وضحكةٍ تستعطف الماء وتغتال الجمُود
‏كل ما ضحكها بوجه الغيم . . حوّل منهمل

صباح النور وش نور الصباح الا صباحك انت
‏" ياوجه ياعساني ما اعدم باهي . . تعابيره "

خذني من افكاري و من كثر ظنّي
‏الظن يرهقني بالايجاب و السلْب

‏و قلّي كلام يطمّن القلب لانّي
‏محتاج لـ ادنى كلمة تطمّن القلب.

على دفا صوتك يمّر الليل ، مرور الكرام
‏والليل تطويه السوالف ، والسوالف لي قبل

‏أزف لك ، كل المحبة والمودة والسلام
‏أمّا بعد : أحبّك ، وأمّا قبل أنسي قبل

‏صدّي عن الفايت ووليّ الجاي كل الأهتمام
‏ولآ لك ألا زلةً تدمح ، وعذرٍ ينّقبل

‏بـ أيام وصلك عوضي عيني عن أيام الخصام
‏وعلى جفاف الروح ، صبّي صبّ همّال الوبل

‏أنتي غمامة حُب ، واللي خالقك منشي الغمام
‏عليك شرهات الشجر لآ مات ، والورد أن ذبل

‏أعلنت لك كل الغلا ، حملت لك كل الغرام
‏خاويتك بـ كل الطرق ، راضيتك بـ شتى السُبل

‏وإذا أمتلى صدري غزل ، ولآ أمتلى صدري ملام
‏أنا النبيل اللي بـ حزنه نُبل ، و بـ فرحه نُبل

‏" خليني أخبّي شعوري عنك في بعدك مدام :
‏في قربك يصير أوضح مْن النار في راس الجبل "

‏وكلمة أحبّك ، تآج في بالي ، وفي صدري وسام
‏متكوّنه من أربع أحرف ، مدري من أربع قُبل

‏متعلّقه فـ حبالي الصوتيّه ، فـ كل الكلام
‏تهدّ يدها من حبل ، وتشدّ في يدها حبل

‏"وعيونك اللي كنّ صف رموشها صفة إسهام
‏لا سلهمت لي ، سلهمتها كنّها مسة نُبل

‏بتنام ، وبتصحى ، وبإذن اللي عيونه ما تنام
‏مثل ما حبّيتك قبل ، بحبّك أكثر من قبل "

‏أواسي الكل وانا اكثر شخص احتاج
‏مواساة ___ وفي روايه اخرى:
‏"ياما حضنت المتعبين بهالحياة
‏حتى غدَا صدري مخيم لاجئين"

انا ادري ماعلى قلبي من صدوف الفراق خلاف
‏لو ان نوبات حزن الذكريات تضيّق ضلوعي

‏ومثلك ما تردّيه الليالي ومنه ما ينخاف
‏لو انك كاشف اسراري وعارف وش هي طبوعي

‏لكن ليه الحياة الجايرة ما تعرف الإنصاف
‏ياكيف احلى الليالي معك تسقى بمالح دموعي ؟

مابعتك بالسحايب والبروق السمْر والأنسام
وساموني بتلويحة وداع وبِعت بأوّل سوم

أنا منكسر .. من ضيقةٍ ، تلفت الانظار
‏عسى في يدين الوقت جبري وتفريجي

‏تدانيت بعدك ، وانطوى قلبي المحتار
‏ولا فاد فـ الموضوع شرحي وتعريجي

‏لا زاد التغلي وانقطع . . طاري الاعذار
‏يقل الغلا . . ويغادر ، بـ شكل تدريجي

‏عليك السلام المعتبر ، والسلام الحار
‏على الشامة اللي في مكان استراتيجي

يطري علينا شيّ ما يطري عليك
‏فـ لا تـذم الشيّ . . لأنـك جاهله
‏ٰ
‏أخذ السهل دامه بمتناول يديك
‏بس الصعب خلّه لمن يستاهله !

وشلون أدور من وراهم على أرباح
‏والحمد لله حالتي .. مستقره

‏إن جيت أجي مزاح وأروح مزاح
‏ودربٍ يجيب الضيق ماني بمره

‏ماعاد باقي من العمر كثر ماراح
‏واللي قنع مافيه شي ٍ .. يغره

‏خلك بعيد تعيش راضي ومرتاح
‏بعض العرب قربه لنفسك مضره

مساء الخير من قلبٍ يشوف إن الحياة بخير
‏ مادام إن الغلا محفوظ والدوله سعوديه .

كيف ضاقت من بعدك الأرض واحتالت ظروفي؟
‏وأنت لا منّك ضحكت.. تعوّد الدنيا وسيعة

والله إني أبيع من سنين عُمري فرح ومزوح
‏ إذا كان المقابل . . تبسّام وجهك🩶

إن ضحكت تْعلّم الازهار وشلون التجلّي
‏وإن بكيت تْساوي النفس القوية بالذليله

‏من عرفك و ماقضى عمره طروب و مسفهلي
‏ من لقاك و ما لقى الدنيا مثل وجهك جميلة

ينازعني شعوري و المشاعر ماتحشْم الـ ليه
‏انا وشلون ابنهي لي شعور أجهل بداياته ؟

ماعاد تغريني الفرص خلها تفوت
‏عندي رجاي و دعـوتي في يـديني

‏يالله رضاك ورحمتك لحظة الموت
‏وأول ما اشوف بـجنتك .. والديني

عزايّ الواجد لنفسي ولخاطري المكسور
بين تقلاب الجروح وفتح الجروح القديمه

شخصٍ أعزّه وأعذره لو ماهوب معذور
تفنن في رسمه و وضع البصمه الأليمه

جعل فيني شخص خالي مجرّد شعور
وخدش الخافق وجعل فيه لمسه يتيمه

يسقي الله يوم عاد خاطري منه مسرور
ومكانته عندي لها قدر ومقام وقيمه

تدور الليالي وعقارب الساعه معها تدور
وأنا بين كل ضحكة فرح تقفاها هزيمه

ما هقيت إن بعض النوايا يحتلها الفجور
ولا توقعت إن مواجهتها عواقبها وخيمه

مانيب أشره عليه لا أطغاه بعض الغرور
وبالآخره الخصيم مارده يواجه خصيمه

ونهاية البني آدم تضمه زوايا القبور
وتخلد بعد موتته روايته العظيمه

تخيّل إن ليلك يحن وأحباب صمتك يسمعون
‏وإن الوَلَه ضحكه على عينك لها لمعه وصخب

‏والوقت واقف أو مشى مايهم حاله وش يكون
‏يكفي إذا أنفاسك معه .. ترقص ولو فيها عتب

‏والعازف اللي من ورا ضجّة ملامحكم .. يمون
‏أرخى على لحنه لجل بك تمتلي روحك شغب

"لعل رمضان يأتي فيزيل هموماً أثقلت
‏ على أرواحنا شهور "

جعله يعود الصوم عامٍ ورى عام
‏و انتم و حنَّـا في نعيم وفضايـل 🌿