عارفين إنو الغيبة أوالقطيعة في المجالس عادة كعبة شديد وفيها ذنوب كتيرة صح!😔
لكن من رحمة ربنا على عباده شرع لينا دعاء لو قلناه ربنا حيغفر لينا حديثنا في المجلس بإذنه تعالى د💚

طيب…عارفين الدعاء دا شنو؟🤔👀

شاركوه معانا في التعليقات
وشيروا البوست، قد يكون سبب في صدقة جارية ليكم😁💚

#قوم_امشي_صلِّ💚

قال ثابت البناني - رحمه الله - :
‏ما شيء أجده في قلبي ألذُّ عندي من قيام ‏الليل💚
ما تنسى الدعاء لإخواننا في غزة وللمؤمنين المستضعفين في كل مكان💚
وماتنسونا من دعائكم فضلًا💚

#قوم_امشي_صلِّ💚

النوم في القبور م أطوله
فقم للصلاة الآن وناج الله

#الصلاة_خير_من_النوم
#قوم_امشي_صلِّ💚

قال تعالى: "إِنَّ ٱلصَّلَوٰةَ كَانَتْ عَلَى ٱلْمُؤْمِنِينَ كِتَٰبًا مَّوْقُوتًا"...
يعني وقتها ثابت ومحدد، ما يجوز تقديمها وتأخيرها إلا بعُذر شرعي "السفر، المرض أو المطر الشديد".

ياطيب المحيا التأخير والجمع مابين الصلوات دون سبب بداية لمُنحنى خطير... بداية فقدانك للبركة والإعانة وبعدين تبدأ تستهين في باقي عباداتك، وقد تنتهي بترك الصلاة نهائيًا لاسمح الله!

استعين بالله واستعيذ من الشيطان،
وصلِّ في أول الوقت، واسأل نفسك "إذا أخرت الظهر هل ضامن نفسي أعيش لحد العصر؟!"💔

ودائما اتذكر...
لا بارك الله في عملٍ أُجلت من أجله الصلاة
فالصلاة الصلاة في وقتها💚

#قوم_امشي_صلِّ💚

الشكر | التخلّق بأخلاق القرآن

الشكر هو الاعتراف بنعم الله علينا، والرضا بما قسمه لنا.
قال الله تعالى:
{لَئِن شَكَرْتُمْ لَأَزِيدَنَّكُمْ}
[إبراهيم: 7]

وقال النبي ﷺ:
"من لا يشكر الناس لا يشكر الله."
[رواه الترمذي]
الشكر ما بس بالكلام،
لكن بالأفعال والتصرفات، وبقلب راضٍ مُمتن.

💡 كيف نعيش الشكر؟
نتذكر نعم الله علينا في كل يوم، كبيرة كانت أو صغيرة.
نستخدم النعم في طاعة الله وخدمة الآخرين.
نرضى بالقضاء والقدر مهما كانت الظروف، ونسلم أمرنا لله.
نخلي التذمر والشكوى بدون سبب.

الشكر يفتح لنا أبواب الزياده والبركة، ويقربنا من الله.

🕊️‏من ظن بالله خيراً فلن يُخيب الله ظنه،ومن شكر الله على نعمه زاده الله من فضله،
ومن توكل على الله فهو كافيه وحسبه،الحمد لله على نعمه التي لا تعد ولا تحصى.

#التخلق_بأخلاق_القرآن
#قوم_امشي_صلِّ

سيدنا لقمان لمن وصى ابنه:

*يَا بُنَيَّ أَقِمْ الصَّلاةَ وَأْمُرْ بِالْمَعْرُوفِ وَانْهَ عَنْ الْمُنكَرِ وَاصْبِرْ عَلَى مَا أَصَابَكَ إِنَّ ذَلِكَ مِنْ عَزْمِ الأُمُورِ (17)*
أمره بالأْمر بالمعروف, والنهي عن المنكر بلطفٍ ولينٍ وحكمة وتحمَّل واصبر ما يصيبك من الأذى مقابل أمرك بالمعروف ونهيك عن المنكر.

أمره بشنو؟؟👀 بالصبر
ليه أمره بالصبر؟
لأنه دنيانا قائمة عليه، في أيامنا دي تلقى الواحد فينا لمن ينصح ويهدي الناس للصح الموجود في ديننا يقولو ليه:
"بقيت شيخ/ة ولا شنو؟"

هو تلقائيا بلقى نفسو خلا النصح زاتو ويقول لنفسو دا شنو الانا بعمل فيه دا؟ الناس دي ما بتفهم ولا انا غريب؟
لا ياعزيزي انت الغريب والرسول بقول "طُوبى للغرباء"

عليك بالصبر على كلام الناس وتحمله؛ عشان الجنة تستاهل ياصحبي💚.

#قوم_امشي_صلِّ💚.

