የሁጃጆችን የትራንስፖርት አገልግሎት ምቾትና ደህንነት የሚያረጋግጥ የውል ስምምነት ተፈረመ።
•••••••••••••••••••••••••••••••••••••••••••••••••
መስከረም 26/2019 ዓ.ል| ረቢዑል ሳኒ 25/1448 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
••••••••••••••••••••••••••••••••••••••••••••••••••
መካ |

የኢትዮጵያ እስልምና ጉዳዮች ጠቅላይ ምክር ቤት ሀጅና ዑምራ ዘርፍ ከሳዑዲ ዓረቢያው የትራንስፖርት አገልግሎት አቅራቢ ሰማያ የትራንስፖርት ኩባንያ ጋር የትራንስፖርት አገልግሎት ውል ስምምነት ተፈራረመ።

​የውል ስምምነቱ ለ2019 (1448) ሁጃጆች ደህንነቱ የተረጋገጠ፣ ምቹና ቀልጣፋ የትራንስፖርት አገልግሎት መስጠት የሚያስችል እንደሆነ ተገልጿል።

በጠቅላይ ምክር ቤቱ ሀጅና ዑምራ ዘርፍ እና በሰማያ የትራንስፖርት ኩባንያ መካከል የተፈረመው የውል ስምምነት በጥብቅ መስፈርቶችና የአሠራር መርሆዎች መሰረት ተፈጻሚ እንደሚደረግም ተመላክቷል።

የሁጃጆች የጉዞ መርሃ ግብር በተያዘለት የጊዜ ሰሌዳ ብቻ እንዲከናወን የሚያስችለው ይህ የውል ስምምነት በጉዞ ወቅት የሚያጋጥሙ ችግሮች በቅንጅትና በፍጥነት ለመፍታት ትልቅ አቅም ከመፍጠሩ ባሻገር የትራንስፖርት አገልግሎቱ የሁጃጆችን አጠቃላይ የጉዞ እንቅስቃሴ ሙሉ በሙሉ የሚያካትትም ይሆናል።

​የጠቅላይ ምክር ቤቱ ሀጅና ዑምራ ዘርፍ የ2019 (1448 ዓ.ሂ.) የሐጅ አገልግሎት ቅድመ ዝግጅቱን በተቀናጀ መንገድ እያከናወነ የሚገኝ ሲሆን ከሰማያ የትራንስፖርት ኩባንያ ጋር የተደረገው ስምምነትም የዚሁ አካል እንደሆነ የጽህፈት ቤቱ የስራ ኃላፊዎች በውልል ስምምነቱ ወቅት አብራርተዋል።

​ሀጅና ዑምራ ዘርፉ ለኢትዮጵያዊ ሁጃጆች የተሟላና ጥራት ያለው አገልግሎት ለመስጠት ከባለድርሻ እና አጋር አካላት ጋር በትብብር እየሰራ ይገኛል።
••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ከኢትዮጵያ እስልምና ጉዳዮች ጠቅላይ ምክር ቤት የተሰጠ መግለጫ
​
​የኢትዮጵያ እስልምና ጉዳዮች ጠቅላይ ምክር ቤት በ7 ኛው ሀገራዊ ምርጫ ህዝቡ የሰጠውን ውሳኔ ተከተሎ በትላንትናው ዕለት የኢፌዴሪ መንግስት በመመስረቱ የተሰማውን ደስታ ይገልፃል።
​
ለተከበሩ የኢፌዴሪ ጠቅላይ ሚኒስትር ዶክተር ዐቢይ አህመድ እንዲሁም ለክልል እና ለከተማ አስተዳድር ፕሬዝደንቶችና ከንቲባዎች በሙሉ ከህዝብ የተጣለባችሁን አደራ እና ኃላፊነት በአግባቡ እንድትወጡ አላህ (ሱ.ወ) እንዲያግዛችሁ እንማጸነዋለን።

የመረጣችሁ ህዝብ እና ሀገራችን ኢትዮጵያ የሚያስፈልጋቸውን ሰላም፣ ልማት እና እድገት ለማምጣት በምታደርጉት ጥረት ሁሉ ጠቅላይ ምክር ቤቱ የበኩሉን ድርሻ እንደሚወጣም ለመግለጽ እንወዳለን።

