#elektr_xavfsizligi_oyligi

ELEKTR XAVFSIZLIGI — HAYOT HIMOYASI, PUХTA TAYYORGARLIK — BARQAROR TA’MINOT ASOSI

Farg‘ona shahar elektr ta’minoti korxonasida kuz-qish mavsumiga tayyorgarlik, tezkor chiqish brigadalarining shayligi va elektr xavfsizligi talablariga rioya etish masalalariga alohida e’tibor qaratilmoqda.

Elektr ta’minotidagi barqarorlik tasodifan ta’minlanmaydi. Uning ortida puxta rejalashtirilgan ishlar, malakali mutaxassislar, soz texnikalar va har qanday vaziyatga tayyor turgan tezkor brigadalar mehnati mujassam.

Mavsumoldi tayyorgarligi doirasida xizmat transport vositalari, maxsus asbob-uskunalar, zarur himoya vositalari hamda zaxira materiallarining mavjudligi va holati muhim ahamiyat kasb etadi. Chunki elektr tarmoqlarida nosozlik yuzaga kelganida har bir daqiqa qadrli, tezkor va malakali harakat esa iste’molchilarga yetkaziladigan noqulayliklarni kamaytirishning muhim omilidir.

"Elektr xavfsizligi oyligi" doirasida esa xodimlarning mehnat muhofazasi qoidalariga qat’iy amal qilishi, himoya vositalaridan to‘g‘ri foydalanishi va xavfsizlikni har qanday vazifadan ustun qo‘yishi dolzarb vazifa hisoblanadi. Zero, elektr toki bilan ishlashda e’tiborsizlikka o‘rin yo‘q — har bir ehtiyot chorasi inson hayotini asrashga xizmat qiladi.

Kuz-qish mavsumida elektr energiyasiga talab ortishi sharoitida brigadalarning shayligi, texnik vositalarning sozligi va zaxira materiallarining tayyorligi yanada muhim ahamiyat kasb etadi.

Maqsad — nafaqat elektr ta’minotidagi uzilishlarni tezkor bartaraf etish, balki ularning oldini olish, xodimlar xavfsizligini ta’minlash va aholi xonadonlarida yorug‘lik barqarorligini saqlashdir.

Zero, elektr ta’minotining ishonchliligi — kundalik hayotimiz osoyishtaligi, elektr xavfsizligi esa inson hayotining bebaho himoyasidir.

⚡️ t.me/farhetk_admin

#elektr_xavfsizligi_oyligi

QO‘QON SHAHRIDA ELEKTR TA’MINOTI BARQARORLIGINI OSHIRISH BO‘YICHA AMALIY ISHLAR DAVOM ETMOQDA

Qo‘qon shahrida elektr energiyasi ta’minoti ishonchliligini oshirish, elektr tarmoqlarining texnik holatini yaxshilash hamda iste’molchilarga sifatli xizmat ko‘rsatish maqsadida mavsum oldi ta’mirlash va modernizatsiya ishlari olib borilmoqda.

Jumladan, “Turkiston” ko‘chasidagi 144-sonli ko‘p qavatli uyni elektr energiyasi bilan ta’minlovchi elektr qurilmalarida ta’mirlash ishlari bajarilmoqda.

Shuningdek, “Rayhon” va “Quduqlik” mahallalarini elektr energiyasi bilan ta’minlovchi “Shahar-3” elektr uzatish tarmog’ida joriy ta’mirlash ishlari amalga oshirilib, elektr uzatish tarmoqlari daraxt shoxlaridan tozalanmoqda, nosoz simlar yangilariga almashtirilmoqda. Bu esa tarmoqlarning xavfsiz va ishonchli ishlashini ta’minlashga xizmat qiladi.

Aholining elektr energiyasiga bo‘lgan ehtiyojini inobatga olgan holda, transformator punktlarining quvvatini oshirish ishlari ham amalga oshirilmoqda.

Xususan, shaharning “Sobir Abdulla” mahallasidagi 135-sonli transformator punkti 400 kVA quvvatdan 630 kVA quvvatga, “Mustaqillik” mahallasidagi 93-sonli transformator punkti esa 250 kVA quvvatdan 400 kVA quvvatga oshirildi.

Mazkur ishlar elektr tarmoqlaridagi yuklamani kamaytirish, elektr energiyasini taqsimlash imkoniyatlarini kengaytirish va iste’molchilarni barqaror elektr energiyasi bilan ta’minlashga qaratilgan.

Qo‘qon shahrida elektr ta’minoti infratuzilmasini yaxshilash, mavjud tarmoqlarni yangilash va aholiga ko‘rsatilayotgan xizmatlar sifatini oshirish borasidagi ishlar davom ettirilmoqda.
 
⚡️ t.me/farhetk_admin

#elektr_xavfsizligi_oyligi

ELEKTR XAVFSIZLIGI — BOLALAR HAYOTI UCHUN MUHIM SABOQ

Yozyovon tumanidagi 6- va 40-sonli umumta’lim maktablarida “Elektr xavfsizligi oyligi” doirasida o‘quvchilar ishtirokida targ‘ibot tadbirlari tashkil etildi.

Tadbirlar davomida qiziqarli va ta’sirchan chiqishlar orqali o‘quvchilarga elektr toki bilan bog‘liq xavf-xatarlar, elektr jihozlaridan foydalanishda ehtiyotkorlik va xavfsizlik qoidalariga rioya etishning ahamiyati tushuntirildi.

Ayniqsa, uzilgan elektr simlariga yaqinlashmaslik, transformator punktlari atrofida o‘ynamaslik, elektr qurilmalariga ruxsatsiz tegmaslik hamda xavfli vaziyat yuzaga kelganda darhol kattalarga xabar berish zarurligiga alohida e’tibor qaratildi.

Bolalarga sodda va hayotiy misollar asosida yetkazilgan bu saboqlar ularning xavfsizlik qoidalarini yaxshiroq anglashiga, xavfli vaziyatlarda to‘g‘ri harakat qilish ko‘nikmalarini shakllantirishga xizmat qiladi.

Zero, elektr xavfsizligi qoidalarini bolalikdan o‘rgatish — inson hayoti va salomatligini asrashga qaratilgan muhim qadamdir. Bugun berilgan bilim va saboq ertaga kutilmagan xavfning oldini olishga yordam beradi.

⚡️ t.me/farhetk_admin