#Yashil_makon

Andijonda “Yashil makon” loyihasi doirasida seminar tashkil etildi

Andijon viloyatining Marhamat tumanida “Yashil makon” umummilliy loyihasining kuzgi mavsumi doirasida ko‘chatlarni to‘g‘ri ekish, parvarishlash va saqlab qolish masalalariga bag‘ishlangan ekologik o‘quv-seminar tashkil etildi.

O‘zbekiston Ekologik partiyasi Andijon viloyat Kengashi tomonidan tashkil etilgan mazkur tadbirda loyihaning mazmun-mohiyati, yashil hududlarni kengaytirish, daraxt va butalarni muhofaza qilish hamda ekilgan ko‘chatlarning yashovchanligini ta’minlash masalalariga alohida e’tibor qaratildi.

Tadbir davomida ishtirokchilar ko‘chat ekish bo‘yicha nazariy bilimlarga ega bo‘lish bilan birga, amaliy jarayonlarni ham kuzatdilar. Ko‘chatlarni hududning tuproq va iqlim sharoitiga mos ravishda tanlash, ekish qoidalariga rioya qilish, ularni o‘z vaqtida sug‘orish va muntazam parvarishlash bo‘yicha zarur tavsiyalar berildi.

Shuningdek, hududlardagi ekologik muammolarni o‘rganish va ularni hamkor tashkilotlar bilan birgalikda bartaraf etish, mavjud daraxt va butalarni asrab-avaylash, noqonuniy daraxt kesilishining oldini olish hamda yashil hududlarni muhofaza qilishda jamoatchilik nazoratini kuchaytirish masalalari muhokama qilindi.

✅Telegram|✅Facebook | 🌐Instagram |🌐 Web site | 📹You Tube

13-oktabr — Xalqaro tabiiy ofatlar xavfini kamaytirish kuni munosabati bilan davra suhbati tashkil etildi

13-oktabr — Xalqaro tabiiy ofatlar xavfini kamaytirish kuni munosabati bilan O‘zbekiston Ekologik partiyasi Andijon viloyat Kengashi tomonidan Marhamat tumanidagi 2-son texnikumda davra suhbati tashkil etildi.

Tadbirda O‘zbekiston Ekologik partiyasi Markaziy Kengashi Ijroiya qo‘mitasi raisining birinchi o‘rinbosari Baxriddin Turdiyevich Xofizov, Markaziy Kengash Ijroiya qo‘mitasining Ekologik ta’lim, yashil tadqiqot va loyihalar ofisi rahbari Husanboy G‘ofurovich Dadaboyev hamda texnikum talabalari ishtirok etdilar.

Davra suhbati davomida tabiiy ofatlar xavfini kamaytirish, ularning oldini olish, favqulodda vaziyatlarga tayyorgarlik ko‘rish, atrof-muhitni muhofaza qilish va tabiiy resurslardan oqilona foydalanish masalalari muhokama qilindi. Shuningdek, iqlim o‘zgarishi, ekologik muammolar va ularning inson hayoti hamda tabiatga ta’siri haqida fikr almashildi.

Tadbirda tabiiy ofatlar xavfini kamaytirishda ekologik muvozanatni saqlash, yashil hududlarni kengaytirish, suv va yer resurslaridan samarali foydalanish, chiqindilar bilan bog‘liq muammolarni kamaytirish hamda atrof-muhitga salbiy ta’sir ko‘rsatuvchi omillarning oldini olish muhim ahamiyat kasb etishi ta’kidlandi.

Alohida qayd etilganidek, tabiiy ofatlarning oldini olish va ularning oqibatlarini kamaytirish nafaqat mas’ul tashkilotlarning, balki har bir fuqaroning ham vazifasidir. Buning uchun aholining ekologik madaniyatini yuksaltirish, xavfsizlik qoidalariga rioya qilish, tabiatga mas’uliyat bilan munosabatda bo‘lish va ekologik muammolarga befarq bo‘lmaslik zarur.

Uchrashuv davomida yoshlar ongida tabiatga nisbatan mas’uliyatli munosabatni shakllantirish, ularni ekologik tashabbuslarga keng jalb etish, tabiiy resurslarni asrab-avaylash va mavjud muammolarni hal etishda faol ishtirokini ta’minlash masalalariga ham alohida e’tibor qaratildi.

Shuningdek, talabalarga O‘zbekiston Ekologik partiyasining maqsad va vazifalari, mamlakatimizda ekologik muammolarni hal etish, atrof-muhitni muhofaza qilish va ekologik barqarorlikni ta’minlash borasidagi faoliyati haqida batafsil ma’lumot berildi. Yoshlarning partiya tashabbuslaridagi ishtiroki, ekologik loyihalarni qo‘llab-quvvatlash hamda jamiyatda ekologik madaniyatni yuksaltirishdagi o‘rni muhokama qilindi.

Davra suhbati yakunida tabiatni asrash, tabiiy ofatlar xavfini kamaytirish va ekologik xavfsizlikni ta’minlash borasida yoshlarning bilim va faolligini oshirish, bu yo‘nalishdagi targ‘ibot-tashviqot ishlarini izchil davom ettirish muhimligi ta’kidlandi.

