ኡጋንዳ ከሁለት አስርት ዓመታት ቆይታ በኋላ ወታደሮቿን ከሶማሊያ ማስወጣት ጀመረች

የኡጋንዳ መከላከያ ኃይል ለ20 ዓመታት ገደማ በሶማሊያ የነበረውን ወታደራዊ ስምሪት አክትሞ ወታደሮቹን ማስወጣት መጀመሩን የኡጋንዳ ዴይሊ ሞኒተር  ዛሬ  ዘግቧል።

የኡጋንዳ መከላከያ ኃይሎች ጠቅላይ አዛዥ ጄነራል ሙሆዚ ኬነሩጋባ በሰጡት መግለጫ፤ የጸጥታውን ኃላፊነት ለሶማሊያ ወታደሮች በማስረከብ ላይ መሆናቸውን አረጋግጠዋል።

ፕሬዝዳንት ዩዌሪ ሙሴዌኒ ቀደም ሲል ባደረጉት ንግግር የውጭ አበዳሪዎች ቢወጡም አፍሪካውያን ሶማሊያን ብቻዋን እንደማይተዋት ገልጸው ነበር።

ባይናንስ በታሪክ ከፍተኛው የተባለ የ6.3 ቢሊዮን ዶላር የክሪፕቶፕ ስርቆት እንደገጠመው አስታወቀ
 
ዓለም አቀፉ የክሪፕቶፕ መለዋወጫ ተቋም ባይናንስ  ባጋጠመው የደኅንነት ጥሰት ምክንያት 6.3 ቢሊዮን ዶላር የሚገመት የደንበኞች ገንዘብ መዘረፉን እና ይህም በታሪክ ትልቁ የክሪፕቶ ስርቆት መሆኑን አልጀዚራ ዛሬ ዘግቧል።
 
ተቋሙ ጥቃቱን ተከትሎ ማንኛውንም ገንዘብ የማስገባትና የማውጣት አገልግሎት ያገደ ሲሆን፣ ከ3 ቢሊዮን ዶላር በላይ የሚሆን የክሪፕቶ ፈንድ ደግሞ እንዳይንቀሳቀስ ማድረጉን ገልጿል።
 
የመጀመሪያ ደረጃ ምርመራዎች እንደሚያሳዩት፤ ሰርሳሪዎች (ሃከሮች) የአንድን መሐንዲስ የግል ኮምፒውተር በመበርበር ፈቃድ ያልተሰጣቸውን የገንዘብ ዝውውሮች አከናውነዋል።
 
የብሎክቼይን መረጃ ተንታኝ ተቋማት ይህንን ጥቃት የሰሜን ኮሪያ መንግሥት የሚደግፈው የሳይበር ወንጀለኞች ቡድን ሳይፈጽመው እንዳልቀረ በከፍተኛ እምነት ገልጸዋል።
 
ባይናንስ የደረሰውን ኪሳራ ሙሉ በሙሉ እራሱ እንደሚሸፍንና የደንበኞች ገንዘብ ደኅንነቱ የተጠበቀ መሆኑን ያስታወቀ ቢሆንም፣ የቢትኮይን ዋጋ ግን ዜናውን ተከትሎ በ5 በመቶ ቅናሽ አሳይቷል።

ኢትዮጵያ የአፍሪካ የመድኃኒት ማምረቻ ማዕከል ለመሆን ስትራቴጂካዊ ዕቅድ ማውጣቷን አስታወቀች
 
ኢትዮጵያ የአፍሪካ አህጉራዊ ነፃ የንግድ ቀጠና የሚሰጣቸውን ዕድሎች በመጠቀም፣ የመድኃኒት ምርቶችን በስፋት ለማምረትና የአፍሪካ የመድኃኒት ማምረቻ ማዕከል ለመሆን ማቀዷን ፒፕልስ ጋዜት ዘግቧል።
 
