#MTRK #suxandonlar #boshlovchilar

O‘zbekiston milliy teleradiokompaniyasi suxandon va boshlovchilaridan iborat navbatdagi guruh uchun malaka oshirish kursi boshlandi

O‘zbekiston Respublikasi Prezidentining 2020-yil 20-oktabrdagi “Mamlakatimizda o‘zbek tilini yanada rivojlantirish va til siyosatini takomillashtirish chora-tadbirlari to‘g‘risida”gi PF–6084-son Farmonida O‘zbekiston milliy teleradiokompaniyasi tizimidagi teleradiokanallar suxandonlari va boshlovchilarini o‘zbek adabiy tili hamda nutq madaniyati bo‘yicha qayta tayyorlov kurslarida o‘qitish vazifasi belgilangan.

Shuningdek, O‘zbekiston Respublikasi Prezidentining 2025-yil 20-oktabrdagi “Davlat tilini rivojlantirishga oid qo‘shimcha chora-tadbirlar to‘g‘risida”gi PQ–308-son qaroriga muvofiq, 2020–2030-yillarda o‘zbek tilini rivojlantirish va til siyosatini takomillashtirish konsepsiyasini 2025–2026-yillarda amalga oshirish dasturining 9-bandida davlat va nodavlat tele hamda radiokanallari boshlovchilarining o‘zbek adabiy tili bo‘yicha nutq madaniyatini oshirish tizimini yo‘lga qo‘yish, shuningdek, Markazda boshlovchilarning malakasini oshirish vazifalari belgilangan.

Mazkur vazifalar ijrosini ta’minlash maqsadida O‘zbekiston milliy teleradiokompaniyasi tizimidagi markaziy teleradiokanallarda faoliyat yuritayotgan 20 nafar xodim — suxandon, boshlovchi, muxbir va muharrirlar uchun “O‘zbek adabiy tili me’yorlari va nutq madaniyati” o‘quv kursi tashkil etildi.

O‘quv kursi ommaviy axborot vositalari xodimlarining adabiy til me’yorlariga rioya etish, ravon va ta’sirchan nutq ko‘nikmalarini shakllantirish, efir madaniyatini yuksaltirish hamda davlat tilining nufuzini oshirishda muhim ahamiyat kasb etadi. Kurs davomida tinglovchilarga o‘zbek adabiy tilining talaffuz, uslub, imlo va nutq madaniyatiga oid zamonaviy bilim va ko‘nikmalar berilishi rejalashtirilgan.

🌎Bizning manzillar:
🌐Veb-sahifa |✈️Telegram |™️ Facebook | 📺Youtube