أنا صوبهم كن القدم بي مع منحاه
‏أدوس الصخر كني على ناعم الزلِّي!

لبّا جبينة ليا ارتج الغطا كنّه
‏برقٍ يصب الرفيف بكف ديمومه

‏وردٍ تفرعن حماره قلت أباكنّه
‏اليا متى والحنايا منْه مفطومه !

كبار وننطح القاله ولكن فالغرام صغار
‏تزعزعنا رهيفات الخصور ان هب طارقها
‏- عويشر

والله انّي ماتنازل ولي رايٍ عنيد
‏لين أداعب غرّة الشمس والثم خدّها

للدْمع في كلّ خدٍّ مني اخدود
باحت خفايا ضمّيري والعزا باح

الحبّ يقرد وراع الحب مقرود
من الروابع يصب أقداح بأقداح

من جادلٍ نابني من جودها جود
يلعب بنا الموج منها لعب الالواح

بعيوني اللي عسى ياكلهنّ الدود
ما جاء مثل حسنها حسنٍ، ولا راح

من مات في حسنّها ما عنه منشود
و إن عاش.. مابين مسراحٍ و مرواح

البارحه في ضيافة شيخه الخود
ليلٍ جمع شملّنا أجساد و أرواح

وضحّاً هواها عذابٍ غير مردود
ما والله يقوم من في حبها طاح

لا سولفت لي تشوف عيونها السود
من خَدرة الشوق سكرانه بلا راح

في صوتها من مزامير آل داوود
لو سَمعه الطير، ما غرّد ولا ناح

في سلّهمة رمشها ما قادني قود
العين ذبّاحةٍ، و الرمش ذبّاح

أسوْد شعرها على الوركين مرجود
و إلا علـى لبّةٍ، بـرّاقهـا لاح

الثّغر حبة عنب أحمر بعنقود
و خدّينها البيض.. مصباحٍ ومصباح

__إحذرّوا الفراعنه لامنْ تغزل..

"لو شافه اللي تهجّد وسط محرابه
‏صلى أم اﻻربع ثلاث وضيَّع القبلة

‏ولو شافه اللي بني عبسٍ تعزوى به
‏والله فلا عاد يسأل عن هوى عبلة"
‏__ناصر الفراعنه

أنا أدري ان الأوادم كلهم من تراب
‏وأنتي من تراب مكة والحرم والحطيم
‏- بندر الدويش

"من يصدّق بانهياري خلف هالوجه الصبوح؟
‏وضحكتي تسبق بكاي وبسمتي تسكن فمي"

"و أنا و أنتِ مشينا درب واحد
‏أبد ما نلتقي.. بس نتبارى"

تمر أيام عمرك دون رغبه عاث فيك اليأس
‏على ضفة مشاوير السنين .. تقول ميتٍ حي
- حال هالأيام

عودك معزّل ومتنهّض ومفتول
‏اليا تعدّل رمح واليا انحنى داب

‏ومعنّقك فارع و زامي ومنتول
‏وصدرك جمع مالذ كلّه وماطاب

‏وسودك طلايع قوم وسيوف وخيول
‏خيّالها يارد على الموت ماهاب

‏ايّووه من صحوة هدبها ولاحول
‏وإن سلّهمت هذا بلا ابوك ياعقاب

‏__مطلق بن شويه.

يازول صفرًا تدوس الروض بالحافر
‏من مربط ٍتنعرف بين العرب خيله

‏الله عطاك الجمال الباذخ السافر
‏اللي ماشفته على لبّاسة الشيله

‏فـ عيونك السّود مايؤمن به الكافر
‏رمش ٍ تبرّت بناته.. من رياجيله

الجبال تذرّي الناس من قيض الشموس
‏ولا تحسب إن الجبال اتشّابه فالقمم

‏بعضهم شكله جبل بس من رمل الطعوس
‏وبعضهم ضرب الصواريخ فيه ولا انهدم

‏لاتفاخر وأنت وارث وتعطينا دروس!
‏وأنت من يومك صغيّر حوالينك خدم

‏من خذاها باليمين وتحت حك الضروس
‏يفرق بعيني عن اللي خذاها من عدم.

عسانا ليّا رحنا ندور لنا منهاج
‏ترحب بنا بيض المقّادير وتهلي*

“يا مزون ​الغيث يا بيض ​السحايب
‏ يا حقوق ​الوسم يا وبل ​المخيله

‏ ابرقي ثم ​ارعدي عقب ​الھبايب
‏ وامطري في ديارنا تسعين ليله”

تبرّيت من صوتي بعد ما علي قسّاك
‏ووقفت لا ذاكر دروبي ولا ناسي

‏اعرف اتكلم لين اجي لزعلك ورضاك
‏اشوف الكلام اصغر بواجد من احساسي

‏وانا والله ان البسمه اللي تمر شفاك
‏ادوّر عليها.. كنّي ادوّر أنفاسي

جعل سيرتنا ليا ذعذعت منها هبوب
‏من رياحين الثّنا.. والقبول مطيّبه

‏__مطحس بن حمد.