Toshkent davlat transport universitetida 2026/2027-o‘quv yili uchun to‘lov-kontrakt miqdorlari tasdiqlandi.

Talabalar kontrakt.edu.uz platformasi orqali to‘lov-kontrakt shartnomalarini shakllantirishlari va yuklab olishlari mumkin.

Shuningdek, tabaqalashtirilgan to‘lov-kontrakt, ya’ni super-kontrakt asosida o‘qish istagida bo‘lgan abituriyentlar ham mazkur platforma orqali ariza topshirishlari va shartnomalarini shakllantirishlari mumkin.

Shartnomani rasmiylashtirish yoki yuklab olishda qiyinchilikka duch kelgan talabalar va abituriyentlar tegishli fakultet dekanatiga yoki universitetning Registrator ofisiga murojaat qilishlari mumkin.

Ijtimoiy tarmoqlarda o‘zini universitet rahbariyati vakili, kafedra mudiri yoki boshqa mas’ul xodim sifatida tanishtirib, o‘qishga qabul qilish va ta’lim jarayoniga oid masalalarni pul evaziga hal qilishni taklif etayotgan shaxslardan ehtiyot bo‘ling.

Jumladan, soxta akkaunt orqali talabaga murojaat qilib, o‘zini kafedra mudiri deb tanishtirgan shaxs keyingi kursga o‘tkazishda yordam berishni va’da qilgan va buning uchun pul talab qilgan holat kuzatildi.

“O‘qishga kiritib qo‘yaman”, “Keyingi kursga o‘tkazib beraman”, “Baholaringizni to‘g‘rilab beraman” yoki “Masalangizni rahbariyat orqali hal qilaman” kabi va’dalarga ishonmang. Bunday takliflarni universitetning rasmiy murojaati sifatida qabul qilmang.

Firibgarlik qurboniga aylanmaslik uchun quyidagilarga amal qiling:
➖ Akkauntdagi ism, surat va lavozimga qarab ishonch bildirmang. Sizga yozgan shaxsning kimligini universitetning rasmiy aloqa kanallari orqali aniqlashtiring.
➖ O‘qishga kiritish yoki o‘quv masalasini hal qilish va’dasi bilan so‘ralgan pulni shaxsiy bank kartasiga yoxud noma’lum hisob raqamiga o‘tkazmang.
➖ Pasport ma’lumotlari, bank kartasi rekvizitlari, parollar va SMS tasdiqlash kodlarini yubormang. Shubhali havolalarga kirmang.
➖ “Tezroq pul yuboring”, “Bu haqda hech kimga aytmang” kabi talablar bilan sizni shoshirishsa, muloqotni to‘xtating va ma’lumotni rasmiy manba orqali tekshiring.
➖ O‘qishga qabul masalalari bo‘yicha universitet qabul komissiyasiga, kursdan kursga o‘tish, akademik qarzdorlik va boshqa o‘quv masalalari yuzasidan fakultet dekanati yoki Registrator ofisiga murojaat qiling.

Ushbu xabarni yaqinlaringiz va kursdoshlaringiz bilan ulashing. Ularni ham yolg‘on va’dalardan ogohlantiring!