Bugungi kunda Toshkent davlat transport universiteti Elektrotexnika va kompyuter muhandisligi fakultetining “Avtomatika va telemexanika” kafedrasi tomonidan temir yo‘l transportida poyezdlar harakatini boshqarishga mo‘ljallangan kompleks “Istiqlol” tizimlari ishlab chiqilmoqda hamda tizimli ravishda amaliyotga tatbiq etilmoqda.

Universitet professor-o‘qituvchilari tomonidan “O‘zbekiston temir yo‘llari” AJ “Temiryo‘linfratuzilma” AJning “Toshkent mintaqaviy temir yo‘l uzeli” filiali tarkibidagi “To‘qimachi–Angren” temir yo‘l uchastkasida joylashgan stansiyalarda foydalanilayotgan Xitoy Xalq Respublikasining Casco Signal kompaniyasi tomonidan o‘rnatilgan MPM-ILOCK mikroprotsessorli markazlashtirish hamda MPAB-ILOCK yarimavtomatik blokirovka tizimlarining ishlash tamoyillari o‘rganilib chiqildi.

O‘rganishlar natijasida mavjud temir yo‘l stansiyalariga qo‘shimcha qabul qilish va jo‘natish yo‘llarini mavjud mavjud MPM-ILOCK mikroprotsessorli markazlashtirish  ulash, mavjud MPAB-ILOCK yarimavtomatik blokirovka tizimiga integratsiya qilish shuningdek, stansiya va peregonlarni konfiguratsiyasidagi o‘zgarishlarni mahalliy mutaxassislar tomonidan amalga oshirish imkoniyatlari mavjud emasligi aniqlandi.

Shundan so‘ng Toshkent davlat transport universiteti hamda “1-son qurilish-montaj poyezdi” MCHJ o‘rtasida tuzilgan shartnoma asosida “O‘zbekiston temir yo‘llari” AJ “Temiryo‘linfratuzilma” AJning “Toshkent mintaqaviy temir yo‘l uzeli” filiali tarkibidagi “To‘qimachi–Angren” temir yo‘l uchastkasining “Aqcha” temir yo‘l stansiyasiga “MPM-Istiqlol” mikroprotsessorli markazlashtirish tizimi, shuningdek, “Aqcha–Obliq” va “Aqcha–Ohangaron” peregonlariga “MPAB-Istiqlol” tizimi joriy etildi.

“Aqcha–Obliq” hamda “Aqcha–Ohangaron” peregonlarida tatbiq etilgan “MPAB-Istiqlol” tizimi qo‘shni stansiyalarda mavjud MPM-ILOCK tizimlari bilan to‘liq integratsiyalashgan holda ishlashi ta’minlandi. Natijada temir yo‘l uchastkalarida poyezdlar harakati xavfsizligini yanada oshirish, ma’lumot almashinuvining uzluksizligini ta’minlash hamda boshqaruv jarayonlarini optimallashtirish imkoniyatlari yaratildi.

Shuni alohida ta’kidlash joizki, universitet professor-o‘qituvchilari tomonidan ishlab chiqilgan kompleks “Istiqlol” tizimlari yangi qurilishi rejalashtirilayotgan temir yo‘l uchastkalari va stansiyalarida, shuningdek, mavjud infratuzilmalarni to‘liq yoki qisman modernizatsiya qilish jarayonlarida keng qo‘llanish imkoniyatiga ega. Mazkur tizimlarning moslashuvchan arxitekturasi ularni temir yo‘l infratuzilmasini modernizatsiya qilish, qayta loyihalashtirish hamda mahalliy sharoitlarga moslashtirishda samarali texnologik yechim sifatida qo‘llash imkonini beradi.