Toza havo ham, to‘kin dasturxon ham, xalqimiz farovonligining ajralmas qismidir

Havo sovishi bilan Toshkent shahri va uning atrofida issiqxonalardan chiqadigan tashlamalarning to‘planishi jamoatchilikning noroziligiga sabab bo‘ladi. Shu bois, poytaxt va unga tutash beshta tumanda issiqxonalar uchun “yashil” texnologiyalarga asoslangan maxsus ekologik tartib joriy etilishi o‘z vaqtida qabul qilingan, to‘g‘ri qaror bo‘ldi.

Bu haqda davlatimiz rahbari ishtirokida o‘tkazilgan taqdimotda qayd etildi. Endi shina, issiqxonalarda plastmassa, bitum, mazut, ishlatilgan moy va chiqindilarni yoqishga yo‘l qo‘yilmaydi.

Ammo issiqxonachilarga faqat cheklovlar qo‘yilmayapti, ularga mablag‘ va imtiyozlar berilmoqda. Jumladan, Ekologik va energiya tejamkor uskunalarni o‘rnatishga har gektar uchun 50 million so‘mgacha subsidiya, yetti yil muddatga 3 milliard so‘mgacha imtiyozli kredit ajratish taklif etildi. Monitoring uskunalarini xarid qilish va o‘rnatish xarajatlarini yengillashtirish ham nazarda tutilmoqda. Bu esa tadbirkorlarning ekologik toza energiya manbalariga o‘tishini osonlashtiradi.

Shuningdek, shaxsiy tomorqalardagi issiqxonalarni modernizatsiya qilish, soliq imtiyozlari berish, energiya tejamkor tizimlar iste’mol qilgan elektr energiyasi xarajatining bir qismini qoplash va grantlar ajratish mexanizmlari aholining daromad manbalarini saqlab qolishga xizmat qiladi.

Bu boradagi ishlar aholini qish mavsumida ham sabzavot mahsulotlari bilan uzluksiz ta’minlash va bozorda narxlar barqarorligini saqlash imkonini beradi.

Demak, bu qaror ekologiya va iqtisodiyot manfaatlari bir-biriga zid emasligini yana bir bor ko‘rsatmoqda. Toza havo ham, to‘kin dasturxon ham, xalqimiz farovonligining ajralmas qismidir.

✅Telegram|✅Facebook | 🌐Instagram | 📹You Tube

250 dan ortiq tut ko‘chati navlari yetishtirilayotgan xo‘jalik faoliyati o‘rganildi

O‘zbekiston Ekologik partiyasi Andijon viloyat Kengashi tomonidan Marhamat tumanidagi "Ipak qurti klasteri" faoliyati o‘rganildi. Mazkur xo‘jalikda 250 dan ortiq tut ko‘chati navlari yetishtirilib, ipakchilik va qishloq xo‘jaligini rivojlantirishga alohida e’tibor qaratilmoqda.

Tadbirda O‘zbekiston Ekologik partiyasi Markaziy Kengashi Ijroiya qo‘mitasi raisining birinchi o‘rinbosari Bahriddin Xofizov, ekofaollar hamda texnikum talabalari ishtirok etdilar.

O‘rganish jarayonida xo‘jalikda amalga oshirilayotgan ishlar, tut ko‘chatlarini yetishtirish va parvarishlash jarayonlari bilan tanishildi. Ma’lum qilinishicha, bog‘da yetishtirilayotgan tut barglari Qozog‘iston va Turkmaniston kabi davlatlarga eksport qilinmoqda. Shuningdek, hududda gulchilik va boshqa qishloq xo‘jaligi mahsulotlarini yetishtirish, soha uchun zarur texnikalarni yaratish ishlari ham olib borilmoqda.

O‘rganish yakunida xo‘jalik faoliyatini yanada rivojlantirish, ekologik barqarorlikni ta’minlash, yashil hududlarni kengaytirish va ilg‘or tajribalarni ommalashtirish yuzasidan takliflar ilgari surildi.

