ألا يكفي قول الحبيب ﷺ:

"مَن صلَّى الصُّبحَ في جماعةٍ فَهوَ في ذمَّةِ اللهِ"

#الصلاة_خير_من_النوم💚
#قوم_أمشي_صلِّ💚

بتقول :
والله ما حصل أخرت مروقي من البيت عشان صلاة حتى ولو نفل إلا ولقيت المشوار إتبارك وإني ما خسرت حاجه من تأخري،
يعني لو إتأخرته على محاضره أو إمتحان ومفروض أصلي الظهر قبله إلا ما ألقى إنه حصلت حاجه وخلتني ببساطه لحقت أي شي وما فاتني شي وفي نفس الوقت أخدت أجر إني قدمت أخرتي على دنيتي .

ولما أخر صلاتي بسبب الإمتحان بلقى إنه حصلت مشكلة في الإمتحان خلى إنه الإمتحان يتأخر بالقدر الكان حيخليني أصلي وفعلا بكون في ناس صلت وجات وإمتحنت عادي بس هم فازوا بأجر تقديمهم للصلاة علَيه وأكيد فازو بالبركه كمان .

نحنا البنحدد أولوياتنا وما زول بخت أولويته رضا ربنا بخسر 💚

#قوم_امشي_صلِّ💚

في بنات بتساهلوا في أمور دينهم بحُجة "إن الناس كلها بتعمل كدا ومابقت علي أنا يعني" أو "عادي والدين يسر ماتتشددوا" وخطابات بالشكل دا فالله المستعان

لكن الحاجة الما منتبهين ليها إن النبي ﷺ ذكر لينا الحال دا قبل ١٤ قرن وورد عنه قوله:
”يَأتي على الناسِ زمانٌ الصابرُ فيهم على دِينِهِ ‌كالقَابِضِ ‌على ‌الجَمْرِ“💔

في سلسلة بعنوان #لأنك_غالية حنتكلم فيها عن مفاهيم ذي الحياء والستر وعن بعض الظواهر السالبة في مجتمعنا وكيف نحلها من هدي الوحي،
فهي سلسلة بتتحدث عنكِ ولأجلكِ 💚

فانتظرونا وورونا حماسكم... 🫣💚

#لأنك_غالية١
#قوم_امشي_صلِّ💚

ما تيسَّر من سورة الطور —
الشيخ المنشاوي رحمه الله💚

{وَٱلطُّورِ * وَكِتَٰبٖ مَّسۡطُورٖ * فِي رَقّٖ مَّنشُورٖ * وَٱلۡبَيۡتِ ٱلۡمَعۡمُورِ * وَٱلسَّقۡفِ ٱلۡمَرۡفُوعِ * وَٱلۡبَحۡرِ ٱلۡمَسۡجُورِ * إِنَّ عَذَابَ رَبِّكَ لَوَٰقِعٞ}

#قوم_امشي_صلِّ💚

لو اتقبلت في وظيفة معينة وبديت تشتغل عادي
لحد ما في يوم، جاء المدير ونبّهكم إنه الشهر الجاي حيكون شهر تقييمي ليكم، أجوركم فيه حتتضاعف وكمان للأسف الغلطة حتبقى أعظم ومُهدّد إنك تخسر وظيفتك بسببها،
كيف حيكون شغلك في الشهر ده ؟👀

إنت كمُسلم عندك ١٢ شهر في السنة
أربعة أشهر منها خطيرة جدًا (ذو القعدة، ذو الحجة، محرم، رجب).
ليه ؟
لأن العمل فيها يُعظّم!
لو عملت حسنة أجرك يُضاعف.
ولو عملت سيئة كمان، حتُعظّم!
لأنك أخطأت في وقت ما مفروض تُخطئ فيه، وانتهكت محارم الله، وربنا قال في الأشهر الحرم دي:
{فَلَا تَظْلِمُوا فِيهِنَّ أَنْفُسَكُم} وللّٰه المثل الأعلىٰ.

فاستغلّ الفرصة دي في إنه ربنا يشوف منك كُل خير،
وإن يعلم اللّٰه في قلبِك خيرًا يُؤتك هداية وتوفيق وصلاح💚
من يعلم ؟!
يمكن بسبب احترامك للأشهر الحرم دي ربنا يفتح عليك في العبادة عمرك كله وربُك الأكرم!

