“Menga yordam emas, imkoniyat kerak”

Effect.uz ga Qashqadaryo viloyati G‘uzor tumani Amir Temur MFYda yashovchi fuqaro tahririyatimizga yana bir bor murojaat qildi.

Uning aytishicha, oilasi 4 kishidan iborat bo‘lib, hozirda moddiy sharoiti og‘ir. Mavjud qarzdorlik ham oilasi zimmasiga katta yuk bo‘lib turibdi. Biroq u shunchaki yordam kutib o‘tirmasdan, o‘z mehnati bilan oyoqqa turishni istaydi.

Shu maqsadda fuqaro 3 yil davomida bosqichma-bosqich amalga oshirishni rejalashtirgan 4 ta loyiha ishlab chiqqan:
gidroponika usulida yem ishlab chiqarish, echkichilik va sutdan qurut tayyorlash,Hikol zotli quyon boqish.

Loyihalarni amalga oshirish uchun 65 million so‘m mablag‘ zarur. Ularning yo‘lga qo‘yilishi orqali oilasiga doimiy daromad yaratish va kelgusida 10 ga yaqin fuqaroni ish bilan ta’minlash rejalashtirilgan.

Murojaatchining ta’kidlashicha, loyihalar bozor o‘rganilib, hisob-kitoblar asosida va 3 yillik rivojlanish rejasi bilan ishlab chiqilgan.

Uning so‘zlariga ko‘ra, mahalladagi hokim yordamchisi uning holati va loyihalari bo‘yicha tuman shtabidan amaliy yordam so‘ragan. Mas’ullar “o‘zimiz aytamiz” deya javob bergan, biroq hozirgacha fuqaro bilan hech kim bog‘lanmagan.

Murojaatchi loyihalarini amalga oshirish, qarzdorlikdan chiqish va kelgusida boshqa fuqarolarga ham ish o‘rni yaratish uchun imkoniyat so‘ramoqda.

Mazkur holat yuzasidan G‘uzor tumani hokimligi va mas’ullardan rasmiy munosabat kutib qolamiz.

Telegram I Facebook I YouTube I Instagram

Saida Mirziyoyeva tadbirkorlarni Yangi Toshkentga sarmoya kiritishga chaqirdi

Prezident Administratsiyasi rahbari Saida Mirziyoyeva Yangi Toshkent hududida barpo etilayotgan zamonaviy bino va inshootlarning qurilish jarayoni bilan tanishdi.

Uning ta’kidlashicha, britaniyalik me’morlar tomonidan puxta ishlab chiqilgan shahar konsepsiyasi Yangi Toshkentning kelgusi o‘n yilliklari uchun mustahkam asos yaratadi.

«Aynan shuning uchun tadbirkorlarimiz Yangi Toshkentga alohida e’tibor qaratishlarini istardim. Bu yerga sarmoya kiriting, qurilish qiling, o‘z biznesingizni yo‘lga qo‘ying. Mazkur maskanning istiqboli va imkoniyatlari beqiyos», — dedi Saida Mirziyoyeva.

Telegram I Facebook I YouTube I Instagram

«Bitta fuqaroning dardi hal bo‘lsa ham, bu katta natija!» — Behzodjon Karimov

Toshkent shahrining Mirzo Ulug‘bek tumanida Davlat kadastrlari palatasi rahbariyati ishtirokida sayyor qabul bo‘lib o‘tdi. Uchrashuvda aholining yer, ko‘chmas mulkni rasmiylashtirish va davlat ro‘yxatidan o‘tkazish bilan bog‘liq eng og‘riqli muammolari bevosita muhokama qilindi.

Muloqot chog‘ida sohadagi byurokratiyani qisqartirish, murojaatlarni asossiz rad etish holatlariga chek qo‘yish hamda «UZKAD» tizimidagi ortiqcha bosqichlarni soddalashtirish bo‘yicha amalga oshirilayotgan ishlar alohida qayd etildi. Ta’kidlanganidek, endilikda asosiy vakolatlar quyi bo‘g‘inga tushirilib, masalalarni joyida, sansalorliksiz hal etishga asosiy urg‘u berilmoqda.

"Davlatimiz rahbari ta’kidlaganlaridek, bir kunda bitta fuqaroni eshitib, muammosiga yechim topsak ham — bu katta natija. Odamlar davlat borligini, adolat va qonun ustuvorligini his qilishi shart", — dedi Behzodjon Karimov o‘z chiqishida.

Videoreportajni bugun kechki dasturlarimizda tomosha qilishingiz mumkin.

Telegram I Facebook I YouTube I Instagram