KUZ-QISH MAVSUMIGA TAYYORGARLIK: ELEKTR TARMOQLARIDA OLIB BORILAYOTGAN ISHLAR O‘RGANILDI

Mamlakatimizda kuz-qish mavsumini barqaror va uzluksiz elektr energiyasi ta’minoti bilan qarshi olish maqsadida energetika infratuzilmasini modernizatsiya qilish, mavjud tarmoqlarni ta’mirlash hamda texnik holatini yaxshilash bo‘yicha keng ko‘lamli ishlar amalga oshirilmoqda.

Shu munosabat bilan O‘zbekiston Respublikasi Vazirlar Mahkamasi huzuridagi Elektr energiyasi, neft mahsulotlari va gazdan foydalanishni nazorat qilish inspeksiyasi — “O‘zenergoinspeksiya” boshlig‘i Dadajon Isakulov Farg‘ona viloyatida bo‘lib, kuz-qish mavsumiga tayyorgarlik doirasida olib borilayotgan amaliy ishlar bilan yaqindan tanishdi.

O‘rganishlar davomida elektr uzatish tarmoqlari, transformator punktlari hamda podstansiyalarda amalga oshirilayotgan joriy va mukammal ta’mirlash ishlari, ularning sifati va belgilangan muddatlarda bajarilishi, shuningdek, elektr energiyasi yo‘qotishlarini kamaytirishga qaratilgan chora-tadbirlarning samaradorligiga alohida e’tibor qaratildi.

Xususan, Toshloq tumanidagi “Zarkent” podstansiyasidan chiquvchi 10 kVli “Tog‘liq” elektr uzatish tarmog‘ida olib borilayotgan ta’mirlash ishlari hamda tumanning “Jarqishloq” mahalla fuqarolar yig‘ini hududida joylashgan 5-sonli transformator punktida amalga oshirilgan texnik tadbirlar joyiga chiqib ko‘zdan kechirildi.

Mutaxassislar tomonidan bajarilgan ishlarning texnik talablarga muvofiqligi, elektr uskunalarining ishga tayyorlik darajasi va kelgusi mavsumdagi yuklamalarni ishonchli qabul qilish imkoniyatlari atroflicha tahlil qilindi. O‘rganish jarayonida mavjud holat yuzasidan tegishli tavsiya va ko‘rsatmalar berilib, ishlarning sifatini yanada oshirish, energiya samaradorligini ta’minlash hamda iste’molchilarni uzluksiz elektr energiyasi bilan ta’minlash masalalari muhokama qilindi.

Ta’kidlanganidek, kuz-qish mavsumiga puxta tayyorgarlik ko‘rish, elektr tarmoqlari va transformator punktlarini belgilangan reja asosida ta’mirlash, avariyaviy holatlarning oldini olish hamda energiya yo‘qotishlarini qisqartirish bo‘yicha olib borilayotgan ishlar aholi va iqtisodiyot tarmoqlarining barqaror elektr ta’minotini ta’minlashda muhim ahamiyat kasb etadi.

⚡️ t.me/farhetk_admin

HUQUQIY BILIM VA HAMKORLIK – ENERGIYA SOHASIDAGI MUVAFFAQIYAT KAFOLATI

“Farg‘ona hududiy elektr tarmoqlari korxonasi” AJda “Energosavdo” filiali Farg‘ona bo‘linmasi hisobchilari hamda huquqshunoslari ishtirokida iqtisodiy-huquqiy masalalarga bag‘ishlangan seminar yig‘ilishi bo‘lib o‘tdi.

Seminarda Farg‘ona tumanlararo iqtisodiy sudi rahbariyati va sudyalari ishtirok etib, energetika sohasida faoliyat yuritayotgan mutaxassislar uchun dolzarb bo‘lgan qator masalalar yuzasidan ma’ruzalar qilindi.

Tadbirni Farg‘ona tumanlararo iqtisodiy sudi raisi F. Amanov kirish so‘zi bilan ochib berar ekan, davlat organlari va xo‘jalik yurituvchi subyektlar faoliyatida qonunchilik talablariga qat’iy rioya etish, huquqiy madaniyatni yuksaltirish hamda nizolarni qonuniy asosda hal etishning ahamiyatiga alohida to‘xtaldi.

Seminar davomida iqtisodiy sudga taqdim etiladigan da’vo arizalarining shakli, mazmuni va ularga ilova qilinadigan hujjatlar bo‘yicha batafsil tushuntirishlar berildi. Mazkur mavzu yuzasidan Farg‘ona tumanlararo iqtisodiy sudi sudyasi G. Xolmatova so‘z yuritib, amaliyotda uchraydigan xatolar, hujjatlarni rasmiylashtirishdagi talablar hamda da’volarni ko‘rib chiqish jarayonlari haqida atroflicha ma’lumot berdi.

Shuningdek, elektr energiyasidan foydalanish qoidalarining buzilishi holatlari bo‘yicha dalolatnomalarni rasmiylashtirish tartibi, ularning huquqiy oqibatlari hamda sud amaliyotidagi ahamiyati yuzasidan Farg‘ona tumanlararo iqtisodiy sudi sudyasi I. Tursunov ma’ruza qildi. Unda energiya resurslaridan oqilona foydalanish, qoidabuzarliklarning oldini olish hamda hujjatlarni qonunchilik talablariga muvofiq yuritish masalalari batafsil yoritildi.

Seminarning navbatdagi qismida davlat xaridlari sohasidagi amaldagi qonunchilikni qo‘llash masalalari muhokama qilinib, ushbu yo‘nalishda yuzaga kelishi mumkin bo‘lgan xato va kamchiliklar hamda ularni bartaraf etish mexanizmlari haqida zarur tavsiyalar berildi.

Tadbir davomida ishtirokchilarni qiziqtirgan savollarga mutaxassislar tomonidan batafsil javoblar berilib, amaliy faoliyatda uchrayotgan muammolar yuzasidan fikr almashildi. Ochiq muloqot ruhida o‘tgan seminar energetika tizimi xodimlarining huquqiy bilim va ko‘nikmalarini yanada mustahkamlash, sud-huquq amaliyoti bilan yaqindan tanishish hamda qonunchilik talablarini to‘g‘ri qo‘llashda muhim ahamiyat kasb etdi.

Mazkur seminar davlat organlari va energetika sohasi mutaxassislari o‘rtasidagi hamkorlikni mustahkamlash, huquqiy savodxonlikni oshirish hamda faoliyat samaradorligini yuksaltirish yo‘lidagi navbatdagi muhim qadamlardan biri bo‘ldi.
 
⚡️ t.me/farhetk_admin