ألا فـ جِدّ واجتهد
واعلم أن الجنّة حُفت بالمكاره
وما ممكن تطمح للدرجات العُلىٰ من الجنة بدون عمل.
في دنيتك دي...
هل بتقدر تنال حاجة بدون ما تتعب عليها ؟
طيب كيف داير تدخل الجنة بدون تعب!
اتنفض وقوم على حيلك
وأري الله منك حُسن صنيعك وإنك عايز الجنة بحقّ وحقيقة
ما شعارات!
دي لحظة صدق بينك وبين ربّك، فأحسِن استغلالها يا طيِّب،
طيّب ؟!

وفي التعليقات: ورونا الفرق شنو بين تعظيم السيئة وتضعيفها، وأيهما أخطر ؟ 🤔

#قوم_امشي_صلِّ💚

عزيزي المصلي...
هل تعلم أنو في أربع ركعات تُصلى قبل صلاة العصر؟!

طيب هل تعلم انها سنة مستحبة ..
ولو سألت نفسك ليه قبل العصر ما بعده؟ 🤔

فأولاً قبلية عشان تهيء قلبك وعقلك لصلاة الفريضة فتدخلها بخشوع وحضور 💚
ليه ما بعد ده موضوع تاني
( لو حابين نتكلم فيهو اكتبو لينا في التعليقات 🤗)

ومن فوائدها أكيد زيادة القرب من الله تعالى وعشان ندخل في دعاء النبي ﷺ ”رحِم اللهُ امرءًا صلَّى قبل العَصرِ أربعًا.“
فنكون مشمولين بالرحمة دي بإذن الله 💚

ورونا كمان لو عارفين...
كيف بنصليها، كلهم مع بعض ولا متفرقة؟👀
وخلونا كلنا نتشارك ونكسب الأجر 💚

#قوم_امشي_صلِّ💚

الله سبحانه وتعالى أرحم بك من نفسك،
ولا تخلو تعاليم دينه من الرحمة والرأفة بعباده،
كل عبادة وعمل فيها من الراحة والسكون مالم تجده في أي عمل أخر، وبعد دا هنالك أجور وحسنات للعباد يثقل بها الميزان ويُضاعف الله لمن يشاء💚

قال تعالى: {وَاللَّهُ يُرِيدُ أَن يَتُوبَ عَلَيْكُمْ...}
قال النبي ﷺ: {ما من عبدٍ يُذنبُ دنبًا فيتوضأ فيحسن الوضوء ثمَّ يقوم فيصلي ركعتين ثم يستغفر الله بذلك الذنب إلا غُفرَ له}

فاللهمَّ أجعلنا من المستغفرين بالنهار والأسحار وأغفر لنا وارحمنا أنت مولانا ونعم النصير💚

#قوم_امشي_صلِّ💚

عارف يعني شنو {وَقُرْآنَ الْفَجْرِ إِنَّ قُرْآنَ الْفَجْرِ كَانَ مَشْهُودًا}؟ 🤔

في اللحظة اللي بكون فيها الكون كله ساكن،
والناس غرقانة في أحلامها، بتجيك "أجمل دعوة" في الدنيا: (الصلاة خيرٌ من النوم).💚
تخيل بس، إنو رب العالمين، ملك الملوك، ناداك "إنت" بالاسم عشان تقيف بين يديه..
في وقت الخلوة والمحبة.. والناس نايمة، إنت صاحي بتبوح له بوجعك، وتطلب منو جبراً وعوضاً.💚
ليه الفجر بالذات؟

• رزقك بيبدأ من هنا:
الفجر هو "محطة التزويد" لباقي يومك.. الزول البدغش الصلاة، يومو بيمشي "مستّف" بركة وراحة بال

• تكون في ذمة الله:
إنت لما تصلي الفجر، بتكون في "ذمة الله".. يعني حمايتو، ورعايتو، ولطفو ماشي معاك في أي خطوة، وفي أي شارع

• نور في وجهك:
والله السجدة في ضلمة الفجر، بتنور الوش والقلب نور ما بتوصف

همسة من القلب.. 💚
يا حبيب، لو فاتتك صلاة الفجر،
إنت كدا ما فاتك "وقت" بس.. إنت فاتك "إحساس" إنك قريب من الله والكون كلو بيشهد ليك.. فاتك نصيبك من الطمأنينة البتخليك تواجه تعب الدنيا بقلب ثابت ومطمئن.💚

فما تخلي المخدة تسرق منك الجنة..
قوم، اتوضى ، وصلي ركعتين "خيرٌ من الدنيا وما فيها".
أرح.. أصحى، المنادي للصلاة بنادي..
فخلي قلبك يسبق رجلك 🤲💚

#الصلاة_خير_من_النوم
#قوم_امشي_صلِّ💚

أبطال الشهادة،
الحمد لله أولاً وأخيراً الحمد لله أن وفقكم لجلوس الإمتحانات وأعانكم فيه على الدراسة وإجابة السؤال

وآخر جلسة إمتحان بعد ساعات
فسددوا وقاربوا ما استطعتم وتذكروا..

