والعلاقات اللي في حياتك بدون ما تسأل نفسك أنا ليش حسيت هكي؟
عندي دليل ملموس؟

من الأشياء الغريبة اللي سمعتها (دكتورة ديريلي تنويم مغناطيسي عشان حاسة أن في ذكريات طفولة راحن مني وهن السبب في وضعي)
(دكتورة خليني نتذكر شن صار معاي أكيد هو السبب)

طبعًا من الاعتقادات الخاطئة جدا هو أن استعادة الذكريات المفقودة قد يساعدنا في التعافي.
ح تقول لي: بس أنتم تقولوا أن طفولتنا اساس كل شي والطفل الداخلي وجروح الطفولة وكل هالمصطلحات اللي تستخدموا فيهن
واللي نشوفوا فيه في الوثائقيات والأفلام والمسلسلات عن التنويم واستعادة الذكريات المفقودة
باهي والعلاج التحليلي اللي داره أب الطب النفسي (فرويد)

نقوللكم أولا المدرسة التحليلية ع شهرتها وفرويد ع شهرته للأسف ما فيش حالات مثبتة للتعافي بطريقتهم وحتى الحالات المسجلة فيهن جدل بالإضافة لكون الحالات شهدت انتكاسات ومضاعفات أخطر بعد استعادة الذكريات وطبعًا مش تقليل من المدرسة هذي ولكن هذه حقيقة ونقطة ضعف كبيرة لها.

طيب شن الرأي؟

الذكريات طبعًا مهمة في تكوين شخصيتنا وسلوكياتنا بس امتى نقولك احكيلي عن طفولتك او نساعدك تتذكرها لما:
- يكون عندك ذكريات بسيطة (يعني الذكرى غير ممسوحة تماما)
- أحلام وكوابيس متكررة
- صور مفاجئة تطلع في مخيلتك بدون سبب
- نوبات هلع لما تتفكر الحدث

واستعادة الذكريات يكون بطريقة علمية وبدون ضغط على الشخص من قبل المعالج ولا من قبله هو شخصيا

وتذكر أن العقل حجب ذكرى سيئة لانها مؤذية جدا، واستعادتها مش ح تفيدك أبدًا لأن هي في الماضي
الطرق الأحدث بالعلاج السلوكي الجدلي والمعرفي والعلاج بالواقع وغيره واااجد فعالة أكثر لأن تشتغل على نسختك الحالية
والماضي نتعلموا منه بس مش نشيلوه ع كتوفنا كأنه جثة ميتة لا فيها فايدة تعود للحياة وكذلك كلما هبت ريح المواقف تجيك رائحتها البشعة.
تاريخك الحالي أهم تاريخ صح تعرف من وين جاك سلوك معين بس أبدًا ما تحط اللوم ع حد لا والدين ولا ظروف لو أنت تبي تتعافى تخلص من اسطوانة الماضي اللي يتلاعبولنا بيها في السوشل ميديا ويعززولنا بيها دور الضحية وأننا ضعاف ومستحيل نتخلصوا من اللي نحن فيه.

لأصحاب الرهاب الاجتماعي والتأتأة والخوف من الظهور:
- مهى القحطاني

ملاحظة : القراءة بصوت مرتفع**

دائرة الانهزام
المؤدية إلى تفاقم الوضع النفسي
تبدأ بفكرة انهزامية
تليها أفعال أو مشاعر انهزامية
بالتالي يتأكد شعورك بالانهزام وتعود لنقطة الأفكار الانهزامية من جديد.
وهكذا تدور في حلقة بدون توقف.