​سنعود للكلام بالتفصيل عن الحلقة التي تثير الكثير من الجدل وسنحاول الكلام من جانب علمي بالرغم من انو الحلقة بالنسبة لي ماكان فيها حتى حاجة تستحق النقاش لا من ناحية تقنية ولا من ناحية شركات ناشئة واستثمارات.

المهم قصة بن دلاج ربما الناس لي شويا مطلعة على المجال التقني تعرف انو في الجزائر تعتبر واحد من اكثر القصص لي فيها اضافة عليها ولي تضرب فيها كل المنطق التقني وتعرفوا قصة الضحكة الاسطورية والموسيقى الاسطورية لي كانت تتماشى دايما معاها.

المهم انا شفت الحلقة تقريبا 2 مرات وخرجت بأمور خلاتني نبقى حاير ....

- على حساب وش فهمت هو عندو فكرة فقط في راسو وهنا جا لبناء فريق وشراء معدات.

- لازم يستثمروا معاه باش يطور AI ؟ وهنا نظن كان يقصد تدريب انظمة مفتوحة المصدر.

- ويبحث عن 15 مليار؟ هدي وشنوا باش تبني الشركة ولا تقييم ولا وشنو مافهمتش؟ وحاجة لي بقيت منها مذهول كيفاه ولا واحد في الحصة سقساه سؤال من هدا النوع ؟؟؟؟

- عندوا ناس هاربين حاب يجيبهم يخدموا معاه وكاين واحد قالك من الاحسن في العالم في المجال.

- يعني كيفاه تقول 90 بالمية جاهزة وتقول بلي هدرنا مع شركات كبرى تابعة للدولة؟ والعكس
تقول انو 100 بالمية النظام جاهز وai شغال وكلش؟؟؟ وفي نفس الوقت قاللهم مزالنا في مرحلة التطوير؟ وهو اصلا MVP ماشفناهاش؟

- لما حكى معاه مطمور قالوا حنا نبنيولك السارفور نتاعك؟ هنا كشغل بقيت مخلوع واش راه يحكي 🧐 وزيد مافهمتش وش علاقة كي قالوا شفت شركة ديالك ومامدلوا حتى معلومة تتماشى مع الضحكة هديك؟

- كبرى الشركات والحكومة على حسابوا جاو ليه وطلبوا مساعدة منه

- 100 مليار ارباح ولا مداخيل ولا مافهمتش وكيفاه تجيبها ومنين؟

والامورات الاخرى واضحة تع في الجزائر للاسف ولينا اي حاجة نكبروها ونطبلولها حتى تولي تحشم تحكي عليها، وهنا اللوم ماشي على اصحابها بزاف لكن على ناس ي تشوف مشروع تع تخرج وترجعوا اختراع وشيء ثوري ومشروع ومنعرف وشنو.

مافهمتش علاه عند البعض كلش يحبوا يرجعوه مشكل شخصي؟ انا نشوفها شيء ايجابي انو المجتمع التقني تكلم ليوم في موضوع البن دلاج، وبالمنطق ونظن العكس الكثير لازم يزيد يخرج يحكي خاصة الناس لي راهي في المجال مباشرة.


اليوم تفرح تلقى صفحات ومجموعات تقنية خرجت وحكات في الموضوع وكل واحد بأسلوبه وطريقته ونشوفها امر عادي، لانو العرض كان في قناة تلفزيونية وامام الجميع يعني من حق اي شخص انو يتكمل ويبدي رايو وهذا امر عادي جدا وماترجعوهاش حدث كبير.


وزيد مليح كشاب كبرت في عصر الانترنت وليوم راك عايش في عصر AI مليح يكون عندك التفكير النقدي وماشي لي تسمعها ولا تلقاها مخلطة بالوطنية تشعل 𖣘𖣘 ديالك وتغرقنا في متاهات ماعندها حتى معنى.


المهم لمستقبل تقني أفضل من فضلك طفي فرفارتك عند الكلام في التقنية.

اليونسكو أطلقت دورة عالمية مجانية على Coursera حول أخلاقيات الذكاء الاصطناعي، بالتعاون مع LG AI Research.

الدورة فيها 10 وحدات، وتهدر على مواضيع مهمة كيما السلامة والأمن، الخصوصية وحماية البيانات، الإنصاف، الشفافية والمساءلة، وحتى الحوكمة العالمية للذكاء الاصطناعي.