أن الخيل إذا شارفت نهاية المضمار بذلت قصارى جهدها .. لتفوز بالسباق💚

فابذلوا ما بوسعكم واستعينوا بالله وعليه توكلوا،
وفقكم الله أيدكم الله أعانكم الله💚

#قوم_امشي_صلِّ💚

طيب كلامي هنا للمؤنسات الغاليات 💚

يا أختي…
أنتِ مسلمة، وعندك قيمة كبيرة جدًا في الإسلام، ما محتاجة تثبتيها بلبس ضيّق أو ملفت للأنظار.
اللبس الساتر ما بيقلل منك، بالعكس… بيزيدك جمااال وهييبة💚

وبرضو موضوع الصور والنشر في التيك توك والفيس…
هل فعلًا دا كلو عشان كلمة "جميلة" أو "سمحة"؟

طيب لو قالوها…
هل دا الشي بضيف ليك قيمة حقيقية؟
ولا مجرد كلام بيختفي بعد لحظات؟
جمالك دا نعمة عظيييمة،
والمفترض يكون محفوظ للشخص الصح…
البيجيك بالباب عديييل، يطلبك من أهلك، ويكرمك بالحلال💚✨
دا الزوج البستاهل يشوفك في أجمل صورة،
وأنتِ كمان بتكوني له الحلال الطيب، وهو ليكِ بالمثل

أما الباقي…
لا بقربى ولا بغيرها، ما عندهم حق يشوفوا منك الشي الخاص.

عشان كدا…
خليكِ واعية بقيمتك،
والتزمي باللبس الساتر والحجاب الشرعي… لنفسك قبل أي زول💚

#لأنك_غالية٢
#قوم_امشي_صلِّ💚

ما تيسَّر من سورة الأحزاب —
الشيخ عبدالله موسى💚

{إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا}

فاللهم صلِّ وسلم على نبينا محمد ﷺ.

#قوم_امشي_صلِّ💚

ليه في ناس بتبـدأ من الصفـر وبتصـل، وناس بتبـدأ من الصفـر وبتفضل فيـه؟ 🫣

السر كٌله في حاجة إسمها «إدارة الطاقة النفسية»؛ لأنه السخط بسحب طاقتك في: (ليه حصل كدة؟) والرضا بوفر طاقتك لـ: (كيف حنجهز للجاي؟).

الليلة يا رفيق حنتكلم عن الرِضا كـ «بنزين» للسعي، ما كـ «فرامل» للطموح، زي ما قلنا الرِضا ببدأ لما تتصالح مع الحاجة الفاتت عشان تقدر تفتح عينك للجاي، لأنه السخط بعمل ضباب في عيونا، فما بنشوف أي باب مفتوح قدامنا، لازم ترضىٰ عشان تشوف الصورة بوضوح أكتر❗.
يقول إبن القيم: «لو كشف الله الغطاء لعبده، لعلم أن الله يدبر له أمره أفضل مما يدبره لنفسه».

القاعدة الذهبية يا رفيقنا: "مَن رضـيَ فلهُ الرِّضـا، ومَن سخط فلهُ السَّخـط".
لو رضيت، ربنا بيمـلأ قلبـك طمأنيـنة بتنسيك مرارة الألم ، وبسهل لـيك الجاي ولو سخطت؟ الواقع ما حيتغير، بس حتخسر راحتك وأجرك وزمنك 💚.

الحَل؟ افصل مشاعرك عن الواقـع؛ الحصل دا "قدر" وانتهى استلم الرسالة، شوف الغلط وين وبكل هدوء ابدأ صلح، وخليك متأكـد إنه "المنع" هو عيـن العطـاء، فأقع وقـوم، انفض غبـارك وأنت مبتـسم.

فما ضـرَّنا ضيقُ الـمدى إن كانَ فـينـا لُطفُـهُ
أو مسَّنـا وجـعٌ ففي الرضـا كـلُّ الشفـاء 💚.

