MUNOSABAT

Superliga 23-tur doirasidagi OKMK - “Navbahor” uchrashuvi davomida va yakunida yuz bergan bir qancha bahsli vaziyatlar nafaqat maydondagi, balki VARdagi hakamlar qarorlari yuzasidan shikoyat yozish uchun yetarli.

Lekin, yaqindagina O’zFHM va klub rahbariyati o’rtasida bo’lib o’tgan uchrashuvdagi o’zaro kelishuv yuzasidan rasmiy shikoyat kiritmadik.

O’zFHM rahbariyatining bizni ishontirganidek, bundan buyon hakamlar yuzasidan shikoyat yozilishi shart emas, endi o’zimiz noto’g’ri qaror chiqargan hakamlarni jazolaymiz, deb aytgan va’dalariga ishongan holda, ularning adolatli qarorini kutib qolamiz!

🕊Telegram | 📱Instagram | 📺YouTube

4ta gol, keskin intriga va dramatik yakun

Superliganing navbatdagi turidan o‘rin olgan OKMK va “Navbahor” jamoalari o‘rtasidagi uchrashuv keskin kurashlar va dramatik vaziyatlarga boy tarzda kechdi. Murosasiz bahs yakunida jamoalar 2:2 hisobida durang qayd etishdi.

Uchrashuvning dastlabki daqiqalaridanoq faol harakat qilgan OKMK 2-daqiqada hisobni ochdi. Sobirjonovning uzatmasidan so‘ng Muqimjonov qanotdan jarima maydonchasiga kirib borib, chap oyoqda aniq zarba yo‘lladi va jamoamizni hisobda oldinga olib chiqdi — 1:0.

Birinchi bo‘lim davomida har ikki jamoa hujumkor futbol namoyish etdi. 40-daqiqada “Navbahor” burchak zarbasidan so‘ng Mamatkazin boshi bilan gol urib, hisobni tenglashtirdi. Tanaffusga qadar tomonlar yana bir qator xavfli vaziyatlar yaratishdi, biroq hisob o‘zgarmadi.

Ikkinchi bo‘limda ham uchrashuv yuqori sur’atda davom etdi. Har ikki jamoa hujumlarni tashkil etib, raqib darvozasi oldida xavfli vaziyatlar yaratdi. 68-daqiqada Papavaning aniq uzatmasidan so‘ng Abdurazzoqov uzoq burchakni nishonga olib, OKMKni yana hisobda oldinga olib chiqdi — 2:1.

Uchrashuvning so‘nggi daqiqalari esa haqiqiy dramatik tus oldi. 87-daqiqada bosh hakam VAR orqali vaziyatni ko‘rib chiqib, Turdialievni maydondan chetlatdi. Shundan so‘ng jamoamiz bir futbolchi kam bo‘lib harakat qilishiga to‘g‘ri keldi.

Asosiy vaqt yakuniga yetayotgan pallada hakam “Navbahor” foydasiga penalti belgiladi. Ilichning zarbasini darvozabon Abdunabiev qaytargan bo‘lsa-da, Komilov qaytgan to‘pni darvozaga yo‘lladi. Biroq vaziyat VAR orqali qayta ko‘rib chiqilib, penalti ofsayd sabab bekor qilindi.

Uchrashuvning 90+12-daqiqasida yana bir penalti belgilandi. 90+14-daqiqada Shohruh Abdurahmonov 11 metrlik jarima zarbasini aniq amalga oshirib, hisobni 2:2 ko‘rinishiga keltirdi.

Shu tariqa, keskin va murosasiz kechgan uchrashuv durang bilan yakunlandi. OKMK navbatdagi uchrashuvlarda ham munosib natija uchun kurashni davom ettiradi.


⚽️⚽️ Superliga. 23-tur.
⚽️OKMK FK — 🔵«Navbahor» 2:2
Gollar: Ahmadullo Muqimjonov (2), Nodirbek Abdurazzoqov (68) — Islombek Mamatkazin (40), Shohruh Abdurahmonov (90+14, pen)


Bosh hakam: Temur To'xtasinov
Yordamchi hakamlar: Anvar Marajabov, Ziyodullo Abdurahmonov
Zaxira hakami: Jahongir Noraliyev
VAR: Asker Najafaliyev
AVAR: Baxtiyorxo'ja Shavkatov
Nazoratchi: Baxtiyor Namozov
Komissar: Sherzod Rajabov


OKMK: 23.Hamidullo Abdunabiyev, 6.Avazbek O'lmasaliyev, 8.Abubakr Rizo Turdialiyev, 19.Ahmadullo Muqimjonov, 44.Abror Karimov, 5.Giorgi Papava, 10.Asad Sobirjonov (4.Mirjamol Qosimov, 90+7), 17.Nodirbek Abdurazzoqov (21.Hazratjon Tursunqulov, 82), 28.Arihiro Sentoku (30.Abror Sarimsoqov, 90), 88.Siavash Haqnazari (13.Eldor Begimov, 90), 77.Ivan Peshich (9.Aziz Xolmurodov, 46).

