#elektr_xavfsizligi_oyligi

“Elektr xavfsizligi oyligi”: inson hayotini asrash, xavflarni barvaqt aniqlash va oldini olishga qaratilgan profilaktika tadbirlari kuchaytiriladi

Vazirlar Mahkamasining 2026-yil 29-sentyabrdagi 523-son qaroriga muvofiq, har yili oktyabr oyida respublika bo‘ylab “Elektr xavfsizligi oyligi” o‘tkaziladi.

Oylikdan ko‘zlangan asosiy maqsad — elektr energiyasidan foydalanishda inson hayoti va sog‘lig‘ini muhofaza qilish, elektr tokidan shikastlanish, yong‘in va avariyalarning oldini olish, aholining elektr xavfsizligi bo‘yicha bilim va ko‘nikmalarini oshirishdan iborat.

Oylik doirasida aholi, mahallalar, ko‘p kvartirali uylar, xonadonlar, aholi gavjum joylar, tadbirkorlik subyektlari, tashkilotlar hamda ijtimoiy soha obyektlari qamrab olinadi. Xonadonlar va jamoat joylarida elektr qurilmalaridan xavfsiz foydalanish, nosoz va qo‘lbola jihozlarni ishlatmaslik, elektr tarmoqlariga ortiqcha yuklama bermaslik, uzilgan simlarga yaqinlashmaslik, xavfli holat aniqlanganda tegishli xizmatlarga xabar berish bo‘yicha tushuntirish ishlari olib boriladi.

Shu bilan birga, elektr tarmoqlari va qurilmalarining texnik holati profilaktik tarzda o‘rganiladi. Xususan, transformator punktlari, taqsimlash qurilmalari, elektr shchitlari, aholi yashash joylari, ta’lim muassasalari, bolalar maydonchalari, bozorlar va ortiqcha yuklama tushayotgan obyektlarga alohida e’tibor qaratiladi. Aniqlangan kamchiliklar xavf darajasiga qarab bartaraf etilib, inson hayotiga bevosita xavf tug‘diruvchi holatlarni zudlik bilan bartaraf etish choralari ko‘riladi.

Oylikda bolalar va yoshlar xavfsizligiga alohida e’tibor qaratiladi. Maktabgacha va maktab ta’limi vazirligi tizimidagi muassasalar, shuningdek, oliy ta’lim tashkilotlarida elektr xavfsizligi bo‘yicha ochiq darslar, mashg‘ulotlar, seminarlar, viktorinalar va boshqa targ‘ibot tadbirlari tashkil etiladi. Bolalar va yoshlarga transformator punktlariga kirmaslik, elektr simlari va ustunlariga yaqinlashmaslik, xavfli elektr qurilmalariga tegmaslik hamda uzilgan simlar aniqlanganda bu haqda kattalar yoki tegishli xizmatlarga xabar berish zarurligi tushuntiriladi.

Tadbirlarni muvofiqlashtirish maqsadida Respublika ishchi guruhi faoliyat yuritadi. Qoraqalpog‘iston Respublikasi, viloyatlar va Toshkent shahrida hududiy ishchi guruhlar tashkil etiladi.

Ularning ishlarida Energetika vazirligi — umumiy muvofiqlashtirish va targ‘ibot ishlarida, FVV — elektr qurilmalari bilan bog‘liq yong‘in va favqulodda holatlarning oldini olish choralarida, “O‘zenergoinspeksiya” — elektr energiyasidan foydalanishda xavfsizlik talablariga rioya etilishi va xavfli holatlarni aniqlashda, “HET” AJ — elektr tarmoqlari va qurilmalarining texnik holatini o‘rganish hamda aniqlangan kamchiliklarni bartaraf etishda ishtirok etadi.

Shuningdek, Maktabgacha va maktab ta’limi vazirligi maktabgacha ta’lim tashkilotlari va umumiy o‘rta ta’lim muassasalarida, Oliy ta’lim, fan va innovatsiyalar vazirligi esa oliy ta’lim tashkilotlarida elektr xavfsizligi bo‘yicha tushuntirish va o‘quv-targ‘ibot tadbirlarini tashkil etadi.

Hududiy hokimliklar ishchi guruhlar faoliyatini tashkil etish va mahallalardagi ishlarni muvofiqlashtirishda, boshqaruv-servis kompaniyalari esa ko‘p kvartirali uylarda xavfsizlik holatini yaxshilashga qaratilgan choralarda ishtirok etadi. Zarur hollarda mahalla faollari, ta’lim muassasalari rahbarlari, xotin-qizlar faollari va boshqa mas’ullar ham jalb etiladi.

Oylik davomida xonadonlarga kirib borib tushuntirish ishlarini olib borish, mahalla yig‘inlari va mehnat jamoalarida suhbatlar o‘tkazish, ko‘rgazmali materiallar tarqatish, o‘quv seminarlari va maslahatlar tashkil etishga ham e’tibor qaratiladi.

Muhimi, ushbu profilaktik ishlar tadbirkorlik subyektlari faoliyatini tekshirish hisoblanmaydi — asosiy maqsad xavflarni barvaqt aniqlash, aholini ogohlantirish va kamchiliklarni bartaraf etishga ko‘maklashishdir.

Oylik yakunida amalga oshirilgan ishlar va aniqlangan holatlar tahlil qilinib, elektr xavfsizligini ta’minlash bo‘yicha keyingi chora-tadbirlar belgilanadi.

@minenergy_uz