#كيف_نرضى_دون_أن_نفقد_الأمل٣
#قوم_امشي_صلِّ

مِنْ سُنَنِ يَوْمِ الْجُمُعَةِ الْمُهْجُورَةِ التَبْكِيرُ إلَى الْمَسْجِدِ وَالذَهَابُ إلَيْهِ مَشْيًا💚

- قَالَ رَسُولُ اللَهِ صَلَى اللَهُ عَلَيْهِ وَسَلَمَ: مَنْ غَسَلَ يَوْمَ الْجُمُعَةِ وَاغْتَسَلَ ثُمَ بَكَرَ وَابْتَكَرَ وَمَشَى وَلَمْ يَرْكَبْ وَدَنَا مِنَ الْإِمَامِ فَاسْتَمَعَ وَلَمْ يَلْغُ كَانَ لَهُ بِكُلِ خُطْوَةٍ عَمَلُ سَنَةٍ أَجْرُ صِيَامِهَا وَقِيَامِهَا
الرَاوِي: أُوسُ بْنُ أَبِي أُوسٍ وَقِيلَ أُوسُ بْنُ أُوسٍ وَالِدُ عَمْرٍو

- "السَابِقُونَ إلَى الْجُمُعَةِ هُمُ  السَابِقُونَ يَوْمَ الْمِزِيدِ"

قَالَ ابْنُ مَسْعُودٍ رَضِيَ اللَهُ عَنْهُ: سَارِعُوا إلَى الْجُمُعَةِ فَإِنَ اللَهَ يُبَرِزُ لِأَهْلِ الْجَنَةِ فِي كُلِ جُمُعَةٍ فِي كُثَيْبٍ مِنْ كَافُورٍ أَبْيَضَ، يَكُونُ مِنْهُ فِي الْقُرْبِ عَلَى قَدَرِ إِسْرَاعِهِمْ إلَى الْجُمُعَةِ، فَيُحَدِثُ لَهُمْ مِنْ الْكَرَامَةِ شَيْئًا لَمْ يَكُونُوا رَأَوْهُ قَبْلَ ذَلِكَ...

#قوم_امشي_صلّ💚

آخر مرة مشيت زرت فيها أهلك ورَحمك متين؟!🤔
طيب آخر رسالة أو تواصل بمكالمة بينكم..

يا صاحبي صِلة الرحم ما بس زيارة وتفقد حال لكنها وعد بالثواب في الدنيا قبل الآخرة كمان، قال رسول الله ﷺ:
”مَن أَحَبَّ أن يُبْسَطَ له في رزقِه ، وأن يُنْسَأَ له في أَثَرِهِ ، فَلْيَصِلْ رَحِمَه“ 💚

فصِلة الرحم زيادة وبركة في الرزق،
وزيادة في الأجل والعمر؛ فحتى بعد الوفاة تُذكر بين الناس بالخير والذكر الحسن، فصِلوا أرحامكم وما تقطعوها يا رفاق 💚

#قوم_امشي_صلِّ💚

يوم الجمعة يوم عظيم يا صاحبي وفيه ساعة لا يدعو فيها العبد ربه بدعوةٍ إلَّا واستُجيبت له، ذي ما قال النبي ﷺ:
"إنَّ في الجُمُعَةِ لَساعَةً، لا يُوافِقُها مُسْلِمٌ، يَسْأَلُ اللَّهَ فيها خَيْرًا، إلَّا أعْطاهُ إيَّاهُ." 💚

فالزم مصلايتك وأرفع أكُفك بالدعاء بعد العصر،
فوالذي نفسي بيده مارُدت يداك إلَّا والإستجابة قرينة لهما 🥹💚.

#قوم_امشي_صلِّ💚

بتحكي..
الصلاة في الجامعه كانت بالنسبه لي صعبه شديد ،
ما حدخِّل صلاة في صلاة لكن بقعد طول الوقت بدعي إنو اليوم يخلص سريع عشان ألحق أصلي في البيت بس الحمدلله كان عندي صديقه ما بتخليني أأخر الصلاة للسبب ده

ولو ضيعت وقت الصلاة لحدي ما المحاضره تبدا بتحسسني بالذنب وإنها لقت أغلب الدفعه في المسجد، فإستسلمت للأمر وبقيت بمشي معاها وأنا مستثقلة الموضوع جداً
بس سبحان الله لقيت إنه الموضوع بسيط جدا بل ومريح جدا جدا والحمد لله💚

