لأول مرة في الجزائر 👏 إطلاق خدمة "GPU as a Service"، اضافة متميزة للمجتمع الرقمي، الخدمة من تقديم شركة Icosnet، يعني اليوم ماشي لازم تستثمر في GPU باش تبدا العمل على المشاريع ديالك، وتقدر تدفع غير واش
استهلكت ولا دير اشتراك شهري.

التفاصيل من هنا 👇🏼
https://icosnet.com.dz/gpu/

بلا ماترجع لغوغل ولا AI قولنا وش معناها
GPU as a Service 🤓

البارحة تكلمنا عن المنتج لراه لأول مرة في السوق الجزائر وانطلقنا من انو الشركات الناشئة، المطورين، وصناع المحتوى في الجزائر دايما يعانيو من مشكل كبير كي يحبو يطورو نماذج ذكاء اصطناعي ولا يديرو خدمة معقدة بالـ 3D.

المشكل هو التكلفة الخيالية تاع الهاردوير وصعوبة الدفع بالعملة الصعبة للخدمات السحابية الأجنبية، وهذا لجات بيه شركة Icosnet وين دارت خطوة تاريخية وفتحت باب جديد كليا بإطلاق خدمة "GPU as a Service" لأول مرة في الجزائر.

واش معناها هاد الهدرة عمليا؟ تقدر تقول ولات عندك قدرة توصل لقوة معالجات NVIDIA الجبارة والمخصصة بنقرة زر، بلا ما تشري ماتريال غالي ولا تكسر راسك مع التركيب. هاد الشي يفتح المجال بقوة لتطوير نماذج الذكاء الاصطناعي (LLMs)، الحوسبة العلمية، ومعالجة البيانات الضخمة (Big Data).

أهم ميزات هذي الخدمة اللي تخليها تقلب الموازين في السوق:
✅ أداء مخصص ومستقر: الـ GPU ديالك وحدك وما تشاركو مع حتى واحد، باش تضمن استقرار الخدمة في أصعب المهام.

✅ مرونة في الدفع: تقدر تخلص غير واش استهلكت (Pay As You Go) ولا دير اشتراك شهري، وهذي تعتبر بديل جد تنافسي للحلول الأجنبية، والدفع بالدينار بطبيعة الحال.

✅ سيادة البيانات والأمان: البنية التحتية راهي مستضافة هنا في الجزائر، وهاد الشي يضمن حماية تامة لبيانات الشركات وسرعة استجابة عالية.

هذي ماشي مجرد خدمة تقنية، بل هي بنية تحتية حقيقية راح تبسط الوصول للتكنولوجيا العالية وتدعم الكفاءات الأكاديمية والشركات باش تخدم مشاريع طموحة باستقلالية تامة.

واش رايكم في هاد التطور، وهل تشوفو بلي توفر هذي التكنولوجيا محليا راح يسرع من ظهور ابتكارات وتطبيقات ذكاء اصطناعي جزائرية خالصة؟

راح نحاولوا نختبروا هذه الخدمة ونديروا مرجاعة مفصلة عليها ان شاء الله.

التفاصيل من هنا
https://icosnet.com.dz/gpu/

ليكيب كاين فرصة هايلة للناس لي تكون يومي 25-26 افريل في العاصمة لحضور حدث تقني DeepX راح يكون فيه خبراء جزائريين جايين من ارقى الجامعات والشركات.

مثلا من جماعة شيكاغو، من هارفرد ومن غيرها الكثير

للاسف الأماكن محدودة

شاركتك التفاصيل كلها في هذا الفيديو على انستا مدابيا تشاهدوه ونتلاقاو لتم ان شاء الله

https://www.instagram.com/reel/DXfIeViDhas/?igsh=MWxnMjlkdzhyMnUxcw==

الـ ChatGPT عاد اليكم من جديد 😅

الـ OpenAI تعلن رسميا عن ChatGPT-5.5، وهاد المرة ماراناش نحكيو على مجرد AI للدردشة، بل على مساعد حقيقي ينفذ المهام.


