✨ YANGI O‘ZBEKISTONNING BAXTIYOR BOLALARI

Kuni kecha 1-iyun – Xalqaro bolalarni himoya qilish kuni munosabati bilan “Farg‘ona hududiy elektr tarmoqlari korxonasi” AJ rahbariyati hamda kasaba uyushmasi qo‘mitasi tashabbusi bilan xodimlar farzandlari uchun unutilmas bayram tadbiri tashkil etildi.

“Yangi O‘zbekistonning baxtiyor bolalari” shiori ostida o‘tkazilgan ushbu tadbir bolajonlarga quvonch, shodlik va yorqin taassurotlarga boy lahzalarni tuhfa etdi. Bayram davomida ular turli ijodiy va intellektual mashg‘ulotlarda ishtirok etib, rasm chizish, qiziqarli savol-javoblar, ertak qahramonlari bilan uchrashuvlar hamda mo‘jizalarga boy ko‘ngilochar dasturlarda faol qatnashdilar.

Tadbirning eng quvonchli jihatlaridan biri bolalarning samimiy kulgisi, beg‘ubor quvonchi va yuzlaridagi tabassum bo‘ldi. Turli sahna ko‘rinishlari, quvnoq o‘yinlar va interaktiv chiqishlar ularga ko‘tarinki kayfiyat ulashib, bayramni yanada fayzli va mazmunli qildi. Har bir bola o‘zini e’tibor markazida his etib, ushbu kunni katta quvonch bilan o‘tkazdi.

Ma’lumki, bolalar — Vatanimiz kelajagi, jamiyatimizning eng bebaho boyligidir. Ularning sog‘lom, bilimli va baxtli voyaga yetishi uchun yaratilayotgan sharoit va imkoniyatlar mamlakatimizda olib borilayotgan islohotlarning muhim yo‘nalishlaridan biri hisoblanadi. Yosh avlodga bo‘lgan mehr va e’tibor esa har bir tashkilot va jamiyatning insonparvarlik mezonini namoyon etadi.

Mazkur bayram tadbiri ham bolajonlar qalbida yorqin xotira sifatida muhrlanib, ularga mehr-muhabbat, quvonch va bayramona kayfiyat ulashgan kunlardan biri bo‘ldi. Eng muhimi, bu kabi tadbirlar farzandlarimizning baxtli bolaligini ta’minlash, ularning orzu-intilishlarini qo‘llab-quvvatlash va kelajakka bo‘lgan ishonchini mustahkamlashga xizmat qiladi.

⚡️ t.me/farhetk_admin

INVESTORLAR ISHONCHINI MUSTAHKAMLAYOTGAN ZAMONAVIY INFRASTRUKTURA

Bugungi kunda mamlakatimizda tadbirkorlik va investitsiya muhitini yanada yaxshilash, yangi ishlab chiqarish quvvatlarini ishga tushirish hamda hududlarning iqtisodiy salohiyatini oshirish borasida keng ko‘lamli ishlar amalga oshirilmoqda. Bu jarayonda investorlar uchun zarur infratuzilmani yaratish va muhandislik-kommunikatsiya tarmoqlarini rivojlantirish ustuvor vazifalardan biri bo‘lib qolmoqda.

Yozyovon tumanidagi “Yuqori Soybo‘yi” mahalla fuqarolar yig‘ini hududida joylashgan 24,7 gektarlik sanoat zonasida ham aynan shu maqsad yo‘lida tizimli ishlar olib borilmoqda. Hududda ishlab chiqarish korxonalarini tashkil etish va investitsiya loyihalarini amalga oshirish uchun zarur sharoitlarni yaratish maqsadida elektr ta’minoti infratuzilmasi izchil takomillashtirilmoqda.

Xususan, quvvati 1000 kVA bo‘lgan ikkita zamonaviy transformatorning o‘rnatilishi hamda montaj ishlari olib borilayotgani nafaqat mahalliy tadbirkorlar, balki xorijiy investorlarning ham e’tiborini tortmoqda. Hududga tashrif buyurgan xitoylik investorlar elektr ta’minotini yaxshilash, muhandislik-kommunikatsiya tarmoqlarini rivojlantirish va sanoat zonasi imkoniyatlarini kengaytirish borasida amalga oshirilayotgan ishlarga yuqori baho berdilar.