ما في إحساس بالذنب ولا خوف من ضياع وقت الصلاة وبكون مصحصحة في المحاضره ومركزة ومرتاحة وكل حاجه مباركه💚

#قوم_امشي_صلّ 💚

الشباب في السودان للأسف بقى متأثر بالثقافات الغربية،
وبياخد منها الصالح والطالح بدون تمييز💔
يمكن بالنسبة ليهم كغير مسلمين إنو دا شيء عادي، لكن نحنا كمسلمين مؤمنين بالله واليوم الآخر،
فلازم يكون عندنا ميزان مختلف، وما نتشبه بيهم في كل شيء.

عشان كدا يا أختي الغالية لبسك بعكس احترامك لنفسك، وبيفرض احترام الناس ليك.

صح الدنيا فيها متاع كتييير…
لكن زااائل، وما عند الله باقٍ💚
وممكن في أي لحظة يجي الأجل، عشان كدا ما نخلي الدنيا تغرّنا، ونسأل الله الهداية والثبات في الدنيا والآخرة💚

وتذكّروا قصة سيدنا موسى عليه السلام،
لما لقى المرأتين عند البئر…
ما أطال الكلام ولا استرسل،
وكان في تعامله حياء وحدود.
وربنا ذكر صفة عظييمة جدا في واحدة منهن:
{تَمْشِي عَلَى اسْتِحْيَاءٍ} 💚✨

ولو ما كانت الصفة دي مهمة…
ما كان ذكرها الله سبحانه و تعالى في كتاب يُتلى
إلى يوم القيامة!

#لأنك_غالية٣
#قوم_امشي_صلِّ💚

من مقطع (حين التقت أعظم شخصيتين في التاريخ)

م. فداء الدين جزاه الله خيرًا💚

يقول النبي ﷺ: ”لَقيتُ إبراهيمَ ليلةَ أُسْريَ بي فقالَ:
يا محمد، أقرئ أمتك مني السلام، وأخبرهم أنَّ الجنة طيبة التربة، عذبة الماء، وأنها قِيعان، وأنَّ غراسها:
سبحان الله، والحمد لله، ولا إله إلا الله، والله أكبر.“

#قوم_امشي_صلِّ💚

لمن تشوف الزمن الصاح و تعمل الحاجه الصاح؛
فإنت كدا من الفائزين مش؟!👀

كلنا عارفين إنو الأشهر الحُرم ربنا اختصاها على باقي الشهور
وميزها؛ بتعظيم الحسنات والذنوب كمان ،
فلما نقول إن ربنا كره من عبده الحاجه الفلانيه فمن باب أولى تبدأ تخلي الحاجه دي في الأيام المُعظَّمة دي ول شنو؟

عن النبيِّ صلَّى الله عليه وسلَّم أنه قال:
{إن الله كَرِهَ لكم ثلاثًا: قِيلَ وقال، وإِضاعَة المال، وكَثرة السُّؤال}

#قوم_امشي_صلِّ💚

حاسس بالكُره والغيظ الشديد من الشيطان؟
كل مرة تاخد عهد على نفسك… ويرجع يخليك تنقضه؟

طيب، الآن عندك فرصة حقيقية تتسدّى حقك كامل مُكمل، والمرة دي بإذن اللّٰه ما حتفوتها صح؟ 🫣

يوم عرفة
اليوم اللي ربنا بيغفر فيه لعباده ويعتق رقابهم من النار بكثرة، اليوم اللي ممكن يمسح كل التقصير وكأنو ما حصل.

وعشان توصل لليوم ده وأنت جاهز…
عندك ٨ أيام قبله تشحذ همتك فيهم،
العشرة الأوائل من ذي الحجة 💚
أعظم أيام السنة…
أقسم الله بها في كتابه الكريم
والعمل فيها أعظم، والأجر فيها مُضاعف.
فالموضوع ما بس "نلحق يوم عرفة وخلاص"

الموضوع: كيف تدخل اليوم ده؟
جاهز؟
ولا زي كل مرة، تسويف وكسل وبعدين تقول "يا ريت؟! "
القرار من هسي في يدك:
يا تضيع الأيام دي…
يا تخليها ١٠ أيام تغيّر فيك كل شيء بإذن اللّٰه، وتغيظ بيها عدوك اللدود. 😏🔥

#قوم_امشي_صلِّ💚