النموذج الجديد تطور بشكل مرعب في فهم الأهداف المعقدة، وراهو يتفوق بقوة في كتابة الأكواد، البحث الدقيق في الأنترنت، وحتى إنشاء الملفات وجداول البيانات بكل سهولة.

بصح الميزة اللي راح تبدل كلش، هي قدرة هاد النموذج على تنفيذ الأوامر والعمل مباشرة داخل التطبيقات اللي تستعملها في جهازك. يعني تعطيه المهمة وهو يفتح التطبيقات ويخدم في بلاصتك.
وما يحبسش هنا، كي يكمل الخدمة ديالو، يدير مراجعة شاملة لروحو (Self-Review) باش يتأكد بلي النتيجة صحيحة 100 بالمية ومافيهاش أغلاط.


وحسب المقال لي نشروه تفوق على اهم المنافسين Claude Opus 4.7 و Gemini 3.1 Pro

الهبال بكل ماتحمله الكلمة في مجال AI والسؤال وين رايحة الامور ...

النصابين دايما يستغلوا المنصات لي تكون جديدة وينتحلوا صفتها، يعني الحذر وشكرا.

الريمونتادا لي مادارتهاش البارصا دارتها OpenAi وفضيحة تقنية في فرنسا، ومنصة لرقمنة حجز أضحية العيد في 🇩🇿 واخبار اخرى متنوعة!

وسؤال اليوم: كيف يمكن ان تنجح المنصات الحكومية في الرقمنة!

وجدوا روحكم! اليوم راح نكونوا في جلسة نقاشية (Live) ، مع أسماء غنية عن التعريف في مجال صناعة المحتوى:
خبيب، محمد جمال طالب، النقاش حول التقنية، صناعة محتوى، والعقلية لي تلحقك في هذا المجال.
الرابط في اول تعليق.
بداية من الخامسة ان شاء الله.

https://streamyard.com/watch/ykZcbXzfkrta

لي يحب يشوف اللايف مرحبا راه الان .

https://streamyard.com/watch/ykZcbXzfkrta

اتخيل زوج من أشهر علامات الهواتف الذكية يندمجو ويوليو كيان واحد. الـ ون بلس وريلمي قرروا رسميا توحيد عملياتهم وجهودهم في السوق.

على بالنا بلي الشركتين من الأساس تابعين لنفس الشركة الأم (BBK Electronics) بصح هاد الخطوة بالذات راح تخلط حسابات سوق الأندرويد.

واش الفايدة لينا كمستهلكين من هاد الاندماج؟

النتيجة المباشرة هي تقنيات مشتركة وتطوير أسرع، والأهم من هاد كامل، كاين احتمال كبير نشوفو هواتف أسطورية تجمع بين الفخامة والأداء الخارق تاع ون بلس، مع الأسعار التنافسية والمنافسة تاع ريلمي.

واش رايكم في هاد التحالف، هل تتوقعو راح يكون في صالحنا ويشعل المنافسة أكثر، ولا راح يقتل التنوع في السوق؟

شاركونا 👇

رسميا سيتم ربط كل البنوك في الجزائر عبر شبكة سيادية آمنة تحمل اسم (IRIES)، الهدف ضمان أمان عالي جدا وسرعة في نقل البيانات الحساسة، القرار جاء بعد اجتماع بين وزيرة المحافظة السامية للرقمنة ومحافظ بنك الجزائر و ممثلي البنوك العمومية والخاصة.

لكن واشنو هو IRIES؟

لسنوات طويلة وحنا نسمعو بمشروع "الأنترانت الحكومي"، شبكة داخلية تربط الإدارات والوزارات باش الداتا تاعنا ما تخرجش للبرا وتكون محمية. اليوم هاد المشروع راهو حقيقة على أرض الواقع واسمه الرسمي شبكة IRIES.

الجميل في هاد المشروع أنه ما بانش في نهار واحد، بل جاز على خريطة طريق تقنية مدروسة وخطوات متسارعة:

✅ نوفمبر 2024: بدأت الأشغال التقنية وتجهيز البنية التحتية الكبيرة للمشروع.

