🟦🟦🟦

O‘zDJTUda “Tinchlik — eng oliy ne’mat” mavzusida ma’rifiy uchrashuv o‘tkazildi

28-sentabr kuni O‘zbekiston davlat jahon tillari universitetida talaba-yoshlarning turli yot g‘oyalar ta’siriga tushib qolishining oldini olish, ularning mafkuraviy immunitetini mustahkamlash hamda ijtimoiy-ma’naviy muhitni yanada sog‘lomlashtirish maqsadida “Tinchlik — eng oliy ne’mat” va “Jaholatga qarshi — ma’rifat bilan kurash!” mavzularida ma’rifiy uchrashuv tashkil etildi.

Tadbirni O‘zbekiston davlat jahon tillari universiteti rektori Ilxomjon Tuxtasinov ochib berdi. Rektor o‘z so‘zida tinchlik va osoyishtalik jamiyat taraqqiyoti, yoshlarning ta’lim olishi va kelajakdagi intilishlarini ro‘yobga chiqarish uchun muhim omil ekanini ta’kidladi. Shuningdek, talaba-yoshlarni turli zararli g‘oyalar ta’siridan asrash, ularda mustahkam dunyoqarash, tanqidiy fikrlash va axborotdan to‘g‘ri foydalanish ko‘nikmalarini shakllantirish muhimligini qayd etdi.

Uchrashuvda universitet rahbariyati vakillari, mas’ul xodimlar hamda talaba-yoshlar, shuningdek, Din ishlari bo‘yicha qo‘mitaning Toshkent shahar hududiy boshqarmasi Uchtepa tumani bosh mutaxassisi Nuriddinov G‘olib Burievich, Toshkent shahar Olmazor tumani ma’rifiy targ‘ibot bosh mutaxassisi Nurmatov Nodirbek Ubaydullaevich hamda Uchtepa tumani IIO FMB xodimi Aripxodjaev Abdug‘afur Abduraufovich mehmon sifatida ishtirok etdi.

Mutaxassislar mavzu yuzasidan ma’ruzalar qilib, tinchlik va barqarorlikni asrash, jaholat va buzg‘unchi g‘oyalarga qarshi ma’rifat bilan kurashish, yoshlarni turli yot ta’sirlardan himoya qilish masalalariga to‘xtaldilar. Shuningdek, internet va ijtimoiy tarmoqlarda tarqalayotgan axborotlarga nisbatan hushyorlik bilan yondashish, turli ma’lumotlarni tahlil qilish va ishonchli manbalardan foydalanish bo‘yicha tavsiyalar berildi.

Tadbir so‘ngida universitet rektori Ilxomjon Tuxtasinov mehmonlarga uchrashuvdagi ishtiroki va mazmunli ma’ruzalari uchun minnatdorlik bildirib, ularga tashakkurnomalar taqdim etdi.

🌐 Biz ijtimoiy tarmoqlarda:
Telegram | Instagram | Facebook | Sayt

“Talaba xulq-atvoridagi tashvish belgilarini erta payqash” mavzusida seminar-trening tashkil etildi

28-sentabr kuni O‘zbekiston davlat jahon tillari universitetida universitet psixologi Z. Xayrullayeva, Birinchi ingliz tili fakulteti va Ikkinchi ingliz tili fakulteti dekan o‘rinbosarlari N. Lapasov hamda Z. Xasanov hamkorligida tyutorlarning ijtimoiy-psixologik faolligini oshirish, talabalarda namoyon bo‘ladigan tashvish va emotsional zo‘riqish belgilarini erta aniqlash hamda ularni psixologik-pedagogik qo‘llab-quvvatlash ko‘nikmalarini rivojlantirishga qaratilgan seminar-trening o‘tkazildi.

Seminar-trening davomida talabalarda kuzatilishi mumkin bo‘lgan xavotir, emotsional zo‘riqish, ijtimoiy chekinish, kayfiyatning beqarorligi, o‘quv motivatsiyasining pasayishi, muloqot faolligining susayishi, diqqat va e’tibor tarqoqlashuvi kabi holatlarning xulq-atvordagi tashqi belgilari haqida ma’lumot berildi. Amaliy mashg‘ulotlarda tyutorlarga talabalarning odatiy xulq-atvoridagi o‘zgarishlarni kuzatish, psixologik xavf omillarini o‘z vaqtida ilg‘ash, faol tinglash, empatik muloqot o‘rnatish, individual yondashuvni qo‘llash hamda zarur hollarda talabani universitet psixologik xizmatiga yo‘naltirish bo‘yicha tavsiyalar berildi.

Shuningdek, trening davomida “kuzatuvchanlik”, “empatik tinglash”, “psixologik qo‘llab-quvvatlash”, “ijtimoiy moslashuv”, “emotsional holatni baholash”, “psixologik profilaktika” va “erta psixologik aniqlash” kabi tushunchalarning amaliy mazmuni yoritildi. Tyutorlarning talabalar bilan kundalik muloqot jarayonida psixologik jihatdan xavfsiz va ishonchli muhitni shakllantirishdagi roli alohida ta’kidlandi.

🌐 Biz ijtimoiy tarmoqlarda:
Telegram | Instagram | Facebook | Sayt