الدورة مناسبة حتى للمبتدئين، وتقدر تقراها بالوتيرة اللي تناسبك.

رابط الدورة مباشرة:
https://www.coursera.org/learn/global-mooc-on-the-ethics-of-ai

العاصمة تتصدر إفريقيا في الـFiber

وغوغل رجعت بقوة لسباق الذكاء الاصطناعي… هذي أهم الأخبار التقنية لي صرات هاذ السمانة

#techfeed

بزاف ناس عندها فكرة موقع، بصح كي توصل باش تطلعو للإنترنت تبدأ: Domain؟ Hosting؟ SSL؟ واش نشري بالضبط؟

اليوم نبسطوها: الـNom de domaine هو العنوان لي الناس راح تكتبوه باش توصل لموقعك، كيما 1001tech.dz. أما الـHébergement Web فهو البلاصة لي راح تكون فيها ملفات الموقع وقاعدة البيانات باش يبقى متوفر للناس على الإنترنت. والـSSL هو لي يأمّن الاتصال بين الزائر والموقع ويخليه يستعمل HTTPS بدل اتصال غير مشفر.

يعني باش تطلق Site ما يكفيش تصممو وتقول خلاص. تحتاج عنوان يوصلولو بيه الناس، Hébergement يخليه Online، وSSL باش الاتصال يكون مؤمّن. وهاذ الثلاثة تلقاهم اليوم عند مزودين عالميين وحتى محلياً، ومن بين الحلول لي شفناها عند Icosnet كاين Hébergement Web مع Nom de domaine وإمكانية استعمال Certificat SSL. وبالنسبة لينا، الأهم ماشي غير الموقع يطلع Online، بل يبقى سريع، متوفر ومؤمّن كي يبدأ يدخلوه الناس.

والآن سؤال للي عندهم Site أو سبق لهم دارو واحد: واش كانت أكثر حاجة عذبتكم في البداية؟😅 اختيار الـDomain، الـHosting، إعداد الـSSL، ولا حاجة أخرى ما حسبتولهاش حساب؟

مطور نشر مشروع اسمه ArtCraft فيه سبعة تطبيقات مبنية من الصفر بلغة Rust، تحاول تكون بدائل لـPhotoshop وIllustrator وPremiere Pro وLightroom وAfter Effects وInDesign وAcrobat Pro. والكود كامل مفتوح للجميع.

والقصة اللي خلات المشروع يدور بقوة هي أن المطور يقول إنه استعان بـClaude Opus 5.5 لتسريع عملية التطوير. أبرز تطبيق حالياً هو PhotoCraft، يفتح ويعدل ملفات PSD وعنده Layers وMasks وBrushes وعدد كبير من الأدوات اللي نعرفوها من Photoshop.

حاليا PhotoCraft مازال Early Alpha، والفريق نفسه يقول إنه مازال ما يقدرش يعوض Photoshop في الخدمة الاحترافية اليومية، وباقي التطبيقات أغلبها مازال قيد التطوير.

رابط التجريب 👈 http://getartcraft.com/apps

كلام هذا قليل لي راه تسمعوا يقولهولك بصح كيما عودناك هنا نحكيولك الواقع بدون فيلتر ونخليك خارج انفراد مع ضميرك والباقي ليك وللتاريخ.

في وقتنا الحالي حرفيا ماتحتاج لحتى شخص او صفحة، مؤثر، صانع محتوى، معرض، دورة وخاصدو دورات تع المهابل، لتتعلم حاجة جديدة خاصة اذا ماكنت تعرف على هذاك المجال والو؟ بيناتنا ليوم مثلا تجارة إلكترونية تريح قعدة شابة مع شات جيبتي ولا كلود ولا جيمناي والله يجبدلك التاريخ والحاضر ويفهمك بالخشيبات بعدها اهبط للميدان ياحميدان واخدم واغلط واتعلم، هنا راح تلقى روحك والله احسن من 50 بالمية من الناس لي راك تسمعلها كل يوم؟

وكيف كيف في اي مجال، ليوم راك تسمع على AI خويا جلسة صادقة مع روحك افتح تليفونك وقول لجيمناي فهمني كطفل صغير راح تلقى روحك فاهم وتبدا تتعلم وتطبق وهنا كيف كيف راح تفو 60 من متصدري المشهد.

