🏆 OKMK futbol akademiyasi yoshlari — O‘zbekiston chempioni!

O‘zbekiston futbol assotsiatsiyasi (O‘FA) futbol akademiyalari o‘rtasidagi mamlakat chempionatining final uchrashuvida OKMK FA U-14 jamoasi yorqin g‘alabaga erishib, O‘zbekiston chempioni degan sharafli unvonni qo‘lga kiritdi.

Keskin va murosasiz kurashlar ostida kechgan hal qiluvchi bahsda yosh futbolchilarimiz Madyorxon Abbosxonovning kiritgan yagona goli evaziga «Sirdaryo» FA jamoasini 1:0 hisobida mag‘lub etib, oltin medallarga sazovor bo‘lishdi. Ushbu muvaffaqiyat klub akademiyasida yosh iste’dodlarni tayyorlash borasida olib borilayotgan tizimli ishlarning yana bir yorqin samarasidir.

Ma’lumot uchun, vakillarimiz shu yilning fevral oyidan may oyiga qadar davom etgan musobaqaning birinchi bosqichida, «Markaz» mintaqasida munosib va barqaror o‘yin ko‘rsatib, chempionatning hal qiluvchi raundiga yo‘llanma beruvchi jamoalar safidan joy olgan edilar.

Musobaqaning ikkinchi bosqichda esa OKMK FA U-14 jamoasi haqiqiy chempionlik xarakterini namoyish etdi. Pley-off bahslarida raqiblariga hech qanday imkoniyat qoldirmagan yoshlarimiz chorak finalda «Nasaf» FAni 3:0, yarim finalda esa «Qashqadaryo» FA jamoasini ham xuddi shunday 3:0 hisobida taslim etishdi. Mana shu yorqin g‘alabalar seriyasi jamoamizni bosh o‘yinga — finalga yetakladi. Yosh futbolchilarimiz hal qiluvchi bahsda ham o‘z so‘zlarini aytib, mamlakat chempionligini tarix zarvaraqlariga muhrlashdi!

📊 Musobaqaning yakuniy natijalari:

🥇 1-o‘rin: OKMK FA U-14
🥈 2-o‘rin: «Sirdaryo» FA U-14
🥉 3-o‘rin: «Andijon» FA U-14
🏅 4-o‘rin: «Qashqadaryo» FA U-14

Quvonarlisi, musobaqa yakunida tashkil etilgan taqdirlash marosimida jamoamiz a’zosi Madyorxon Abbosxonov turnir davomida ko‘rsatgan sermaxsul o‘yini uchun «Eng yaxshi to‘purar» (Bombardir) nominatsiyasida tengsiz deb topildi va maxsus sovrin bilan taqdirlandi!

Futsatdan foydalanib, OKMK FA U-14 jamoasi, murabbiylar shtabi va akademiyamiz tarbiyalanuvchilarini ushbu tarixiy muvaffaqiyat bilan samimiy muborakbod etamiz! Yosh futbolchilarimizga kelgusi musobaqalarda ham ulkan zafarlar, yorqin g‘alabalar va yangi cho‘qqilarni zabt etishlarini tilab qolamiz! Oltin medallar muborak, yosh «konchilar»!

📲 Telegram
📲 Instagram
📲 You Tube