✅ أكتوبر 2025: كانت الانطلاقة الفعلية، وين بدأت الوزارات الكبرى تتبادل البيانات الحقيقية بيناتها لتجريب النظام.

✅ ديسمبر 2025: صدر المرسوم الرئاسي اللي قنن الشبكة وردها البنية التحتية الحصرية والرسمية للدولة.

✅ أفريل 2026 (هاد السمانة): الخطوة المنتظرة، المحافظة السامية للرقمنة دمجت رسميا البنوك العمومية والخاصة في هاد الشبكة.

باش نبسطوها تقنيا، IRIES هي عبارة عن "أنترانت" عملاق ومغلق خاص بالدولة الجزائرية. في بلاصة ما بنك يبعث معلومات لوزارة وتجوز هاديك البيانات على سيرفرات دولية، دركا كلش يجوز في طريق داخلي، محلي، ومفصول تماما على الأنترنت العالمية. هاد الشي يضمن حماية تامة للسيادة الرقمية، موثوقية، وسرعة فائقة في نقل المعلومات.

البنية التحتية راهي واجدة وخدامة اليوم، بصح التحدي الحقيقي دركا راهو في رقمنة الأرشيف القديم، تحديث قواعد البيانات المشتتة، تكوين الموظفين.

والأهم من هاد كامل هو فرض استعمال هاد الشبكة بقوة القانون باش المواطن يولي صح يقضي صوالحو بلا ما يرفد وراقيه من إدارة لإدارة.

واش رايك في المعلومة هدي؟

كنا نقولو "اللي تشوفو عينك آمن بيه"، بصح مع الـ AI تاع دوكا، ولّينا في وقت تقدر تشوف فيديو لشخص يهدر بصح الكود هو لي راه يصنع فيه.

هاد "الضباب الرقمي" خلى الصين تخرج العين الحمراء وتفرض قوانين زلزلت منصات كبار كيما CapCut.

الـ Deepfakes طغى، والصين شافت بلي إذا ما حطتش قوانين، الحقيقة راح تموت.
منصة CapCut وأخواتها ذاقوا العقوبات لأنهم "غمّضوا عينيهم" على محتوى AI مجهول. الدولة قالتلهم: "ممنوع التخفي.. أي فيديو AI لازم يكون عندو Tag صريح يبيّن حقيقتو".

ماكانش "ما علاباليش"، المسؤولين على المنصات وُلاو يتحاسبوا شخصياً إذا جاز فيديو AI بلا ما يديكلاري هويتو.

الصين راهي تقولنا بلي "الحرية التقنية" ما لازمش تكون على حساب "الحقيقة". الـ AI لازم يبقى "خادم" للواقع ماشي "بديل" عليه.

تتوقعو يجي وقت وين يطبق مثل هاذ القانون عندنا ؟

العب خفيف ....

هدية مجانية ليك 👏👌

منصة Replit، هي باختصار أداة سحرية تخليك تبرمج وتبني تطبيقات ومواقع مباشرة من المتصفح تاعك (كيما كروم)، بدون تثبيت أي برنامج عندك. ومؤخرا دخلو فيها الذكاء الاصطناعي بقوة، وين وليت تقدر تبني مشاريع كاملة غير بالأوامر النصية، وهادا هو دور أداة "Agent".

وبمناسبة مرور 10 سنين على تأسيسها، المنصة قررت تحتفل بطريقة استثنائية. نهار السبت 2 ماي، راح تمد لكل المستخدمين وصول مجاني بالكامل لأداة "Replit Agent" لمدة 24 ساعة، بدون حدود وبلا تعقيدات.

الهدف واضح، تقدر تبني أي فكرة في راسك باستعمال الذكاء الاصطناعي. وزيد معها، أطلقو مسابقة "Buildathon" مخصصة ليوم واحد برك بجوائز تفوت 100 ألف دولار. الفكرة بسيطة جدا، ورينا واش تقدر تبني في 24 ساعة.

كل التفاصيل راح تنكشف في بث مباشر هاد الجمعة على 5 تاع العشية بتوقيت الجزائر، وين راح يعلنو ثاني على "Replit Slides"، ميزة جديدة تسمح بإنشاء عروض تقديمية بالذكاء الاصطناعي وتصديرها مباشرة لـ PowerPoint أو PDF.

