Ziyodbek Mashrapov: «Andijon» hech qachon kichik maqsadlar bilan yashamaydi»

"Andijon" jamoamizning "Bobur arena"da "Buxoro"ga qarshi o'yinda qo'lga kiritgan ajoyib g'alabasi barchani birdek quvontirdi, qalblarni shodlikka to'ldirdi.

Jamoa o'zining tanlagan yo'lidan to'g'ri ketmoqda va bu borada klub bosh direktori Ziyodbek Mashrapov klub matbuot xizmatiga shunday dedi:

"G'alaba bilan barcha andijonlik muxlislarimizni chin qalbimdan tabriklayman. Bu zafar maydondagi 90 daqiqalik mehnat emas, balki klubda olib borilayotgan tizimli ishlarning ham natijasidir.

Biz «Andijon»ning kelajagini o'z tarbiyalanuvchilarimiz bilan bog'laymiz. Shuning uchun iqtidorli yoshlarni kashf etish, ularni rivojlantirish va katta futbolga tayyorlash eng muhim vazifalarimizdan biri hisoblanadi.

Yoshlarimiz bugun tajribali futbolchilar bilan yonma-yon harakat qilib, nafaqat o'yin mahoratini, balki professionallik, mas'uliyat va g'oliblik ruhini ham o'rganmoqda. «Buxoro»ga qarshi bahsda ham ana shu uyg'unlik o'z natijasini berdi. Bu bizni tanlagan yo'limiz to'g'ri ekanini yana bir bor isbotladi.

Shu bilan birga koʼpni koʼrgan, tajribali futbolchilar ham biz uchun kerak va ularning tajribasidan foydalanisimiz ayni muddao. Aynan yoshi katta ijrochilar bilan yosh ijrochilarning uygʼunlashuvini shakllantirib boryapmiz.

«Andijon» hech qachon kichik maqsadlar bilan yashamaydi. Biz doimo eng yuqori marralar uchun kurashamiz. Yaqin kelajakda klub akademiyasi barpo etiladi va o'z tarbiyalanuvchilarimiz orqali jamoamizning poydevorini mustahkamlashni maqsad qilganmiz.

Oldimizda hali ko'p vazifalar turibdi. Ammo biz mehnatdan to'xtamaymiz. Chunki «Andijon» har kuni kechagidan kuchliroq bo'lishi kerak.

Barcha muxlislarimizga samimiy minnatdorchilik bildiraman. Sizlarning ishonchingiz va qo'llab-quvvatlashingiz biz uchun eng katta kuchdir. Ishonamanki, hali birgalikda yana ko'plab yorqin g'alabalarni nishonlaymiz.

❗️❗️❗️❗️❗️❗️❗️❗️❗️❗️

🔜 Navbatdagi o’yin #AndijonPaxtakor

🗓️ 01.08.2026
🏟️ Bobur Arena
⌚️ 19:30

❗️❗️❗️❗️❗️❗️❗️❗️❗️❗️

☑️☑️☑️☑️Artyom Potapov, Nodirxon Ne'matxonov va Shohmalik Komilov “Andijon”ning yangi futbolchilari!

Yozgi seleksiyada tarkibni yanada kuchaytirish maqsadida transfer oynasi ochilganidan unumli foydalangan jamoamiz uch nafar futbolchilar bilan rasman kelishuvga erishdi. Bular – darvozabon Artyom Potapov, himoyachi Nodirxon Ne'matxonov va yarim himoyachi Shohmalik Komilov.

Artyom Potapov - 1994 yilning 28 iyun kuni Rossiyaning Orenburg shahrida tavallud topgan. Ampluasi darvozabon. Faoliyati davomida Rossiyaning “Akron”, “Krasnodar 2”, “UFA 2”, “Mordoviya”, “Krilya Sovetov”, “SKA Xabarovsk”, Xorvatiyaning “Luko”, Belarusning “Torpedo Minks”, “Minsk”, Qozog'istonning “Qaysar”, Armanistonning “Alashkert” va “Ararat” klublari sharafini himoya qilgan. U 2023 yilda yurtimizga kelgan va hozirga qadar “Surxon” bilan “Xorazm”da faoliyat olib borgan. Joriy mavsumning dastlabki qismida Artyom termizliklar safida 2 ta o'yin maydonga tushgan. Faoliyati davomida esa 231 ta o'yin o'tkazgan.

Nodirxon Ne'matxonov – 2001 yilning 14 iyun sanasida Toshkentda tavallud topgan. Ampluasi himoyachi. “Paxtakor” klubi tarbiyalanuvchisi. Bunga qadar u “Paxtakor” U21, OKMK U21, “Sho'rtan”, “Neftchi” va “Surxon” jamoalarida to'p tepgan. Ne'matxonov mavsumning dastlabki qismida termizliklar tarkibida 11 ta uchrashuvda maydonga tushdi. Faoliyati davomida 80 ta o'yinda ishtirok etgan.

Shohmalik Komilov – 2000 yilning 14 mart kuni Qashqadaryoda tavallud topgan. Ampluasi – yarim himoyachi. Shu kunga qadar “Nasaf”, “Dinamo”, “Turon”, “Buxoro”, “Merani Martvili” (Gruziya) va “Navbahor” klublarida faoliyat olib borgan. Joriy yilgi mavsumning dastlabki qismida namanganliklar safida 11 ta uchrashuvda maydonga tushdi va 2 ta gol muallifi va 1 ta assist qayd etdi. Faoliyati mobaynida 134 ta o'yinda qatnashgan, 17 ta gol urgan.

Ishonamizki, ushbu futbolchilar jamoamizning yangi g'alabalariga munosib hissa qo'shgan holda muxlislarning ishonchni oqlaydi.

Jamoamizning ahil oilasiga xush kelibsizlar!


❗️❗️❗️❗️❗️❗️❗️❗️❗️❗️