የጤና ጥበቃ የመንግሥት ሚኒስትር ሙሉቀን አርጋው እንደገለጹት፤ አገሪቱ ከቀጠናው አገራት ጋር የቁጥጥርና የጋራ ግዥ ሥርዓቶችን በመዘርጋት በአገር ውስጥ የሚመረቱ መሠረታዊ መድኃኒቶችን፣ ክትባቶችንና የሕክምና መሣሪያዎችን አቅርቦት ለማሳደግ እየሠራች ነው።
 
ሚኒስትሩ አክለውም የኢትዮጵያ ምኞት ከሀገር ድንበር የዘለለ መሆኑንና የሕክምና ቱሪዝምን ለማስፋፋት ዕቅድ እንዳለ ጠቅሰዋል። የኢትዮጵያ የመድኃኒት ገበያ እ.ኤ.አ. በ2030 ከ4 ቢሊዮን ዶላር በላይ እንደሚበልጥ በትንበያው ላይ ተመልክቷል።

''ማንኛውም ሀገር ብቻውን የባህር ላይ ደህንነት ስጋትን መከላከል አይችልም” አድሚራል ክንዱ ገዙ

የኢትዮጵያ ባህር ኃይል ዋና አዛዥ ቫይስ አድሚራል ክንዱ ገዙ ማንኛውም ሀገር ምንም ያህል አቅም ቢኖረው ብቻውን እያደገ የመጣውን የባህር ላይ ደህንነት ስጋት መከላከልና የባህር ላይ ትራፊክን ሰላማዊ እንቅስቃሴ ማረጋገጥ እንደማይችል ገልጸው፣ የጋራ የደህንነት ተግዳሮቶችን ለመፍታትና የባህር ላይ እንቅስቃሴዎችን ለማመቻቸት የቀጠናው ሀገራት ትብብር ወሳኝ መሆኑን አሳስበዋል።

ባህር ኃይሉ ባዘጋጀው የባህር ላይ ቀጠናዊ ፎረም ላይ ከየመን፣ ኦማን፣ ጅቡቲ፣ ሶማሊላንድ እና ፑንትላንድ የተውጣጡ የባህር ኃይል አዛዦች የተሳተፉ ሲሆን፣ መድረኩ በባህር ላይ ፍለጋና ማዳን ስራዎች፣ በደህንነት ጥበቃ እና በጋራ ተግዳሮቶች ዙሪያ ልምድ ለመለዋወጥ እንዲሁም ኢትዮጵያ የባህር በር ለማግኘት የምታደርገውን ጥረት ጨምሮ ከቀጠናው ሀገራት ጋር ያላትን ውይይትና ትብብር ይበልጥ ለማጠናከር ትልቅ ዕድል መፍጠሩ ተመላክቷል።

ሩሲያ ከኢትዮጵያ ጋር የኒውክሌር ኃይል ማመንጫ ፕሮጀክት ለመገንባት የሚያስችሉ ቅድመ ሁኔታዎችን እየገመገመች መሆኑን ሮሳቶም አስታወቀ

የሩሲያ መንግስታዊ የኒውክሌር ኢነርጂ ኮርፖሬሽን (ሮሳቶም) ዋና ስራ አስፈፃሚ አሌክሲ ሊካቼቭ እንደገለጹት፣ ተቋማቸው ከኢትዮጵያ፣ ኡጋንዳ፣ ጋና እና ግብፅ ጋር ታላላቅ የኒውክሌር ኃይል ማመንጫ ፕሮጀክቶችን ለመገንባት የሚያስችሉ ውይይቶችን እያደረገ ይገኛል።

በሞስኮ በተካሄደው 3ኛው የሩሲያ አፍሪካ ጉባኤ ማጠቃለያ ላይ ይፋ እንደተደረገው፣ ኢትዮጵያ ከሮሳቶም ጋር ቀደም ሲል የተፈራረመችውን የትብብር ፍኖተ ካርታ መነሻ በማድረግ የማመንጫ ጣቢያው ሊገነባባቸው የሚችሉ እምቅ ቦታዎችን የመለየት ስራ እየተከናወነ ሲሆን፣ በቅርቡም የመጀመሪያ ደረጃ የምህንድስና ጥናቶች ይጀመራሉ ተብሎ ይጠበቃል።