Ularning ta’kidlashicha, har qanday ishlab chiqarish korxonasining samarali faoliyat yuritishida barqaror va ishonchli elektr energiyasi hal qiluvchi ahamiyatga ega. Shu bois hududda yaratilayotgan qulay sharoitlar va davlat tomonidan ko‘rsatilayotgan amaliy ko‘mak investitsiya loyihalarini qisqa muddatlarda ishga tushirish hamda ishlab chiqarish hajmlarini oshirish uchun mustahkam zamin yaratmoqda.

Ayni paytda A-373 xalqaro avtomobil yo‘li bo‘yida joylashgan mazkur sanoat zonasida infratuzilmani yanada rivojlantirish ishlari izchil davom ettirilmoqda. Elektr ta’minoti, muhandislik-kommunikatsiya tarmoqlari va boshqa zarur obyektlarning bosqichma-bosqich barpo etilishi hududning investitsiyaviy jozibadorligini oshirishga xizmat qilmoqda.

Eng muhimi, bunday loyihalar yangi ishlab chiqarish korxonalarining tashkil etilishi, qo‘shimcha ish o‘rinlarining yaratilishi hamda aholi bandligini ta’minlashda muhim omil bo‘lib, hududning ijtimoiy-iqtisodiy rivojlanishiga munosib hissa qo‘shmoqda.

⚡️ t.me/farhetk_admin

SHOXIMARDONDA ELEKTR TA’MINOTINI YAXSHILASH BO‘YICHA KENG KO‘LAMLI ISHLAR DAVOM ETMOQDA

Aholini sifatli va barqaror elektr energiyasi bilan ta’minlash maqsadida "Shoximardon" mahalla fuqarolar yig‘ini hududida elektr ta’minotini modernizatsiya qilish bo‘yicha loyiha asosida keng ko‘lamli amaliy ishlar olib borilmoqda.

Mazkur loyiha doirasida hududdagi elektr tarmoqlarining texnik holatini yaxshilash, elektr energiyasi yetkazib berishdagi uzilishlar va kuchlanish pasayishlarining oldini olishga alohida e’tibor qaratilgan.

Bugungi kunga qadar amalga oshirilgan ishlar natijasida 66 dona yangi temir-beton tayanchlar o‘rnatildi. Shuningdek, 1,5 kilometr uzunlikdagi yangi elektr uzatish tarmog‘ini qurish ishlari jadal sur’atlarda davom ettirilmoqda.

Mazkur tarmoq foydalanishga topshirilgach, iste’molchilarning elektr energiyasiga bo‘lgan ehtiyojini yanada ishonchli ta’minlash imkoniyati yaratiladi.

Bundan tashqari, mahalladagi 350-sonli transformator punktidagi mavjud yuklamani kamaytirish maqsadida hududga quvvati 400 kVA bo‘lgan yangi transformator olib kelinib, uni o‘rnatish va montaj ishlari amalga oshirilmoqda.

Yangi transformator ishga tushirilishi natijasida elektr tarmog‘idagi yuklama muvozanatlashtirilib, iste’molchilarga yetkazib berilayotgan elektr energiyasining sifati va barqarorligi sezilarli darajada yaxshilanadi.

Olib borilayotgan ushbu bunyodkorlik ishlari yakunlangach, "Shoximardon" mahallasidagi 200 dan ortiq xonadonlar, 100 ga yaqin tadbirkorlar va ijtimoiy soha obyektlarining elektr ta’minoti yanada mustahkamlanib, isteʼmolchilarga ko‘rsatilayotgan xizmatlar sifati yangi bosqichga ko‘tariladi.

Elektr energetikasi infratuzilmasini rivojlantirish borasidagi bunday loyihalar hududlarning ijtimoiy-iqtisodiy taraqqiyotiga xizmat qilishi bilan ahamiyatlidir.

⚡️ t.me/farhetk_admin