VAQT — ASOSIY MEZON: “QUVASOY” PODSTANSIYASIDAGI SHARTLI AVARIYA BARTARAF ETILDI

Kuz-qish mavsumida elektr ta’minotining barqarorligini ta’minlash, energetika obyektlarida yuzaga kelishi mumkin bo‘lgan favqulodda vaziyatlarning oldini olish hamda bunday holatlarda tezkor va muvofiqlashtirilgan harakat qilish ko‘nikmalarini mustahkamlash maqsadida maxsus-taktik o‘quv mashg‘uloti o‘tkazildi.

110/35/6 kVli, Farg‘ona va Quvasoy shaharlari hamda Farg‘ona tumanidagi iste’molchilarni elektr energiyasi bilan ta’minlovchi “Quvasoy” podstansiyasida tashkil etilgan mashg‘ulot markaziy shtab nazorati ostida onlayn shaklda olib borildi.

O‘quv mashg‘ulotining asosiy maqsadi — podstansiyada favqulodda nosozlik yuzaga kelgan taqdirda navbatchi xodimlar va ta’mirlash guruhlarining tezkor, xavfsiz va aniq harakatlanish darajasini amaliyotda sinovdan o‘tkazishdan iborat bo‘ldi.

Shartli favqulodda vaziyat yuzaga kelishi bilan mutaxassislar tomonidan nosozlikni aniqlash, uning kelib chiqish sabablarini tezkor tahlil qilish, zarur hisob-kitoblarni amalga oshirish va mavjud holatdan kelib chiqib to‘g‘ri qaror qabul qilish jarayonlari bajarildi.

Mashg‘ulot davomida ta’mirlash guruhlarining voqea joyiga yetib kelishi, elektr qurilmalarida xavfsizlik talablariga qat’iy rioya qilgan holda nosozlikni aniqlashi, ishlarni bajarish ketma-ketligini belgilashi hamda avariyaviy holatni qisqa vaqt ichida bartaraf etishga qaratilgan harakatlari alohida nazorat qilindi.

Ayniqsa, tezkor qaror qabul qilish, aniq hisob-kitob asosida harakatlanish, xavfsizlik choralarini ta’minlash va brigadalar o‘rtasidagi o‘zaro hamkorlik mashg‘ulotning muhim yo‘nalishlaridan bo‘ldi.

Shartli avariya sharoitida har bir xodimning o‘z vazifasini aniq bilishi, topshiriqlarni belgilangan tartibda bajarishi va yagona boshqaruv asosida harakat qilishi amaliy tarzda sinovdan o‘tkazildi.
Mazkur mashg‘ulotlar energetika tizimining kuz-qish mavsumidagi barqarorligini ta’minlashda muhim ahamiyat kasb etadi. Zero, favqulodda vaziyatlarda natija ko‘p jihatdan mutaxassislarning tayyorgarligi, qarorni qanchalik tez va to‘g‘ri qabul qilishi hamda jamoaviy harakatlarning puxtaligiga bog‘liq.
 
⚡️ t.me/farhetk_admin

KORRUPSIYA, GIYOHVANDLIK VA INTIZOM MASALALARIDA XODIMLAR QAT’IY OGOHLANTIRILDI

Toshloq tumani elektr ta’minoti korxonasida korrupsiyaning oldini olish, giyohvandlik vositalari va psixotrop moddalar tarqalishiga qarshi kurashish, xizmat hamda ijro intizomini mustahkamlashga qaratilgan profilaktik yig‘ilish o‘tkazildi.

Unda tegishli mutasaddi tashkilotlar vakillari hamda korxona xodimlari ishtirok etdi.

Yig‘ilishda xizmat faoliyatida qonuniylik, halollik, shaffoflik va mas’uliyat tamoyillariga qat’iy rioya etish, korrupsiyaviy holatlarga yo‘l qo‘ymaslik hamda xizmat vazifalarini vijdonan bajarish masalalariga alohida e’tibor qaratildi.

Shuningdek, giyohvandlik vositalari va psixotrop moddalar iste’molining inson salomatligi, oila va jamiyatga salbiy ta’siri haqida tushuntirishlar berildi. Xodimlarning turli salbiy illatlarga qarshi immunitetini kuchaytirish, sog‘lom turmush tarziga amal qilish va hushyorlikni oshirish zarurligi ta’kidlandi.

Xizmat intizomi, qonuniylik va mas’uliyat talablariga rioya etish har bir xodim uchun majburiy ekani qayd etildi.

Yig‘ilish yakunida xodimlar korrupsiyaning har qanday ko‘rinishiga yo‘l qo‘ymaslik, giyohvandlik va boshqa salbiy illatlardan yiroq bo‘lish, xizmat vazifalarini sidqidildan bajarish hamda mehnat intizomiga qat’iy rioya etish yuzasidan qat’iy ogohlantirildi.

⚡️ t.me/farhetk_admin