ሆኖም ፕሮጀክቶቹ በአሁኑ ወቅት በቅድመ ዝግጅትና በውይይት ደረጃ ላይ የሚገኙ በመሆናቸው እስካሁን የመጨረሻ የገንዘብ ድጋፍ ወይም የኮንስትራክሽን ስምምነት አልተፈረመም።

ሱዳን በድሮን ጥቃቶች ምክንያት በኢትዮጵያ ላይ ለተባበሩት መንግሥታት ድርጅት እና ለአፍሪካ ህብረት አቤቱታ አቀረበች

ሱዳን በግዛቷ በሚገኙ የሲቪል ተቋማት እና የኤሌክትሪክ ጣቢያዎች ላይ ለተሰነዘሩት የድሮን ጥቃቶች የኢትዮጵያ ግዛት ጥቅም ላይ ውሏል በማለት ለተባበሩት መንግሥታት ድርጅት የጸጥታው ምክር ቤት እና ለአፍሪካ ህብረት የሰላምና ጸጥታ ምክር ቤት የቅሬታ አቤቱታ ማቅረቧን አስታውቃለች።

የሱዳን የውጭ ጉዳይ ሚኒስቴር ፈጣን ደጋፊ ኃይሎች የተባለው ታጣቂ ቡድን የኢትዮጵያን ግዛት በመጠቀም ጥቃቱን መፈጸሙን የሚያሳዩ ሰነዶችን ማቅረቡን የገለጸ ሲሆን፣ ድርጊቱን የሉዓላዊነት መጣስ እና የጠላትነት ተግባር በማለት ኮንኖታል።

ኢትዮጵያ ቀደም ሲል ለታጣቂው ቡድን ድጋፍ እንደማታደርግና የሱዳንን ሉዓላዊነት እንደምታከብር በመግለጽ የቀረቡባትን ክሶች ያስተባበለች መሆኑን አናዶሉ በዘገባው አመልክቷል።

11 ቢሊዮን ዶላር የገንዘብ ድጋፍ ኢትዮጵያ ከልማት አጋሮች እየፈለገች መሆኑ ተገለጸ

ኢትዮጵያ በፈረንጆቹ 2035 መላውን ህዝብ የኤሌክትሪክ ተጠቃሚ ለማድረግ ያቀደችውን የ18 ቢሊዮን ዶላር ብሄራዊ የኤሌክትሪፊኬሽን መርሃ ግብር ለመደገፍ፣ ከዓለም ባንክ እና ከሌሎች የልማት አጋሮች የ11 ቢሊዮን ዶላር የገንዘብ ድጋፍ እየፈለገች መሆኑን ቢኤንኢ ኢንተሊኒውስ የተባለው የዜና ወኪል የካፒታል ጋዜጣን መረጃ ጠቅሶ ዘግቧል።

ይህ እቅድ እስከ 2035 ድረስ 32.5 ሚሊዮን ለሚሆኑ አባወራዎች የኤሌክትሪክ አገልግሎት ለማድረስ ያለመ ሲሆን፣ አብዛኞቹ በሀገራዊ የኃይል መረብ እንዲሁም 4.4 ሚሊዮን የሚሆኑት ደግሞ ከዋናው መረብ ውጭ በሆኑ እንደ ሶላር ባሉ አማራጮች ተጠቃሚ ይሆናሉ።

ሀገሪቱ ከፍተኛ የኃይል ማመንጨት አቅም ቢኖራትም የኃይል ማከፋፈያ መሠረተ ልማት እና የመጨረሻ መስመር ዝርጋታ እጥረት ዋና ማነቆ በመሆኑ፣ መንግስት የኤሌክትሪክ ተደራሽነቱን ለማስፋፋት ከዓለም አቀፍ ተቋማት የእርዳታና የብድር አጋርነትን ለማጠናከር እና የግል ባለሀብቶችን ተሳትፎ ለማሳደግ በንቃት እየሰራ ይገኛል ነው የተባለው።