Zaxira: 1.Muhammad Ubaydullayev, 22.Saidafzalxon Ahrorov, 26.Faridjon Abdullayev, 27.Urosh Koyich


“Navbahor”: 1.O'tkir Yusupov, 4.Islom Mamatkazin, 5.Dilshodjon Komilov, 21.Asadbek Rahimjonov (13.Benjamin Teydi, 80), 22.Umar Adhamzoda, 55.Muhammadqodir Hamraliyev, 6.Shohruh Abdurahmonov, 7.Ruslan Jiyanov (17.Muhammaddali G'iyosov, 65), 8.Diyor Xolmatov, 30.Jasur Jaloliddinov (23.Vanya Ilich, 65), 11.Husayn Norchaev (28.Joel Kojo, 80).

Zaxira: 2.Saidazamat Mirsaidov, 3.Zafar Rahimjonov, 16.Shukron Yo'ldoshev 44.Anri Chichinadze, 77.Muhammaddali Usmonov

Ogohlantirishlar: Giorgi Papava (28), Hazratjon Tursunqulov (90+5) — Asadbek Rahimjonov (23)

Chetlatish: Abubakr Rizo Turdialiyev (87) — Timur Kapadze (90+8)

🕊Telegram | 📱Instagram | 📺YouTube

Mixail Yaremchukning OKMKga qarshi o’yindan so’ng matbuot anjumanida bildirgan fikrlari

— O’yin haqida

— O'yin oxirigacha asabiy, kuchli bosim ostida kechdi. Afsuski, kutilmaganda ikkita keraksiz gol o'tkazib yubordik, umuman olganda, Olmaliq bugun yaratgan deyarli barcha xavfli vaziyatlar shu bo'ldi. Bizda esa vaziyatlar etarlicha edi. Shunchaki o'z vaziyatlarimizdan unumli foydalanishimiz kerak edi, shunda o'yin oxiri bunchalik asabiy o'tmagan bo'lardi. Xotirjam o'yinni yakunlashimiz lozim edi - bu mening va murabbiylar shtabimizning fikri

— O'yin oxiri ko'proq nofutbol holatlar bilan yodda qoldi. O'sha vaziyatni qayta ko'rib chiqdingizmi? Yani bekor qilingan penalti. Nima bo'ldi o'zi?

— Ha, takrorni ko'rdik, lekin bizning fikrimizcha, u yerda chiziq chizilishi, vaziyatga ancha jiddiyroq qaralishi kerak edi. Nazarimizda, biz toza gol urdik.

— Bu mavsumda OKMKga qarshi o'yinlar juda qiyin kechmoqda. Birinchi davrani eslaymiz, "Navbahor mag'lub bo'lgandi. Bugun ham "Navbahor" g'alaba qozona olmadi, vaholanki bu juda muhim o'yinlardan biri edi. Nega aynan OKMKga qarshi bunday bo'lmoqda?

— OKMK - yaxshi jamoa, bir necha yillardan buyon barqaror va yaxshi jamoa hisoblanadi. Shu sababli kuchli jamoaga qarshi o'yinlar doim qiziqarli o'tadi. Lekin yana takrorlayman: bugun o'yin bo'yicha, mening fikrimcha, biz yaxshiroq edik va ko'proq xavfli vaziyatlar yaratdik. Shuning uchun durangdan xafamiz, tabiiyki. O'yin oxiri esa - bu emociyalar. Hamma yutishni xohladi: OKMK ham g'alabani istadi, biz ham istadik, shuning uchun bu shunchaki hissiyotlar. Keyinroq o'yinni takroran ko'rib chiqamiz, nima va qanday bo'lganini, nega bunday yakun topganini tahlil qilamiz.

— Bugun Navbahor avvalgi o'yinlarga qaraganda biroz kuchsizroq harakat qilgandek taassurot yo'qmi? Chunki o'tgan o'yinlarda sifati bo'yicha bugungi o'yindan ham yaxshiroq edi…

— Bizda ma'lum bir omillar bor edi. Terma jamoaga chaqirilgan futbolchilarimiz saflarimizga biroz kechroq qaytishdi. Lekin men o'yin sifati bugun ancha yaxshi bo'ldi deb hisoblayman. Eslasangiz, birinchi bo'limning boshida ikkita juda yaxshi vaziyatimiz bo'ldi, ikkinchi bo'limda ham etarlicha edi. Yana ikkitasini urganimizda - hisob 4:2 bo'lardi.