سبحان الله على كمية الفرص اللي راهي قدامنا والناس مازالت تتكاسل. التكنولوجيا ما خلات حتى عذر لواحد فينا. البرمجة ما بقاتش حكر على اللي يكتب سطور الكود، بل ولات لمن يملك الفكرة ويعرف يوظف هاد الأدوات. Replit راهي تقولك علنا بلي وفرتلك الأداة، الوقت، والجوائز، والباقي عليك.

وقولي واش هو أول مشروع راح تبنيوه؟ شاركونا أفكاركم في التعليقات 👇

https://replit.com/birthday

مع ظهور Image 2 من عند ChatGPT كل يوم تقريبا كاين تراند جديد، خدو يامات هدا البروبمت راه يدور بقورة عالميا وين تقدر تحول اي صورة عادية الى صورة مرسومة بطريقة نوستالجيا وكأنو طفل صغير خربشها شويا جربوها ورجعونا خبر.

بكل بساطة ترفع صورتك لـ ChatGPT وتكتب البرومبت ادناه وتربح.

Redraw the attached image in the most clumsy, scribbly, and utterly pathetic way possible. Use a white background, and make it look like it was drawn in MS Paint with a mouse. It should be vaguely similar but also not really, kind of matching but also off in a confusing, awkward way, with that low-quality pixel-by-pixel feel that really emphasizes how ridiculously bad it is. Actually, you know what, whatever, just draw it however you want.

وزارة الدفاع الأمريكية تتعاقد مع اكبر الشركات التقنية مثل غوغل ومايكروسوفت.
والذكاء الإصطناعي في مقاعد التكوين المهني في الجزائر؟

والصين تمنع امريكا من تقنياتها.
هذا هو جديد التقنية لهذا الاسبوع مشاهدة ممتعة وسؤال الحلقة هو:

متى نرى ذكاء اصطناعي محلي ينافس عالميا؟

صناعة محتوى في المجال الذي تتقن وتحب هو لي يخليك تصل لنتائج مبهرة والتنوع في المحتوى هو الذي نحتاجه اليوم في المحتوى الجزائري او العربي بشكل عام، ابراهيم واحد من صناع المحتوى القدامى لي اختار الغوص في مجال ربما تراه الخورازميات غير جذاب لانو عندو جمهور متخصص وليس عام، لكن بأسلوبه الجميل الاحترافي يخلي الفكرة توصل حتى للناس لي ربما بعاد على المجال، ومنه تلقى روحك تستفاد اما كهاوي او محترف.

الحاجة لي تعجبني في محتواه ايضا هو الباب لي فتحوا للعديد من الشباب المختص في كل مايتعلق بالتصوير والإخراج والكاميرات، الإضاءات وين قربنا للمجتمع الجزائري في المجال وخلانا نشوفوا شباب مبدع وفاهم في المجال.

ربما العتاب الوحيد على Ibrahim Seddik Taleb هو غيابوا المتكرر عن صناعة المحتوى ربما نتفهمها بحكم ظروف العمل وايضا انو صناعة المحتوى في هذا المجال يديلك وقت كبير وفي نفس الوقت ماعندوش عائد مباشر لكن لوكان ينزل اكثر راح يكون واحد من افضل القنوات في المجال على المستوى العربي.

بالتوفيق ليه ولكل صناع المحتوى المجتهدين.

ونتا شاركني صفحات، حسابات وقنوات تقدم محتوى هايل تشوف انو الناس لازم تابعها.