የሶማሊያ የባሕር ላይ ወንበዴዎች የኢራንን የዓሣ ማጥመጃ መርከብ ከተሳፋሪዎቿ ጋር አገቱ

የሶማሊያ የባሕር ላይ ወንበዴዎች 23 ሰዎችን ያጫነች የኢራን የዓሣ ማጥመጃ መርከብን በቁጥጥራቸው ሥር ማዋላቸውን የሕንድ ውቅያኖስ የባሕር ደኅንነት ማዕከል አስታውቋል። አዚኒ የተሰኘችው ይህች መርከብ የታገተችው በሰሜን ምስራቅ ሶማሊያ ፑንትላንድ የባሕር ዳርቻ ሲሆን፣ በመርከቧ ላይ 21 የኢራን የሠራተኞች አባላት እና ሁለት የሶማሊያ የደኅንነት ጠባቂዎች ይገኙባታል።
 
 
ታጣቂዎቹ መርከቧን በዓለም አቀፍ የንግድ መርከቦች መተላለፊያ መስመር ላይ ሌሎች የጭነት መርከቦችን ለማጥቃት እንደ የጦር ሰፈር ሊጠቀሙባት ይችላሉ የሚል ከፍተኛ ሥጋት ተፈጥሯል።
 
ይህ አዲስ ጥቃት በኤደን ባሕረ ሰላጤ እና በምዕራብ ሕንድ ውቅያኖስ አካባቢ የሶማሊያ የባሕር ላይ ወንበዴዎች ጥቃት በከፍተኛ ሁኔታ እያገረሸ መምጣቱን የሚያመለክት ሌላው ማሳያ ሆኗል። የአውሮፓ ኅብረት የባሕር ኃይል ግብረኃይል በጉዳዩ ላይ ምርመራ እያደረገ ሲሆን፣ በአካባቢው የሚያልፉ መርከቦች በሙሉ ጥብቅ ጥንቃቄ እንዲያደርጉ አሳስቧል።

ግብፅ እና ሱዳን የኢትዮጵያን ፍትሐዊ የውኃ አጠቃቀም መብት የሚጋፋ ማሳሰቢያ ሰጡ
 
ግብፅ እና ሱዳን በካይሮ ባካሄዱት ስብሰባ የአገሪቱን ፍትሐዊ የውኃ አጠቃቀም መብት የሚጋፋ መግለጫ አውጥተዋል። ሁለቱ የታችኛው ተፋሰስ አገራት የኢትዮጵያን ተጠቃሚነት የሚገድበውንና ሌሎችን የአባይ ተፋሰስ አገራትን ያገለለውን የ1959ኙን አግላይ የውኃ ክፍፍል ስምምነት በድጋሚ ለማንጸባረቅ የሞከሩ ሲሆን፣ የኢትዮጵያን የወደፊት የልማት እርምጃዎች በአንድ ወገን ውሳኔ የመመደብ አካሄድ ተከታትለዋል።
 
ኢትዮጵያ በበኩሏ ማናቸውም ዓይነት የአባይ ውኃ ድርድር ሁሉንም የተፋሰሱ አገራት ያካተተና ፍትሐዊ መሆን እንዳለበት በተደጋጋሚ የገለጸች ሲሆን፣ የግብፅና ሱዳን  የትናንቱ የካይሮ ስብሰባ ግን ጉዳዩን በሁለቱ አገራት መካከል ብቻ ለመገደብ ያለመ ነው።
 
