🇹🇯 БОЗДИДИ ГУРӮҲИ КОРИИ ФЕДЕРАТСИЯИ ФУТБОЛИ ТОҶИКИСТОН АЗ ВИЛОЯТИ СУҒД
 
✅ Гурӯҳи кории Федератсияи футболи Тоҷикистон дар ҳайати ноибони президенти ФФТ Алишер Урунов ва Сайвалӣ Дониёрзода ҷиҳати таҳлил ва арзёбии вазъи футболи вилоят ба шаҳри Хуҷанди вилояти Суғд сафар намуданд.
 
🔺 Таҳлил ва арзёбии воқеии вазъият имкон медиҳад, ки мушкилоти мавҷуда дар инфрасохтор, футболи кӯдакону наврасон, бонувон ва футзал инчунин сатҳи омодагии дастаҳо саривақт муайян ва ҳал карда шаванд.
 
🔹 Зимни сафар мулоқоти гурӯҳи корӣ бо раиси вилояти Суғд, раиси Федератсияи футболи вилоят Раҷаб Аҳмадзода баргузор гардид. Дар мулоқот самтҳои афзалиятноки соҳа, аз ҷумла инфрасохтори футболи вилоят, вазъи молиявии клубҳои футбол ва футзал, инчунин иҷрои дастуру супоришҳои протоколи мулоқоти Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, президенти Федератсияи футболи Тоҷикистон муҳтарам Рустам Эмомалӣ бо масъулони соҳаи футболи мамлакат аз 3 феврали соли 2025 мавриди муҳокима қарор дода шуданд.
 
🔸 Дар аснои мулоқот Раҷаб Аҳмадзода зикр намуданд, ки ҷиҳати иҷрои дастурҳои бевоситаи муҳтарам Рустам Эмомалӣ дар доираи супоришҳои протоколии болозикр, вобаста ба таъмиру таҷдиди варзишгоҳи «Спартак»-и шаҳри Хуҷанд ва насби системаи равшанидиҳии ҷавобгӯ ба талабот ва стандартҳои ҷорӣ, корҳои насбу васли системаи мазкур оғоз гардида, дар ҳоли анҷомёбӣ қарор дорад.
 
🔹 Зикр карда шуд, ки бо мақсади такмил додани раванди истифодаи технологияҳои рақамӣ дар футболи миллӣ барои харидории як ҷуфт системаи сайёри мукаммали VAR фармоиш дода шуда, он то оғози мавсими футболи соли 2027 омода ва мавриди истифода қарор дода мешавад.
 
🔸 Дар ҳошияи сафар, гурӯҳи корӣ аз рафти корҳои таҷдиду сохтмон дар варзишгоҳи марказии шаҳри Гулистон шинос шуда, ба масъулон ва мутахассисон ҷиҳати босифат ва ҷавобгӯ ба талаботи ҷорӣ мутобиқ намудани корҳо дар чамани варзишгоҳ тавсияву пешниҳодҳои муфид доданд.
 
🔺 Ҳамзамон, рафти иҷрои дастуру супоришҳои роҳбарияти Федератсияи футболи Тоҷикистон барои мутобиқнамоӣ ба талаботи ҷорӣ дар варзишгоҳи «Спартак» ва маҷмааи варзишии «Суғд Арена»-и шаҳри Хуҷанд, инчунин варзишгоҳи марказии шаҳри Истаравшан аз ҷониби гурӯҳи корӣ мавриди баррасӣ ва санҷиш қарор гирифта, барои омодагии пурраи иншоотҳои футболӣ ба мавсими соли 2027 дастурҳои иловагӣ пешниҳод гардиданд.