Президент Ўзбекистон МТЖнинг жаҳон чемпионатидаги иштирокини юқори баҳолаб, футболчиларни танқид қилиш эмас, аксинча, уларни қўллаб-қувватлаш бугун ҳар қачонгидан ҳам муҳим эканини таъкидлади.

“Миллий жамоамизнинг АҚШ ва Мексика майдонларидаги ўйинларини бутун халқимиз билан бир тан-у, бир жон бўлиб, катта ҳис-ҳаяжон билан кузатиб бордик. Футболчиларимиз кучли рақибларга қарши баҳслар орқали ўз тажрибасини оширди, мундиал нафасини ҳис қилди”, — деди президент.

Давлат раҳбари Аббос Файзуллаев ва Элдор Шомуродовнинг жаҳон чемпионатидаги илк голлари халқимизга қувонч бағишлаганини алоҳида эътироф этди.

Шунингдек, президент миллий терма жамоа манзилига ортиқча танқидлар билдириш тўғри эмаслигини таъкидлади.

“Ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос иш эмас. Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим”, — деди давлат раҳбари.

Президент катта ғалабалар ҳали олдинда эканини таъкидлаб, футболни ривожлантириш, айниқса болалар футболига эътиборни кучайтириш ва соҳага инвестицияларни кўпайтириш бўйича ишлар давом эттирилишини билдирди.

“Биз жамоамизга ишонамиз ва ушбу мусобақада ҳам бутун халқимиз билан қўллаб-қувватлаймиз!” — деди президент.