يامات لي فاتوا كان اسم ضياء العوضي تراند تقريبا في كل مواقع التواصل الإجتماعي، إما بقصة وفاته او مقاطعه القديمة او حتى نظامه الذي اطلق عليه اسم "نظام الطيبات" لكن بعيدا عن كل الجدل وبعد الهدوء حبيت نظرح سؤال بسيط، هل الإختلاف والخروج عن المألوف يكفي لضرب سنوات من الطب والأبحاث؟
لانو ليوم مثلا راني نشوف جهة مضادة تماما بمجرد خروج شخص بشيء مختلف راخ يمشي معاه الآلاف بدون التحقق من وراءه وبدون البحث عن صحة كلامه إما بالتجربة الإنسانية او التجارب العلمية الطبية خاصة واننا اليوم امام ملايين الدراسات والبحوث في مجالات مهمة مثل الصحة والأنظمة الغذائية؟
وهنا لا أملك القدرة العلمية للرد على الدكتور رحمه الله واصلا ليس المقام هنا لذلك لكن فقط هو باب النقاش لي لازم نفتحوه لانو مواقع التواصل اليوم تصنع الوعي ويقدر فيديو واحد ينتشر يغير حياة ناس؟
وماشي لازم حالة وحدا تخلينا نشكوا في علم اسمه الطب مبني على آلاف السنين ولا ملاين التجارب الإنسانية؟
شاركني رأيك؟

لمن يسأل عن منصة adhahi انعم الرسائل راهي توصل للمسجلين والرسالة بسيطة فيها تاريخ وموعد التقدم لنقطة البيع المحددة مسبقا حسب المكان لي سجلت فيه اول مرة.

تبقى برك تفصيل مهم وهو كيفية الدفع لمن اختار اونلاين هل تكون بعد اختيار الأضحية ولا يتم استلامها حتى تتم الدفع ام كيف ستكون؟ إذا واحد فيكم دار التجربة كاملة شاركنا؟

ونتا وقتاش سجلت وهل وصلتك الرسالة او لا؟

نظن اكثر منصة رانا خاسرين كثيرا بعدم التواجد عليها كجزائريين هي "تويتر | X" المنصة تَصنع الرأي العام في الكثير من البلدان العربية خاصة المشرق وحتى دول العالم.

نشوف التواجد هناك والتفاعل مع المواضيع العامة راه ضرورة.
ولا واش رايكم!؟ وهل تستعمل المنصة؟

https://x.com/1001dztech/status/2050706678543208894?s=46

​انعم هذا المنشور طويل لكن ان شاء الله راح يكون مرجعي ليك في كيفية استخدام واحتراف Claude ...

دليلك الشامل لاحتراف Claude: الميزات لي الأغلبية ماعلابالهمش بيها

راني فوت مئات الساعات داخل كل واجهات Claude. خبي هاد البوسط عندك، راح تحتاجه.

بزاف ناس يخلصوا اشتراك في هاد الأداة، بصح يستعملوا غير 20% من واش تقدر دير. Claude ماراهوش واجهة وحدة، فيه 3 واجهات: Chat، Cowork، و Code. الأغلبية تستعمل وحدة برك وماعلابالهمش بالباقي. والنتيجة ملايين الناس تضيع في إمكانيات جبارة.

هاك 40 ميزة، إعداد، واختصار مخفيين راح يبدلو طريقة خدمتك نهار تكتشفهم.


✅ خبايا Claude Chat (واجهة الدردشة)

1. الستايلات (Styles): ادخل للإعدادات. تقدر تبدل طريقة هدرة كلود، ترجعها رسمية ولا مختصرة، وتقدر تخدم ستايل خاص بيك وبصوت البراند تاعك.

2. المشاريع (Projects): الأغلبية تراطي هاد العفسة. دير مساحة عمل خاصة، تخبي فيها ملفاتك وتعليماتك. كل محادثة تندار تما، كلود راح يكون فاهم السياق ديراكت بلا ما تعاود تفهمو.

3. معرفة المشروع (Project Knowledge): طلع ملفاتك المرجعية (قواعد البراند، ملفات بي دي اف، الخ). كلود يقراهم ديما قبل ما يبدا أي حوار في هاداك المشروع ومستحيل ينساهم.

4. التعليمات المخصصة (System Prompt): حط تعليمات تمشي في الخفاء مع كل رسالة. مثلا قولو دايما جاوبني بهاد الفورما ولا ما تستعملش هاد الكلمات.

5. الـ Artifacts: كي يخدملك كود ولا ديزاين ولا وثيقة، تخرج في شاشة وحدها باش تقدر تعدل عليها بلا ما تخسر الشات ديالك.

