Ayni daqiqalarda xalqaro ilmiy-amaliy konferensiya doirasida parallel sho‘balar o‘z ishini boshladi.

Birinchi sho‘ba iqtisodiy transformatsiya, investitsion jozibadorlik va inklyuziv iqtisodiy o‘sish masalalariga bag‘ishlangan.

Ikkinchi sho‘bada inson kapitali, ijtimoiy siyosat, ta’lim va sog‘liqni saqlash, ijtimoiy himoya hamda teng imkoniyatlar muhokama qilinmoqda.

Uchinchi sho‘ba ishtirokchilari esa ekologik barqarorlik, "yashil" iqtisodiyot, suv xavfsizligi, iqlim o‘zgarishiga moslashuv va Orolbo‘yi transformatsiyasi yuzasidan fikr almashmoqda.

Anjuman O‘zbekistonning mustaqil taraqqiyot tajribasini xalqaro va ekspertlik nuqtayi nazaridan muhokama qilish bilan birga, islohotlarni amalga oshirishda parlament oldida turgan dolzarb vazifalar hamda xalqaro hamkorlikning yangi bosqichlarini belgilashda muhim muloqot maydoni bo‘ldi.

Ishtirokchilar Yangi O‘zbekistonda kechayotgan yangilanish jarayonlarini izchil davom ettirish, ilg‘or xalqaro tajribani keng qo‘llash, parlamentlararo va ekspertlik muloqotini yanada rivojlantirish muhim ahamiyat kasb etishini ta’kidladilar.

Konferensiya yakunida mamlakatlar taraqqiyoti yo‘lida parlamentlararo hamkorlikni yanada rivojlantirish, o‘zaro ishonch va hurmatga asoslangan muloqotni mustahkamlash, qonunchilik tajribasi almashinuvini kengaytirish hamda qo‘shma tashabbuslarni ilgari surishga qaratilgan Toshkent deklaratsiyasi qabul qilindi.