سما خليك واقعي وريح ماتتمهبل ونتا تشوفلي فيديو تعلم اسرار الايكومرس في 30 ثانية وداير بلي هديك لي راح توصلك والله الحياة ماشي ساهلة لهديك الدرجة.

بكري كنا عايشين بالكراك 😂 تسحق برنامج، تروح تحوس كيفاش تكراكيه باش تستعمله بلا ما تشريه.

اليوم رانا داخلين في مرحلة جديدة تماما! عجبك تطبيق ولا برنامج؟ تقدر تستعمل الذكاء الاصطناعي باش تفهم كيفاش يخدم، وتبني بديل خاص بيك!

كشغل حكاية خاوتنا لي يخدموا العطور ودخلوا في مجال البدائل 😂 تلقاه يقولك هذي بديل الريحة الفلانية، وحاول يجيب نفس المكونات باش يخرج ريحة قريبة للأصلية، ويبيعها بسعر أقل.

نفس الفكرة تقريبًا ولات ممكنة في عالم البرمجيات، خاصة مع مستودع جديد اسمو REA راه داير ضجة على GitHub ووصل لحوالي 58 ألف نجمة! ⭐

تروح تقول للـAI: راني حاب نفهم كيفاش يخدم التطبيق الفلاني، ووشنو هي الخصائص لي فيه، وعاونّي نبني برنامج مستوحى منو.

بصح ماتفهمنيش غالط، مارانيش حاب نسرق الكود الأصلي 😂 حاب غير نفهم الفكرة ونخدم حاجة خاصة بيا.

وهو يعاونك في التحليل والهندسة العكسية وكتابة الكود وريح عاقل برك.

يعني بكري كنا نحوسوا كيفاش نستعملوا برامج الناس، واليوم ولينا نقدروا نصنعوا برامجنا وحدنا! 😅

الرابط المباشر:
https://github.com/morluto/rea

سؤال Tech Feed لهذا الأسبوع: لحقاتك لافيبر ولا مزالك بالـ ADSL
ومشروع بين الجزائر والنيجر بسعة 100 جيغابت 👌🔥

كاين طلبة يعرفو Student CamPUCE لي دارتها جيزي، بصح ماشي كامل يعرفو المزايا اللي فيه.

وين تقدر تستفاد من تخفيضات عند أكثر من 30 شريك في النقل، السفر، التسوق والتكوينات، وزيد دخول مجاني لبعض المواقع والمنصات، وCashback يرجعلك جزء من قيمة مشترياتك حسب الشريك.

🔻رابط المنصة باش ماتراطيش وتستفاد👇

https://student-campuce.dz/join

في الجزائر تعوّدنا على الإشهارات لي تجيك مباشرة، وعلاش لازم تشري. بصح قليل وين نشوفوا حملات تخليك تحبس، تتساءل وتحاول تفهم واشنو راهي الفكرة لي فيها.

هادو الأيام، إذا كنت في العاصمة، سواء في الطرقات أو حتى في المترو، ممكن تكون شفت سلسلة من اللوحات الإعلانية بفكرة بسيطة: كل واحد عندو الـN°1 تاعو.

الفكرة ما تكشفلكش كلش من أول نظرة، وتخليك تتساءل شكون راه وراء هذي الحملة وواش حاب يوصل.

وراء هذي الفكرة كاينة Volz، واحدة من الشركات الناشئة الجزائرية لي قدرت تفرض حضورها في مجال تطبيقات السفر.

واش عجبني في الحملة هو أنها استعملت وسيلة إشهارية تقليدية، وهي اللوحات في الطرقات والمترو، لكن بطريقة مختلفة عن الإعلانات المباشرة لي تعوّدنا نشوفوها.

وهذا بالضبط واش نتمنى نشوف أكثر في الجزائر، خاصة من الشركات الناشئة لي يقودها شباب. الابتكار ما لازمش يكون غير في التطبيق أو الخدمة لي تقدمها، بل حتى في طريقة التسويق والتواصل مع الجمهور.

عندنا شباب مبدعين، وعندنا شركات قاعدة تكبر، ونتمنى نشوفوا معاهم حملات تسويقية تخرج من المعتاد، وتخلينا نفتكروا الفكرة حتى بعدما يفوت الإشهار.

ونتوما، واش رايكم في هاذ النوع من الحملات؟ الإشهار لي يخليك تخمم وتبحث عليه يقدر ينجح عندنا، ولا تفضّلوا الرسالة تكون واضحة من البداية؟