Sayohat qilishning asl oltin qoidasi:

⚠️ Pul, passport, telefon va buyumlaringizga ehtiyot bo’ling - o’g’irlatib qo’ymang.

Kuni kecha Istanbulda oila a’zolarimdan biri telefonini o’g’irlatib qo’ydi. Yana sal turib, do’stim hamma narsasi solingan ryugzagini o’g’irlatib qo’yibdi.

❓Xorijda o’g’irlikdan jabrlanganda nima qilish kerak?

0️⃣ Panika qilmang.
Muhimi o’zingiz omonsiz. Apple mahsulotingiz qayerdaligini ko’rsatib turgan bo’lsa ham, o’g’rining izidan bir o’zingiz bormang.

1️⃣ Politsiyaga xabar bering.
Telefonni topib bera olishmadiyu, lekin politsiya mashinasida, sirenalar bilan mazza qilib shahar aylandik.

2️⃣ Elchixonaga murojaat qiling.
Passport yo’qolgan holatda 30 kunga yaroqli hujjat tayyorlab berishadi. Politsiya aralashgan bo’lsa ishingiz tezroq bitadi.

“Ogoh bo’ling - ogohlik davr talabi” deydiyu Toshkent metrosida 🙂

Sizda ham shunday bo’ladimi?

Yoqimli, qiziq voqealar bo’layotgan bir payt uyg’onib ketdim - qarasam Varshavadaman.

Huddi tushdek oilam bilan Turkiyadagi sayohatimiz nihoyasiga yetdi. Bugungi kunim xuddi 3 yil oldingi Varshavadagi birinchi kunimdek o’tdi - sog’inchda.

Sog’inish qiziqda.
Vaqtga nisbatan sog’inish grafigi qanday bo’larkan deb o’ylab qoldim.

Oddiy o’ylab qarasak, chiziqli o’sadigandek ko’rinadi - ko’proq vaqt o’tgan sari ko’proq sog’inasiz. Lekin menimcha buning aksi to’g’ri - boshida eng ko’p qiynalasiz va sekin ko’nika boshlaysiz. Chiziqni ko’tarib turmasangiz, bir kun kelib sog’inmay qo’yasiz.

Sog’inib turing.

Meta yana 10 ming kishini ishdan haydadi.
Amazonda ham bu jarayon hali oxriga yetgani yo'q.

Bu "layoff"lar menga ham ta'sir qilmasdan qolmadi. Bugun ertalab menejerim bilan shoshilinch majlis bo'ldi. Keyingi hafta men uchun ular bilan oxirigi hafta bo'larkan 🥲

Yaxshi yangilik ham bor. Amazon Polshada ishga olishni to'xtatgani yo'q. Hozirgi jamoam AQShda va ko'p layofflar ham ko'proq aynan u yerda bo'lyapti. Meni Polshadagi jamoaga o'tkazishadigan bo'ldi. BMW va boshqa mashinalardagi embedded systems ustida ishlar ekanman, ko'p C++ ishlatishar ekan.

Xullas, bu mening ishim emas demasdan - bu mening yangi ishim deb yana yangi sarguzashtlarni boshlab olamiz.

Jurnalistdek his qildim

Kecha do'stimiz Javohirdan intervyu oldim.
Suhbatni tugatib, keyin ovqatlangani bordik. Ovqatlanib o'tirib, Javohir qiziq voqealarni aytib berdi.

Men:
- Nega shularni videoda aytmadingiz?

Keyin borib videoni qaytadan yozdik, to'liq.

🎤 Mikrofon ushlashni bilasizmi?

2018-yil Garage48 xakatonida Estoniyadan kelgan hakamlardan bu ajoyib usulni o'rganganman.

To'rt barmog'ingiz bilan mikrofonni ushlaysiz va bosh barmog'ingizni iyagingizga qo'yasiz - rasmdagidek.

Natijada, mikrofon bilan bo'ladigan eng katta muammoni yechasiz - ovoz har doim bir xil balandlikda chiqadi. Mikrofon juda yaqin ham, uzoq ham ketib qolmaydi.

Sinalgan usul.

Teskari Psixologiya

Nimadirni yo xohlab qilamiz, yo majburligimizdan qilamiz. Bir paytda ikkalasi bo'lishi qiyin. Majburiy qilib qo'yilgan narsalar avtomatik tarzda yoqimsiz tuyulishni boshlaydi. Xuddi o'sha yo'qlama bilan boshlanadigan dars kabi.