عن شدّاد بن أوس -رضي الله عنه- قال: قال رسول الله ﷺ: (الكَيِّسُ مَن دان نفسَه وعمِل لما بعدَ المَوتِ والعاجِزُ مَن أتبَعَ نفسَه هواها وتمنَّى على اللهِ)

حنشرح الحديث وحده وحده لكن فالأول كدي صلو على النبي عليه أفضل الصلاة وأتم التسليم💚
الكَيِّس دا هو الزول الفَطِن حَسُن الفهم، ودان نفسه يعني حاسب نفسه واعماله في الدنيا قبل الآخرة!
والعاجز هو الماقادر يروض نفسوا إنها تمتثل لأمر الله وتنتهي عن نواهيه، فنفسه بتأمره بالمنكر وتنهاه عن المعروف وبعد قلة عملوا للطاعات و كثرة ذنوبه ومعاصيه بيحسب نفسه من أصحاب الجنة وكأنو عنده دين عند الله عز وجل وحيشيلو

يارفاق خلونا نحاسب روحنا ونستغفر عن الذنوب ونكتر من الطاعات وندعي ربنا يشملنا في رحمته يوم القيامة وندخل الجنة بإذنه تعالى💚

#قوم_امشي_صلِّ💚

لو في زول قدامك عطس وقال: "الحمد لله"

المفروض تقول ليهو شنو؟🤔
أكتب لينا في التعليقات واكتب الحديث لو عارفه كمان💚

#قوم_امشي_صلِّ💚

صلاة الفجر ما أي زول بوفّق ليها،
دي اصطفاء من رب العالمين لعبادو الأخيار🌿.

في اللحظة دي الملائكة حاضرين،
وربنا معاك برحمتو ولطفو، كاتب ليك أجر عظيم
وما تفتكر قيامك للفجر بقوتك،
دا كلو توفيق ورحمة من ربنا ليك بالتحديد

فقوم صلي الفجر ولاتكن من الغافلين💚.

#الصلاة_خير_من_النوم
#قوم_امشي_صلِّ💚

أتندس الصلاة..

صليتو الظهر ولا لسه؟👀
أي رفيق صلّى يتفاعل مع الرسالة بـ "🫡"

"اللَّهُمَّ اجعل قلوبنا ثابتة على طاعتك، وأعمالنا خالصة لوجهك، وارزقنا لذة الذكر، وراحة في الصلوات، واغفر لنا وللمسلمين أجمعين

#قوم_امشي_صلِّ💚

الغيرة ما عيب!

في بعض الأوقات اخواتنا قد يكون لبسهن غير مكتمل الأركان، خارجين في اوقات خاطئة، أو حتى لمجالس لا تليق بهن....

وقد ينتج انه تحصل ليهم مواقف، والبعض منا أو جميعنا قد لا تُخفى عليهم....

هنا يأتي دور الغيرة💚
الغيرة ماعيب، بل هي خُلق نبيل وفضيلة
شعور فطري ومطلوب، لكن بشرط تكون في محلّها وبحكمة.

📌 ما شرط تكون أختك في البيت عشان تغير...
كلنا مسؤولين، لأنو نبينا الكريم ﷺ قال: "كلكم راعٍ وكلكم مسؤول عن رعيته".

يعني في الجامعة، في السوق، في الطريق... غيرتك على بنات المسلمين ما عيب، بل شرف!

فخليك راعي ومسؤول عن بنات المسلمين كأنهم اخواتك في البيت، وانصح وأمر بالمعروف "إن الدين النصيحة"💚

#قوم_امشي_صلِّ💚

القـــرآن القـــرآن

عِبـــادُ الله

#قوم_امشي_صلِّ💚

سيفتحُ اللهُ بابًا كنتَ تحسبهُ
من شِدَّةِ اليأسِ لم يُخلق بمفتاحِ

صباح الخير والطمأنينة🌿
مهما ضاقت بيك الدنيا وتاهت بيك الأسباب، اتذكّر أن الله لا يغلق بابًا إلا ليفتح خيرًا منه.
‏
فقوم صلّ الفجر واطمئن، فالفرج أقرب مما تظن💚

#الصلاة_خير_من_النوم
#قوم_امشي_صلِّ💚

{وَإِذَا مَرِضْتُ فَهُوَ يَشْفِينِ}

في اللحظة البتتعب فيها وتتداوى،
اتذكّر إنو رب العالمين هو الشافي وهو المعافي؛
لأن الدواء سبب والدكتور وسيلة،
لكن الشفاء الحقيقي بيد الله وحده💚.

فلم تآخد العلاج أذكر ربنا في نفسك وادعوه بالعافية والشفاء
"اللهم ربّ الناس، أذهب البأس، واشفِ أنت الشافي، لا شفاء إلا شفاؤك، شفاءً لا يُغادر سقمًا"💚

#قوم_امشي_صلِّ💚

أبشر، أبشر..💚

خلي كل الفي يدك و بالك و تعال أديك وصفة للسعادة و التوفيق و السكينة البتفتش عنها في غير مكانها!