6. الذاكرة (Memory): كلود ولى يشفى على واش هدرتو من قبل. تقدر تشوف وتعدل واش راه شافي عليه في الإعدادات باش تريقل واش لازم يشفى واش لازم ينسى.

7. البحث العميق (Deep Research): كي تفعلها، كلود يولي يحوس في عشرات المصادر ويعطيك تقرير مفصل. شغل راك مكلف باحث يخدم ساعتين، يعطيك النتيجة في زوج دقايق.

8. ذكاء قراءة الملفات: طلع واش تحب، إكسل، صور، كود. كلود ماشي غير يخبيهم، راه يقراهم ويفهمهم. تقدر تعطيلو رابور فيه 50 باجة وتسقسيه غير على باجة 37.

9. تحليل الصور العميق: يقدر يقرا أي صورة بالتفصيل. كابتير تاع إيرور، تصاور السبورة، لي تيكي، وحتى الملاحظات المكتوبة باليد.

10. الكانفا (Canvas): يقدر يخدملك جداول، رسومات بيانية، وكالكيلاتريس تتفاعل معاها مباشرة في الشات.

11. دعم LaTeX: للناس لي تخدم بالرياضيات والإحصاء، يكتبلك المعادلات بطريقة احترافية.

12. تفرع المحادثة (Branching): تقدر تعدل أي رسالة قديمة وتبدا محادثة جديدة من هاديك النقطة. هكا تسلك طرق جديدة بلا ما تخسر المحادثة الأصلية.


✅ قوة Claude Code (واجهة المطورين)

13. مستويات CLAUDE md: المحترفين يخدمو بـ 3 مستويات تاع إعدادات. مستوى للمستخدم، مستوى للمشروع كامل، ومستوى للملفات سبيسيال باش الخدمة تكون منظمة مع التيم.

14. قواعد حسب المسار: دير قواعد سبيسيال لكل نوع تاع ملفات. مثلا طريقة تيست معينة تتطبق غير على ملفات التيست وحدها.

15. وضع التخطيط (Plan Mode): عبز Shift+Tab قبل المهام الكبيرة. كلود يعطيك خطة خطوة بخطوة توافق عليها قبل ما يبدا يخدم باش تتفادى الفوضى.

16. أمر /compact: كي تطوال الهدرة، يضغط المحادثة باش يفرغ المساحة ويبقى شافي على الصح، مليحة كي يبدا كلود يخلط ولا ينسى.

17. أمر /memory: يوريلك واش من ملفات راه رافدها في الذاكرة حاليا باش تعرف لا راه فاهم السياق صحيح ولا لالا.

18. أوامر مخصصة: اخدم أوامر خاصة بيك. مثلا /review باش يدير مراجعة للكود تاعك حسب شروطك انت. راح تربحك سوايع تاع خدمة.

19. التكامل مع Git: يقدر يدير commit، push، ويكتب رسائل الكوميت وحدو. قولو دير كوميت لكلش مع رسالة توضيحية وراح يخدمها ديراكت.

20. تعديل ملفات متعددة: يبدل كود ولا اسم تاع عفسة في قاع ملفات المشروع في ضربة وحدة بلا ما تفتحهم بالواحد.
21. توليد الاختبارات (Tests): يقدر يكتبلك تيست كامل لأي كود تمدهولو ويحط فيه قاع السيناريوهات.

22. وضع -p: يخلي كلود يخدم وحدو في الخلفية. أساسي بزاف للـ CI/CD باش الخدمة ما تحبسش تستنى في الموافقة تاعك.

23. مخرجات JSON: يرجعلك الخدمة منظمة باش الماشينة تقراها مباشرة وتستعملها في البايبلاين تاعك.

24. مراجعة مستقلة: دايما استعمل نافذة جديدة باش تراجع الكود لي كتبو كلود باش ما يكونش متحيز لخدمتو.


خير 5 ميزات من هادو وجربهم اليوم. كل وحدة راح تنقص عليك بزاف وتخليك تربح الوقت.

هذه المقالة ترجمة لمقالة نشرها Khairallah AL-Awady على منصة X