Universitetda 3 yildan buyon ma'ruzalarda qatnashish majburiy bo'lmagandi. Ko'p ma'ruzalarga o'zim xohlab kirardim va mazza qilib tinglardim. Faqat bugun emas. Bugun bir ma'ruzaga kirishim majburiy, kirmasam fandan yiqilaman. Aynan o'sha fandan ko'ra yoqimsizroq fan yo'q men uchun.

Sport majburiy bo'lsa qarshilik qilmasdim. Lekin uni ham aylanib o'tsa bo'ladi. O'sha ma'ruzaga kirib ham boshqa ishlarimni qilib o'tirsam bo'ladi. Lekin muammo ham shunda. Majburiy qilishdan ma'no nima unda?

Majburiy qilish qaysidir tarafga manfaat olib keladi.

Faraz qiling, ma'ruzangizga atiga 2 kishi keldi, nima qilasiz?
Keyingi safar ma'ruzani qiziqroq qilib o'tasizmi yoki majburiy qilib qo'yasizmi?

Tanlov o'zimizda.

Sunnat to'y

Qishlog'imizdagi bolalarda velosiped sotib olish uchun yagona imkoniyat bo'lardi - sunnat to'y.

Aksiga olib menikida yetarlicha pul tushmagan, 6 yosh edim. Bozorga borib, velosiped o'rniga dendy sotib olganmiz.

Mario o'ynayverib, boshqargichini buzib qo'yardim. Keyin ichini ochib, o'zim tuzatishga harakat qilardim. Ko'pincha ishlardi.

O'ylab qoldim, o'sha payt velosiped olganimda bugun dasturchi bo'lmasmidim deb. Hammasi yaxshilikka ekan. Velosipedsiz ham ajoyib bolalik bo'lgan.

Birinchi Biznes

Hovlimizda katta tog’ olcha daraxti bo’lardi. Taxminan yilning ayni shu paytlarida ko’p-ko’p meva solardi. Butun mahallani boqardi.

Bir kuni tomdan prujinali tarozi topib oldim, chamasi 9 yosh edim. Do’stim bilan 1 chelak olcha terdik. Lekin olchani kimga ham sotardik?

Hammaning hovlisida meva daraxtlari bor, lekin domda yashaydiganlarda yo’q deb o'yladik.

O’sha ko’p qavatli uylar oldiga bordik.
“Olcha keldi, olcha” - deb xaridor chaqira boshladim.

⁃ “Sen ham chaqirsangchi” dedim do’stimga.
⁃ “Uyalaman. Sinfdoshlarimiz shu yerda yashaydiku, ular nima deb o’ylaydi” dedi do’stim - chaqirmadi.

Ayollar gaplashib o’tirgan joyga bordik. Bir ayol olchaga qiziqib qoldi - kompot qilaman dedi. Unga qiziqib boshqalar ham oldi. Pulladik.

9 yashar bola qo’liga pul tushsa nima ham qilardi?
To’g’ri kompyuter xonaga ketti do’stim.
Xafiza opaning magazinidan shakar olib, uyga qaytdim. Rahmatli momam bilan birga nonushta qilish uchun edi.

Eng shirin shakar o’sha bo’lgan men uchun.

"Yutkazsam ham bellashaman" yohud tishimni qanday sindirganim haqida

8 yosh edim. Endi sut tishlarim tushib, yangi tishlar chiqqandi. Amakimning o'g'li bilan yog'ochdan "chayka" yasagandik. G'ildiraklari podshivnikdan edi. Oddiy mexanika - ustiga kimdir o'tiradi, kimdir esa orqadan itaradi. Tekis yo'lda tez yurardi jonivor.

Bir kuni qo'shnimizning o'g'li yangi olgan velosipedini "tiringlatib" atrofimizda aylanaverdi. Negadir yoqmadi. Shunda men:

- "Hey palonchi, poyga o'ynisanmi?" dedim.

Atrofdagilar "chayka"da yutkazishim aniqligini aytaverardi. Menga esa qizig'i yo'q edi. Do'stimni o'tirgizib, poygaga shaylandik.

Poyga boshlandi. Kuchim boricha, atrofga qaramasdan itarishni boshladim.

Birdan yo'ldan tosh chiqib qoldi. Chayka g'ildiragi toshga urilib mutlaq to'xtadi va men otilib ketdim. To'g'ri yuzim bilan asfaltga ishqalandim. Tishim sinib, qimirlab qoldi. Burnim ham shu payt jarohat olgan bo'lsa kerak.

Uyga borib, ayamdan yaxshigina gap eshitamanmi deb tursam, tezda stomotologga oborib, tishimni mustahkamlash uchun ukol qildirdilar. Kuchi 10 yilga yetadi degandi.

15 yil bo'ldi. Hali ham mustahkam.