ዚህም በተጨማሪ ሁለቱ አገራት በቀይ ባሕር አካባቢ ያለውን ወታደራዊና የባሕር ላይ እንቅስቃሴ በማውገዝ፤ ኢትዮጵያ ቀጠናዊ ተደራሽነቷንና ብሔራዊ ደኅንነቷን ለማስከበር የምታደርገውን ጥረት ዲፕሎማሲያዊ እንቅፋት ለመፍጠር ፍላጎት እንዳላቸው አሳይተዋል።

የእስራኤል ምርጫ ዕልባት አላገኘም፤ ተቃዋሚዎች ጋዲ አይዘንኮትን ለጠቅላይ ሚኒስትርነት ሲያጩ ኔታንያሁ የዓረብ ፓርቲዎችን ያገለለ ጥምረት ጠየቁ

በእስራኤል ምርጫ የትኛውም ወገን የላቀ መቀመጫ ባለማግኘቱ የፖለቲካ ቀውስ የተፈጠረ ሲሆን፣ የተቃዋሚው ጎራ ጋዲ አይዘንኮት ቀጣዩ ጠቅላይ ሚኒስትር እንዲሆኑ በጋራ ለመደገፍ ተስማምተዋል።

በአንጻሩ የወቅቱ ጠቅላይ ሚኒስትር ቤንያሚን ኔታንያሁ ፓርቲያቸው ከፍተኛ መቀመጫ ማግኘቱን በመጥቀስ ጥምር መንግሥቱን እሳቸው ሊመሩት እንደሚገባ ገልጸው፣ ሪኮርድ 19 መቀመጫ ያሸነፉትን የዓረብ ፓርቲዎች ያገለለ ሰፊ ብሔራዊ መንግሥት ለመመሥረት ጥሪ አቅርበዋል።

የተቃዋሚው ጎራ 48 መቀመጫ እና የኔታንያሁ ወገን 53 መቀመጫ ስላላቸው፣ ወሳኝ የሆኑትን የዓረብ ፓርቲዎች በጥምረት ውስጥ ስለማካተት በተቃዋሚዎች ዘንድ የሃሳብ ልዩነት ያለ ሲሆን የሀገሪቱ ፕሬዚዳንት መንግሥት የሚመሠርት ዕጩ ለመሰየም ከነገ ጀምሮ ከፓርቲዎች ጋር ምክክር ይጀምራሉ።

ምንጭ፦ ፍራንስ 24

ኢትዮጵያ ከሩሲያ የገዛቻቸው ተዋጊ ጄቶችና የአየር መከላከያ ሥርዓቶች በግብፅ ሥጋት መፍጠራቸው ተዘገበ
 
ኢትዮጵያ 12 የሱ35 ተዋጊ ጄቶችን መረከቧና የኤስ-400 የአየር መከላከያ ሥርዓቶችን ለመታጠቅ መዘጋጀቷ በአፍሪካ ቀንድ የኃይል ሚዛን ላይ ተጽዕኖ መፍጠሩን ኢንዲፔንደንት አረቢያ በዛሬው ዘገባ አመልክቷል።
 
የካይሮ ዲፕሎማሲያዊ ምንጮች፤ ይህ የጦር መሣሪያ ዝግጅት የግብፅን ወታደራዊ የበላይነት አይቀይረውም ሲሉ ተከላክለው፣ ኢትዮጵያ በቀይ ባሕር አካባቢ የባሕር በር ለማግኘትና ቀጠናዊ ተፅዕኖዋን ለማሳደግ በምታደርገው ጥረት ውስጥ ስልታዊ ጥቅሟን ለማስከበር ልትጠቀምበት ትችላለች የሚል ሥጋት በግብፅ ዘንድ መፈጠሩን አልሸሸጉም።
 
የኢትዮጵያ መንግሥት ግዢው የሀገሪቱን የመከላከል አቅም ለማጠናከርና ዘላቂ ሰላምን ለማረጋገጥ የታለመ መሆኑን ማስታወቁ አይዘነጋም።

