Farg‘onada yoshlar siyosati: bandlik, manzilli yordam va zamonaviy kasblar

Ahmad Farg‘oniy nomidagi viloyat axborot-kutubxona markazida yoshlar siyosati yo‘nalishida amalga oshirilayotgan ishlarga bag‘ishlangan navbatdagi matbuot anjumani bo‘lib o‘tdi.

Unda viloyat hokimi o‘rinbosari Sherzod Polvonov jurnalist va blogerlarga yoshlar bandligini ta’minlash, tadbirkorligini qo‘llab-quvvatlash hamda zamonaviy kasblarga o‘qitish borasidagi natijalar haqida ma’lumot berdi.

Ta’kidlanganidek, yil boshida xatlovda aniqlangan 7 841 nafar ishsiz yoshning 7 818 nafari — 99,7 foizining bandligi ta’minlandi. Shuningdek, 16 329 nafar yoshga 728 milliard so‘m imtiyozli kredit ajratildi. "Yoshlar daftari" orqali 1 022 nafar yoshga 3,3 milliard so‘mlik manzilli yordam ko‘rsatildi.

Yoshlar o‘rtasida huquqbuzarlik va jinoyatchilikning oldini olishga qaratilgan 1 445 ta tadbirda 47 ming nafardan ortiq yosh qamrab olindi.

Fergana.gov.uz|Facebook|Instagram|Youtube|X

Farg‘ona jurnalistikasi ustozi Doniyor Ergashev 90 yoshda

Farg‘ona jurnalistikasi rivojiga munosib hissa qo‘shgan, ko‘p yillik samarali faoliyati bilan el-yurt hurmatiga sazovor bo‘lgan O‘zbekistonda xizmat ko‘rsatgan jurnalist Doniyor Ergashev 90 yoshni qarshiladi.

Shu munosabat bilan Farg‘ona shahridagi viloyat axborot-kutubxona markazida viloyat hokimligi, O‘zbekiston Jurnalistlar uyushmasi viloyat bo‘limi, “Yangi Farg‘ona” gazetasi tahririyati, “Farg‘ona viloyati teleradiokanali” davlat muassasasi hamda hamkor tashkilotlar ishtirokida tadbir tashkil etildi. Unda ustozning hamkasblari, shogirdlari, jamoatchilik vakillari hamda oila a’zolari qatnashdi.

Dastlab viloyat hokimi o‘rinbosari Xurshid Ahmedov viloyat hokimi Xayrullo Bozorovning ustozning qutlug‘ 90 yoshi munosabati bilan yo‘llagan tabrigini o‘qib eshittirdi. Tabrikda Doniyor Ergashevning el-yurt xizmatiga bag‘ishlangan umri, soha rivojiga qo‘shgan hissasi va fidokorona mehnati alohida e’tirof etildi.

Tadbir davomida ustozning sermazmun hayot yo‘li va kasbiy faoliyatiga to‘xtalib o‘tildi. Uning viloyat teleradioqo‘mitasida rahbar, viloyat hokimligi muassisligidagi gazetalarda bosh muharrir sifatida olib borgan faoliyati Farg‘ona jurnalistikasi tarixida muhim o‘rin tutadi.

Doniyor Ergashev yarim asrdan ziyod umrini jurnalistikaga bag‘ishlab, viloyatning ijtimoiy-siyosiy va ma’naviy hayotini yoritish, xalqning orzu-intilishlari va bunyodkorlik mehnatini qalamga olishga munosib hissa qo‘shdi. Uning so‘zga mas’uliyat bilan yondashuvi, kasbiga sadoqati va boy tajribasi ko‘plab yosh jurnalistlar uchun ibrat maktabiga aylandi.

Ustozning jurnalistika sohasidagi ko‘p yillik xizmatlari munosib taqdirlanib, unga “O‘zbekistonda xizmat ko‘rsatgan jurnalist” faxriy unvoni berilgan.

Bugun ham matbuot yangiliklarini kuzatib borishi, kasbiga bo‘lgan mehri va hayotga faol munosabati bilan yosh avlodga namuna bo‘lib kelmoqda.

Tadbirda so‘zga chiqqanlar tomonidan va ustozning hayoti hamda faoliyatiga bag‘ishlangan videolavhada uning nafaqat jurnalist sifatidagi mahorati, balki sog‘lom turmush tarziga amal qilishi, jismoniy faollikni targ‘ib etishi ham alohida ta’kidlandi.

Batafsil

Fergana.gov.uz|Facebook|Instagram|Youtube|X