G‘OLIBLAR MUNOSIB TAQDIRLANDI

Avval xabar berganidek, "Kasb mahorati" musobaqasining tantanali taqdirlash marosimi chinakam bayramona ruhda o‘tdi. Musobaqa davomida o‘zining kasbiy mahorati, bilim va tajribasi, jamoaviy hamjihatligini namoyon etgan ishtirokchilar munosib e'tirof etildi.

Musobaqaning final bosqichiga qadar yetib kelgan barcha jamoalarga "Farg‘ona hududiy elektr tarmoqlari korxonasi" AJ rahbariyati hamda Kasaba uyushmasi qo‘mitasi tomonidan esdalik sovg‘alari topshirilib, ularning fidoyiligi va kasbiga sadoqati yuksak baholandi.

Shundan so‘ng musobaqaning eng hayajonli lahzalari – g‘olib va sovrindorlarni taqdirlash marosimi boshlandi. Bo‘lim xizmatlari o‘rtasidagi bellashuv yakunlariga ko‘ra, 3-o‘rin Izolyatsiya xizmatiga, 2-o‘rin Yuqori kuchlanishli tarmoqlar xizmatiga, faxrli 1-o‘rin esa Podstansiyalar xizmati jamoasiga nasib etdi.

Tuman va shahar elektr ta'minoti korxonalari o‘rtasidagi murosasiz bahslarda esa 3-o‘rin Bag‘dod tuman elektr ta'minoti korxonasi, 2-o‘rin Yozyovon tuman elektr ta'minoti korxonasi, faxrli 1-o‘rin esa Uchko‘prik tuman elektr ta'minoti korxonasi jamoasi tomonidan qo‘lga kiritildi.
Musobaqa g‘oliblari va sovrindorlari maxsus diplomlar, pul mukofotlari hamda qimmatbaho esdalik sovg‘alari bilan tantanali ravishda taqdirlandi.

Mazkur musobaqa nafaqat g‘oliblarni aniqlash, balki xodimlarning kasbiy bilim va ko‘nikmalarini yanada mustahkamlash, xavfsizlik madaniyatini yuksaltirish, tajriba almashish hamda jamoalar o‘rtasida sog‘lom raqobat muhitini rivojlantirishga xizmat qildi. Kasbiga sadoqat, mas'uliyat va yuqori mahoratni namoyon etgan barcha ishtirokchilar ushbu musobaqaning haqiqiy g‘oliblari ekanini yana bir bor isbotladilar.

⚡️ t.me/farhetk_admin

MEHNATNING MUNOSIB E'TIROFI – FIDOYI XODIMLARGA MUNOSIB MUKOFOT

"Kasb mahorati" musobaqasi nafaqat g‘oliblarni aniqlash, balki fidokorona mehnat qilayotgan xodimlarni e'tirof etish va rag‘batlantirish maydoniga ham aylandi. Tantanali taqdirlash marosimida ko‘p yillik mehnati, kasbiy mahorati va namunali faoliyati bilan ajralib turgan energetiklar munosib taqdirlandi.

Tadbir davomida "Yaxshi mehnat hech qachon e'tirofsiz qolmaydi" degan ezgu tamoyil yana bir bor o‘z tasdig‘ini topdi.

Hududlarda samarali faoliyat yuritib, kasbiy mahorati, tashabbuskorligi va fidoyiligi bilan ajralib turgan eng yaxshi 7 nafar yosh elektromontyorga zamonaviy skuterlar tantanali ravishda topshirildi. Ushbu rag‘bat yosh mutaxassislarni yanada katta marralar sari ilhomlantirishi, ularning kasbga bo‘lgan sadoqati va mas'uliyatini oshirishiga xizmat qiladi.

Shuningdek, elektr tarmoqlarini kuz-qish mavsumiga puxta tayyorlash borasida mukammal hamda joriy ta'mirlash ishlarini yuqori saviyada amalga oshirgan, mehnatsevarligi va jamoaviy birdamligi bilan namuna bo‘lgan brigadalar ham maxsus sovg‘alar bilan taqdirlandi. Bu e'tirof ularning mashaqqatli mehnati va mas'uliyatli xizmatiga bildirilgan yuksak hurmat ifodasi bo‘ldi.

Tadbir yakunida 130 nafardan ortiq xodimga jami 100 million so‘mdan ziyod qiymatdagi pul mukofotlari, skuterlar, esdalik sovg‘alari va qimmatbaho sovrinlar tantanali ravishda topshirildi. Bu esa korxonada inson qadri, mehnatga munosib baho berish va xodimlarni rag‘batlantirish ustuvor yo‘nalishlardan biri ekanini yana bir bor namoyon etdi.

Kasbiga sadoqat, yuksak mas'uliyat va fidoyilik bilan mehnat qilayotgan barcha g‘olib va sovrindorlarni samimiy muborakbod etamiz. Ularning bugungi yutuqlari ertangi yanada ulkan muvaffaqiyatlar uchun mustahkam zamin bo‘lib xizmat qilishiga ishonamiz.

Barcha sovrindorlarni chin dildan tabriklaymiz va kelgusi faoliyatlarida ularga ulkan zafarlar tilaymiz!

⚡️ t.me/farhetk_admin