ትውልደ ኢትዮጵያዊው የአሜሪካን ምስጢራዊ መረጃዎች ለኢትዮጵያ አሳልፎ መስጠቱን አመነ
 
የአሜሪካ ብሔራዊ የስለላ ቢሮ፣ የውጭ ጉዳይ እና የፍትሕ ሚኒስቴር ውስጥ የመረጃ ቴክኖሎጂ ባለሙያ የነበረው ትውልደ ኢትዮጵያዊው አብርሃም ተክሉ ለማ፤ በሰሜን ኢትዮጵያ ጦርነት ወቅት ከፍተኛ ምስጢራዊነት ያላቸውን የአሜሪካ የደኅንነት መረጃዎች ለኢትዮጵያ መንግሥት ባለሥልጣናት ለማስተላለፍ በማሴር ወንጀል በቀረበበት ክስ በጥፋተኝነት ማመኑን ቢቢሲ ዘግባል።
 
ፍትሕ ሚኒስቴር ባወጣው መግለጫ መሠረት፣ የ53 ዓመቱ ግለሰብ ልዩ የመረጃ መዳረሻ ፈቃዱን በመጠቀም በርካታ ምስጢራዊ ሰነዶችን፣ ማስታወሻዎችንና ፎቶዎችን በድብቅ ያወጣ ሲሆን፤ በወቅቱ የነበሩ ታጣቂ ኃይሎችን ለመፈለግና ወታደራዊ እርምጃ ለመውሰድ እንዲያግዝ መረጃውን ለኢትዮጵያ ባለሥልጣናት አስተላልፏል።
 
በጥፋተኝነት እምነቱ መሠረት ግለሰቡ ከ10 እስከ 22 ዓመት በሚደርስ እስራት ሊቀጣ የሚችል ሲሆን፣ ፍርድ ቤቱ የመጨረሻውን የቅጣት ውሳኔ ለመስጠት ለሚያዝያ 6 ቀን 2019 ዓ.ም ቀጠሮ ሰጥቷል።

በኬንያ ድንበር አቅራቢያ በተቀሰቀሰ ግጭት የሁለት ኢትዮጵያውያን ህይወት ማለፉ ተነገረ

በኢትዮጵያ እና በኬንያ ድንበር አቅራቢያ በምትገኘው ሎዮሮ በተባለች የቱርካና ሰሜን ቀጠና ውስጥ፣ የታጠቁ የዳሰነች ማህበረሰብ አባላት ናቸው የተባሉ ተጠርጣሪዎች የቱርካና እረኞችን ከብቶች ለመዘረፍ ባደረጉት ሙከራ ሳቢያ በተቀሰቀሰ ከባድ የተኩስ ልውውጥ የሁለት ሰዎች ህይወት ማለፉን የቱርካና ካውንቲ የፖሊስ አዛዥ ጆን ታሩስ አስታውቀዋል።

የተሰነዘረውን ጥቃት የቱርካና እረኞች ከብሔራዊ የፖሊስ ተጠባባቂ ኃይሎች ጋር በመሆን በጋራ መክተውታል የተባለ ሲሆን፣ በአካባቢው የተፈጠረውን የጸጥታ ውጥረት ተከትሎ የኬንያ የጸጥታ ኃይሎች በድንበር አካባቢዎች ላይ የሚያደርጉትን የደህንነት ጥበቃ እና ክትትል አጠናክረዋል።

የፖሊስ አዛዡ ነዋሪዎች የአጸፋዊ ጥቃት ከመፈጸም እንዲቆጠቡ፣ እንዲረጋጉ እና የተጀመሩትን የድንበር ተሻጋሪ የሰላም ጥረቶች እንዲደግፉ ጥሪ ማቅረባቸውን ዘ ስታንዳርድ ዘግቧል።

