#elektr_xavfsizligi_oyligi

BERUNIYDAGI TRANSFORMATOR QUVVATI 2,5 BAROBARGA OSHIRILDI!

Viloyatimizda kuz-qish mavsumida iste’molchilarni barqaror elektr ta’minoti ta’minlash, tarmoqlardagi yuklamalarni kamaytirish va yuzaga kelishi mumkin bo’lgan nosozliklarni oldini olishga qaratilgan ishlar davom ettirilmoqda.

Xususan, Farg’ona tumandagi “Beruniy” mahalla fuqarolar yig‘ini hududida joylashgan 1224-sonli transformator punkti yangilanib, uning quvvati 250 kVA dan 630 kVA ga oshirildi.

Bu — hudud elektr ta’minoti imkoniyatlarini kengaytirish, ortib borayotgan iste’mol yuklamalariga bardosh berish va mavjud tarmoqning ishonchliligini mustahkamlash yo‘lidagi muhim qadamdir.

Avvalgi 250 kVA quvvatli transformator o‘rniga 630 kVA quvvatli yangi transformatorni o‘rnatilishi mavjud quvvatni 2,5 barobardan ziyodga oshirdi. Natijada, elektr energiyasiga bo‘lgan talab yuqori bo‘lgan davrlarda uskunaning ortiqcha yuklanish xavfini kamaytirish, kuchlanish sifatini yaxshilash hamda iste’molchilarni barqaror elektr energiyasi bilan ta’minlash uchun qo‘shimcha imkoniyat yaratildi.

Ayniqsa, kuz-qish mavsumida elektr energiyasi iste’moli ortishi hisobga olinsa, bunday modernizatsiya ishlari katta ahamiyatga ega. Chunki ishonchli elektr ta’minoti — xonadonlardagi qulaylik, aholi osoyishtaligi va kundalik hayotning uzluksizligini ta’minlovchi muhim omildir.

Shu bilan birga, elektr tarmoqlaridagi yuklamalarni me’yorlashtirish va texnik holatni yaxshilash orqali elektr energiyasi yo‘qotishlarini kamaytirish uchun ham zamin yaratiladi.

“Farg‘ona hududiy elektr tarmoqlari korxonasi” AJ tomonidan amalga oshirilayotgan bunday ishlar hududlarda elektr ta’minoti infratuzilmasini mustahkamlash, kuz-qish mavsumini betalafot o‘tkazish hamda iste’molchilarga sifatli va ishonchli elektr energiyasi yetkazib berishga xizmat qiladi.
 
⚡️ t.me/farhetk_admin

#elektr_xavfsizligi_oyligi

✅ ELEKTR XAVFSIZLIGI — HAR BIR O‘QUVCHINING HAYOTI UCHUN MUHIM SABOQ!

Farg‘ona shahridagi 40-sonli umumta’lim maktabida “Elektr xavfsizligi oyligi” doirasida o‘quvchilar ishtirokida targ‘ibot tadbiri o‘tkazildi.

Elektr energiyasi hayotimizni yoritadi, xonadonlarimizga qulaylik, kundalik yumushlarimizga yengillik olib kiradi. Ammo undan noto‘g‘ri foydalanish, oddiygina ehtiyotsizlik ham inson hayoti uchun jiddiy xavf tug‘dirishi mumkin. Ayniqsa, hali hayotiy tajribasi kam bo‘lgan bolalarga elektr xavfsizligi qoidalarini yoshligidan o‘rgatish nihoyatda muhim.

Shu maqsadda Farg‘ona shahridagi 40-sonli umumta’lim maktabida “Elektr xavfsizligi oyligi” doirasida o‘quvchilar o‘rtasida targ‘ibot tadbiri tashkil etildi.

Tadbir davomida o‘quvchilarga elektr toki bilan bog‘liq xavf-xatarlar, elektr jihozlaridan foydalanishda rioya etilishi lozim bo‘lgan qoidalar hamda elektr qurilmalari va tarmoqlariga yaqin joylarda ehtiyotkor bo‘lish zarurligi haqida tushunchalar berildi.

Mutaxassislar bolalarga kundalik hayotda uchrashi mumkin bo‘lgan xavfli vaziyatlarni sodda va tushunarli misollar orqali izohlab, bunday holatlarda qanday yo‘l tutish kerakligini tushuntirdilar.

Ayniqsa, elektr simlariga tegmaslik, ochiq yoki shikastlangan simlarni ko‘rganda ulardan uzoq turish, elektr jihozlarini nam qo‘l bilan ushlamaslik, transformator punktlari va elektr qurilmalari joylashgan hududlarga kirmaslik kerakligiga alohida e’tibor qaratildi. Shuningdek, xavfli vaziyatga duch kelganda darhol kattalarga xabar berish lozimligi ta’kidlandi.

Mazkur targ‘ibot tadbiri 1–31-oktabr kunlari o‘tkazilayotgan “Elektr xavfsizligi oyligi” doirasidagi ishlarning bir qismi bo‘lib, bu kabi uchrashuvlar orqali yosh avlodning elektr xavfsizligi borasidagi bilimlarini oshirishga qaratilgan.

Tadbir so‘ngida esa o‘quvchilar uchun unutilmas va quvonchli lahzalar ulashildi. “Farg‘ona hududiy elektr tarmoqlari korxonasi” AJ tomonidan maktab o‘quvchilariga ertak kitoblari sovg‘a qilindi.

Zero, bolalarga xavfsizlik qoidalarini o‘rgatish bilan birga, ularga kitobga mehr uyg‘otish, bilim olishga rag‘batlantirish ham ezgu maqsadlarimizdan biridir. Chunki bugun kitob mutolaa qilayotgan, xavfsizlik qoidalarini o‘rganayotgan bolalar ertangi kunning bilimli, ongli va mas’uliyatli avlodidir.

Hududlarda belgilangan rejaga muvofiq targ’ibot ishlari davom etmoqda.
 
⚡️ t.me/farhetk_admin