​ጠቅላይ ምክር ቤቱ በሀገራችን ወንድማማችነት፣ የህግ የበላይነት እና እኩልነት እንዲሰፍን ከመንግስት እና ከህዝባችን ጋር በቅንጅት እንደሚሰራ እየገለጽን ዘመናትን ያስቆጠረው የሀገራችንን የመቻቻል፣ የመከባበር እና የአብሮነት እሴቶች ተጠናክረው እንዲቀጥሉ ህዝበ ሙስሊሙ እንደ ከዚህ ቀደሙ አዎንታዊ ሚናውን እንዲወጣ አደራ እንላለን።

​በመጨረሻም አዲሱ መንግስት የተጣለበትን ሀገራዊ አደራ እና የህዝብ ፍላጎት በትክክል ለመወጣት ከምንጊዜውም በላይ በትኩረት እንዲሰራ እየጠየቅን ለሀገራችን ኢትዮጵያ እና ለህዝቦቿ ሰላምን፣ ፍቅርን፣ አንድነትን እንመኛለን።

​የኢትዮጵያ እስልምና ጉዳዮች ጠቅላይ ምክር ቤት
አዲስ አበባ፣ ኢትዮጵያ

26/01/209

ሀጅና ዑምራ ዘርፉ ለ2019 (1448 ዓ.ሂ.) ሁጃጆች የምግብ አቅርቦት ውል ስምምነት ተፈራረመ።
•••••••••••••••••••••••••••••••••••••••••••••••••
መስከረም 27/2019 ዓ.ል| ረቢዑል ሳኒ 26/1448 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••••••••
መካ |

የኢትዮጵያ እስልምና ጉዳዮች ጠቅላይ ምክር ቤት ሀጅና ዑምራ ዘርፍ ለ2019 (1448 ዓ.ሂ.) ኢትዮጵያውያን ሁጃጆች የሚቀርበውን የምግብ አገልግሎት ጥራቱን የጠበቀ ማድረግ የሚያስችለውን የውል ስምምነት ከሳዑዲ ዓረቢያ የምግብ አቅራቢ ኩባንያዎች ጋር ተፈራረመ።

​የውል ስምምነቱ በሀጅ ወቅት ለሁጃጆች ምግብ በወቅቱና በጥራት ለማቅረብ እንደሚያስችል የተገለጸ ሲሆን የምግብ አቅርቦቱ የሁጃጆችን ጤና፣ ደኅንነትና ምቾት የጠበቀ ይሆናልም ተብሏል።

​የምግብ አቅራቢ ድርጅቶቹ በየዕለቱ የሚያቀርቡት ምግብና መጠጥ ጥብቅ የንጽህና፣ የጥራትና የደኅንነት መስፈርቶችን ማሟላቱ የሚረጋገጥ ሲሆን አቅርቦቱ ስምምነት በተደረበት የጊዜ ሰሌዳ መሠረት በመካ፣ በመዲና እና የሐጅ ሥርዓት በሚፈጸምባቸው ቦታዎች ሁሉ ያለ ምንም መስተጓጎል ተደራሽ ይሆናል።

በአቅርቦት ሂደት ወቅት ሊያጋጥሙ የሚችሉ እክሎችን በቅንጅት ለመፍታት የሚያስችል አሠራር ለመዘርጋትም የውል ስምምነቱ ከፍተኛ ሚና እንደሚኖረው ተገልጿል።

​የኢትዮጵያ እስልምና ጉዳዮች ጠቅላይ ምክር ቤት ሀጅና ዑምራ ዘርፍ የሐጅ አገልግሎትና መስተንግዶውን ከመቼውም ጊዜ በላቀ ሁኔታ ለማጠናቀቅ እያከናወናቸው ያሉትን ተግባራት በቀጣይም ከሚመለከታቸው ባለድርሻ እና አጋር አካላት ጋር አጠናክሮ እንደሚቀጥል አመላክቷል።
••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1