ኢትዮጵያ የሱዳን ዲፕሎማቶችን ከአገር እንዲወጡ ማዘዟ ተዘገበ
 
ኢትዮጵያ የፈጣን ድጋፍ ኃይላትን (አርኤስኤፍ) ትደግፋለች በሚል አዲስ ውንጀላ መነሳቱን ተከትሎ፣ በአሶሳ ከተማ በሚገኘው የሱዳን ቆንስላ ጽሕፈት ቤት ውስጥ የሚሰሩ ስድስት ዲፕሎማቶች በ48 ሰዓታት ውስጥ አገሪቱን ለቀው እንዲወጡ ማዘዟን አንድ ከፍተኛ የኢትዮጵያ ባለሥልጣን ለሮይተርስ ገልጸዋል።
 
ይህ ውሳኔ በሁለቱ ጎረቤት አገራት መካከል የነበረውን ዲፕሎማሲያዊ ግንኙነት ይበልጥ ያሻከረ ሲሆን፣ የኢትዮጵያ ጠቅላይ ሚኒስትር ጽሕፈት ቤት ቃል አቀባይ ግን በጉዳዩ ላይ እስካሁን የሰጡት ምላሽ የለም።
 
አዲስ አበባ ለሱዳን ፈጣን ድጋፍ ኃይላት  ድጋፍ እንደማታደርግ በተደጋጋሚ ብታስተባብልም፣ የሱዳን ጦር ግን ኢትዮጵያ ድንበሯን ለኃይላቱ ክፍት አድርጋለች በሚል በተደጋጋሚ ሲከስ ማቆየቱ ይታወሳል።

ሱዳን የኢትዮጵያን ዲፕሎማቶች በማባረር የአጸፋ እርምጃ መውሰዷ ተገለጠ

ሱዳን የኢትዮጵያ መንግሥት የወሰደውን የዲፕሎማቶች ማባረር ውሳኔ ተከትሎ፣ በአገሪቱ የሚገኙ የኢትዮጵያ ዲፕሎማቶች በአስቸኳይ ውጡ ስትል ተመሳሳይ የአጸፋ እርምጃ መውሰዷን አልጀዚራ ዘግቧል።

ሱዳን በምሥራቃዊቷ ገዳሪፍ ከተማ በሚገኘው የኢትዮጵያ ቆንስላ ጽሕፈት ቤት ውስጥ የሚሠሩ ሶስት የኢትዮጵያ ዲፕሎማቶች በአስቸኳይ አገሪቱን ለቀው እንዲወጡ አዛለች።
 
ሁለቱ አገራት እርስ በርስ የትጥቅ አማፂያንን በመደገፍ የሚካሰሱ ሲሆን፣ ይህ የሱዳን የአጸፋ ምላሽ በሁለቱ ወንድማማች ጎረቤቶች መካከል ያለውን ዲፕሎማሲያዊ ግንኙነት ወደ ከፋ ምዕራፍ አሸጋግሮታል።

በኢትዮጵያ ኮኬይን ሲያዘዋውር የተገኘው የማላዊ ዜጋ በቁጥጥር ስር ዋለ

ዕድሜው 47 የሆነ አላን ጎንድዌ የተባለ የማላዊ ዜጋ ከማላዊ ተነስቶ በቦሌ ዓለም አቀፍ አውሮፕላን ማረፊያ በኩል ወደ ማሌዢያ ኩዋላ ላምፑር ሊያስተላልፈው ከነነበረው ኮኬይን መያዙ ነው የተገለጸው።

ተጠርጣሪው አደንዛዥ ዕፁን በስዕል ማዕቀፎች ውስጥ ደብቆ ለማጓጓዝ ሲሞክር በኢትዮጵያ የጸጥታ አካላት በቁጥጥር ስር መዋሉ ተገልጿል።

በኢትዮጵያ የማላዊ አምባሳደር ኳውሊ ምሲስካ እንደገለጹት፣ ተጠርጣሪው በኢትዮጵያ አየር መንገድ በረራ ቁጥር ኢቲ 876 ተጉዞ አዲስ አበባ የገባ ሲሆን በአሁኑ ወቅት በፌዴራል ፖሊስ የፍርድ ቤት ሂደቱን እየተጠባበቀ ይገኛል።

ምንጭ ንያሳ ታይምስ