“Insecurity” - o’zini boricha qabul qila olmaslik

Bu voqeadan keyin bir qancha vaqt ko’chada yuzimni qo’llarim bilan yopib yurdim. Singan tish bilan tabassum ham qilgim kelmasdi. Nima deganlari esimda yo’q, ayamning gaplari tufayli o’zim haqimda yaxshi his qilib, nuqsonlarimni boricha qabul qilganman.

Ulg’ayib bunday vaziyatlarni yanayam ko’proq ko’ryapman. Ayniqsa, yigitlarda soch to’kilishi, ayollarda esa pardoz masalasi.

Bir do’stimning uyiga borgandim. Borsam, berilib sochiga piyoz surtayotgan ekan. Sochi to’kilayotganidan xafaligi va fikri hayoli shunda ekanligini aytdi. Ko’pchiligimizga tanish vaziyat, shaxsan menga ham.

Ko’nglini ko’tarish uchun - Elon Musk’dek muvaffaqqiyatli bo’lsak, soch o’zi qaytib o’sib chiqadi deb hazillashdim.

“Insecurity”ni tuzatishning yo’li bitta - gaplashish. Yaqingiz bilan sizni qiynaydigan mavzuda ochiq, dildan suhbat qilish ko’p narsaga oydinlik kiritadi.

Hech kim mukammal emas, hammada kamchilik bor.

Ularni boricha qabul qilaylik.

Bir bekatda -0°C haroratni ko'rib qolgandim.

O'ylantirib qo'ydi, keyin texnik suhbat uchun so'raydigan savollar to'plamimga qo'shib qo'ydim.

Savol: -0 qayerdan keldi?

Tahminiy javob:
Xotirada haroratni saqlash uchun "float" - o'nli kasrdan foydalanilgan. Ekranga kasr qismi chiqarilmaganligi uchun ko'rinmay qolgan. Masalan, -0.5 bo'lgan bo'lishi mumkin.

2 xil dasturchilar bor:
- Windows ishlatadiganlar
- Dasturlashga jiddiy kirishganlar

"Datababase admistration" darsida Microsoft SQL Serverini ishlatyapmiz.

Butun darsda hammani sichqonchani chiqqillatishini eshitib o'tiraman.

Chiq, chiq, chiq ...
Kod yozamizmi o'zi?

Har kuni men:
youtu.be/ko9XGXDZDfM

Taqdir Hazili

Digital Nomads - Ko'chmanchi nomardlarmi?

Yevropada oyliklar yaxshi, lekin soliqlar...
Soliq odatda yillik daromad uchun hisoblanib, qiymati bo'yicha kategoriyalarga bo'linadi.

Masalan, Polshada 26 yoshgacha bo'lganlar uchun (yillik):
- 20 ming usd gacha 0%
- 25 ming usdgacha 12%
- Uyog'iga 32% 🙀

Pulni qaysi davlatda ishlab topgan bo'lsangiz, soliqni o'sha davlatga to'laysiz. O'ylab qoldim, har 3-6 oyda davlat o'zgartirib turilsa kamroq soliq to'lanadi-da?!

Shunday, hatto bu ishni qiladigan insonlar bor ekan. Ularni "digital nomad" - raqamli ko'chmanchilar deb atashadi.

Nomad bo'lishning ko'p taraflama yutuq va kamchiliklari bor ekan, qiziqtirib qo'ydi.

Ko'chamizmi?

Qilmagan ishingizni natijasini so’ramang

Litseyda bir kursdoshim bo’lardi. Nimadir qilishdan oldin juda ko’p o’ylanardi.

Bir kuni mendan:
- “Agar har kuni matematikadan 50ta misol yechib, 50ta so’z yodlasam - Moliyaga grantga kiramanmi?“ deb so’radi.

Bunaqa savollaridan rosa charchagandim, shunda:
- “Agar kecha boshlaganingda shu ishlarni, aniq kirarding” deb javob berdim.

Hali ham o’sha gap - ko’p o’ylanmang, qilavering. Natija o’zi keladi.

Facebook vs Amazon
youtube.com/shorts/SHqGYNM2U84

Och bo'ling!

Ilmga och bo'ling
Tajribaga och bo'ling
Sarguzashtga och bo'ling

To'q insondan yaroqsizrog'i yo'q

Dasturlashni o'rganishni boshlaganimga 7 yil, Amazonda ishlayotganimga esa 7 oy to'libdi.

Shu munosabat bilan instagramda kichik savol/javob shaklidagi live stream tashkillashtirmoqchiman:

Havola: instagram.com/azimjon__pulatov
Bugun, Toshkent vaqti bilan soat 17:30da

Live stream tugadi, yozib olindi
Havola: instagram.com/p/Cq23uE2v0ao