"عسى صبح الوضوح ليّا سرى ليل الغموض و تاه
يجي مثل الضرير اللي؛ يمد الشوف بـ إيدينه"

__خالد الردادي

"أنت يا حلو الملامح و يا حلو الصفات
جل شان اللي من الزين معطيك رهوه

كل يوم تحط دوبك و دوب الذكريات
لين ما ياخذ بي الوجد و الشوق نهوه

يا محاصرني بـ ذكرك من الأربع جهات
ما تركت لـ ساحة البال.. سجه و لهوه

أرتبط وجهك مع الورد و الماء و النبات
و ارتبط طاريك.. مع كل فنجال قهوه"

"عظيم البرد يوم إنك رحلتي و الجمر بيديك
‏وأنا مالي نصيب من الدفا و البرد يا قوّه

‏تيبس طارف أشجار الكلام وما قدرت اجيك
‏حداني عنك تأنيب الضمير و دافع مروّة

‏تناسيتك رغم هذي السنين وقلت لك ناسيك
‏وأنا اللي مات في برد الكرامة ما شعم ضوّه."

__عبدالملك الخربوش.

"تشرّه ولا تعذْر، ترى ظروفي أخذ وخل
‏مخاوف سنيني (غيبتك) كانت أزمنها

‏تعال أجمع شْتات الحكي والعتاب وقل
‏من اللي مشرّد ضحكتك عن مواطنها؟

‏وقم وأرسم البسمة على أيام عمري، عل
‏إلى دارت الأيام من بعدك؟ أضمنها

‏ورا صْدورنا حاجات تستاهل إنْها تْظل
‏حرام (الزعل) ما يجلس ألّا بـ أماكنها"

"يبدو إن الشوق وصّاني عليك وصايه
‏لا اللقى يشفي غليل ولا المعانق كافي"

‏__مزيد الوسمي.

"هلا يا غاية العمر وهلا يا أجمل الزوّار
‏هلابك قد ما تبرى جروحي بلمسة إيدينك

‏هلابك قد ما زان العمر وأبتسمت الأقدار
‏وكنّ إللي مضى وهمٍ نسيته بين ضلعينك"

‏"تظل السنه واغلى التواريخ محض أرقام
‏لكن ما يخلدها ، سوى ما جرى فيها "

__‏صالح حمد

"ما يهمّ العمر.. لا منّه وقف لـ عيون غالي!
‏كيف عاد أسوق لك عمري سحاب ولا تخيْله؟

‏ردّني... لـ أيّامك الصّلفات لا زاد اِنعزالي
‏آه "يا ذلّ السؤال.." إن صار ما فـ اليد حيْلة

‏ليش أميل لضحكتك وأكْسِر لطارفك اِعتدالي
‏وأتمنّى خنجرك.. وأبدأ نهارَك، وأنتهي له

‏لا تحاول تشرح أسباب الرحيل ولا تبالي
‏صدّة العشّاق؛ مثل الفارس اللي زلّ خيْله

‏الصباحات اِتودَّد طلَّتك! حتّى اللِّيَالي..
‏كلّما جفّ الظلام؟ اِستنجدت ليلك جديلة

‏والسّنين إن غرّبت صوتي، وخلَّتني لحالي؟
‏أدري إنها ما تكون بـ حضرتك؟ إلَّا جميلة."

" يا ليتْ إني سَحابه، و أنهمرتكْ يا حبيس الضلع
تباشرك القصيد و كل وادي بك .. دَرْج سيله "

__طلال الصقيه

"ردّتني النّسمة اللي من شذاك الأخير
‏مع إن لي سنين، أحسب إني تجاوزتها"

__‏فيصل السور.

حزينٍ لـ أبوي اللي تركني بـ سنّ الطيف ،
عرفته مسافر .. بس مدري وش أبطى به
__فيصل المهلكي

"صحيح ان الموادع حط في قلب الشقي مخلاب
‏لكن يفداك قلبي يا اول وآخر معازيبه"

عسى شعرٍ يليق بـ غيبتك يا المُترف الحساس
يجنبنّي بواريد الحنين .. و عضّة إبهامي

سريت البارحه، والبال خالي من جميع الناس
عدا وجهك .. على طول الطريق يلوح قدامي

عليه الله و أمانه كم سرى بي فالدجى عسّاس
و هو نجمٍ يشع بهالزمان الأسود الدامي

ضحك لي ، وأحسب انه ضو برقٍ فجّ نحر الياس
على غفله .. و سيّل من وراه حكاية إلهامي

"ماتمايل ..لو يشوف الوقت قدامه تمايل
‏رغم ما شافه من الأيّام ما قد باح سدّه."

" جعل شمس الشروق اللي تبدد أمنيات الشمع
على ظلما محابيس القلوب، يْجي لها ميله "

"لوّ كان لـ النور.. بس وجهك لا منه شرق
ما شلت همّ اللْيال و قوّ تأثيرها

لو أنه البرق في نَحرك ما لَاح و برق
ما جدّت تركيبها، وأتقنت تصويرها!

ولوّ إن ربي كتب لي في بحرك الغرق
ما تقدر تصد نفسٍ عن مقاديرها..

ولوّ إن -لَوّي- لها عِدَة جواب وطرق
جاوبت بـ الحَاجَه اللي ودي اصيرها"

__طَلالْ الصقيه.

﴿ إن الله ومَلائكته يُصلون على النَّبي يا أيُها الذين آمنُوا صَلوا عليه وَسَلِّموا تَسليماً ﴾