— Keyingi o'yin "Paxtakor"ga qarshi. Sizningcha, jamoa haligacha chempionlik poygasida qoldimi? Chunki oradagi farq qisqarmadi.

— Biz oxirigacha kurashamiz. Biz uchun har bir o'yin muhim, qarshimizda qaysi raqib turganining ahamiyati yo'q. Biz har bir jamoani hurmat qilamiz, ular turnir jadvalida nechanchi o'rinda borayotgani muhim emas, har biriga jiddiy hurmat bilan tayyorgarlik ko'ramiz. Ammo biz har doim har bir bahsda faqat g'alaba qozonishni istaymiz va keyingi o'yinlarda ham buni amalga oshirishga harakat qilamiz.

🕊Telegram | 📱Instagram | 📺YouTube

Mirjalol Qosimovning “Navbahor”ga qarshi o’yindan so’ng matbuot anjumanida bildirgan fikrlari

— O’yin haqida

— "Barcha kutgan o'yin edi. "Navbahor"ga qarshi o'yinlar qiziqarli kechmoqda. Muxlislarga o'yin yoqdi deb o'ylayman. Jangovar va tezkor o'yin guvohi bo'ldik. Ushbu uchrashuv tarixga aylandi va endi keyingi o'yinlarga tayyorgarlik ko'rishimiz kerak. Yil oxiri yaqinlashib kelmoqda, demak intriga yanada ko'payadi"

— Bugungi o'yinning qaysi jabhalaridan qoniqdingiz?

— Yigitlar oxirigacha o'ynashdi, nima holat bo'lishiga qaramay. Maqsadimiz muxlislarni xursand qilish. Kamchilik esa uch ochkodan mahrum bo'lganimiz bo'ldi.

— Abror Karimov umumiy olganda yaxshi o'ynadi, ammo o'yin so'ngida ikkita penalti uning xatolaridan so'ng belgilandi. Karimov haqida nima deysiz?

— Qonun barcha uchun teng. Yosh o'yinchi shunday o'yinlar orqali toblanib boradi. Birinchi penaltida Sobirjonov barchasini bartaraf etishi mumkin edi. Birgina noto'g'ri harakat penaltiga olib keldi. Raqib futbolchisi darvoza tomon emas, yonga ketayotgandi. Karimov raqib futbolchisi bilan parallel ravishda yugurib qo'ysa bo'lardi. Mana shunday vaziyatlar orqali tajriba oshib boradi. Tajriba yillar davomida orttiriladi degan gap bor. Agar keyingi uchrashuvda ham yana shu xatoni takrorlaydigan bo'lsa, bu boshqa masala bo'ladi. Yaxshi himoyachi bir marotaba aldanadi degan gap bor.

— O'tgan mavsumda OKMK zo'r o'ynagan edi, ammo darvozabonlar ko'p xatoga yo'l qo'ydi. Darvozabonlar esa bu mavsumda ancha yaxshi o'yin namoyish etishmoqda, misol uchun penalti bartaraf etildi. Hozir jamoada Denis Ivankov darvozabonlar murabbiyi bo'lib ishlamoqda. Balki bu tasodifdir yoki yo'q. Shuningdek, OKMK statistika bo'yicha eng yaxshi hujumkor jamoalardan biri, ammo realizatsiya yaxshi emas. Siz futbolchilik davringizda eng yaxshi hujumchilar bilan o'ynagansiz...

— Unday desangiz, sizni har kungi mashg'ulotlarimizga chaqiraman. Mashg'ulotlarda nima qilayotganimizni ko'rasiz. Biz buning ustida ishlayapmiz. Taktika uchun ochko berishmaydi. Yetti metrlik darvozaga to'p kirsa bo'ldi, taktika ish bergan bo'ladi. Biz barcha jabhalar ustida ishlayapmiz. Jizzaxdagi o'yinda ham birinchi bo'limning o'zidayoq ikkita yaqqol vaziyatimiz bor edi. Masalan, bugun ham standartdan gol o'tkazib yubordik. Qiyin vaziyat emas edi, faqatgina o'yinchiga e'tiborliroq bo'lish va uni biroz yaxshiroq qo'riqlash kerak edi. Sen o'z futbolchingga mas'ul bo'l. To'p yoki yana bir raqib futbolchisiga e'tibor berma. O'zingning o'yinching bilan o'yna.

Agar barcha vaziyatlarimizdan foydalanganimizda chempion bo'lib ketardik. Ishlashda davom etyapmiz.

🕊Telegram | 📱Instagram | 📺YouTube