الله أكبر، الله أكبر..💚
يا سلام يا صحبي، الله أكبر مما يعتريك من هم و غم، و أكبر مما يشغل بالك و من كل شيء، يا لحلاوة النداء و سعادة القلب كأنه يُنَادى لينعم بالسلام.

"أرحنا بها يا بلال" ..💚
صدقني يا صحبي ماف حاجة ممكن تنتشلك من الظلام الإنت فيه إلا صلاتك، و ماف حاجة حتحتوي همومك إلا مصلايتك، فليه بتفتش عن الطمأنينة و هي كل يوم بتناديك!

فيا صحبي:

#قوم_امشي_صلِّ💚

حصل جربت؟

تصلّ الفجر حاضر وأثناء صلاتك تشكي لربّك همومك والمزعلك؟!،

جربت الطمأنينة لمن تصليها بسورة جديدة وبتلاوة سمحة وكأنك بتجدد العهد مع ربنا ومع نفسك؟💚

لو جربت احكي لينا شعورك كيف ولو ما جربت جرّب وتعال احكي لينا التجربة كيف!💚.

#الصلاة_خير_من_النوم
#قوم_امشي_صلِّ💚.

الصدق | التخّلق بأخلاق القرآن

الصدق ما مجرد كلام نقوله، بل هو سلوك نعيشه في كل تفاصيل حياتنا.
هو نقاء القلب، ووضوح القول، والثبات على الحق مهما كانت الظروف.

قال الله تعالى:
﴿يَا أَيُّهَا الَّذِينَ آمَنُوا اتَّقُوا اللَّهَ وَكُونُوا مَعَ الصَّادِقِينَ﴾ [التوبة: 119]

وقال النبي ﷺ:
"عليكم بالصدق، فإن الصدق يهدي إلى البر، وإن البر يهدي إلى الجنة."
[رواه البخاري ومسلم]

الصدق هو ما يجعلنا أمناء مع أنفسنا، ومع ربنا، ومع الناس.
هو الذي يزرع الثقة في القلوب، ويفتح أبواب الخير.
فكر معاي :
هل كلامي مع الناس دائمًا صادق؟
هل مشاعري معبرة بصدق؟
هل عرفت أن أعيش الصدق حتى في أصعب اللحظات؟

تطبيق عملي:
اليوم، اختار موقف صغيرً تعامل فيه مع شخص بصدق كامل، حتى لو كان التعبير صعب أو موقف بسيط.
جرب تكون صريحة مع نفسك.
🕊️فلنتمسك بالصدق، فالصادقون هم النجوم التي تضيء دروبنا.
وصِدقك مع ربك هو البداية.

#التخلق_بأخلاق_القرآن
#قوم_امشي_صلِّ

أتندس الصلاة..💚

صليتو العصر؟
قريتوا أذكاركم؟👀
أي رفيق صلّى يتفاعل مع الرسالة بـ "🫡"

"اللَّهُم ارزقنا لذة الخشوع، وحلاوة المناجاة 🤲🏻"

#قوم_امشي_صلِّ💚

الدنيا مليانة تحديات يارفاق، مرات بنقع وتاني نقوم، ومرات بنلقي نفسنا محتاجين كلمات صادقة تنفعنا وتورينا الطريق الصحيح

ومافي أنفع من مجلس الخير البتجمعنا على كلام يفتح القلب ويشعل الهمة، عندنا فرصة سانحة عشان ننير قلوبنا ونثري عقولنا مع شيخنا العزيز حاطب محمد جزاه الله عنَّا كل خيرٍ💚

فكونوا معانا حضور في مجلس بعنوان (وصايا للشباب)
المجلس حيكون فرصة لينا عشان نتعلم وننموا، ونستمد العزيمة والإرادة من كلماته الملهمة بإذن الله💚

🗓️ اليوم:
الجمعة ٢٨ صفر ١٤٤٧هـ الموافق ٢٢ أغسطس ٢٠٢٥م
🕣 الميعاد:
الساعة ٨:٣٠ مساءاً بتوقيت السودان،
٩:٣٠ مساءاً بتوقيت القاهرة ومكة المكرمة أحب البقاع💚

فتعالوا معانا وشاركونا في هذه المجلس المبارك، وماتخلوا الفرصة تفوتك😁💚

#قوم_امشي_صلِّ💚

وفي يوم الجمعة يا رفيق عايزين نقول ليك ما تنسى 🥰💚:
- سنن الجمعة
وما تنسى إخوانك المسلمين المُستضعفين في فلسطين والسودان وكل بلاد المسلمين 💚

#قوم_امشي_صلِّ💚