✅Telegram|✅Facebook | 🌐Instagram |🌐 Web site | 📹You Tube

Yaylov — bu nafaqat chorva ozuqasi, balki xalqimiz rizqi

Mamlakatimizda 21 million gektardan ortiq yaylov bor, lekin uning atigi 40 foizidan samarali foydalanilmoqda. Degradatsiyaga uchragan har bir gektar — bu yo‘qotilgan ozuqa, xalqimiz rizqi, to‘kin dasturxon yoki bozorimiz mo‘l-ko'lligi uchun imkoniyat.

Davlatimiz rahbari belgilagan vazifalar yaylovlarni tiklash, ularni suv bilan ta’minlash va chorvadorlarning huquqlarini mustahkamlashga qaratilgan. Bu tashabbus oziq-ovqat xavfsizligi va ekologik barqarorlik uchun muhim qadamdir.

Endi asosiy vazifa ijroni ta’minlashdir. Har bir quduq yer osti suvlarini asragan holda qazilishi, har bir gektar esa ilmiy asosda tiklanishi lozim. Xalq vakillari sifatida biz bu jarayonni doimiy nazoratga olamiz va qonunchilikni takomillashtirish masalasini ko‘rib chiqamiz.

✅Telegram|✅Facebook | 🌐Instagram | 📹You Tube

Tabiiy ofatlar xavfini kamaytirishga qaratilgan targ‘ibot tadbiri o‘tkazildi

O‘zbekiston Ekologik partiyasi Sirdaryo viloyati Kengashi tomonidan 13-oktabr — Xalqaro tabiiy ofatlar xavfini kamaytirish kuni munosabati bilan Guliston davlat pedagogika instituti binosida talabalar hamda professor o‘qituvchilar ishtirokida targ‘ibot tadbiri tashkil etildi.

Tadbir davomida tabiiy ofatlar xavfini kamaytirish, favqulodda vaziyatlarning oldini olish, ekologik xavfsizlikni ta’minlash hamda aholining tabiiy ofatlarga tayyorgarlik darajasini oshirish masalalariga alohida e’tibor qaratildi.

Yashil hududlarni kengaytirish, daraxtlarni asrash, suv va tuproq resurslarini muhofaza qilish kabi ekologik chora-tadbirlar orqali tabiiy xavflarning ayrim salbiy oqibatlarini kamaytirish mumkinligi qayd etildi.

✅Telegram|✅Facebook | 🌐Instagram |🌐 Web site | 📹You Tube

Shahrixon tumanida qurilayotgan suv tozalash inshootining qurilish jarayoni o‘rganildi

O‘zbekiston Ekologik partiyasi Andijon viloyat Kengashi tomonidan Shahrixon tumanida barpo etilayotgan suv tozalash inshootida o‘rganish ishlari olib borildi.

Mazkur inshoot 5 gektar maydonda joylashgan bo‘lib, joriy yil yakuniga qadar foydalanishga topshirilishi rejalashtirilgan. Inshoot sutkasiga 4 ming kub metr oqova suvni tozalash quvvatiga ega bo‘lishi ko‘zda tutilgan. Ushbu loyiha Shahrixon tumanida bunyod etilayotgan ko‘p qavatli turar joylardan hosil bo‘ladigan oqova suvlarni tozalash hamda hududda ekologik barqarorlikni ta’minlashda muhim ahamiyat kasb etadi.

O‘rganish jarayonida O‘zbekiston Ekologik partiyasi Markaziy Kengashi Ijroiya qo‘mitasi raisining birinchi o‘rinbosari Bahriddin Xofizov, “O‘zsuvta’minot” AJning Andijon viloyatidagi mas’ul xodimlari ishtirok etdi.

Jarayon davomida qurilish ishlarining borishi, inshootning texnik imkoniyatlari va ekologik talablarga muvofiqligi yuzasidan fikr almashildi. Shuningdek, oqova suvlarni samarali tozalash, zamonaviy texnologiyalardan foydalanish hamda inshootning belgilangan muddatda sifatli foydalanishga topshirilishi bo‘yicha tegishli taklif va tavsiyalar bildirildi.

✅Telegram|✅Facebook | 🌐Instagram |🌐 Web site | 📹You Tube