✅Telegram|✅Facebook | 🌐Instagram |🌐 Web site | 📹You Tube

Ekologik barqarorlik va aholi xavfsizligini ta’minlashning zamonaviy yondashuvlari

O‘zbekiston Ekologik partiyasi Markaziy Kengashi hamda O‘zbekiston Respublikasi Favqulodda vaziyatlar vazirligi hamkorligida Xalqaro tabiiy ofatlar xavfini kamaytirish kuni munosabati bilan "Tabiiy ofatlar xavfini kamaytirish: ekologik barqarorlik va aholi xavfsizligini ta’minlashning zamonaviy yondashuvlari" mavzusida o‘quv seminari tashkil etildi.

Tadbirda O‘zbekiston Ekologik partiyasi Markaziy Kengashi raisining yoshlar va xotin-qizlar masalalari bo‘yicha o‘rinbosari Nilufar Matkarimova "Ekologik barqarorlik — tabiiy ofatlar xavfini kamaytirishning muhim sharti" mavzusidagi ma’ruzasi bilan ishtirok etib, tabiatni muhofaza qilish, tabiiy resurslardan oqilona foydalanish va aholi xavfsizligini ta’minlash masalalari bo‘yicha so‘z yuritdi.

Shuningdek, O‘zbekiston Respublikasi Favqulodda vaziyatlar vazirligi mutaxassisi, katta ofitser Samandar Hikmatullayev "Tabiiy ofatlarning oldini olish va ularning oqibatlarini kamaytirish: aholi xavfsizligini ta’minlashning samarali mexanizmlari" mavzusida ma’ruza qildi. Toshkent kimyo-texnologiya instituti "Hayot faoliyati xavfsizligi" kafedrasi professor-o‘qituvchisi Shohida Shamuratova esa tabiiy ofatlar xavfini kamaytirishda hayot faoliyati xavfsizligi tamoyillari va aholining favqulodda vaziyatlarga tayyorgarligi xususida fikr-mulohazalarini bildirdi.

Muhokamalar davomida yashil hududlarni kengaytirish, daraxtzor va o‘rmonlarni asrash, suv resurslarini tejash, ekotizimlarni muhofaza qilish, aholining ekologik madaniyatini yuksaltirish hamda yoshlar va xotin-qizlarni ekologik tashabbuslarga keng jalb etishning ahamiyatiga e’tibor qaratildi.

Seminar yakunida ishtirokchilar o‘zlarini qiziqtirgan savollarga javob oldilar.

✅Telegram|✅Facebook | 🌐Instagram |🌐 Web site | 📹You Tube

Toza havo ham, to‘kin dasturxon ham, xalqimiz farovonligining ajralmas qismidir

Havo sovishi bilan Toshkent shahri va uning atrofida issiqxonalardan chiqadigan tashlamalarning to‘planishi jamoatchilikning noroziligiga sabab bo‘ladi. Shu bois, poytaxt va unga tutash beshta tumanda issiqxonalar uchun “yashil” texnologiyalarga asoslangan maxsus ekologik tartib joriy etilishi o‘z vaqtida qabul qilingan, to‘g‘ri qaror bo‘ldi.

Bu haqda davlatimiz rahbari ishtirokida o‘tkazilgan taqdimotda qayd etildi. Endi shina, issiqxonalarda plastmassa, bitum, mazut, ishlatilgan moy va chiqindilarni yoqishga yo‘l qo‘yilmaydi.

Ammo issiqxonachilarga faqat cheklovlar qo‘yilmayapti, ularga mablag‘ va imtiyozlar berilmoqda. Jumladan, Ekologik va energiya tejamkor uskunalarni o‘rnatishga har gektar uchun 50 million so‘mgacha subsidiya, yetti yil muddatga 3 milliard so‘mgacha imtiyozli kredit ajratish taklif etildi. Monitoring uskunalarini xarid qilish va o‘rnatish xarajatlarini yengillashtirish ham nazarda tutilmoqda. Bu esa tadbirkorlarning ekologik toza energiya manbalariga o‘tishini osonlashtiradi.

Shuningdek, shaxsiy tomorqalardagi issiqxonalarni modernizatsiya qilish, soliq imtiyozlari berish, energiya tejamkor tizimlar iste’mol qilgan elektr energiyasi xarajatining bir qismini qoplash va grantlar ajratish mexanizmlari aholining daromad manbalarini saqlab qolishga xizmat qiladi.

Bu boradagi ishlar aholini qish mavsumida ham sabzavot mahsulotlari bilan uzluksiz ta’minlash va bozorda narxlar barqarorligini saqlash imkonini beradi.

Demak, bu qaror ekologiya va iqtisodiyot manfaatlari bir-biriga zid emasligini yana bir bor ko‘rsatmoqda. Toza havo ham, to‘kin dasturxon ham, xalqimiz farovonligining ajralmas qismidir.

✅Telegram|✅Facebook | 🌐Instagram | 📹You Tube